ഈസ്റ്റര്‍ തീയതി

എല്ലാ വര്‍ഷവും ഡിസംബര്‍ 25-നാണു് ക്രിസ്മസ്. അതെല്ലാര്‍ക്കുമറിയാം. അതുകൊണ്ടു് ഹോളിഡേ ട്രിപ്പുകള്‍ മുന്‍കൂട്ടി പ്ലാന്‍ ചെയ്യാന്‍ വളരെ എളുപ്പമാണു്. പക്ഷേ ഈസ്റ്റര്‍ തീയതി അങ്ങനല്ല, എല്ലാ വര്‍ഷവും അതു് മാറിക്കൊണ്ടിരിക്കും. പലപ്പോഴും മിക്കവാറും നമ്മില്‍ പലരും ഈസ്റ്റര്‍ തീയതി എന്നാണെന്നറിയുന്നതുതന്നെ അതതു വര്‍ഷത്തെ കലണ്ടറുകള്‍ കയ്യില്‍ക്കിട്ടിക്കഴിയുമ്പോഴായിരിക്കും. രണ്ടു വര്‍ഷം കഴിഞ്ഞുവരുന്ന ഈസ്റ്റര്‍ തിയതി കണ്ടെത്താന്‍ കുറച്ചു ബുദ്ധിമുട്ടേണ്ടതായി വരും. ഇനി ഈസ്റ്റര്‍ എന്നാണെന്നറിഞ്ഞാല്‍ ഓശാനഞായര്‍, പെസഹാ വ്യാഴം, ദുഃഖവെള്ളി, പുതുഞായര്‍ തുടങ്ങിയ തിയതികളും അറിയാന്‍ കഴിയും. പക്ഷേ എങ്ങനെയാണു് ഈസ്റ്റര്‍ തീയതി കണക്കാക്കുന്നതെന്നറിയേണ്ടേ?

ഈസ്റ്റര്‍ തീയതിയുടെ ചരിത്രം

യഹൂദരുടെ പെസഹാ നീസാന്‍ മാസം ഹീബ്രൂ കലണ്ടര്‍ പ്രകാരം നീസാന്‍ മാസം 14-ാം തീയതിയാണു്. ഉദ്ദേശം സി.ഇ. രണ്ടാം നൂറ്റാണ്ടു മുതല്‍  ഈ തീയതിയെ അധികരിച്ചാണു് മിക്കവാറും ആദിമക്രൈസ്തവസഭ ഈസ്റ്റര്‍ ആചരിച്ചിരുന്നതു്. ഏതു ദിവസമായാലും നീസാന്‍ 14-നു തന്നെ ഈസ്റ്റര്‍ ആചരിക്കുന്ന രീതിയായിരുന്ന ഏഷ്യാമൈനറിലും സിറിയയിലുമുള്ള ക്രൈസ്തവര്‍ സ്വീകരിച്ചിരുന്നതു്. ക്രിസ്തുവിന്റെ അപ്പസ്തോലനായ യോഹന്നാന്റെ പാരമ്പര്യമനുസരിച്ചാണു് അവര്‍ ഈ തിയതി ഈസ്റ്റര്‍ ആഘോഷങ്ങള്‍ക്കായി തെരഞ്ഞടുത്തതു്. എന്നാല്‍ റോമാക്കാരാകട്ടെ നീസാന്‍ മാസം 14-ാം തീയതി കഴിഞ്ഞുവരുന്ന ഞായറാഴ്ചയായിരുന്നു ഈസ്റ്റര്‍ ആഘോഷിച്ചിരുന്നതു്. ക്രിസ്തുവിന്റെ ഉയിര്‍ത്തെഴുന്നേല്പു കൂടി കണക്കിലെടുത്താണു് അത്തരമൊരു തിയതി അവര്‍ തെരഞ്ഞടുക്കുവാന്‍ കാരണം. അങ്ങനെ പലപല വാദഗതികള്‍ മുന്‍നിര്‍ത്തി ഈസ്റ്റര്‍ തീയതിയെപ്പറ്റിയുള്ള തര്‍ക്കങ്ങളും ഭിന്നതകളും സഭ എന്നു തുടങ്ങിയോ അന്നുമുതല്‍ക്കേതന്നെ തുടങ്ങിക്കഴിഞ്ഞിരുന്നു. ഒടുവില്‍ സി.ഇ. 325-ല്‍ കോണ്‍സ്റ്റന്റൈന്‍ ചക്രവര്‍ത്തിയുടെ നേതൃത്വത്തില്‍ വിളിച്ചുചേര്‍ത്ത ഒന്നാം നിഖ്യ സൂനഹദേോസില്‍ വച്ചാണു് ഈ തര്‍ക്കത്തിനു് താല്‍ക്കാലികമായെങ്കിലും ഒരു പരിഹാരമുണ്ടായതു്. പിന്നീടു് നിഖ്യാ കൗൺസില്‍ തീര്‍പ്പാക്കിയ സമവായം ഏതാണ്ടെല്ലാ ക്രൈസ്തവസഭകളും പിന്‍തുടരുകയായിരുന്നു.

