ഡിസ്ക് പാർട്ടീഷനിംഗ്

എന്താണ് ഡിസ്ക് പാർട്ടീഷൻ?

തികച്ചും വീട്ടാവശ്യങ്ങൾക്ക് വേണ്ടി മാത്രം കമ്പ്യൂട്ടറിൽ ഗ്നു/ലിനക്സ്‌ ഇൻസ്റ്റാൾ ചെയ്യുമ്പോൾ എപ്രകാരം ഡിസ്ക് പാർട്ടീഷൻ ചെയ്യണം എന്നതിനെപ്പറ്റി ഒരു ചെറിയ മാർഗ്ഗ നിർദ്ദേശം ഇവിടെ എഴുതിയുണ്ടാക്കുകയാണ്.

ചില കുറിപ്പുകൾ

വളരെ ഉയർന്ന വ്യാപ്തിയുള്ള ഡിസ്ക് ഡിസ്ക് ഡ്രൈവുകൾ വിപണിയിലെത്തിയപ്പോൾ മുതലാണ് ഇവ ഫോർമാറ്റ് ചെയ്ത് ഒറ്റയ്ക്ക് ഒരു വലിയ സ്പേസ് ആയി സൂക്ഷിക്കുന്നതുമായി ബന്ധപ്പെട്ട സാങ്കേതികപ്രശ്നങ്ങൾ ഉയർന്നു വന്നത്. ഇത്തരം ഉയർന്ന വ്യാപ്തിയുള്ള ഡ്രൈവുകൾ ലഭ്യമാക്കുന്ന കൂടുതല്‍ സ്ഥലം എപ്രകാരം മാനേജ് ചെയ്യും എന്നതിലെ അവ്യക്തതയായിരുന്നു പ്രശ്നങ്ങൾ ഉയർന്നു വരാനുള്ള കാരണം. കൂടുതല്‍ വലിപ്പമുളള വലിയ ഡ്രൈവുകളെ ബഹുഭൂരിപക്ഷം ഫയല്‍ സിസ്റ്റങ്ങള്‍ക്കും ഓപ്പറേറ്റിംഗ് സിസ്റ്റങ്ങൾക്കും പിന്തുണയ്ക്കുവാന്‍ സാധിച്ചുവെങ്കിലും ചുരുക്കം ചിലതിനു പിന്തുണ നൽകാൻ കഴിഞ്ഞില്ല. വലിയൊരു ഡിസ്കിനെ ചെറിയ പാർട്ടീഷനുകള്‍ ആയി വേർതിരിക്കുക എന്നതാണ് ഈ പ്രശ്നത്തിനുളള ഏക പരിഹാരം. ഓരോ പാർട്ടീഷനും വെവ്വേറെ ഡിസ്ക് എന്നവണ്ണം ലഭ്യമാക്കി കൊണ്ടാണ് ഇത് സാധ്യമാക്കുന്നത്.

സാധാരണ ഗ്നു/ലിനക്സ്‌ ഉപയോക്താക്കൾക്ക് മിക്കവാറും അവ്യക്തമായ ധാരണ മാത്രമുള്ള ഒരു മേഖലയാണ് ഡിസ്ക് പാർട്ടീഷനിംഗ്. ഇൻസ്റ്റലേഷന്റെ ഈ ഘട്ടമെത്തുമ്പോൾ മിക്കവരും വഴി മുട്ടി നില്ക്കുകയാണ് പതിവ്. ഇതിനു കാരണം ലിനക്സിന്റെ ഫയൽ സിസ്റ്റവുമായുള്ള പരിചയക്കുറവാണ്. ഓരോ വ്യക്തികളും കമ്പ്യൂട്ടർ ഉപയോഗിക്കുന്നത് അവരവരുടെ ആവശ്യമനുസരിച്ചാണ്. രാമന്റെ ആവശ്യമായിരിക്കില്ല ഭാസിയുടെ ആവശ്യം. അബ്ദുള്ളയുടെ ആവശ്യം മറ്റൊന്നായിരിക്കാം. ജോണ്‍ കമ്പ്യൂട്ടർ ഉപയോഗിക്കുന്നത് നെറ്റ് ബ്രൌസ് ചെയ്യാൻ വേണ്ടി മാത്രമാണ് എങ്കിൽ സീതയുടെ ഉപയോഗം ഗ്രാഫിക് ഡിസൈനിംഗ് ആയിരിക്കാം. നാരായണൻ പ്രോഗ്രാമറും ജനാർദ്ദനൻ വീഡിയോ എഡിറ്ററുമാണ് – ഓരോരുത്തരുടേയും ആവശ്യം തികച്ചും വിഭിന്നമാണ്. വിഭിന്നമായ ഇത്തരം ആവശ്യങ്ങൾക്കനുസൃതമായി ഹാർഡ് ഡിസ്ക് പാർട്ടീഷനിംഗും വ്യത്യസ്തമായിരിക്കും.

