നാലാംപൗരന്‍

നാലാംപൗരന്‍

കാത്തുകാത്തിരുന്ന സിനിമ ~ നാലാം പൗരന്‍ ~ കണ്ടതിന്നലെയാണ്. രാത്രി വൈകുവോളം കുത്തിയിരുന്നു കണ്ടു. സംശയം വരുന്ന ഭാഗങ്ങളില്‍ റിമോട്ട് കൊണ്ട് പോസ് ചെയ്ത് സബ്ടൈറ്റില്‍ വായിച്ചു മനസ്സിലാക്കിയൊക്കെയാണ് കണ്ടത്. എങ്കിലും ഒന്നും പ്രത്യേകിച്ച് തോന്നിയില്ല. സ്നോഡന്‍ വെളിപ്പെടുത്തലുകള്‍ മുഴുവനും അതിന്റെ വിലയിരുത്തലുകള്‍ ഉള്‍പ്പെടെ ഇതിനകം പല ആവൃത്തി വായിച്ചതിനാലാകണം പുതുതായി ഒന്നും സിനിമയില്‍ നിന്ന് ലഭിച്ചില്ല എന്ന തോന്നലുണ്ടായത്. ഗാര്‍ഡിയനില്‍ വന്ന ഗ്ലെന്‍ ഗ്രീന്‍വാള്ഡിന്റെ മിക്കവാറും എല്ലാ പോസ്റ്റുകളും പല പല അവസരങ്ങളിലായി വായിച്ചിട്ടുണ്ട്. എങ്കിലും ഇരുപത്തൊന്നാം നൂറ്റാണ്ടു കണ്ട ഏറ്റവും വലിയ വെളിപ്പെടുത്തലുകള്‍ നടത്തിയ ഈ അമേരിക്കന്‍ കുഴലൂത്തുകാരന്‍ (Whistleblower) ഭീകരമായ ആ വെളിപ്പെടുത്തലുകള്‍ നടത്തുന്ന നേരത്ത് അനുഭവിച്ച മാനസിക സംഘര്‍ഷങ്ങള്‍ ഒപ്പിയെടുക്കുന്നതില്‍ സിനിമ വിജയിച്ചിടുണ്ട്. ഒരു സ്പൈ ത്രില്ലര്‍ കാണുമ്പോള്‍ ഉണ്ടാവുന്ന അതേ അസ്വസ്ഥതയാര്‍ന്ന അനുഭൂതി യഥാര്‍ത്ഥ സംഭവങ്ങളെ ആസ്പദമാക്കി നിര്‍മ്മിച്ച ഈ ഡോക്യുമെന്ററി കാണുമ്പോള്‍ ഉണ്ടാകും എന്നതില്‍ സംശയമില്ല.