നിഖ്യാ കൗൺസില്‍ തീര്‍പ്പാക്കിയ സമവായം

ഈസ്റ്റര്‍ ഞായറാഴ്ച തന്നെ ആചരിക്കണം. യഹൂദരുടെ ഒരു ആഘോഷവുമായും, അവരുടെ കാലഗണനരീതികളുമായും ഈസ്റ്ററിനെ ബന്ധിപ്പിക്കാതെ തികച്ചും സ്വതന്ത്രമായി ഈസ്റ്റര്‍ തീയതി നിശ്ചയിക്കുക. ഇതായിരുന്നു ഒന്നാം നിഖ്യാ സൂനഹദോസ് ഈസ്റ്റര്‍ തീയതി നിശ്ചയിക്കാനെടുത്ത മാനദണ്ഡം. ഇതു പ്രകാരം സൂര്യന്‍ ഭൂമിയ്ക്കുനേരെ മുകളില്‍ വരുന്ന വസന്തവിഷുവ (Vernal Equinox) ത്തിനു ശേഷം വരുന്ന പൗര്‍ണ്ണമിയുടെ പിറ്റേ ഞായറാഴ്ച എന്നു് ഈസ്റ്റര്‍ തീയതി പുനര്‍നിര്‍ണ്ണയിക്കപ്പെട്ടു.

1582-ല്‍ ഗ്രിഗരി പതിമൂന്നാമന്‍ മാര്‍പാപ്പയുടെ കാലഘട്ടത്തില്‍ നടന്ന കലണ്ടര്‍ നവീകരണത്തിനു ശേഷം വീണ്ടും ഈസ്റ്റര്‍ തീയതികളില്‍ പല സഭകളിലും ഭിന്നത വന്നു. റോമന്‍ കത്തോലിക്കാ സഭയെ അംഗീകരിക്കുന്ന സഭകള്‍ ഗ്രിഗോറിയന്‍ കാലഗണനാരീതി പ്രകാരം ഈസ്റ്റര്‍ തീയതി കണക്കാക്കിയപ്പോള്‍ പൗരസ്ത്യസഭകള്‍ മിക്കവാറും പഴയ ജൂലിയന്‍ കലണ്ടര്‍ പ്രകാരമാണു് ഈസ്റ്റര്‍ തീയതി കണക്കാക്കിയതു്. ഇതു രണ്ടും നിഖ്യാ സൂനഹദോസിന്റെ മാനദണ്ഡങ്ങള്‍ പ്രകാരം തന്നെയാണെങ്കിലും കലണ്ടറിന്റെ വ്യത്യാസം നിമിത്തമാണു് തിയതികള്‍ വ്യത്യസ്തമായതു്.

ഈസ്റ്റര്‍ തിയതിയിലെ ഭിന്നത മാറ്റുന്നതിനായി 1997-ല്‍ സിറിയയിലെ ആലപ്പോയില്‍ ചേര്‍ന്ന ഉച്ചകോടിയില്‍ വച്ചു്  വേള്‍ഡ് കൗണ്‍സില്‍ ഓഫ് ചര്‍ച്ചസ് പുതിയൊരു മാര്‍ഗ്ഗരേഖ നിര്‍ദ്ദേശിക്കുകയുണ്ടായി. ജറൂസലേമിലെ ധ്രുവരേഖ അടിസ്ഥാനപ്പെടുത്തിക്കൊണ്ടു് സൂര്യന്‍ ജറൂസലേമിനുനേരെ മുകളില്‍ വരുന്ന ജ്യോതിശാസ്ത്രപരമായ വസന്തവിഷുവ (Vernal Equinox) ത്തിനു ശേഷം വരുന്ന ജ്യോതിശാസ്ത്രപരമായ പൗര്‍ണ്ണമിയുടെ പിറ്റേ ഞായറാഴ്ച ഈസ്റ്റര്‍ എല്ലാ സഭകള്‍ക്കും ഒരുമിച്ചാഘോഷിക്കാം എന്നായിരുന്നു ഈ മാര്‍ഗ്ഗരേഖ. ഇതിനു സമാനമായ ജ്യോതിശാസ്ത്രപരമായ മറ്റൊരു നിര്‍ദ്ദേശം 1923-ല്‍ കോണ്‍സ്റ്റാന്റിനോപ്പിളില്‍ വച്ചുനടന്ന പാന്‍ ഓര്‍ത്തഡോക്സ് കോണ്‍ഗ്രസിലും സമര്‍പ്പിക്കപ്പെട്ടിരുന്നു. ഇതൊന്നും പക്ഷെ സ്വീകരിക്കപ്പെട്ടില്ല. ആദിമക്രൈസ്തവര്‍ ചെയ്തതുപോലെ ഈസ്റ്റര്‍ ആഘോഷങ്ങള്‍ ലോകം വ്യത്യസ്ത തീയതികളില്‍ത്തന്നെ ആചരിക്കട്ടെ.