ഹാർഡ് ഡിസ്കിനെ വിർച്വൽ ആയി വിഭജിച്ചു പല പാർട്ടീഷനുകൾ ഉണ്ടാക്കാൻ പല സോഫ്റ്റ്‌വെയറുകളും നിർമ്മിക്കപ്പെട്ടു. ഇവയിൽ പ്രധാനപ്പെട്ട ഒന്നാണ് fdisk. fdisk ഉപയോഗിച്ച് ഹാർഡ് ഡിസ്കിനെ പ്രൈമറി / എക്സ്റ്റന്റഡ് / ലോജിക്കൽ പാർട്ടീഷനുകൾ ആയി വിഭജിക്കാം.

പ്രൈമറി / ലോജിക്കൽ / എക്സ്റ്റന്റഡ് പാർട്ടീഷനുകൾ തമ്മിലുള്ള വ്യത്യാസം

  1. ഒരു ലോജിക്കല്‍ ഡ്രൈവ് മാത്രം അടങ്ങുന്ന ഒരു ഹാര്‍ഡ് ഡ്രൈവു് ആണു് പ്രൈമറി പാര്‍ട്ടീഷന്‍. ഒരു പാര്‍ട്ടീഷന്‍ ടേബിളില്‍ മൂന്ന് പ്രൈമറി പാര്‍ട്ടീഷനില്‍ കൂടുതല്‍ നല്‍കുവാന്‍ സാധ്യമല്ല.
  2.  നാലു പാർ‍ട്ടീഷനുകളിൽ കൂടുതൽ വേണ്ടി വരുമ്പോൾ മൂന്നു പ്രൈമറി പാർട്ടീഷനുകൾക്ക് പുറമേ ഒരു എക്സ്റ്റെന്‍ഡഡ് പാര്‍ട്ടീഷന്‍ കൂടി ഉണ്ടാക്കി അതിനെ വീണ്ടും ലോജിക്കൽ പാർട്ടീഷനുകൾ ആയി വിഭജിച്ച്‌ കൂടുതൽ പാർട്ടീഷനുകൾ ഉണ്ടാക്കാം. എത്ര ലോജിക്കല്‍ പാർട്ടീഷനുകള്‍ ഉണ്ടാക്കാം എന്നതിന് ഒരു വ്യക്തമായ ഉത്തരമില്ല, എന്നിരുന്നാലും, ലിനക്സ്‌ സിസ്റ്റത്തിൽ പാർട്ടീഷനുകള്‍ ലഭ്യമാക്കുന്ന പ്രത്യേകരീതിയുടെ അടിസ്ഥാനത്തിൽ ഒരു ഡിസ്ക് ഡ്രൈവിൽ 12 ലോജിക്കല്‍ പാർട്ടീഷനുകളില്‍ കൂടുതല്‍ പാടില്ല.

ഏതൊക്കെ പാർട്ടീഷൻ വേണം?

വലിയ ഒരു ഡിസ്ക് (വണ്‍ റ്റീബി എന്ന് തന്നെ കരുതിക്കോളൂ) ഒരൊറ്റ പാർട്ടീഷൻ ആയി നിങ്ങൾക്ക് ഗ്നു/ലിനക്സ്‌ ഇൻസ്റ്റോൾ ചെയ്യാം. പക്ഷെ വ്യത്യസ്ത പാർട്ടീഷനുകൾ ഉണ്ടാക്കി അതിലേയ്ക്ക് ഇൻസ്റ്റോൾ ചെയ്യുന്നതാണ് അഭികാമ്യം. നിങ്ങളുടെ ഡിസ്കിലുള്ള സ്ഥലം എങ്ങനെ ലഭ്യമാക്കേണമെന്നു തീരുമാനിക്കുന്നതിനായി നിങ്ങളെ സഹായിക്കുന്നതിനുള്ള ചില സൂചനകൾ മാത്രമാണിത്.

