ബ്ലാക്ക് കോഡ്

പ്രൈവസിയെപ്പറ്റിയുള്ള മറ്റൊരു സിനിമ പരിചയപ്പെടുത്തുന്നു – ബ്ലാക്ക് കോഡ്. ടൊറന്റോയിലെ പ്രസിദ്ധ ഡോക്യുഫിലിംമേക്കര്‍ നിക്കോളാസ് ഡ‍ി പെന്‍സിയര്‍ സംവിധാനം ചെയ്ത ഈ സിനിമ സ്വതന്ത്രഭാഷണം, പ്രൈവസി, ആക്ടിവിസം തുടങ്ങിയ വിഷയങ്ങളില്‍ ഭരണകൂടം നടത്തുന്ന ഇടപെടലുകളെപ്പറ്റി കുറെയേറെ വെളിച്ചം പകരുന്നു. വിശദവിവരങ്ങള്‍ http://www.mongrelmedia.com/film/black-code.aspx എന്ന സൈറ്റില്‍ ലഭ്യമാണു്. ഇതേ സൈറ്റില്‍ നിന്നുതന്നെ ഡൗണ്‍ലോഡ് ലിങ്കും കിട്ടും.

Black Code by Mongrel Media

Black Code

ഇന്ത്യയില്‍ ബിറ്റ്കോയിന്‍ ഇടപാടുകളില്‍ വന്‍വര്‍ദ്ധന

ആശ്വസിക്കാവുന്ന കാര്യമാണു് – പ്രധാനമന്ത്രിയുടെ തലതിരിഞ്ഞ സാമ്പത്തികപരിഷ്കാരങ്ങളുടെ അനന്തരഫലമായി ചില ബുദ്ധിമാന്മാരായ വ്യക്തികള്‍ യഥാര്‍ത്ഥ കാഷ്ലെസ്സ് ഇക്കണോമിയിലേയ്ക്കു് തിരിഞ്ഞിരിക്കുന്നു. അവര്‍ ഉപയോഗിക്കുന്നതു് പേടിയെമ്മോ യുപിഐയോ ഒന്നുമല്ല, അതിനേക്കാളൊക്കെ ശക്തമായ ബിറ്റ്കോയിനാണു്. മൂന്നു വ്യത്യസ്ത ബിറ്റ്കോയിന്‍ എക്സ്ചേഞ്ച് സ്റ്റാര്‍ട്ടപ്പുകളാണു് [1] ചുരുങ്ങിയ സമയം കൊണ്ടു് ഇന്ത്യയില്‍ ലോഞ്ച് ചെയ്തതു്. ഈ പോസ്റ്റ് എഴുതുന്ന സമയത്തു് ഒരു ബിറ്റ്കോയിന്റെ വില 67,737 ഉറുപ്പികയാണു്. നവംബര്‍ എട്ടിനു 51,491 ഉറുപ്പികയില്‍ നിന്നു തുടങ്ങിയ റാലിയാണു് ഇപ്പോള്‍ 67,737-ല്‍ എത്തിനില്ക്കുന്നതു്.

Bitcoin

ബിറ്റ്കോയിന്‍ വഴി നടത്തപ്പെടുന്ന ഇടപാടുകള്‍ തികച്ചും സുരക്ഷിതവും വ്യക്തികളുടെ സ്വകാര്യത സംരക്ഷിക്കുന്നതുമാണു്. ബിറ്റ്കോയിനെപ്പറ്റി കൂടുതലറിയാന്‍ വിക്കിപീഡിയ കാണുക.