ഈസ്റ്റര്‍ തിയതി എങ്ങനെ മുമ്പേ അറിയാം?

ഞാന്‍ ഉപയോഗിക്കുന്ന ഗ്നു/ലിനക്സ് കമ്പ്യൂട്ടറില്‍ ഈസ്റ്റര്‍ തീയതി അറിയാന്‍ വളരെ എളുപ്പമാണു് – ഒരു ചെറിയ കമാന്റ് ടെര്‍മിനലില്‍ പാസ് ചെയ്താല്‍ കഴിഞ്ഞുപോയ വര്‍ഷങ്ങളിലെയും ഇനി വരാനിരിക്കുന്ന നൂറ്റാണ്ടുകളിലേയും ഈസ്റ്റര്‍ തീയതികള്‍ അതു പറഞ്ഞുതരും. cal, ncal എന്നീ രണ്ടു കലണ്ടര്‍ പ്രോഗ്രാമുകള്‍ യൂണിക്സ് സമാന കമ്പ്യൂട്ടറുകളിലുണ്ടു്. ഈ പ്രോഗ്രാമുകളില്‍ ഗ്രിഗോറിയന്‍ ജൂലിയന്‍ തീയതികളുടെ സമഗ്രചരിത്രമനുസരിച്ചുള്ള എല്ലാ വിവരങ്ങളൂം ഉള്‍പ്പെടുത്തിയിട്ടുള്ളതിനാല്‍ ഏതൊക്കെ രാജ്യങ്ങള്‍ ഏതൊക്കെ വര്‍ഷങ്ങളില്‍ ഗ്രിഗോറിയന്‍ കാലഗണന സമ്പ്രദായം സ്വീകരിച്ചു, പാശ്ചാത്യ പൗരസ്ത്യസഭകളുടെ ഈസ്റ്റര്‍ തീയതികള്‍ ഏതൊക്കെ തുടങ്ങിയ കൃത്യമായ വിവരങ്ങളെല്ലാം തന്നെ ഇതിലൂടെ അറിയാന്‍ കഴിയും. ഉദാഹരണമായി സി.ഇ. 4012-ലെ കത്തോലിക്കാ ഈസ്റ്റര്‍ തിയതി അറിയാന്‍ ചെറിയൊരു കമാന്റ് നല്‍കിയാല്‍ മതി.

ncal -e 4012

4012-ലെ കത്തോലിക്കാ ഈസ്റ്റര്‍ തീയതി 22 April 4012 ഞായറാഴ്ചയാണെന്നു് ഉടന്‍ ഉത്തരം കിട്ടും.

ഇനി അതേ വര്‍ഷത്തിലെ ഓര്‍ത്തഡോക്സ് ഈസ്റ്റര്‍ എന്നാണെന്നറിയാന്‍ കമാന്റില്‍ ചെറിയൊരു മാറ്റം വരുത്തിയാല്‍ മതി

ncal -o 4012

4012-ലെ ഓര്‍ത്തഡോക്സ് ഈസ്റ്റര്‍ തീയതി 06 May 4012 ഞായറാഴ്ചയാണെന്നു് കണ്ടെത്താന്‍ അധികം കാത്തിരിക്കേണ്ട.