ഒരു ലിനക്സ്‌ സിസ്റ്റത്തിൽ വേണ്ട അടിസ്ഥാന പാർട്ടീഷനുകൾ

ക്രമ നമ്പർ പാർട്ടീഷൻ നാമം വിശദീകരണം
1 / / (അല്ലെങ്കില്‍ റൂട്ട്) പാര്‍ട്ടീഷനാണു് ഡയറക്ടറി ശൈലിയില്‍ ഏറ്റവും മുകളിലുള്ളതു്. സിസ്റ്റം അഡ്മിനിസ്ട്രേഷനുള്ള അക്കൌണ്ടിന്റെ ഹോം ഡയറക്ടറി ആണ് /root ഡയറക്ടറി /root (ഇത് “സ്ലാഷ്-റൂട്ട്” എന്നും അറിയപ്പെടുന്നു).
2 /usr സിസ്റ്റത്തിലുള്ള മിക്ക സോഫ്റ്റ്‌വെയറുകളും /usr ഡയറക്ടറിയില്‍ സൂക്ഷിക്കപ്പെടുന്നു. സ്വതവേയുള്ള സോഫ്റ്റ്‌വെയര്‍ സെറ്റ് ഇന്‍സ്റ്റോള്‍ ചെയ്യുന്നതിനായി, ഏറ്റവും കുറഞ്ഞതു് 4 GB എങ്കിലും സ്ഥലം നല്‍കേണ്ടതാണു്
3 /home ഹോം പാർട്ടീഷനിലാണ് യൂസറുടെ ഫയലുകൾ എല്ലാം സേവ് ചെയ്യുന്നത്. അത് കൊണ്ട് തന്നെ നിങ്ങളുടെ കമ്പ്യൂട്ടർ ഉപയോഗത്തെ മുൻനിർത്തി ഹോം പാർട്ടീഷന് എത്ര വലുപ്പം നല്കണമെന്ന് സ്വയം തീരുമാനിക്കുക. എത്ര മാത്രം ഡിസ്ക് സ്പേസ് നാം ഉപയോഗിക്കും എന്ന് മുൻകൂട്ടി അറിയാൻ കഴിയില്ലെങ്കിൽ കഴിയുന്നത്ര വലിയ സൈസിൽ ഹോം പാർട്ടീഷൻ ഉണ്ടാക്കുക.
/home പാര്‍ട്ടീഷന്‍ എന്‍ക്രിപ്റ്റ് ചെയ്യുന്നതു് നന്നായിരിക്കും. കാരണം അതിൽ സെന്‍സിറ്റീവ് ഡേറ്റ ഉണ്ടായിരിക്കും. ഇങ്ങനെ ചെയ്യുന്നതു്, ആധികാരികത ഇല്ലാത്ത ഉപയോക്താക്കളെ, അവര്‍ക്കു് സ്റ്റോറേജ് ഡിവൈസിലേക്കു് പ്രവേശനമുണ്ടെങ്കിലും, പാര്‍ട്ടീഷനുകളിലുള്ള ഡേറ്റാ ലഭ്യമാക്കുന്നതില്‍ നിന്നും തടയുന്നു.
4 /var താൽക്കാലികമായി ഡൌണ്‍ലോഡ് ചെയ്യുന്ന പാക്കേജ് പരിഷ്കരണങ്ങളൊക്കെ ഇവിടെയാണ് സൂക്ഷിക്കുന്നത്. /var ഡയറക്ടറി അടങ്ങുന്ന പാര്‍ട്ടീഷനില്‍ ഡൌണ്‍ലോഡ് ചെയ്യുവാന്‍ ബാക്കിയുള്ളവ സൂക്ഷിക്കുവാനുള്ള സ്ഥലം ലഭ്യമെന്നു് ഉറപ്പ് വരുത്തുക.
5 /boot നിങ്ങളുടെ സിസ്റ്റത്തില്‍ ഇന്‍സ്റ്റോള്‍ ചെയ്തിട്ടുള്ള ഓരോ കേര്‍ണലിനും /boot പാര്‍ട്ടീഷനില്‍ കുറഞ്ഞതു് 10 MB എങ്കിലും ആവശ്യമുണ്ടു്. നിങ്ങള്‍ ഇനിയും കേര്‍ണലുകള്‍ ഇന്‍സ്റ്റോള്‍ ചെയ്യുന്നതു് വരെ /boot പാര്‍ട്ടീഷന്റെ സ്വതവേയുള്ള 250 MB വ്യാപ്തി മതിയാവും.
6 swap ഒരു swap പാര്‍ട്ടീഷന്‍ (കുറഞ്ഞത് 256 MB) —- വിര്‍ച്ച്വല്‍ മെമ്മറി പിന്തുണയ്ക്കുന്നതിനായി സ്വാപ്പ് പാര്‍ട്ടീഷനുകള്‍ ഉപയോഗിക്കുന്നു. അതായതു്, പ്രക്രിയകള്‍ നടക്കുമ്പോള്‍ RAM-ല്‍ ഡേറ്റാ സൂക്ഷിക്കുവാന്‍ ആവശ്യമുളള സ്ഥലം ലഭ്യമല്ലെങ്കില്‍, ഡേറ്റാ swap പാര്‍ട്ടീഷനിലേക്കു് എഴുതപ്പെടുന്നു.

