ഒരു മോട്ടിവേഷണല്‍ ഹോക്സ്

ഇന്റര്‍നെറ്റില്‍ പ്രചരിക്കുന്ന ചില നിരുപദ്രവമായ നുണകളുണ്ടു്. ഹോക്സ്  (Hoax)എന്നാണു് അവയെ വിളിക്കുക. ഇവയിലെ ഒരു അസാധാരണവകഭേദമാണു് മോട്ടിവേഷനല്‍ ഹോക്സ്. ഇതിനൊരു ഒരുദാഹരണമാണു് താഴെ ചേര്‍ക്കുന്നതു്. സൗത്ത് ആഫ്രിക്കയിലെ ഒരു യൂണിവേഴ്സിറ്റിയുടെ കവാടത്തില്‍ എഴുതിവച്ചിരിക്കുന്ന സന്ദേശം എന്ന നിലയിലാണു് ഇതു് എഴുതപ്പെട്ടിരിക്കുന്നതു്. സത്യമെന്തെന്നാല്‍ ഇതു് ഏതു സര്‍വ്വകലാശാലയാണെന്നോ സൗത്ത് ആഫ്രിക്കയിലെവിടെയാണെന്നോ ഒന്നും ഒരിടത്തും ഒരു പരാമര്‍ശവുമില്ല. പക്ഷേ സന്ദേശം വളരെ അര്‍ത്ഥവത്തായതിനാല്‍ ഇതു് വളരെപ്പെട്ടെന്നു് പ്രചരിപ്പിക്കപ്പെടുകയായിരുന്നു. ഇതിന്റെ പരിഭാഷപ്പടുത്തിയ പതിപ്പുകള്‍ പല ഭാഷകളിലും കാണാം. ആശ്വസിക്കാവുന്ന കാര്യമെന്തെന്നാല്‍ വളരെ അര്‍ത്ഥവത്തായ സന്ദേശമാണു് ഇത്തരത്തില്‍ പ്രചരിക്കപ്പെടുന്നതു് എന്നതാണു്.

മലയാളം പതിപ്പ്

ഒരു രാഷ്ട്രത്തെ തകര്‍ത്തെറിയുവാന്‍ ആറ്റം ബോംബുകളുടേയോ മിസൈലുകളുടേയോ ആവശ്യമില്ല.
അതിനു് ആ രാജ്യത്തിന്റെ വിദ്യാഭ്യാസ നിലവാരം തകര്‍ക്കുകയും പരീക്ഷകളില്‍ കള്ളം ചെയ്യുവാന്‍ അനുവദിക്കുകയും ചെയ്താല്‍ മതി.
അതിനു് ആ രാജ്യത്തിന്റെ വിദ്യാഭ്യാസനിലവാരം തകര്‍ക്കുകയും പരീക്ഷകളില്‍ കള്ളം ചെയ്യുവാന്‍ അനുവദിക്കുകയും ചെയ്താല്‍ മതിയാകും.
അത്തരം ഡോക്ടര്‍മാരാല്‍ രോഗികള്‍ കൊല്ലപ്പെടുന്നു.
അത്തരം എഞ്ചിനീയര്‍മാരാല്‍ കെട്ടിടങ്ങള്‍ തകര്‍ന്നു വീഴുന്നു.
അത്തരം സാമ്പത്തിക വിദഗ്ദ്ധന്മാരാല്‍ സാമ്പത്തിക തകര്‍ച്ചയുണ്ടാകുന്നു.
അത്തരം മതപണ്ഡിതന്മാരാല്‍ മനുഷ്യത്വം മരിച്ചു വീഴുന്നു.
അത്തരം ന്യായാധിപന്മാരാല്‍ നീതി നഷ്ടമാകുന്നു.
വിദ്യാഭ്യാസത്തിന്റെ തകര്‍ച്ചയെന്നാല്‍ രാഷ്ട്രത്തിന്റെ തകര്‍ച്ചയാണു്

ഇംഗ്ലീഷ് പതിപ്പു്

Collapsing any Nation does not require use of Atomic bombs or the use of Long range missiles.
But it requires lowering the quality of Education and allowing cheating in the exams by the students.
The patient dies in the hands of the doctor who passed his exams through cheating.
And the buildings collapse in the hands of an engineer who passed his exams through cheating.
And the money is lost in the hands of an accountant who passed his exams through cheating.
And humanity dies in the hands of a religious scholar who passed his exams through cheating.
And justice is lost in the hands of a judge who passed his exams through cheating.
And ignorance is rampant in the minds of children who are under the care of a teacher who passed exams through cheating.
The collapse of education is the collapse of the Nation

View at Medium.com

മിക്കവാറും ഇതു് ഏതോ ഒരു വിദ്യാഭ്യാസപണ്ഡിതന്റെ വാക്കുകള്‍ തന്നെയാകണം. പക്ഷേ എത്ര തെരഞ്ഞിട്ടും ഇതിന്റെ സൗത്ത് ആഫ്രിക്കന്‍ ബന്ധം തെളിയിക്കാനുള്ള ലിങ്കുകളൊന്നും കണ്ടെത്താന്‍ കഴിഞ്ഞില്ല.

Advertisements

കോപ്പി പ്രൊട്ടക്ട് ചെയ്തിരിക്കുന്ന വെബ് സൈറ്റുകളില്‍ നിന്നും ടെക്സ്റ്റ് കോപ്പി ചെയ്യുന്നതെങ്ങനെ?

ചെറിയൊരു ഇന്റര്‍നെറ്റ് ടിപ്പ് പങ്കുവയ്ക്കുകയാണു്. വളരെ ചെറിയൊരു ടിപ്പ്. പല പ്രമുഖ വാര്‍ത്താ വെബ്‍സൈറ്റുകളില്‍ നിന്നും ടെക്സ്റ്റ് കോപ്പി ചെയ്തെടുക്കാന്‍ വലിയ വിഷമമാണു്. മിക്കവാറും എല്ലാ വെബ്‍സൈറ്റുകളിലും എന്തെങ്കിലൂം ഒരു ജാവാസ്ക്രിപ്റ്റ് കോഡ് ഉപയോഗിച്ചു് റൈറ്റ് ക്ലിക്ക് വരെ ബ്ലോക്ക് ചെയ്തിരിക്കും. ഇവിടെ നിന്നൊക്കെ എങ്ങനെ ഈസിയായി ടെക്സ്ററ് കോപ്പി ചെയ്തെടുക്കാം എന്നാണു് ഇവിടെ പറയുന്നതു്. പലരും പല രീതികളിലും ടെക്സ്റ്റ് കോപ്പി ചെയ്യാറുണ്ടു് – ഇവിടെ പറയുന്നതു് അതില്‍ ഏറ്റവും എളുപ്പമുള്ള മാര്‍ഗ്ഗമാണെന്നു മാത്രം.

ഇതിനായി വേണ്ടതു് മൊസില്ല ഫയര്‍ഫോക്സിന്റെ ഏറ്റവും പുതിയ വെര്‍ഷന്‍ (60 അല്ലെങ്കില്‍ അതിനു മുകളിലുള്ളതു്) – അത്ര മാത്രം.

ഉദാഹരണമായി നമുക്കു മനോരമ ഓണ്‍ലൈന്‍ എന്ന പത്രത്തിന്റെ പേജില്‍ പോയി നോക്കാം. https://www.manoramaonline.com

അവിടെയുള്ള ഏതെങ്കിലും വാര്‍ത്തയിലെ വരികള്‍ കോപ്പി ചെയ്യാന്‍ ശ്രമിച്ചു നോക്കൂ. ഈസിയായി കോപ്പി ചെയ്യാം. ദാ ഇങ്ങനെ.

Manoramaonline Screenshot

പക്ഷേ അതൊന്നു പേസ്റ്റ് ചെയ്തു നോക്കൂ. ദാ ഇങ്ങനെയേ കിട്ടൂ.

manoramaonline screenshot

ആദ്യത്തെ ഏതാനും വരികള്‍ മാത്രമേ ഇങ്ങനെ കോപ്പിചെയ്യാന്‍ കഴിയുകയുള്ളൂ. ഇതു് ബൈപാസ് ചെയ്യാന്‍ ഏറ്റവൂം എളുപ്പമുള്ള മാര്‍ഗ്ഗമാണു് ഇനി പറയുന്നതു്. ടെക്സ്റ്റ് കോപ്പി ചെയ്യാനുള്ള പേജ് ലോഡു ചെയ്തതിനു ശേഷം മൊസില്ല ഫയര്‍ഫോക്സിന്റെ അഡ്ഡ്രസ്സ് ബാറിന്റെ വലത്തേ അറ്റത്തു് കാണുന്ന (താഴെ കാണിച്ചിരിക്കുന്ന) ഐക്കണില്‍ ക്ലിക്ക് ചെയ്യുക.

Moilla firefox icon

ഇപ്പോള്‍ ഏതു പേജാണോ ലോഡ് ചെയ്തിരിക്കുന്നതു് അതിന്റെ റീഡര്‍ വ്യൂ ലഭിക്കും. അതില്‍ നിന്നു് നമുക്കാവശ്യമായ ടെക്സ്റ്റ് ഈസിയായി കോപ്പി ചെയ്യാം. പരീക്ഷിച്ചു നോക്കൂ.