അതുപോലെ ncal -p എന്ന കമാന്റ് കൊടുത്താല്‍ ഏതൊക്കെ രാജ്യങ്ങള്‍ ഏതൊക്കെ വര്‍ഷങ്ങളില്‍ ഗ്രിഗോറിയന്‍ കലണ്ടര്‍ സ്വീകരിച്ചു എന്നും അറിയാം. അതിന്റെ ഔട്ട്പൂട്ട് ഇവിടെ നല്‍കിയിരിക്കുന്നു.

AL Albania        1912-11-30      IT Italy          1582-10-04
AT Austria        1583-10-05      JP Japan          1918-12-18
AU Australia      1752-09-02      LI Lithuania      1918-02-01
BE Belgium        1582-12-14      LN Latin          9999-05-31
BG Bulgaria       1916-03-18      LU Luxembourg     1582-12-14
CA Canada         1752-09-02      LV Latvia         1918-02-01
CH Switzerland    1655-02-28      NL Netherlands    1582-12-14
CN China          1911-12-18      NO Norway         1700-02-18
CZ Czech Republic 1584-01-06      PL Poland         1582-10-04
DE Germany        1700-02-18      PT Portugal       1582-10-04
DK Denmark        1700-02-18      RO Romania        1919-03-31
ES Spain          1582-10-04      RU Russia         1918-01-31
FI Finland        1753-02-17      SI Slovenia       1919-03-04
FR France         1582-12-09      SE Sweden         1753-02-17
GB United Kingdom 1752-09-02      TR Turkey         1926-12-18
GR Greece         1924-03-09     *US United States  1752-09-02
HU Hungary        1587-10-21      YU Yugoslavia     1919-03-04
IS Iceland        1700-11-16

ഈസ്റ്റര്‍ തീയതി കണ്ടുപിടിക്കാന്‍ ഇത്രയും നല്ല ഒരു മാര്‍ഗ്ഗം നമ്മുടെ സ്വന്തം കമ്പ്യൂട്ടറില്‍ ഉണ്ടു് എന്നു കാണിക്കാന്‍ വേണ്ടിയാണു് ഈ പോസ്റ്റ്. വിശദമായി എല്ലാം അതിന്റെ മാന്‍പേജില്‍ പറഞ്ഞിട്ടുള്ളതിനാല്‍ ഈ ആപ്ലിക്കേഷനെപ്പറ്റി ഇനി കൂടുതല്‍ വിശദീകരിക്കേണ്ടതില്ലല്ലോ.

Advertisements

ഗ്നു/ലിനക്സ് ആണെന്നു കരുതി സുരക്ഷയില്‍ അഹങ്കരിക്കേണ്ട

എയൂആറില്‍ മാല്‍വെയര്‍

ആര്‍ച്ച് യൂസര്‍ റെപ്പോസിറ്ററിയിലാണു് പുതിയ മാല്‍വെയര്‍ കണ്ടെത്തിയിരിക്കുന്നതു്. ചില ഉപയോഗപ്രദമായ സോഫ്റ്റ്‍വെയറുകള്‍ ചിലപ്പോള്‍ ആര്‍ച്ചിന്റെ അംഗീകൃത റെപ്പോസിറ്ററികളില്‍ ഉണ്ടായിക്കൊള്ളണമെന്നില്ല. എയൂആറില്‍ (ആര്‍ച്ച് യൂസര്‍ റെപ്പോസിറ്ററിയില്‍) അതുണ്ടാകുകയും ചെയ്യും. ഉദാഹരണമായി ഡെബിയനില്‍ ഞാന്‍ സ്ഥിരം ഉപയോഗിച്ചു കൊണ്ടിരുന്ന pdftk എന്ന പാക്കേജു് ആര്‍ച്ചിന്റെ പ്രധാന റെപ്പോസിറ്ററിയില്‍ ഉണ്ടായിരുന്നില്ല. അതിനു തത്തുല്യമായ മറ്റൊരു പാക്കേജ് കണ്ടെത്താന്‍ കഴിയാതെ വന്നപ്പോള്‍ നേരെ എയൂആറില്‍ നോക്കി. അതാ അവിടെയുണ്ട് ആ പാക്കേജു്. ഒന്നും നോക്കിയില്ല അപ്പോള്‍ത്തന്നെ അതങ്ങു് ഇന്‍സ്റ്റാള്‍ ചെയ്തു. അതുപോലെ തന്നെ ഇങ്ക്സ്കേപ്പില്‍ ചെയ്ത svg ഫയലുകള്‍ ഉപയോഗിച്ചു് അനിമേറ്റഡ് പ്രസന്റേഷന്‍ ചെയ്യാന്‍ കഴിയുന്ന sozi എന്ന പാക്കേജും എയൂആറില്‍ മാത്രമേയുള്ളൂ, ഇത്തരം ഒരുപാടു് പാക്കേജുകള്‍ക്കായി അനേകം ലിനക്സ് ഉപയോക്താക്കള്‍ എയൂആര്‍ പോലുള്ള യൂസര്‍ റെപ്പോസിറ്ററികള്‍ ഉപയോഗപ്പെടുത്തുന്നു.