ഉത്തമമായ പാര്‍ട്ടീഷനിങ് രീതി എന്ന രേഖയിൽ റെഡ് ഹാറ്റ്‌ ലിനക്സിന്റെ ഔദ്യോഗിക വെബ്സൈറ്റിൽ പറയുന്നത് പ്രകാരം താഴെ പറയുന്ന രീതിയിൽ പാർട്ടീഷൻ ചെയ്യുന്നതാണ് ഉത്തമം

  1. ഒരു swap പാര്‍ട്ടീഷന്‍
  2. ഒരു /boot പാര്‍ട്ടീഷന്‍
  3. ഒരു / പാര്‍ട്ടീഷന്‍
  4. ഒരു home പാര്‍ട്ടീഷന്‍

മേൽപ്പറഞ്ഞ പാർട്ടീഷനുകളിൽ നിന്ന് /boot പാർട്ടീഷൻ ഒഴിവാക്കാം, പകരം /var, /usr എന്നീ പാർട്ടീഷനുകൾ ചേർക്കാം. (ഇത് കൂടാതെ നിങ്ങളുടെ സൌകര്യാർത്ഥം ഇഷ്ടമുള്ള ഒരു പേരിൽ എന്തെങ്കിലും പ്രത്യേക ആവശ്യങ്ങൾക്കായുള്ള പാർട്ടീഷനും നിർമ്മിക്കാവുന്നതാണ്. ഉദാഹരണത്തിന് ഞാൻ ഡെബിയൻ ഇൻസ്റ്റോൾ ചെയ്യുമ്പോൾ dbnrepo എന്നോ മറ്റോ ഉള്ള ഒരു പേരിൽ ഒരു പാർട്ടീഷൻ ഉണ്ടാക്കി അതിലാണ് ഡെബിയൻ സീഡികൾ മുഴുവനും കോപ്പി ചെയ്തു വയ്ക്കുന്നത്.)
500 ജീബിയോ അതിനു മുകളിലോ (ചിലപ്പോൾ 1, 2 റ്റീബി വരെയൊക്കെ പോകും. വരും കാലങ്ങളിൽ റ്റീബി മാറി പീബിയും ഈബിയും ഒക്കെ ആയേക്കാം) ഒക്കെയുള്ള ഡിസ്ക് ഡ്രൈവുകളാണ് ഇപ്പോൾ മിക്കവരും ഉപയോഗിക്കുന്നത്.

ഒരു 1 റ്റീബി ഹാർഡ് ഡിസ്ക് മുഴുവനായയോ ഭാഗികമായോ എങ്ങനെ ഗ്നു/ലിനക്സിനു വേണ്ടി പാർട്ടീഷൻ ചെയ്യാമെന്ന് ചെറിയൊരു രൂപരേഖ ഇവിടെ നൽകുന്നു:

ക്രമ നമ്പർ പാർട്ടീഷൻ നാമം വിശദീകരണം
1 / (root) 15 ജീബി
2 /usr 30 ജീബി
3 /var 30 ജീബി
4 swap 4 ജീബി
5 /home ബാക്കിയുള്ള സ്പേസ് മുഴുവനും / അല്ലെങ്കിൽ ആവശ്യമായത്ര സ്ഥലം. ബാക്കി സ്ഥലം ഉണ്ടെങ്കിൽ അത് അണ്‍പാർട്ടീഷൻഡ് സ്പേസ് ആയി നീക്കിയിടുക.