യൂട്യൂബ് വീഡിയോകള്‍ ഡൗണ്‍ലോഡ് ചെയ്യൂ ഈസിയായി

യൂട്യൂബില്‍ നിന്നുള്ള വീഡിയോകള്‍ ഡൗണ്‍ലോഡ് ചെയ്യുക എന്നതു് ശ്രമകരമായ ഒരു പണിയായിരുന്നു ഈയടുത്ത കാലം വരെയുമെനിയ്ക്കു്. ആദ്യം ഏതെങ്കിലും തേഡ് പാര്‍ട്ടി സൈറ്റുകളില്‍ ചെന്നു് (ഉദാ :— keepvid.com / savefromnet.com) യൂട്യൂബ് വീഡീയോയുടെ ലിങ്ക് നല്‍കി അതിന്റെ ലിങ്ക് കിട്ടിക്കഴിഞ്ഞശേഷം ഡൗണ്‍ലോഡ് ചെയ്തു് — അങ്ങനെ കുറേ സ്റ്റെപ്പുകള്‍ ഉണ്ടായിരുന്നു. എന്നാല്‍ ഒരു പ്ലേലിസ്റ്റ് ഒന്നടങ്കം ഡൗണ്‍ലോഡ് ചെയ്യേണ്ടിവരുന്ന സാഹചര്യത്തില്‍ ആകെ വിഷമിച്ചുപോകുമായിരുന്നു. കീപ്‍വിഡിന്റെ പ്രോ വെര്‍ഷന്‍ ഉപയോഗിച്ചു മാത്രമേ പ്ലേലിസ്റ്റ് ഒന്നടങ്കം ഡൗണ്‍ലോഡ് ചെയ്യാന്‍ കഴിയു. അതിനു് പണം കൊടുക്കണം. തികച്ചും സൗജന്യമായി അതിലും എളുപ്പത്തില്‍ ഇതു ചെയ്യാന്‍ വഴിയുള്ളപ്പോള്‍ പിന്നെയെന്തിനു് പണം മുടക്കണം?

പറഞ്ഞുവരുന്നതു്  youtube-dl എന്ന ചെറിയൊരു കമാന്റ് ലൈന്‍ പ്രോഗ്രാമിനെപ്പറ്റിയാണു്. ഗ്നൂ/ലിനക്സില്‍ ഉപയോഗിക്കാന്‍ തികച്ചും ഈസിയായ കമാന്റ് ലൈന്‍ പ്രോഗ്രാമാണു് ഇതു്. കമാന്റ് ലൈന്‍ അത്ര പരിചയമില്ലാത്ത തുടക്കക്കാര്‍ക്കു് കമാന്റ് ലൈനിന്റെ സുഖം തിരിച്ചറിയാനുള്ള ഒരു വഴി കൂടിയാണിതെന്നു പറയാം.

പ്രോഗ്രാം ഇന്‍സ്റ്റാള്‍ ചെയ്യുവാനായി ദാ ഈ കമാന്റ് കൊടുക്കാം.
sudo apt-get install youtube-dl
ഇപ്പോള്‍ ഇന്‍സ്റ്റലേഷന്‍ നടന്നോളും.
ആര്‍ച്ച് ഉപയോക്താക്കള്‍ ഈ കമാന്റ് നല്‍കുക
sudo pacman -S youtube-dl
ഇനി നിങ്ങള്‍ക്കൊരു വീഡിയോ അങ്ങനെതന്നെ യൂട്യൂബില്‍ നിന്നു ഡൗണ്‍ലോഡ് ചെയ്യുവാന്‍ ഈ കമാന്റ് കൊടുക്കാം.
youtube-dl https://youtu.be/DW5jfjN-5RIഇതില്‍ യൂട്യൂബ് ലിങ്കിന്റെ സ്ഥാനത്തു് നിങ്ങള്‍ക്കാവശ്യമുള്ള ലിങ്ക് നല്‍കാം.
ഇനി നിങ്ങള്‍ക്കാവശ്യം ഒരു യൂട്യൂബ് പ്ലേലിസ്റ്റിലൂള്ള സകല വീഡിയോകളും mp3 ആയി കണ്‍വര്‍ട്ട് ചെയ്തു് ഒറ്റയടിക്കു് കിട്ടണമെങ്കിലോ, ദാ വഴി ഇതാണു് —
youtube-dl --extract-audio --audio-format mp3 -o "%(title)s.%(ext)s" https://www.youtube.com/playlist?list=PL_rXc1ssylNdm6ywGuUoFDceN7RokajID
അപ്പോള്‍ മിക്കവാറും ഒരു പ്രശ്നം സംഭവിച്ചിരിക്കും. പ്ലേലിസ്റ്റിലെ ചില വീഡിയോ ഫയലുകള്‍ കോപ്പിറൈറ്റ് ലംഘനത്തിന്റെ പേരിലോ മറ്റു നിയമപ്രശ്നങ്ങളാലോ യൂട്യൂബ് തന്നെ ഡെലീറ്റ് ചെയ്തിട്ടുണ്ടാകും, ഇപ്രകാരമുള്ള വീഡിയോകള്‍ കിട്ടാതാവുമ്പോള്‍ കമാന്റിനു കീഴില്‍ പ്രവര്‍ത്തിക്കുന്ന സ്ക്രിപ്റ്റ് സ്വയം ടെര്‍മിനേറ്റ് ആകും. ഇതു മറികടക്കാന്‍ ചുമ്മാ ഒരു -i പാസ് ചെയ്താല്‍ മതി. അപ്പോള്‍ കമാന്റ് ഇങ്ങനെ
youtube-dl -i --extract-audio --audio-format mp3 -o "%(title)s.%(ext)s" https://www.youtube.com/playlist?list=PL_rXc1ssylNdm6ywGuUoFDceN7RokajID
ഏതു ഫോള്‍ഡറില്‍ നിന്നുകൊണ്ടാണോ ഇതു ചെയ്യുന്നത് ആ ഫോള്‍ഡറിന്റെ റൂട്ടില്‍ ഫയലുകള്‍ ‍ഡൗണ്‍ലോഡ് ആയിക്കോളും.
യെപ്പടി?

ഇന്‍കോഗ്നീറ്റോ നിങ്ങളെ നിരീക്ഷണ ക്യാമറയില്‍ നിന്നു് രക്ഷിക്കുന്നതേയില്ല

ഫയര്‍ഫോക്സിലെ പ്രൈവറ്റ് വിന്‍ഡോയും ക്രോമിലെ ഇന്‍കോഗ്നീറ്റോ മോഡ‍ും പ്രൈവസിയെ സംരക്ഷിക്കും എന്നു തെറ്റിദ്ധരിച്ചു് അതിയായ ആത്മവിശ്വാസത്തോടെ ഇന്റര്‍നെറ്റ് ഉപയോഗിക്കുന്നവരുണ്ടു് – അവര്‍ക്കായാണു് ഈ പോസ്റ്റ് സമര്‍പ്പിക്കുന്നതു്. ഇന്‍കോഗ്നീറ്റോ സംവിധാനത്തിലൂടെ ഒരാള്‍ നടത്തുന്ന തെരച്ചിലൂകളോ, ഇടപാടുകളോ ഒന്നും തന്നെ ബ്രൗസര്‍ ഹിസ്റ്ററിയില്‍ രേഖപ്പെടുത്തില്ല എന്നു മാത്രമുള്ള സുരക്ഷയേ ലഭിക്കുന്നുള്ളൂ. ഗൂഗിള്‍, യാഹൂ, മൈക്രോസോഫ്റ്റ് തുടങ്ങിയ ഭീമന്‍മാരുടെ അക്കൗണ്ടില്‍ ലോഗിന്‍ ചെയ്തിട്ടാണ് ഇന്‍കോഗ്നീറ്റോ സംവിധാനം ഉപയോഗിക്കുന്നതെങ്കില്‍ നിങ്ങള്‍ നടത്തിയ സര്‍വ്വ സന്ദര്‍ശനങ്ങളും ഇടപാടുകളും അവരുടെ സര്‍വ്വറുകളില്‍ സ്ഥാനം പിടിക്കും. ഇന്‍കോഗ്നീറ്റോ മോഡില്‍ കുക്കികള്‍ ഒന്നും സ്ഥിരമായി സേവ് ചെയ്യപ്പെടില്ല. അതെല്ലാം തന്നെ എപ്പോള്‍ നിങ്ങള്‍ ഇന്‍കോഗ്നീറ്റോ മോഡില്‍ നിന്നു പുറത്തുകടക്കുന്നോ ആ സമയത്തുതന്നെ മായ്ചു കളയപ്പെടും. ചുരുക്കത്തില്‍ നിങ്ങളുടെ സ്വന്തം കമ്പ്യൂട്ടറിലെ ബ്രൗസിംഗ് ഹിസ്റ്ററിയില്‍ നിന്നു മാത്രമെ ഇന്‍കോഗ്നീറ്റോ സംവിധാനം നിങ്ങള്‍ക്കു സുരക്ഷ നല്‍കുന്നുള്ളൂ.