പ്രധാനമായും ഇന്റർനെറ്റിലൂടെയുള്ള സാമ്പത്തിക ഇടപാടുകൾക്കായി ഉപയോഗിക്കുന്ന ഡിജിറ്റൽ നാണയമാണ് ബിറ്റ്കോയിൻ (Bitcoin). ഇത് ലോഹ നിർമ്മിതമായ നാണയമോ കടലാസ് നോട്ടോ അല്ല. കമ്പ്യൂട്ടർ ഭാഷയിൽ തയ്യാറാക്കിയിരിക്കുന്ന ഒരു പ്രോഗ്രാം അല്ലെങ്കിൽ അല്ലെങ്കിൽ സോഫ്റ്റ്‌വെയർ കോഡാണ്. എൻക്രിപ്ഷൻ സാങ്കേതികവിദ്യ ഉപയോഗിക്കുന്നതിനാൽ ഇവയെ ‘ക്രിപ്റ്റോ കറൻസി’ എന്നും വിളിക്കാറുണ്ട്.

ഇടനിലക്കാരോ വിവിധ രാജ്യങ്ങളിലെ കേന്ദ്രബാങ്കുകളോ സർക്കാരുകളോ നിയന്ത്രിക്കാനില്ലാത്ത സ്വതന്ത്ര നാണയം എന്ന ആശയമാണ് ബിറ്റ്കോയിനിലൂടെ യാഥാർത്ഥ്യമായത്. ആഗോള സാമ്പത്തിക, ബാങ്കിങ് തകർച്ചയുടെ നിരാശയിൽ നിന്നാണ് ഡിജിറ്റൽ കറൻസി എന്ന ആശയം രൂപംകൊള്ളുന്നത്. 2008-ൽ സതോഷി നകമോട്ടോ ആണ് ബിറ്റ്കോയിൻ അവതരിപ്പിച്ചത്. ‘സതോഷി നകമോട്ടോ’ എന്നത് ഒരു വ്യക്തിയോ ഒരു സംഘം ഐ.ടി. വിദഗ്ദർ സ്വയം വിശേഷിപ്പിക്കുന്ന പേരോ ആയിരിക്കാമെന്ന് അഭ്യൂഹങ്ങളുണ്ട്. 2016 മേയിൽ ഓസ്ട്രേലിയയിലെ ഐ.ടി. വിദഗ്ദനും വ്യവസായിയുമായ ക്രെയ്ഗ് റൈറ്റ് ബിറ്റ്കോയിന്റെ ഉടമസ്ഥാവകാശ വാദവുമായി രംഗത്തെത്തിയിരുന്നു

ബിറ്റ്കോയിന്റെ ഉപജ്ഞാതാക്കൾ 2.10 കോടി ബിറ്റ്കോയിനുകളാണ് സൃഷ്ടിച്ചത്. ഇവ ഇരുപത് വർഷം കൊണ്ടു പൂർണ്ണമായും ലഭ്യമാക്കുകയും പിന്നീട് പുതിയവ കിട്ടുകയുമില്ലെന്ന് അവർ പറഞ്ഞിരുന്നു. നിലവിലുള്ള ബിറ്റ്കോയിനുകൾ ഉപയോഗിച്ചുള്ള ഇടപാടുകൾ മാത്രമേ പിന്നീട് നടക്കുകയുള്ളൂ. സാധാരണ കറൻസികളുടെ മൂല്യം എപ്പോൾ വേണമെങ്കിലും ഇടിയാൻ സാധ്യതയുള്ളപ്പോൾ ബിറ്റ്കോയിന് ആ ഭീഷണിയില്ല. കാരണം അവയുടെ എണ്ണം കൂടുന്നില്ല. സാധാരണ കറൻസി എത്ര വേണമെങ്കിലും അച്ചടിച്ചിറക്കി മൂല്യം കുറയ്ക്കുവാൻ കേന്ദ്രബാങ്കുകൾക്കു സാധിക്കും

[1] (a) സെബ്പേ  (b) യൂനോകോയിന്‍  (c) കോയിന്‍സെക്യൂര്‍

അവലംബം

  1. http://www.forbes.com/sites/krnkashyap/2016/12/22/indias-demonetization-is-causing-bitcoin-to-surge-inside-the-country/#52d57ddd738a
  2. http://www.manoramaonline.com/technology/technology-news/indian-bitcoin-buying.html

ഫേസ്ബൂക്ക് എങ്ങനെ നിങ്ങളെ ഉപയോഗിക്കുന്നു?