എയൂആറില്‍ താഴെ പറയുന്ന പാക്കേജൂകളിലാണു് ഇപ്പോള്‍ മാല്‍വെയര്‍ കണ്ടെത്തിയിരിക്കുന്നതു്:

  1. acroread 9.5.5-8
  2. balz 1.20-3
  3. minergate 8.1

xeactor എന്നു നിക്ക്നെയിമുള്ള ട്രസ്റ്റഡ് യൂസര്‍ പ്രിവിലേജ് ഉള്ള ഒരു യൂസറാണു് ഇതില്‍ മാല്‍വെയര്‍ കടത്തിവിട്ടതു്. 2018 ജൂലൈ 8-നു് ഇതു കണ്ടെത്തിയതിനു് ഏതാനും മിനിട്ടുകള്‍ക്കുള്ളില്‍ യൂസറിനെ സസ്പെന്റ് ചെയ്യുകയും പാക്കേജ് പാച്ച് ചെയ്യുകയും ചെയ്തു. ഇതു സൂചിപ്പിക്കുന്നതു് ഡെബിയന്‍ ബാക്ക് പോര്‍ട്ട്സ്, എയൂആര്‍ തുടങ്ങിയ യൂസര്‍ റെപ്പോസിറ്ററികളും തേഡ് പാര്‍ട്ടി റെപ്പോസിറ്ററികളും ഉപയോഗിക്കുന്നതു് അത്ര സുരക്ഷിതമല്ല എന്നതാണു്. അഥവാ ഉപയോഗിക്കണമെങ്കില്‍ത്തന്നെ സൂക്ഷിച്ചു് ഉപയോഗിക്കുവാന്‍ ശ്രദ്ധിക്കുക. എയൂആറില്‍ മാല്‍വെയര്‍ കടത്തിവിട്ട xeactor എന്ന യൂസര്‍ ശേഖരിച്ച വിവരങ്ങള്‍ മെഷീന്‍ ഐഡി, uname -a എന്ന കമാന്റിന്റെ ഔട്ട്പുട്ട്, പാക്‍മാന്‍ വിവരങ്ങള്‍, systemctl list-units ഔട്ട്പുട്ട് എന്നിവയാണു്. താരതമ്യേന അത്ര മൂല്യമില്ലാത്ത ഈ വിവരങ്ങള്‍ എന്തിനാണിയാള്‍ ശേഖരിച്ചതെന്നു് ഇതുവരെ  സെക്യൂരിറ്റി വിദഗ്ദ്ധന്മാര്‍ക്കുപോലും മനസ്സിലായിട്ടില്ല.

എയൂആറില്‍ ട്രസ്റ്റഡ് യൂസര്‍ പ്രിവിലേജ് ഉള്ള ഒരു ഉപയോക്താവിനു് ഇത്തരമൊരു കുരുത്തക്കേടു് കാണിക്കാമെങ്കില്‍, സ്പൈയിംഗ് ഏജന്‍സികള്‍ക്കു് എന്തൊക്കെ കാണിക്കാന്‍ സാധിക്കില്ല? അതിനാല്‍ ജാഗ്രത പുലര്‍ത്തുക – നമ്മുടെ സുരക്ഷ നമ്മുടെ സ്വന്തം കരങ്ങളിലാണ്, തീക്കട്ടയില്‍ ഉറുമ്പരിക്കുന്ന കാലമാണിതെന്നു് ഓര്‍മ്മവയ്ക്കുക.