ഇന്‍കോഗ്നീറ്റോ മോഡില്‍ നിങ്ങള്‍ നില്‍ക്കുമ്പോഴും പിറകില്‍ നിരീക്ഷണക്യാമറ ഓണ്‍ ആണെന്നുള്ള വിചാരം എപ്പോഴുമുണ്ടെങ്കിലേ കാര്യമുള്ളു. സത്യത്തില്‍ ടോര്‍ ബ്രൗസര്‍ ഉള്ളപ്പോള്‍ എന്തിനു് ഈ ഇന്‍കോഗ്നീറ്റോ മോഡ്? ടോര്‍ ബ്രൗസറില്‍ നിങ്ങള്‍ by default ഇന്‍കോഗ്നീറ്റോ മോഡില്‍ത്തന്നെയാണു്. മാത്രമല്ല നിരീക്ഷണ ക്യാമറയ്ക്കു് ഇവിടെ കയറിപ്പറ്റാന്‍ ഒരല്പം ബൂദ്ധിമുട്ടുണ്ടു്. അതുകൊണ്ടു് പ്രൈവസി ഒരു പ്രധാനകാര്യമായി പരിഗണിക്കുന്നവര്‍ ഇന്‍കോഗ്നീറ്റോ മോഡില്‍ കിടന്നുരുളാതെ ടോര്‍ ബ്രൗസറുമായി ചങ്ങാത്തം സ്ഥാപിക്കുക.

സ്വകാര്യത പണയം വച്ച് ഇന്റർനെറ്റ്‌ ഉപയോഗിക്കേണ്ടതുണ്ടോ?

ചെറിയൊരു മിനിക്കഥ.

പകലും രാവും മുഴുവൻ നീണ്ട കഠിനമായ പണിയായിരുന്നു. അതിസാഹസികമായി സംഘടിപ്പിച്ച രഹസ്യരേഖകൾ അവലോകനം ചെയ്ത് നാൽപ്പതു പേജുള്ള നെടുങ്കൻ റിപ്പോർട്ട് ടൈപ്പ് ചെയ്തു കഴിഞ്ഞപ്പോഴേയ്ക്കും നേരം പുലരാറായി. ന്യൂ ഓർലിയൻസിലെ സുഹൃത്തിന് അത് അതീവ രഹസ്യവിഭാഗത്തിൽപെടുന്ന ഇമെയിൽ സന്ദേശമായി, പഴുതുകൾ അടച്ച ക്രിപ്റ്റോഗ്രാഫിക് പൂട്ടിട്ട് പൂട്ടിക്കൊണ്ട് അയച്ചുകൊടുത്തു. ജോലി ഏൽപ്പിച്ച മാനസിക സമ്മർദ്ദം അകറ്റാൻ രണ്ടുമൂന്ന് കവിൾ തണുത്ത വോഡ്ക ഒറ്റ വീർപ്പിനു തന്നെ അകത്താക്കി. ഇനി തണുത്ത വെള്ളത്തിൽ ഒന്ന് കുളിക്കണം. തികഞ്ഞ ശ്രദ്ധയോടെ കമ്പ്യൂട്ടർ ഷട്ട് ഡൌണ്‍ ചെയ്തു എന്ന് വീണ്ടും ഉറപ്പുവരുത്തിക്കൊണ്ട് അവൾ സ്നാനമുറിയിൽ കയറി. സ്വന്തം വീടിന്റെ സ്വകാര്യതയിൽ, കിടപ്പുമുറിയോട് ചേർന്ന ആഡംബര സ്നാനമുറിയിൽ തണുത്ത ജലം പ്രവഹിക്കുന്ന ഷവറിനു കീഴിൽ പരിപൂർണ്ണ നഗ്നയായി ശാന്തയായി അവൾ കുളിക്കാൻ തുടങ്ങി.

പെട്ടെന്ന് ഒരു തോന്നൽ, ഒരു വെളിപാട് – താൻ നിൽക്കുന്നത് വലിയൊരു ആംഫിതിയ്യേറ്ററിന്റെ നടുത്തളത്തിലെ പോഡിയത്തിലാണോ എന്ന്. പോഡിയത്തിൽ സെറ്റ് ചെയ്ത സ്നാനമുറിയുടെ ചുവരുകൾ വെറും ലോലമായ സ്ഫടികപാളികൾ മാത്രം. ആണും പെണ്ണുമായി ചുറ്റിലും അനേകമനേകം വ്യക്തികൾ നാടകം കാണുന്നതു പോലെ തന്നെ നോക്കി, തന്റെ നഗ്നതയിൽ കണ്ണുനട്ട് അവിടിരിക്കുന്നു. ഒരു നിമിഷം. അവരെല്ലാം കണ്ടു കഴിഞ്ഞു. ആരും കാണുന്നില്ല എന്ന പൂർണ്ണവിശ്വാസത്തോടെ സ്നാനമുറിയിൽ ചെയ്ത ഓരോ അംഗചലനവും അവരുടെ ക്യാമറകളിൽ പതിഞ്ഞു കഴിഞ്ഞു.

ചെറിയൊരു ടവൽ കൊണ്ട് ദേഹം മറച്ച് അവൾ അവിടെ തളർന്നിരുന്നു.


ഓണ്‍ലൈന്‍ പ്രൈവസിയെപ്പറ്റി അല്‍പ്പമെങ്കിലും അവബോധമുള്ള ഒരു ഇന്റര്‍നെറ്റ് ഉപയോക്താവിന്റെ ടിപ്പിക്കൽ വിഹ്വലസ്വപ്നമാണിത്. അവർക്കറിയാം സ്വകാര്യത എന്നത് ഒരു മരീചിക പോലാണെന്ന്. ഉണ്ടെന്ന് ഒറ്റ നോട്ടത്തിൽ തോന്നുന്നതൊക്കെ ഉള്ളതല്ല എന്ന് അവർക്ക് നന്നായറിയാം.

ഓണ്‍ലൈൻ പ്രൈവസി എന്നത് വളരെ ഗഹനമായ ഒരു വിഷയമാണ്. ഇന്നത്തെ ലോകത്തിൽ ഒരൽപം ശ്രദ്ധ മാറിയാൽ നിങ്ങളുടെ പ്രൈവസി അപകടത്തിലാവും. നിങ്ങൾ ടാർഗറ്റ് ചെയ്യപ്പെട്ടേക്കും. ടെക്ക്നോളജിയിൽ താൽപ്പര്യമുള്ള ഗീക്കുകൾക്ക് ഇത് അറിയാവുന്ന കാര്യമാണ്, എങ്കിലും സാധാരണ ഇന്റർനെറ്റ്‌, മൊബൈൽ ഫോണ്‍ ഉപയോക്താക്കൾ കരുതുന്നത് തങ്ങൾ സുരക്ഷിതരാണ്‌ എന്നാണ്.

നമ്മുടെ കമ്പ്യൂട്ടർ നമുക്കെതിരേ ചാരപ്പണി ചെയ്യുന്നു. മറ്റാരും കാണില്ല എന്ന് കരുതി നാമയയ്ക്കുന്ന സന്ദേശങ്ങൾ നാമറിയാത്ത എത്രയോ മനുഷ്യരും യന്ത്രങ്ങളും വായിക്കുന്നു. അതൊക്കെ ആർക്കൊക്കെ പങ്കുവയ്ക്കപ്പെടുന്നു? നമുക്ക് സൗജന്യ ഇമെയിൽ സേവനങ്ങൾ തരുന്നവർ തന്നെ നമ്മുടെ സന്ദേശങ്ങൾ ചോർത്തി വായിക്കുന്നു. നാമയച്ച സന്ദേശങ്ങൾ നമുക്കൊരിക്കലും ഡിലീറ്റ് ചെയ്യാൻ കഴിയാത്ത വിധം അവരുടെ സർവ്വറുകളിൽ സൂക്ഷിക്കപ്പെടുന്നു.

കറൻസി സൂക്ഷിക്കുന്ന സേഫുകൾ ഇരട്ടപ്പൂട്ടിട്ടു പൂട്ടിയാലും നമുക്ക് സമാധാനമില്ല. വീടു പൂട്ടി ദൂരയാത്ര പോകുമ്പോൾ നാലു തവണയെങ്കിലും നോക്കും ശരിക്കും ലോക്ക് വീണിട്ടുണ്ടോ എന്ന്. പക്ഷേ ഒരു ഇലക്ട്രോണിക് ഡാറ്റ കൈകാര്യം ചെയ്യുമ്പോൾ നമുക്കാർക്കും തന്നെ യാതൊരു സുരക്ഷിതത്വചിന്തയുമില്ല. സുഹൃത്തിന് ഒരു ഇമെയിൽ അയയ്ക്കുമ്പോൾ, സോഷ്യൽ മീഡിയയിൽ ഒരു സ്വകാര്യ ഫോട്ടോ അപ്‌ലോഡ്‌ ചെയ്യുമ്പോൾ ഒന്നും നാം മറ്റൊന്നും ആലോചിക്കാറില്ല. ക്രെഡിറ്റ്‌ കാർഡ്‌ / നെറ്റ് ബാങ്കിംഗ് പാസ്‌വേഡുകൾ  ഒക്കെ പലരും സൂക്ഷിക്കുന്നത് തങ്ങളുടെ ഇമെയിൽ ഇൻബോക്സിന്റെ അല്ലെങ്കിൽ ക്ളൌഡ് സ്പേസിന്റെ ഒക്കെ അകത്താണ്. ഇന്റർനെറ്റിൽ ഒരിടം എന്നത് തികച്ചും സുരക്ഷിതമായാണ് മിക്ക സാധാരണക്കാരും കരുതുന്നത്. മറ്റാരും ഒന്നും കാണുന്നില്ല എന്ന് അവർ ധരിച്ചു വശായിരിക്കുന്നു.