പ്രധാനപ്പെട്ട ഒരു കാര്യം

നിങ്ങൾ ഡിസ്ക് പാർട്ടീഷൻ ചെയ്യുമ്പോൾ പിന്നീട് ഓർത്തിരിക്കത്തക്കവിധം അത് വ്യക്തമായി എവിടെയെങ്കിലും കുറിച്ച് വയ്ക്കുക. നിർണ്ണായകമായ ഒരു ഘട്ടത്തിൽ അത് നിങ്ങളെ സഹായിക്കും, തീർച്ച. കഴിയുമെങ്കിൽ അതിന്റെ ഒരു സ്ക്രീൻ ഷോട്ടോ ക്യാമറ ഷോട്ടോ തന്നെ എടുത്തു വയ്ക്കുക.

അവലംബം:

  1. https://access.redhat.com/site/documentation/ml-IN/Red_Hat_Enterprise_Linux/6/html/Installation_Guide/s2-diskpartrecommend-x86.html
  2. https://access.redhat.com/site/documentation/ml-IN/Red_Hat_Enterprise_Linux/6/html/Installation_Guide/s2-diskpartrecommend-x86.html
  3. http://entubuntu.blogspot.in/2012_05_01_archive.html

വാൽക്കഷണം

ഇന്നലെയാണ് ഞാൻ ഡെബിയൻ വീസി ഇൻസ്റ്റോൾ ചെയ്തത്. മേൽപ്പറഞ്ഞ പ്രകാരം തന്നെ പാർട്ടീഷൻ ചെയ്തു. കൂടാതെ ഡെബിയൻ വീസിയുടെ റിപ്പോ ഡീവിഡികൾ കോപ്പി ചെയ്യാൻ വേണ്ടി മാത്രം wrepo (ച്ചാൽ, വീസി റിപ്പോസിറ്ററി എന്ന അർത്ഥത്തിൽ) എന്ന ഒരു അധിക പാർട്ടീഷൻ കൂടി ഇൻസ്റ്റോൾ സമയത്ത് തന്നെ നിർമ്മിച്ചു. (ഇൻസ്റ്റാൾ ചെയ്യുന്ന സമയത്ത് തന്നെ ഇങ്ങനെ ഒരു പാർട്ടീഷൻ നിർമ്മിച്ചാൽ അത് സ്വമേധയാ തന്നെ ഈ പാർട്ടീഷനെ മൌണ്ട് ചെയ്തോളും, അല്ലെങ്കിൽ പിന്നെ നമ്മൾ പോയി മാനുവൽ ആയി മൌണ്ട് ചെയ്യേണ്ടി വരും)

പിന്നീട് wrepo പാർട്ടീഷനിൽ disk01 മുതൽ disk10 വരെയുള്ള പത്തു ഫോൾഡറുകൾ ഉണ്ടാക്കി

ഡീവിഡി ഡ്രൈവിൽ മീഡിയ ഇട്ട ശേഷം cp -Rf * /wrepo/disk01 എന്ന കമാൻഡ് നല്കി കോപ്പി ചെയ്തു. അപ്രകാരം പത്തു ഡീവിഡികളും wrepoയിലെ അതതു ഫോൾഡറുകളിലേയ്ക്ക് കോപ്പി ചെയ്തു. അതിനു ശേഷം /etc/apt ഫോൾഡറിലെ sources.lst എന്ന ഫയൽ എഡിറ്റ്‌ ചെയ്തു. സീഡിയുമായി ബന്ധപ്പെട്ട എല്ലാ ലൈനുകളും # ചേർത്ത് കമന്റ്‌ ചെയ്ത ശേഷം deb file:/wrepo/disk01/ ./ എന്ന ലൈനുകൾ കൂട്ടി ചേർത്തു. (sources.lst ഫയൽ കാണുവാൻ ഈ ലിങ്കിൽ ക്ലിക്കുക)

ഡെബിയൻ പ്രവർത്തക സംവിധാനത്തിന്റെ നിലവിലെ സ്ഥിരതയുള്ള പതിപ്പായ വീസിയുടെ സന്നിവേശന(ഇൻസ്റ്റാളേഷൻ)ത്തിന്റെ ഓരോ ഘട്ടങ്ങളും ചിത്രങ്ങൾ സഹിതം മനസ്സിലാക്കുവാൻ ഇവിടെ അമർത്തുക

Advertisements

നിങ്ങളുടെ അഭിപ്രായം രേഖപ്പെടുത്തൂ

Fill in your details below or click an icon to log in:

WordPress.com Logo

You are commenting using your WordPress.com account. Log Out / മാറ്റുക )

Twitter picture

You are commenting using your Twitter account. Log Out / മാറ്റുക )

Facebook photo

You are commenting using your Facebook account. Log Out / മാറ്റുക )

Google+ photo

You are commenting using your Google+ account. Log Out / മാറ്റുക )