ചുമ്മാ കണ്ടുനോക്കൂ. ഒരു മാട്രിക്സ് സ്പൂഫ് ടെലിവിഷന്‍ എപ്പിസോഡ് ആണിതു്. എങ്ങനെ ഫേസ്ബൂക്ക് നിങ്ങളെ ഉപയോഗിക്കുന്നു എന്നു ഒരല്‍പ്പം തമാശ കലര്‍ത്തി പറയുന്നു എന്നേയുള്ളൂ. പറയുന്നതു പക്ഷേ മൂഴുവന്‍ വെള്ളം ചേര്‍ക്കാത്ത സത്യമാണു്.

ഗോഡാഡിയുടെ ചതി

കുടുംബപ്പേരു വച്ചു് ഒരു ഡൊമൈന്‍ കിട്ടിയപ്പോള്‍ ഒന്നു സന്തോഷിച്ചു. ഗോഡാഡി വഴിയാണു് സംഗതി എടുത്തതു്. കൃത്യം 611 രൂപ ഓണ്‍ലൈന്‍ ആയി നല്‍കി. സംഗതി നുമ്മടെ കയ്യിലായി എന്നു കണ്ടപ്പോഴേയ്ക്കും വന്നു തുടങ്ങി മൊബൈലിലൂടെ എസ്സെമ്മെസ് സന്ദേശങ്ങള്‍. നിങ്ങടെ സൈറ്റ് ഞങ്ങളെ ഏല്‍പ്പിക്കൂ ഞങ്ങള്‍ ദിപ്പ ശരിയാക്കിത്തരാം എന്ന മട്ടിലാണു് സന്ദേശങ്ങള്‍ ഒക്കെയും. 48 മണിക്കൂറിനുള്ളില്‍ 12 SMS ഇതുവരെ കിട്ടി. കഷ്ടം ഗോഡാഡീ കഷ്ടം. ഉപഭോക്താക്കളുടെ പ്രൈവസി ഇങ്ങനെ പകല്‍വെളിച്ചത്തില്‍ത്തന്നെ ചോര്‍ത്തി നാട്ടുകാര്‍ക്കു മുഴുവന്‍ നല്‍കണോ? ഡൊമൈന്‍ രജിസ്റ്റര്‍ ചെയ്യുമ്പോള്‍ കൃത്യമായ മൊബൈല്‍ നമ്പര്‍ ഇനി ഞാനൊരിക്കലും കൊടുക്കില്ല. പിന്നീടെപ്പോഴെങ്കിലും ഹൂഈസില്‍ കയറി അപ്ഡേറ്റ് ചെയ്താല്‍ പോരേ?