ഒരു സാധാരണ ഇന്റർനെറ്റ്‌ കമ്മ്യൂണിക്കേഷന്റെ പിന്നിൽ നടക്കുന്ന ഇടപാടുകൾ വളരെ സങ്കീർണ്ണമാണ്. നിരവധി ഗേറ്റ് വേകൾ, നൂറുകണക്കിന് സർവ്വറുകൾ, ഒന്നിലേറെ ഐ.എസ്.പികൾ ഇവയൊക്കെ ഉൾപ്പെട്ടതാണ് ഒരൊറ്റ ഇന്റർനെറ്റ്‌ കമ്മ്യൂണിക്കേഷൻ. ഒരാൾ ഒരു വെബ്സൈറ്റ് നോക്കുമ്പോൾ അതിന്റെ പിന്നിൽ സർവറുകൾ തമ്മിൽ അങ്ങോട്ടുമിങ്ങോട്ടും അയാൾ ഉപയോഗിക്കുന്ന കമ്പ്യൂട്ടറുമായും ഒക്കെ നിരവധി തവണ ബന്ധപ്പെടുന്നുണ്ട്. ഈ കമ്മ്യൂണിക്കേഷനുകൾക്ക് നടുവിൽ നിങ്ങളുടെ സന്ദേശം ഹൈജാക്ക് ചെയ്യാൻ ഒരു രഹസ്യാന്വേഷണ ഏജൻസിക്കോ അല്ലെങ്കിൽ ഒരു അറ്റാക്കർക്കോ നിഷ്‌പ്രയാസം സാധിക്കും.

നിങ്ങൾ എവിടെ നിന്ന് ഇന്റർനെറ്റിൽ പ്രവേശിച്ചു എന്നറിയാൻ ഒരു ബുദ്ധിമുട്ടുമില്ല – നിങ്ങളുടെ ഐ.എസ്.പി. നിങ്ങൾക്ക് ലീസ് നൽകിയ ഐ.പി. അഡ്രസ്‌ കണ്ടെത്തിയാൽ മാത്രം മതി, ഭൂമിശാസ്ത്രപരമായ നിങ്ങളുടെ സ്ഥലം കിറുകൃത്യമായി ഗണിച്ചെടുക്കാൻ സാധിക്കും. അത് കണ്ടെത്താൻ അധികം വൈദഗ്ധ്യം പോലും ആവശ്യമില്ല. ഒരു മുൻകരുതലുമെടുക്കാതെ അയയ്ക്കപ്പെട്ട സംശയാസ്പദമായ ഒരു സന്ദേശം ഒരു രഹസ്യാന്വേഷണ ഏജൻസിയ്ക്ക് ചോർന്നു കിട്ടിയാൽ നിമിഷങ്ങൾ അധികമൊന്നും വേണ്ട അതിന്റെ ഉറവിടം കണ്ടെത്താൻ. ഇക്കാര്യങ്ങളെപ്പറ്റിയൊന്നും കാര്യമായ അവബോധമില്ലാതെ അതീവ രഹസ്യ സ്വഭാവമുള്ള ഒരു സന്ദേശം ഒരാൾ ഇന്റർനെറ്റ്‌ മുഖേന കൈമാറാൻ ശ്രമിച്ചാൽ നിമിഷങ്ങൾക്കകം അയാൾ ടാർഗറ്റ് ചെയ്യപ്പെടും എന്നതാണ് ഇന്നത്തെ സ്ഥിതി.

ഏതാണ്ട് ഒരു വർഷം മുമ്പ്, 2013 ജൂണ്‍ രണ്ടാം വാരത്തോടെ ലോകം ഞെട്ടലോടെ ശ്രവിച്ച സ്നോഡൻ വെളിപ്പെടുത്തലുകൾ ഒന്ന് മനസ്സിരുത്തി വായിച്ചാൽ മാത്രം മതി എത്രമാത്രം അപകടകരമാണ് നമ്മുടെ സൈബർ ജീവിതം എന്ന് വ്യക്തമായി തിരിച്ചറിയാൻ. അമേരിക്കയുടെ നേതൃത്വത്തിൽ പടുത്തുയർത്തിയ ഗ്ളോബൽ സർവെയ്ലൻസ് പ്രോഗ്രാം എന്ന സ്പൈ പ്രോഗ്രാം വഴി ഒരു ഡസനിലേറെ രാജ്യങ്ങളിലെ ശതകോടിക്കണക്കിന് പൌരന്മാരുടെ സ്വകാര്യ വിവരങ്ങളാണ് അവർ സ്വന്തമാക്കിയത്. ഇന്റർനെറ്റിലൂടെയും ഫോണിലൂടെയും ഈ പൌരന്മാർ നടത്തിയ ആശയവിനിമയങ്ങളിൽ നിന്നാണ് അവർ ഈ വിവരങ്ങൾ ചോർത്തിയെടുത്തത്.

ലോകമെമ്പാടും അനേകം സ്പൈ പ്രോഗ്രാമുകള്‍ വ്യാപകമായി ഉപയോഗിക്കപ്പെടുന്നുണ്ടെങ്കിലും സ്നോഡന്റെ വെളിപ്പെടുത്തലുകളിൽ നിന്ന് തെളിയുന്നത് പ്രധാനമായും മൂന്ന് സ്പൈ പ്രോഗ്രാമുകളുടെ സാന്നിധ്യമാണ്.

  1. എക്സ്കീസ്കോർ – ഇന്റർനാഷണൽ സർവെയ്ലൻസ് ടൂൾ. പ്രധാനമായും ഇമെയിൽ, ഫോണ്‍ സന്ദേശങ്ങൾ, വെബ്‌ ചാറ്റുകൾ തുടങ്ങിയവയിൽ നിന്നുള്ള മെറ്റാഡാറ്റ വിവരണങ്ങൾ ചോർത്തുന്നു.
  2. ടെമ്പോറ – ബ്രിട്ടന്റെ സർവെയ്ലൻസ് ടൂൾ. ഇന്റെർനെറ്റിന്റെ ബാക്ക്ബോണ്‍ ആയ ഫൈബർ ഒപ്റ്റിക് കേബിളിൽ നിന്ന് വിവരങ്ങൾ നേരിട്ട് ചോർത്തുന്നു.
  3. പ്രിസം – എൻ.എസ്.എയുടെ സർവെയ്ലൻസ് ടൂൾ. മൈക്രോസോഫ്റ്റ്, ഗൂഗിൾ, യാഹൂ, എഓഎൽ, ഫേസ്ബുക്ക്‌, ആപ്പിൾ, ട്വിറ്റെർ തുടങ്ങിയ യു.എസ്. സേവനദാതാക്കളുടെ സെർവറിൽ നിന്ന് നേരിട്ട് ഡാറ്റ ചോർത്തുന്നു.

ലോകത്തിലെ തന്നെ എണ്ണം പറഞ്ഞ രഹസ്യാന്വേഷണ ഏജൻസിയായ സി.ഐ.എയുടെയും നാഷണൽ സെക്യൂരിറ്റി ഏജൻസിയുടെയും മുൻഉദ്യോഗസ്ഥനായിരുന്ന സ്നോഡൻ എങ്ങനെ ഈ വിവരങ്ങൾ ഇത്രയും സുരക്ഷിതമായി ബ്രിട്ടനിലെയും യു.എസ്സിലെയും പത്രപ്രവർത്തകർക്ക് കൈമാറി? സ്നോഡൻ പത്രപ്രവർത്തകരുമായി ഇമെയിൽ സന്ദേശങ്ങൾ കൈമാറിയിരുന്നോ? എങ്കിൽ എങ്ങനെ ആ സന്ദേശങ്ങൾ മേൽപ്പറഞ്ഞ ചാര സോഫ്റ്റ്‌വെയറുകൾ മണത്തറിഞ്ഞില്ല?

ടെയിൽസ് ഓപ്പറേറ്റിംഗ് സിസ്റ്റം

പത്രപ്രവർത്തകരായ ലോറ പൊയട്രാസ്, ഗ്ളെൻ ഗ്രീൻവാൾദ് എന്നിവരുമായി ജീപീജി പൂട്ടിട്ട ഇമെയിൽ വഴിയാണ് എഡ്വേർഡ് സ്നോഡൻ ആദ്യമായി ബന്ധപ്പെട്ടത്. ഒരു നൂറ്റാണ്ടിലെ ഏറ്റവും വലിയ വെളിപ്പെടുത്തൽ അങ്ങനെ ലോകം കണ്ട ഏറ്റവും വലിയ പത്രവാർത്തകളിൽ ഒന്നായി മാറി. ഇതോടൊപ്പം മറ്റൊരു ടൂൾ കൂടി ലോകശ്രദ്ധ ആകർഷിച്ചു – അതിന്റെ പേരാണ് ടെയിൽസ് ഓപ്പറേറ്റിംഗ് സിസ്റ്റം. നേരത്തെ പറഞ്ഞ ചാരസോഫ്റ്റ്‌വെയറുകളുടെയൊന്നും കണ്ണിൽ പെടാതെ എഡ്വേർഡ് സ്നോഡനുമായി ആശയവിനിമയം നടത്താൻ ഈ പത്രപ്രവർത്തകരെ സഹായിച്ചത് ടെയിൽസ് എന്ന ഈ ഓപ്പറേറ്റിംഗ് സിസ്റ്റമാണ്. സ്നോഡൻ തന്നെയാണ് അവരോട് ടെയിൽസ് ഉപയോഗിക്കാൻ ആവശ്യപ്പെട്ടതും. ഓണ്‍ലൈൻ പ്രൈവസിയുടെ കാര്യത്തിൽ ഏതെങ്കിലും സോഫ്റ്റ്‌വെയറോ  അല്ലെങ്കിൽ ഓപ്പറേറ്റിംഗ് സിസ്റ്റമോ വിശ്വസനീയമായിട്ടുണ്ടെങ്കിൽ അത് ടെയിൽസ് ഓപ്പറേറ്റിംഗ് സിസ്റ്റം മാത്രമായിരിക്കും. എങ്കിലും ഇത് അവസാനവാക്കല്ല എന്ന് ഒരു ഡിസ്ക്ളൈമർ കൂടി ഉൾപ്പെടുത്താൻ അവർ മറന്നിട്ടില്ല.