നാലാംപൗരന്‍

നാലാംപൗരന്‍

കാത്തുകാത്തിരുന്ന സിനിമ ~ നാലാം പൗരന്‍ ~ കണ്ടതിന്നലെയാണ്. രാത്രി വൈകുവോളം കുത്തിയിരുന്നു കണ്ടു. സംശയം വരുന്ന ഭാഗങ്ങളില്‍ റിമോട്ട് കൊണ്ട് പോസ് ചെയ്ത് സബ്ടൈറ്റില്‍ വായിച്ചു മനസ്സിലാക്കിയൊക്കെയാണ് കണ്ടത്. എങ്കിലും ഒന്നും പ്രത്യേകിച്ച് തോന്നിയില്ല. സ്നോഡന്‍ വെളിപ്പെടുത്തലുകള്‍ മുഴുവനും അതിന്റെ വിലയിരുത്തലുകള്‍ ഉള്‍പ്പെടെ ഇതിനകം പല ആവൃത്തി വായിച്ചതിനാലാകണം പുതുതായി ഒന്നും സിനിമയില്‍ നിന്ന് ലഭിച്ചില്ല എന്ന തോന്നലുണ്ടായത്. ഗാര്‍ഡിയനില്‍ വന്ന ഗ്ലെന്‍ ഗ്രീന്‍വാള്ഡിന്റെ മിക്കവാറും എല്ലാ പോസ്റ്റുകളും പല പല അവസരങ്ങളിലായി വായിച്ചിട്ടുണ്ട്. എങ്കിലും ഇരുപത്തൊന്നാം നൂറ്റാണ്ടു കണ്ട ഏറ്റവും വലിയ വെളിപ്പെടുത്തലുകള്‍ നടത്തിയ ഈ അമേരിക്കന്‍ കുഴലൂത്തുകാരന്‍ (Whistleblower) ഭീകരമായ ആ വെളിപ്പെടുത്തലുകള്‍ നടത്തുന്ന നേരത്ത് അനുഭവിച്ച മാനസിക സംഘര്‍ഷങ്ങള്‍ ഒപ്പിയെടുക്കുന്നതില്‍ സിനിമ വിജയിച്ചിടുണ്ട്. ഒരു സ്പൈ ത്രില്ലര്‍ കാണുമ്പോള്‍ ഉണ്ടാവുന്ന അതേ അസ്വസ്ഥതയാര്‍ന്ന അനുഭൂതി യഥാര്‍ത്ഥ സംഭവങ്ങളെ ആസ്പദമാക്കി നിര്‍മ്മിച്ച ഈ ഡോക്യുമെന്ററി കാണുമ്പോള്‍ ഉണ്ടാകും എന്നതില്‍ സംശയമില്ല.

നാലാംപൗരന്‍ റിലീസ് ചെയ്തു

ഇതാ നാലാംപൗരന്‍ (CITIZENFOUR) പുറത്തുവന്നു. കേട്ടിടത്തോളം ലോറാ പൊയിട്രാസ് ഇവിടെ തകര്‍ത്തിട്ടുണ്ട്. ഇന്ത്യയില്‍ എന്നു റിലീസ് ചെയ്യും എന്നറിയില്ല. നിങ്ങള്‍ വലിക്കുന്ന ഓരോ ശ്വാസവും മുന്നോട്ടു വയ്ക്കുന്ന ഓരോ ചുവടും മൊഴിയുന്ന ഓരോ പദവും നിരീക്ഷണത്തിലാണ് എന്ന് ഈ സിനിമ എല്ലാവരോടും ഉറക്കെ വിളിച്ചു കൂവുന്നു. വര്‍ഷങ്ങള്‍ക്കുമുമ്പ് റിച്ചാര്‍ഡ് സ്റ്റാള്‍മാന്റെ ഒരു പ്രഭാഷണത്തില്‍ സാസി (Software as a Service) നെ പറ്റിയുള്ള അദ്ദേഹത്തിന്റെ നിരീക്ഷണങ്ങള്‍ ശ്രവിച്ചപ്പോള്‍ തോന്നിയത് അയാള്‍ക്ക് ഭ്രാന്താണ് എന്നാണ്. ക്ലൗഡ് കമ്പ്യൂട്ടിംഗ് സുരക്ഷിതമാണെന്നായിരുന്നു അന്നത്തെ എന്റെ ധാരണ. വിവരങ്ങള്‍ കിടക്കുന്നതു സ്വന്തം കമ്പ്യൂട്ടറില്‍ അല്ലല്ലോ. മറ്റാര്‍ക്കും എന്റെ ഫയലുകള്‍ ആക്സസ് ചെയ്യാന്‍ കഴിയാത്ത വിധം ഭദ്രമാണെന്ന ഒരു ആത്മവിശ്വാസം. സ്നോഡന്‍ ആ വിപ്ലവകരമായ വെളിപ്പെടുത്തലുകള്‍ പുറത്തുവിടും വരെ ഈ ധാരണയില്‍ ഞാന്‍ ഉറച്ചു നിന്നു. അതുവരെ എന്തൊക്കെ വിവരങ്ങളാണ് തേഡ് പാര്‍ട്ടി ക്ലൗഡ് സേവനങ്ങള്‍ വഴി ഞാന്‍ പങ്കുവച്ചത് എന്ന് ഇന്ന് ഓര്‍ക്കുമ്പോള്‍ പേടി തോന്നുന്നു. എന്നെപ്പോലുള്ള സാധാരണക്കാര്‍ വരെയുള്ളവരുടെ ഡിജിറ്റല്‍ ഫുട്ട് പ്രിന്റുകള്‍ അവരുടെ പക്കല്‍ പണ്ടേ കാണും.