ടെയിൽസ് ഓപ്പറേറ്റിംഗ് സിസ്റ്റം സ്പ്ളാഷ് സ്ക്രീൻ

ടെയിൽസ് ഓപ്പറേറ്റിംഗ് സിസ്റ്റം സ്പ്ളാഷ് സ്ക്രീൻ

ഒരു പക്ഷെ എഡ്വേർഡ് സ്നോഡന്റെ വെളിപ്പെടുത്തലുകളെ ആധാരമാക്കി പ്രശസ്ത ഡയറക്ടർ ഒലിവർ സ്റ്റോണ്‍ സംവിധാനം ചെയ്യുന്ന The Snowden Files: The Inside Story of the World’s Most Want Man എന്ന ചിത്രത്തിൽ ടെയിൽസ് ഓപ്പറേറ്റിംഗ് സിസ്റ്റത്തിലൂടെ പത്രപ്രവർത്തകർ  സ്നോഡനുമായി ആശയവിനിമയം നടത്തുന്ന രംഗങ്ങൾ ഉൾപ്പെടുത്തുമായിരിക്കും! 2014 സെപ്റ്റംബർ മാസത്തിൽ പുറത്തിറങ്ങുന്ന “Classified: The Edward Snowden Story” എന്ന ഫീച്ചർ ഫിലിമിലും ടെയിൽസിനെ പറ്റിയുള്ള പരാമർശങ്ങൾ കണ്ടേക്കാം.

ടെയിൽസ് ഓപ്പറേറ്റിംഗ് സിസ്റ്റം ഒരു ഓൾ-ഇൻ-വണ്‍ സെക്യോർ ഡിജിറ്റൽ കമ്മ്യൂണിക്കേഷൻ സിസ്റ്റമാണ്. ടോർ വെബ്‌ ബ്രൌസർ, ജീപീജീ ഇമെയിൽ, ഒടീആർ ചാറ്റ്, എൻക്രിപ്റ്റഡ് സ്റ്റോറേജ് അങ്ങനെ ഓണ്‍ലൈൻ പ്രൈവസിയ്ക്ക് അത്യാവശ്യം വേണ്ട എല്ലാ പ്രോഗ്രാമുകളും ഉൾക്കൊള്ളിച്ച ഒരു ഓപ്പറേറ്റിംഗ് സിസ്റ്റം ആണ് ടെയിൽസ്. ഏതൊരു സാധാരണക്കാരനും നിഷ്‌പ്രയാസം ഉപയോഗിക്കാൻ കഴിയുന്ന ഇന്റർഫേസ്. പ്രത്യേകിച്ച് ഒരു തരത്തിലുള്ള കോണ്‍ഫിഗറേഷനും ഉപയോക്താവ് ചെയ്യേണ്ടതില്ല. നിയമപരമായി നിങ്ങൾക്ക് അവകാശപ്പെടാവുന്ന അനോണിമിറ്റി (legal anonymity) ടെയിൽസ് നിങ്ങൾക്ക് ആവും വിധം നൽകുന്നു. ടെയിൽസിന്റെ ഏറ്റവും മികച്ച പ്രത്യേകതകളിൽ ഒന്ന് അത് ഉപയോക്താവിന്റെ ഹാർഡ് ഡിസ്കിനെ സ്പർശിക്കുന്നില്ല എന്നതാണ്. ഒരു യു.എസ്.ബി. സ്റ്റിക്കിലൊ ഒരു ഡീവിഡി യിലോ ടെയിൽസ് സൂക്ഷിക്കാം, അതിൽ നിന്നു തന്നെ ലോഡ് ചെയ്യാം. സിസ്റ്റം ഷട്ട് ഡൌണ്‍ ചെയ്തു കഴിയുമ്പോൾ യാതൊരുവിധ ലോഗുകളും അതിൽ ഉണ്ടാവുകയുമില്ല. ഏറ്റവും മികച്ച ഐടി ഫോറൻസിക് വിദഗ്ദ്ധനു പോലും ഒരുവിധ ട്രെയ്സുകളും അതിൽ നിന്ന് ലഭിക്കില്ല.

“ഗൂഗിൾ, ഫേസ്ബുക്ക്‌, യാഹൂ തുടങ്ങിയ ഇന്നത്തെ ഇന്റർനെറ്റ്‌ ഭീമൻമാരും രഹസ്യാന്വേഷണ ഏജൻസികളും ഒക്കെ നമ്മുടെ ഓണ്‍ലൈൻ ജീവിതം ആര്‍ക്കും കാണാന്‍ കഴിയും വിധം
സുതാര്യമാകണം എന്ന് ആഗ്രഹിക്കുന്നവരാണ്. എന്തിനാണെന്നോ? അവരുടെയൊക്കെ സ്വന്തം കാര്യങ്ങൾ കൂടുതല്‍ എളുപ്പമാകാൻ വേണ്ടി മാത്രം.”
– ടെയിൽസ് ഡെവലപ്പ്മെന്റ് ടീം.

കഴിഞ്ഞ നാലഞ്ചു കൊല്ലം മുമ്പ് തുടങ്ങിയതാണ്‌ ടെയിൽസ് പ്രൊജക്റ്റ്‌. ആരംഭത്തിൽ അമ്നീഷ്യ എന്നായിരുന്നു പ്രൊജക്റ്റിനു നൽകിയ പേര്. നേരത്തേ ഉണ്ടായിരുന്ന ഇൻകോഗ്നിറ്റോ എന്ന മറ്റൊരു പ്രോജക്റ്റിനെ അടിസ്ഥാനപ്പെടുത്തിയാണ് അമ്നീഷ്യ ഡെവലപ്പ് ചെയ്യാൻ തുടങ്ങിയത്. ഒടുവിൽ അമ്നീഷ്യയും ഇൻകോഗ്നിറ്റോയും മെർജ് ചെയ്യപ്പെട്ടു. അങ്ങനെ The Amnesic Incognito Live System എന്ന് സിസ്റ്റം നാമകരണം ചെയ്തു, ഇതിന്റെ ചുരുക്കരൂപമാണ് ടെയിൽസ്. ഇപ്പോൾ ഡെസ്ക്ടോപ്പ് കംപ്യൂട്ടറുകളിലും ലാപ്ടോപ്പുകളിലും മാത്രമേ ടെയിൽസ് ഉപയോഗിക്കാൻ കഴിയൂ, വൈകാതെ മൊബൈലിൽ ഉപയോഗിക്കാൻ കഴിയുന്ന വെർഷൻ കൂടി ഇപ്പോൾ ഡെവലപ്പ് ചെയ്യുന്നുണ്ട്.

ടെയിൽസിലെ ഡീഫോൾട്ട് ഇന്റർനെറ്റ്‌ ബ്രൌസർ “ടോർ ബ്രൌസർ” ആണ്. ടോർ ബ്രൌസറിലൂടെ ഇന്റർനെറ്റ്‌ ഉപയോഗിക്കുമ്പോൾ നിങ്ങളുടെ ഐപി അഡ്രസ്‌ ഒരു സ്പൈയിംഗ് ഏജൻസിയ്ക്ക് നേരിട്ട് ലഭിക്കില്ല. കൃത്യമായ ഇടവേളകളിൽ ഐപി അഡ്രസ്‌ മാറിക്കൊണ്ടിരിക്കുന്നത് നിങ്ങൾക്ക് സ്വയം കാണാൻ കഴിയും. ടെയില്‍സിലെ ടോർബ്രൌസർ വാസ്തവത്തിൽ മോസില്ല ഫയർഫോക്സിന്റെ ഫോർക്ക് ആയ ഐസ് വീസലില്‍ ടോര്‍ നെറ്റ്വര്‍ക്ക് സംയോജിപ്പിച്ച പതിപ്പാണ്. ഗ്നുപീജീ സപ്പോർട്ട് ഉള്ള ക്ളോവ്സ്‌ മെയിൽ ആണ് ഡീഫോൾട്ട് ഇമെയിൽ ക്ളയന്റ്. രേഖകൾ എഡിറ്റ്‌ ചെയ്യാൻ ഓപ്പണ്‍ ഓഫീസ്, സ്ക്രൈബസ് എന്നീ എഡിറ്ററുകൾ ഉണ്ട്. ഇമേജുകൾ എഡിറ്റ്‌ ചെയ്യാൻ ഗിമ്പും, വെക്ടർ ഗ്രാഫിക്സിന് ഇങ്ക്സ്കേപ്പും ഉൾക്കൊള്ളിച്ചിട്ടുണ്ട്. പ്ളെയിൻ ടെക്സ്റ്റ്‌ എൻക്രിപ്റ്റ് ചെയ്യാൻ ഓപ്പണ്‍ പീജീപി ആപ്പ്ലെറ്റ് ടെയിൽസിൽ ലഭ്യമാണ്.

ഏതെങ്കിലും പൊതുസ്ഥലങ്ങളിൽ ഇരുന്നു കൊണ്ട് മറ്റുള്ളവരുടെ ശ്രദ്ധ ആകർഷിക്കാതെ ടെയിൽസ് ഉപയോഗിക്കണമെങ്കിൽ അതിനും മാർഗ്ഗമുണ്ട്. ടെയിൽസിലെ രസകരമായ ഒരു വേലത്തരമാണത് – വിൻഡോസ് കാമോഫ്ളാഷ് എന്ന ഓപ്ഷൻ ഉപയോഗിച്ചാൽ പുറത്തു നിന്നൊരാൾ നോക്കിയാൽ നിങ്ങൾ ഉപയോഗിക്കുന്നത് ഒരു വിൻഡോസ്‌ എക്സ്പി ഓപ്പറേറ്റിംഗ് സിസ്റ്റം ആയേ തോന്നൂ.

ടെയിൽസിൽ ഓപ്പണ്‍ ഓഫീസ് സ്യൂട്ടും ഗിമ്പും ഇങ്ക്സ്കേപ്പും ഒക്കെ അടങ്ങിയിട്ടുണ്ടെങ്കിലും ഇത് നമ്മുടെ സ്ഥിര ഉപയോഗത്തിന് അനുയോജ്യമാണ് എന്ന് പറയാനാവില്ല. ടോർ നെറ്റ്‌വർക്കിലൂടെ ബ്രൌസ് ചെയ്യുന്നത് വളരെ അധികം സമയമെടുക്കുന്ന പരിപാടിയാണ്. ഒരാളുടെ തികച്ചും സാധാരണ ഉപയോഗങ്ങൾക്ക് ഡെബിയൻ, ഉബുണ്ടു പോലുള്ള സാധാരണ ഓപ്പറേറ്റിംഗ് സിസ്റ്റം ഉപയോഗിക്കുന്നതായിരിക്കും അഭികാമ്യം. പക്ഷേ എപ്പോഴും ടെയിൽസ് കൈവശം കരുതുക, എപ്പോഴാണ് അനോണിമസ് ആയി നിങ്ങൾക്ക് ഇന്റർനെറ്റ്‌ ഉപയോഗിക്കേണ്ട ആവശ്യം വരുന്നതെന്ന് പറയാൻ കഴിയില്ലല്ലോ.

ക്രിപ്റ്റോപാർട്ടി

ഓണ്‍ലൈൻ പ്രൈവസിയെ പറ്റി തികച്ചും അജ്ഞരായ സാധാരണ ജനങ്ങൾക്ക്‌ അവബോധം നൽകുവാൻ വേണ്ടി ആഗോള തലത്തിൽ നടക്കുന്ന കാമ്പയിൻ ആണ് ക്രിപ്റ്റോപാർട്ടി. പാസ്വേഡുകൾ സൂക്ഷിക്കേണ്ടത് എങ്ങനെ എന്ന ലളിതമായ വിഷയങ്ങൾ മുതൽ ടോർ നെറ്റ്‌വർക്ക്സ്, പീജീപി, ജീപീജി തുടങ്ങിയ എൻക്രിപ്ഷനുകൾ, ഓ.ടി.ആർ (Off The Record) ചാറ്റ് സർവ്വീസുകൾ തുടങ്ങിയ സെക്യൂരിറ്റി വിഷയങ്ങൾ വരെ ക്രിപ്റ്റോപാർട്ടികളിൽ സെഷനുകൾ എടുക്കുന്നു. ഒരിക്കൽ പോലും എൻക്രിപ്ഷൻ ടൂളുകൾ ഉപയോഗിക്കാത്ത സാധാരണക്കാർക്കാണ് ക്രിപ്റ്റോപാർട്ടികളിൽ പ്രഥമപരിഗണന നൽകപ്പെടുന്നത്.

വാൽക്കഷണം

എഡ്വേർഡ് സ്നോഡൻ ഉപയോഗിച്ചിരുന്ന ഇമെയിൽ സർവീസ് ലാവബിറ്റ്.കോം ആയിരുന്നു. cincinnatus@lavabit.com എന്നായിരുന്നു അദ്ദേഹത്തിന്റെ ഇമെയിൽ വിലാസം. ഇന്ന് ലാവബിറ്റിന്റെ ഹോം പേജിൽ നമുക്ക് കാണാൻ കഴിയുന്നത്‌ ഒന്ന് രണ്ടു പോസ്റ്റുകൾ മാത്രം. സ്നോഡൻ വെളിപ്പെടുത്തലുകൾ പുറത്തു വന്ന ശേഷം ഏതാണ്ട് രണ്ടു മാസങ്ങൾക്കു ശേഷം ലാവബിറ്റ് യു.എസ്. ഫെഡറൽ ഗവണ്മെന്റ് കരിനിയമങ്ങൾ ചുമത്തി തകർത്തു തരിപ്പണമാക്കി. ലാവബിറ്റ്  ഇന്ന് സുരക്ഷിത ഇമെയിൽ സർവീസ് നൽകുന്നില്ല. ഇക്കഴിഞ്ഞ മെയ് മാസമാണ് ലോകത്തിലെ മികച്ച ഓപ്പണ്‍ സോഴ്സ് എൻക്രിപ്ഷൻ ടൂൾ എന്ന് കേൾവി കേട്ട ട്രൂക്രിപ്റ്റ് സ്വയം വൾനറബിലിറ്റി ആരോപിച്ച് സർവീസ് അവസാനിപ്പിച്ചത്. നാളെ ഒരു ദിവസം ടെയിൽസ് ഓപ്പറേറ്റിംഗ് സിസ്റ്റത്തിനും ഈ ഗതി വരുമോ?

അവലംബം

  1. https://tails.boum.org/index.en.html
  2. http://www.wired.com/2014/04/tails/
  3. https://pressfreedomfoundation.org/blog/2014/04/help-support-little-known-privacy-tool-has-been-critical-journalists-reporting-nsa
  4. https://www.newschallenge.org/challenge/2014/submissions/improve-tails-to-limit-the-impact-of-security-flaws-isolate-critical-applications-and-provide-same-day-security-updates
  5. http://en.wikipedia.org/wiki/Laura_Poitras
  6. http://www.forbes.com/sites/runasandvik/2014/05/27/that-one-time-i-threw-a-cryptoparty-with-edward-snowden

ക്രിപ്റ്റോപാര്‍ട്ടി / Cryptoparty

പ്രത്യേകിച്ച് മെയിലിംഗ് ലിസ്റ്റില്‍ വന്ന അജണ്ട ഒന്നും നോക്കാതെയാണ്‌ ഐലഗ്ഗിലെ പ്രതിമാസ മീറ്റിങ്ങിനു പോയത്. അവിടെ ചെന്നപ്പോള്‍ “ക്രിപ്റ്റോപാര്‍ട്ടി” എന്ന ഒരു ടൈറ്റില്‍ നോട്ടീസ് ബോര്‍ഡില്‍ എഴുതി വച്ചിരിക്കുന്നു. എന്താണാവോ ഈ ക്രിപ്റ്റോപാര്‍ട്ടി എന്ന് അനന്തന്‍ എന്നോട് സ്വകാര്യമായി ചോദിച്ചപ്പോള്‍ വന്നിരിക്കുന്ന മറ്റുള്ളവര്‍ക്കും ക്രിപ്റ്റോപാര്‍ട്ടിയെ പറ്റി കാര്യമായ ധാരണ ഇല്ല എന്ന് മനസ്സിലായി. ജേ ജേക്കബ്‌ സാറും പുതിയൊരു കക്ഷിയുമായി എന്തോ കാര്യമായി മാറിയിരുന്നു സംസാരിക്കുന്നുണ്ട്. മീറ്റിംഗ് തുടങ്ങാന്‍ പതിവിലും താമസം. ഒടുവില്‍ സോഫ്റ്റ്‌വെയര്‍ ഫ്രീഡം ലേര്‍ണിംഗ് സെന്റെറി (ന്യൂഡല്‍ഹി) ലെ പ്രശാന്ത്‌ സുഗതന്‍ സാര്‍ മീറ്റിംഗ് ഹാളിലേക്ക് വന്നു. ക്രിപ്റ്റോപാര്‍ട്ടി തുടങ്ങി. എന്താണ് ക്രിപ്റ്റോപാര്‍ട്ടി എന്ന് വിശദീകരിച്ചു.

എന്താണ് ക്രിപ്റ്റോപാര്‍ട്ടി / Cryptoparty?

വിശദമായ ഉത്തരം ദാ ഈ കാണുന്ന ലിങ്കുകള്‍ നിന്നൊക്കെ കിട്ടും.