സിനിമ കാണാന്‍ ധൃതിയായി.

മാര്‍ച്ച് ആദ്യവാരത്തോടെ നാലാം പൗരന്‍ view-on-demand എന്ന നിലയില്‍ ഇന്റര്‍നെറ്റില്‍ റിലീസ് ചെയ്തു. താഴെയുള്ള കണ്ണിയില്‍ നിന്ന് നേരിട്ട് കാണാം.

http://kobex.filminstan.pw/4044364

വാല്‍ക്കഷണം

ഈ പോസ്റ്റ് ചെയ്തുകഴിഞ്ഞതിന് നാലുമാസങ്ങള്‍ക്ക് ശേഷം നാലാം പൗരനെക്കുറിച്ച് മലയാള മനോരമയില്‍ ഒരു ഫുള്‍പേജ് വാര്‍ത്ത വന്നത് ശരിക്കും അത്ഭുതപ്പെടുത്തി. മലയാളത്തിലെ ഏറ്റവും പ്രചാരമുള്ള ഒരു പത്രത്തില്‍ത്തന്നെ ഇങ്ങനെയുള്ള വാര്‍ത്തകള്‍ വരുന്നത് തികച്ചും ആശാവഹമാണ്.

The news appeared on Malayala Manorama

മലയാള മനോരമയില്‍ വന്ന ഫുള്‍പേജ് വാര്‍ത്ത

മെറ്റാ ഡാറ്റ അനോണിമൈസേഷൻ ടൂൾ കിറ്റ്

കഴിഞ്ഞ ദിവസമാണ് മെറ്റാ ഡാറ്റ അനോണിമൈസേഷൻ ടൂൾ കിറ്റ് എന്ന ഈ കുഞ്ഞൻ ടൂൾ ഉപയോഗിക്കേണ്ട ആവശ്യം വന്നത്. അപ്പോൾ മാത്രമാണ് മെറ്റാഡാറ്റ അനോണിമൈസേഷന്റെ ആവശ്യകത ശരിക്കും ബോധ്യമായതും. ഞാൻ നിർമ്മിച്ച ഒരു ഫയലിൽ ഞാനറിയാതെ എന്നെപറ്റി കുനുകുനാന്നു പലതും ഒക്കെ എഴുതി വയ്ക്കുന്നുണ്ട്‌. നല്ല കാര്യമാണ്, സാധാരണ ഘട്ടങ്ങളിൽ അത് കുറെയേറെ പ്രയോജനപ്രദവുമാണ്. പക്ഷെ അനോണിമസ് ആയി ഒരു ഡാറ്റ കൈകാര്യം ചെയ്യുമ്പോൾ ഇക്കാര്യം പ്രത്യേകം സൂക്ഷിച്ചില്ലെങ്കിൽ ലവന്റെ കാര്യം പോക്കാണ്.

ഡിജിറ്റൽ ക്യാമറ ഉപയോഗിച്ച് ഒരു ഫോട്ടോ എടുക്കുമ്പോഴും സ്കാനർ ഉപയോഗിച്ച് ഒരു ഇമേജ് സ്കാൻ ചെയ്യുമ്പോഴും, ഗിമ്പ് ഉപയോഗിച്ച് ഒരു ഇമേജ് എഡിറ്റ്‌ ചെയ്യുമ്പോഴും ഒക്കെ അതതു ഫയലുകളിൽ ഒരു മെറ്റാഡാറ്റ സ്വയം ക്രിയേറ്റ് ചെയ്യപ്പെടുന്നുണ്ട്. ഡിജിറ്റൽ ക്യാമറയിൽ സേവ് ചെയ്യുന്ന ജെപെഗ് ഫയലുകളിൽ രേഖപ്പെടുത്തുന്ന മെറ്റാഡാറ്റയിൽ (ഇതിനെ എക്സിഫ് ഡാറ്റ എന്നാണു വിളിക്കുന്നത്‌) സാധാരണയായി ദാ, ഇത്രയും ഡീറ്റെയിൽസ് ഉണ്ടായിരിക്കും.