    1. http://en.wikipedia.org/wiki/CryptoParty
    2. https://cryptoparty.org/wiki/CryptoParty
ക്രിപ്റ്റോപാര്‍ട്ടി

ക്രിപ്റ്റോപാര്‍ട്ടി

അധികം കാലമൊന്നും ആയിട്ടില്ല, ഈ കഴിഞ്ഞ വര്‍ഷം  ഓസ്ട്രേലിയയില്‍ ആണ് ആഷര്‍ വോള്‍ഫ് എന്ന ഓണ്‍ലൈന്‍ സെക്യൂരിറ്റി വിദഗ്ധന്‍ ഇങ്ങനെ ഒരു ആശയം മുന്നോട്ടു വച്ചത്. ടോര്‍ പ്രൊജക്റ്റ്‌ എങ്ങനെ ഉപയോഗിക്കാം, പീജീപീ (പ്രെറ്റി  ഗുഡ് പ്രൈവസി), ജീപീജീ (ഗ്നുപീജീ -ഗ്നു പ്രൈവസി ഗാർഡ്‌) തുടങ്ങിയ ഡാറ്റ എന്‍ക്രിപ്ഷന്‍ മാർഗ്ഗങ്ങൾ ഇമെയിലുകളില്‍ എങ്ങനെ ഉപയോഗിക്കാം എന്നൊക്കെ സാധാരണക്കാര്‍ക്കു മുമ്പില്‍ (ഗ്നു/ലിനക്സ്‌ ഗീക്കുകള്‍ക്ക് മാത്രമല്ല, എല്ലാ സാദാ ജനത്തിനു മുമ്പിലും) അവതരിപ്പിക്കുകയാണ് ക്രിപ്റ്റോപാര്‍ട്ടിയുടെ ലക്‌ഷ്യം. ഫേസ്ബുക്കില്‍ എന്തൊക്കെ അപ്ഡേറ്റ് ചെയ്യാം, എന്തൊക്കെ അപ്ഡേറ്റ് ചെയ്യരുത് തുടങ്ങിയ തികച്ചും ചെറിയ ചെറിയ കാര്യങ്ങള്‍ വരെ ഇത്തരം പാര്‍ട്ടികളില്‍ ചര്‍ച്ചാവിഷയം ആകാം എന്നും പ്രശാന്ത്‌ പറഞ്ഞു. അനോണിമസ് ആകാന്‍ നിയമപരമായി ഓരോരുത്തര്‍ക്കും അവകാശം ഉണ്ട്. പക്ഷെ ഒരാളുടെ അറിവില്ലായ്മ മൂലം അയാള്‍ക്ക് ആ അവകാശം ലഭിക്കുന്നില്ല; പക്ഷെ തങ്ങള്‍ തിരിച്ചറിയപ്പെടാം എന്ന് അയാള്‍ തിരിച്ചറിയുന്നുമില്ല. തന്നെ ആരും തിരിച്ചറിയുന്നില്ല എന്ന തെറ്റായ വിശ്വാസം മൂലം പലരും അവര്‍ അറിയാതെ ട്രാക്ക് ചെയ്യപ്പെടുന്നു. ഇവിടെയാണ്‌ ക്രിപ്റ്റോപാര്‍ട്ടി നിങ്ങളുടെ അവകാശങ്ങളെ പറ്റി നിങ്ങള്‍ക്ക് അവബോധം നല്‍കുന്നത്. ഉദാഹരണത്തിന് രണ്ടു വ്യക്തികള്‍ തമ്മില്‍ നടക്കുന്ന ഒരു ഇമെയില്‍ വിനിമയത്തിനിടയില്‍ നിന്ന് വേണമെങ്കില്‍ ഒരു സര്‍ക്കാര്‍ ഏജന്‍സിക്ക് ഡാറ്റ ചോര്‍ത്താം. പക്ഷെ അത് എന്‍ക്രിപ്റ്റഡ് ആണെങ്കില്‍ അതു ചോർത്തുന്നത്‌ എളുപ്പമാവില്ല. അനോണിമസ് ആയിരിക്കാന്‍ നിങ്ങള്‍ക്ക് നിയമപരമായി അവകാശം ഉണ്ട്. വിധ്വംസക പ്രവര്‍ത്തനങ്ങള്‍ അല്ല; ന്യായമായ അവകാശങ്ങള്‍ മാത്രമാണ് ഇവിടെ പ്രസ്താവിക്കപ്പെടുന്നത്. തങ്ങളുടെ അധികാര പരിപാലനത്തിനായി പല സര്‍ക്കാരുകളും പൌരന്മാരുടെ വാര്‍ത്താവിനിമയ രേഖകള്‍ ചോര്‍ത്തുന്നത്‌ ഇന്ന് ലോകത്തില്‍ സര്‍വ്വ സാധാരണമായിക്കൊണ്ടിരിക്കുന്നു.

എന്തായാലും ടോര്‍ പ്രൊജെക്ടിനെ പറ്റിയും ഇ മെയില്‍ എന്‍ക്രിപ്ഷനെ പറ്റിയും ഒക്കെ വിവരം തന്ന ക്രിപ്റ്റോപാര്‍ട്ടി എല്ലാവര്‍ക്കും വളരെ ആസ്വാദ്യമായി എന്ന കാര്യത്തില്‍  സംശയമില്ല.

എഫ്എഫ്എംപിഇജി (FFmpeg): ഈ കുഞ്ഞു പ്രോഗ്രാം ഉപയോഗിച്ച് വീഡിയോ/ഓഡിയോ ഫയലുകളില്‍ അത്ഭുതങ്ങള്‍ കാണിക്കാം

സജീവന്റെ കൂട്ടുകാരന്റെ സഹോദരിയുടെ കല്ല്യാണം കഴിഞ്ഞു രണ്ടു ദിവസങ്ങള്‍ക്കു ശേഷമാണ് വീഡിയോ ഡീവിഡീ കിട്ടിയത്. കിട്ടിയ ഉടന്‍ തന്നെ നിര്‍മ്മല്‍ സ്ഥലത്തെ പ്രധാന കമ്പ്യൂട്ടര്‍ വിദഗ്ദ്ധനും അടുത്ത സുഹൃത്തുമായ സജീവന്റെ അടുത്തെത്തി. സിമ്പിള്‍ ആയി ഈ വീഡിയോ യൂട്യൂബില്‍ ഇടണം. കാനഡയില്‍ ഉള്ള മൂത്ത ചേച്ചിയ്ക്ക് കാണാനാ. അവധി കിട്ടാത്തതിനാല്‍ അവര്‍ക്ക് നാട്ടില്‍ വരാനോ കല്ല്യാണം കൂടാനോ കഴിഞ്ഞില്ല. ന്യായമായ കാര്യമാണ്. സിമ്പിള്‍ പ്രശ്നവും. സജീവന്‍ സമ്മതിച്ചു. ആദ്യം സിസ്ടത്തില്‍ ഉള്ള ഒരു വീഡിയോ എക്സ്ട്രാക്ടര്‍ യൂട്ടിലിറ്റി  ഉപയോഗിച്ച് ഡീവിഡീയില്‍ നിന്ന് വീഓബി ഫയല്‍ മുറിച്ചു. നേരെ യൂട്യൂബ് തുറന്നു. ലോഗിന്‍ ചെയ്തു. അപ്‌ലോഡ്‌ കൊടുത്തു. “ശൂ” എന്ന് അപ്‌ലോഡ്‌ തുടങ്ങി. റോക്കറ്റ് വിട്ടത് പോലെ നേരെ 95 ശതമാനത്തില്‍ 97, 98, 99… ഇപ്പൊ തീരും ഇപ്പൊ തീരും എന്ന് കരുതി സജീവനും നിര്‍മ്മലും കാത്തിരുന്നു, കുറച്ചു നേരമൊന്നുമല്ല ഒരു ഒന്നൊന്നര മണിക്കൂര്‍ !”ശൂ” എന്ന് പറഞ്ഞു അപ്‌ലോഡ്‌ ആകുന്നത് കണ്ടപ്പോള്‍ തോന്നിയ സന്തോഷം പയ്യെ സങ്കടവും ദേഷ്യവും നട്ടപ്രാന്തും ഒക്കെയായി മാറി. ഒടുവില്‍ സജീവനും നിര്‍മ്മലിനും വട്ടായി. ഒന്നും ശരിയാവാതെ ഒടുവില്‍ ശ്രമം ഉപേക്ഷിച്ചു. “നീ എവിടത്തെ കമ്പ്യൂട്ടര്‍ വിദഗ്ധനാ, ഇത്രയൊക്കെ ഒള്ളോ” എന്നൊക്കെ ചോദിച്ചു ചൊറിഞ്ഞു  നിര്‍മ്മല്‍ സജീവനെ കളിയാക്കി. സജീവന്‍ ചൂടായി. ഉന്തും തള്ളുമായി. കല്യാണ സീഡി, ട്രെയില്‍ നിന്നെടുത്തു സജീവന്‍ ഒടിച്ചു കളഞ്ഞു.  നിര്‍മ്മല്‍ സജീവന്റെ മോണിട്ടര്‍ അടിച്ചു പൊട്ടിച്ചു. എന്നിട്ടരിശം തീരാഞ്ഞ് നിര്‍മ്മല്‍ സജീവന്റെ പുരയുടെ ചുറ്റും മണ്ടി നടന്നു!

ഒരു ചോദ്യം. ഒരൊറ്റ ചോദ്യം – ഇത്രയൊക്കെ വേണമായിരുന്നോ?

വേണ്ട! വേണ്ടേ വേണ്ട.