Manufacturer | Model name | Orientation (rotation) | Software | Date and Time | YCbCr Positioning | Compression | x-Resolution | y-Resolution | Resolution Unit | Exposure Time | FNumber | ExposureProgram | Exif Version | Date and Time (original) | Date and Time (digitized) | ComponentsConfiguration | Compressed Bits per Pixel | Exposure Bias | MaxApertureValue | Metering Mode | Flash | Focal Length | MakerNote | FlashPixVersion | Color Space | PixelXDimension | PixelYDimension | File | Source | InteroperabilityIndex | InteroperabilityVersion

MAT

മെറ്റാ ഡാറ്റ അനോണിമൈസേഷൻ ടൂൾ കിറ്റ്

ഈ മെറ്റാ ഡാറ്റ ഒരു പക്ഷെ അനോണിമിറ്റിയെ നിശ്ശേഷം തകർത്തു തരിപ്പണമാക്കി നമ്മുടെ തലയും കൊണ്ട് പോയേക്കാം. ഡിജിറ്റൽ ക്യാമറയിലെ എക്സിഫ് ഡാറ്റയെ പ്പറ്റി സാധാരണ ഉപയോക്താക്കൾ ഒട്ടും ബോധവാന്മാരല്ല, ഓഫീസ് പാക്കെജുകളിലെ മെറ്റാഡാറ്റയെപ്പറ്റി അത്ര പോലും മിക്കവർക്കും അറിയില്ല.

ഫയലുകളിൽ തനിയെ വളർന്ന ഈ മെറ്റാഡാറ്റയെ വടിച്ചു കളയാൻ വേണ്ടി സൃഷ്ടിക്കപ്പെട്ട സേഫ്റ്റി റേസർ ആണ് മെറ്റാ ഡാറ്റ അനോണിമൈസേഷൻ ടൂൾ കിറ്റ്. ടോർ പ്രൊജക്റ്റിന് കീഴിൽ 2011-ലെ ഗൂഗിൾ സമ്മർ ഓഫ് കോഡിൽ ചെയ്ത പ്രൊജക്റ്റ്‌ ആയിരുന്നു മെറ്റാ ഡാറ്റ അനോണിമൈസേഷൻ ടൂൾ കിറ്റ്. ജേപീഈജീ, പീയെൻജി, ഓഡീടി, ഡോക്എക്സ്, എംപീഈജി തുടങ്ങിയ ഒട്ടനവധി ഫയൽ ഫോർമാറ്റുകളിലെ മെറ്റാഡാറ്റ ഈ ടൂൾ ഉപയോഗിച്ച് ഒറ്റയടിക്ക് വടിച്ചു കളയാം. ഉപയോഗിക്കാൻ ഒരു വൈദഗ്ധ്യവും വേണ്ട, ആർക്കും എളുപ്പത്തിൽ ഉപയോഗിക്കാൻ കഴിയും വിധം സിമ്പിൾ ആണ് ഇതിന്റെ സമ്പർക്കമുഖം (interface). ടെയിൽസ് ഓപ്പറേറ്റിംഗ് സിസ്റ്റത്തിൽ മെറ്റാ ഡാറ്റ അനോണിമൈസേഷൻ (മാറ്റ്) ടൂൾ കിറ്റ് ഡീഫോൾട്ട് ആയി ഉണ്ട്. ഡെബിയൻ റിപ്പോസിറ്ററിയിലും മാറ്റ് ടൂൾ കിറ്റ്ഉൾപ്പെടുത്തിയിട്ടുണ്ട്.