കാരണമെന്താ? എഫ്എഫ്എംപിഇജി (FFmpeg) ഇല്ലേ നമുക്ക് മുമ്പില്‍? നിങ്ങള്‍ക്ക് മുന്നില്‍ കീറാമുട്ടിയായ ഏതു വീഡിയോ പ്രശ്നങ്ങള്‍ക്കും സമഗ്രമായ പരിഹാരവുമായി ഇഷ്ടന്‍ വരും. നേരത്തെ സജീവന്‍ അഭിമുഖീകരിച്ച മൊത്തം പ്രശ്നം പരിഹരിക്കാന്‍ ഇഷ്ടന് ഒരു പത്തു മിനിട്ട് സമയം മാത്രം മതി, വെറും നാലേ നാല് കമാന്‍ഡുകള്‍ കൊണ്ട് ഈ പറഞ്ഞ പ്രശ്നം വെറും സിമ്പിള്‍ ആയി പരിഹരിക്കാം. എഫ്എഫ്എംപിഇജി (FFmpeg) എന്ന ഒരൊറ്റ കുഞ്ഞന്‍ പ്രോഗ്രാം ഉപയോഗിച്ച് മേല്‍പ്പറഞ്ഞ പ്രശ്നം പൂര്‍ണ്ണമായും പരിഹരിക്കാം. ഒരു 15 മെഗാബൈറ്റുകള്‍ മാത്രമുള്ള ഈ കുഞ്ഞു പ്രോഗ്രാം ഉപയോഗിച്ച് വീഡിയോ/ഓഡിയോ ഫയലുകളില്‍ അത്ഭുതങ്ങള്‍ കാണിക്കാം. വീഡിയോ/ഓഡിയോ ഫയലുകള്‍ മുറിക്കാം, കൂട്ടിച്ചേര്‍ക്കാം, ഫോര്‍മാറ്റുകള്‍ മാറ്റാം. പലര്‍ക്കും യൂട്യൂബില്‍ വീഡിയോ അപ്‌ലോഡ്‌ ചെയ്യുമ്പോള്‍ പലവിധ പ്രശ്നങ്ങളും നേരിട്ടിട്ടുണ്ടാകും.

സജീവന്റെ പ്രശ്നത്തിന് എഫ്എഫ്എംപിഇജി (FFmpeg) നല്‍കുന്ന പരിഹാരം ഇതാ.

ആ വെറും നാലേ നാല് കമാന്‍ഡുകള്‍ ഇതാ.

  1. ffmpeg -i SourceFile1.vob -sameq -ss 00:13:20 -t 180 DestinationFile1.vob
  2. ffmpeg -i SourceFile2.vob -sameq -ss 00:13:20 -t 180 DestinationFile2.vob
  3. ffmpeg -i concat:”DestinationFile1.vob|DestinationFile2.vob” -c copy ConcatenatedFile.vob
  4. ffmpeg -i ConcatenatedFile.vob -qscale 7 -acodec libmp3lame -ar 22050 -ab 96000 -deinterlace -nr 500 -s 640×480 -aspect 4:3 -r 20 -g 500 -me_range 20 -b 270k -deinterlace -f flv -y YoutubeFile.flv

ഓരോ കമാന്‍ഡുകളുടെയും  വിശദീകരണം

  1. ffmpeg -i SourceFile1.vob -sameq -ss 00:13:20 -t 180 DestinationFile1.vob // എഫ്എഫ്എംപിഇജി ഉപയോഗിച്ച് SourceFile1.vob എന്ന ഇന്‍പുട്ട് ഫയലില്‍ നിന്നും  സെയിം ക്വാളിറ്റിയില്‍ 00:13:20 എന്ന ടൈം ഫ്രെയിമില്‍ നിന്നും 180 സെക്കന്റ്‌ മുന്നോട്ടു നീക്കി മുറിച്ചു  DestinationFile1.vob എന്ന പുതിയ ഒരു ഫയല്‍ ആക്കി സേവ് ചെയ്യുക എന്നാണ് ഈ കമാന്‍ഡിന്റെ അര്‍ഥം
  2. ffmpeg -i SourceFile1.vob -sameq -ss  00:20:46 -t 180 DestinationFile2.vob // എഫ്എഫ്എംപിഇജി ഉപയോഗിച്ച് SourceFile1.vob എന്ന മുന്‍പത്തെ അതേ ഇന്‍പുട്ട്  ഫയലില്‍ നിന്നും സെയിം ക്വാളിറ്റിയില്‍  00:20:46 എന്ന ടൈം ഫ്രെയിമില്‍ നിന്നും 180 സെക്കന്റ്‌ മുന്നോട്ടു നീക്കി മുറിച്ചു  DestinationFile2.vob എന്ന പുതിയ ഒരു ഫയല്‍ ആക്കി സേവ് ചെയ്യുക എന്നാണ് ഈ കമാന്‍ഡിന്റെ അര്‍ഥം
    • കുറിപ്പ് :  ഇപ്പോള്‍ രണ്ടു പുതിയ വീഓബി ഫയലുകള്‍ സൃഷ്ടിക്കപ്പെട്ടു. ഇനി ഈ രണ്ടു വീഓബി ഫയലുകളും കൂട്ടി ചേര്‍ക്കണം. അതിനായി താഴെ കാണുന്ന കമാന്‍ഡ് ഉപയോഗിക്കാം.
  3. ffmpeg -i concat:”DestinationFile1.vob|DestinationFile2.vob” -c copy ConcatenatedFile.vob // DestinationFile1.vob  DestinationFile2.vob  എന്ന രണ്ടു വീഓബി ഫയലുകളെ കോണ്‍കാറ്റനേറ്റ്  ചെയ്യുക അഥവാ കൂട്ടിച്ചേര്‍ക്കുക എന്നാണ് ഈ കമാന്‍ഡിന്റെ അര്‍ഥം
    • കുറിപ്പ് :  ഇങ്ങനെ സൃഷ്ടിക്കപ്പെട്ട പുതിയ വീയ്യോബീ ഫയല്‍ യൂട്യൂബിലെക്ക് നേരിട്ട് കയറിപ്പോകാന്‍ സാധ്യതയില്ല. അത് കൊണ്ട് അതി എഫ്ഫെല്‍വി (flv) എന്ന മറ്റൊരു ഫോര്‍മാറ്റിലേക്ക് കണ്‍വേര്‍ട്ട് ചെയ്യണം.
  4. ffmpeg -i ConcatenatedFile.vob -qscale 7 -acodec libmp3lame -ar 22050 -ab 96000 -deinterlace -nr 500 -s 640×480 -aspect 4:3 -r 20 -g 500 -me_range 20 -b 270k -deinterlace -f flv -y YoutubeFile.flv // ConcatenatedFile.vob എന്ന ഫയല്‍ ക്വാളിറ്റി-നിലവാരം 7 ആയി libmp3lame എന്ന ഓഡിയോ കോഡക് ഉപയോഗിച്ച് 640×480 എന്ന ഫ്രെയിം വലുപ്പത്തില്‍ 4:3 എന്ന സ്ക്രീന്‍ അനുപാതത്തില്‍ flv എന്ന ഫോര്‍മാറ്റിലേക്ക് കണ്‍വേര്‍ട്ട് ചെയ്തു YoutubeFile.flv എന്ന പുതിയ ഫയല്‍ ആയി സേവ് ചെയ്യുക എന്നാണ് ഈ കമാന്‍ഡിന്റെ അര്‍ഥം. ( -ar 22050 -ab 96000 -deinterlace -nr 500), ( -r 20 -g 500 -me_range 20 -b 270k -deinterlace) ബ്രാക്കറ്റില്‍ കൊടുത്ത ഇത്രയും ഭാഗങ്ങള്‍ യൂട്യൂബില്‍ എഫ്.എല്‍.വി. അപ്‌ലോഡ്‌ ചെയ്യാന്‍ വേണ്ട സ്പെസിഫിക്കേഷനുകളാണ് .

(qscale) ക്യൂസ്കെയില്‍ ഉപയോഗിക്കുന്നത് വീഡിയോയുടെ ക്വാളിറ്റി കുറയ്ക്കുവാന്‍ വേണ്ടിയാണ്. ആദ്യം കണ്ട (sameq) എന്ന ഓപ്ഷന്‍ ഉപയോഗിച്ചാല്‍ എഫ്എഫ്എംപിഇജി വീഡിയോയുടെ ക്വാളിറ്റി അതേ പടി തന്നെ നിലനിര്‍ത്തും. (qscale) ക്യൂസ്കെയില്‍ എന്താണ് എന്ന് വിശദമായി അറിയുവാന്‍ ഇവിടെ ക്ലിക്ക് ചെയ്യുക. qscale 7 / ക്യൂസ്കെയില്‍ 7  അഥവാ ക്വാളിറ്റി 7 നല്‍കിയിട്ടും ഫയല്‍ യൂട്യൂബില്‍ അപ്‌ലോഡ്‌ ചെയ്യാന്‍ കഴിഞ്ഞില്ലെങ്കില്‍ ഒരല്‍പം കൂടി കുറയ്ക്കുക. qscale 10 നല്‍കി നോക്കുക. മിക്കവാറും ശരിയാവും.

ഉപയോഗപ്രദമായ മറ്റു എഫ്എഫ്എംപിഇജി (FFmpeg) കമാന്‍ഡുകള്‍ ഇവിടെ കാണാം.

എഫ്എഫ്എംപിഇജി (FFmpeg) ഡൌണ്‍ലോഡ് ചെയ്യുവാന്‍

ലിനക്സില്‍ എന്നത് പോലെ വിന്‍ഡോസിലും മാക്കിലും എഫ്എഫ്എംപിഇജി (FFmpeg) ലഭ്യമാണ്. ഒട്ടു മിക്ക വീഡിയോ കണ്‍വേര്‍ഷന്‍ പ്രോഗ്രാമുകളുടെയും ബാക്ക് എന്‍ഡില്‍ കിടന്നു കളിക്കുന്നത് എഫ്എഫ്എംപിഇജി എന്ന ഈ കുഞ്ഞന്‍ പ്രോഗ്രാമാണ്. എഫ്എഫ്എംപിഇജി (FFmpeg) ഡൌണ്‍ലോഡ് ചെയ്യുവാന്‍ ഇവിടെ ക്ലിക്ക് ചെയ്യുക.