അവലംബം

https://sensorstechforum.com/arch-linux-aur-repository-found-contain-malware/

യൂട്യൂബ് വീഡിയോകള്‍ ഡൗണ്‍ലോഡ് ചെയ്യൂ ഈസിയായി

യൂട്യൂബില്‍ നിന്നുള്ള വീഡിയോകള്‍ ഡൗണ്‍ലോഡ് ചെയ്യുക എന്നതു് ശ്രമകരമായ ഒരു പണിയായിരുന്നു ഈയടുത്ത കാലം വരെയുമെനിയ്ക്കു്. ആദ്യം ഏതെങ്കിലും തേഡ് പാര്‍ട്ടി സൈറ്റുകളില്‍ ചെന്നു് (ഉദാ :— keepvid.com / savefromnet.com) യൂട്യൂബ് വീഡീയോയുടെ ലിങ്ക് നല്‍കി അതിന്റെ ലിങ്ക് കിട്ടിക്കഴിഞ്ഞശേഷം ഡൗണ്‍ലോഡ് ചെയ്തു് — അങ്ങനെ കുറേ സ്റ്റെപ്പുകള്‍ ഉണ്ടായിരുന്നു. എന്നാല്‍ ഒരു പ്ലേലിസ്റ്റ് ഒന്നടങ്കം ഡൗണ്‍ലോഡ് ചെയ്യേണ്ടിവരുന്ന സാഹചര്യത്തില്‍ ആകെ വിഷമിച്ചുപോകുമായിരുന്നു. കീപ്‍വിഡിന്റെ പ്രോ വെര്‍ഷന്‍ ഉപയോഗിച്ചു മാത്രമേ പ്ലേലിസ്റ്റ് ഒന്നടങ്കം ഡൗണ്‍ലോഡ് ചെയ്യാന്‍ കഴിയു. അതിനു് പണം കൊടുക്കണം. തികച്ചും സൗജന്യമായി അതിലും എളുപ്പത്തില്‍ ഇതു ചെയ്യാന്‍ വഴിയുള്ളപ്പോള്‍ പിന്നെയെന്തിനു് പണം മുടക്കണം?

പറഞ്ഞുവരുന്നതു്  youtube-dl എന്ന ചെറിയൊരു കമാന്റ് ലൈന്‍ പ്രോഗ്രാമിനെപ്പറ്റിയാണു്. ഗ്നൂ/ലിനക്സില്‍ ഉപയോഗിക്കാന്‍ തികച്ചും ഈസിയായ കമാന്റ് ലൈന്‍ പ്രോഗ്രാമാണു് ഇതു്. കമാന്റ് ലൈന്‍ അത്ര പരിചയമില്ലാത്ത തുടക്കക്കാര്‍ക്കു് കമാന്റ് ലൈനിന്റെ സുഖം തിരിച്ചറിയാനുള്ള ഒരു വഴി കൂടിയാണിതെന്നു പറയാം.

പ്രോഗ്രാം ഇന്‍സ്റ്റാള്‍ ചെയ്യുവാനായി ദാ ഈ കമാന്റ് കൊടുക്കാം.
sudo apt-get install youtube-dl
ഇപ്പോള്‍ ഇന്‍സ്റ്റലേഷന്‍ നടന്നോളും.
ആര്‍ച്ച് ഉപയോക്താക്കള്‍ ഈ കമാന്റ് നല്‍കുക
sudo pacman -S youtube-dl
ഇനി നിങ്ങള്‍ക്കൊരു വീഡിയോ അങ്ങനെതന്നെ യൂട്യൂബില്‍ നിന്നു ഡൗണ്‍ലോഡ് ചെയ്യുവാന്‍ ഈ കമാന്റ് കൊടുക്കാം.
youtube-dl https://youtu.be/DW5jfjN-5RIഇതില്‍ യൂട്യൂബ് ലിങ്കിന്റെ സ്ഥാനത്തു് നിങ്ങള്‍ക്കാവശ്യമുള്ള ലിങ്ക് നല്‍കാം.
ഇനി നിങ്ങള്‍ക്കാവശ്യം ഒരു യൂട്യൂബ് പ്ലേലിസ്റ്റിലൂള്ള സകല വീഡിയോകളും mp3 ആയി കണ്‍വര്‍ട്ട് ചെയ്തു് ഒറ്റയടിക്കു് കിട്ടണമെങ്കിലോ, ദാ വഴി ഇതാണു് —
youtube-dl --extract-audio --audio-format mp3 -o "%(title)s.%(ext)s" https://www.youtube.com/playlist?list=PL_rXc1ssylNdm6ywGuUoFDceN7RokajID
അപ്പോള്‍ മിക്കവാറും ഒരു പ്രശ്നം സംഭവിച്ചിരിക്കും. പ്ലേലിസ്റ്റിലെ ചില വീഡിയോ ഫയലുകള്‍ കോപ്പിറൈറ്റ് ലംഘനത്തിന്റെ പേരിലോ മറ്റു നിയമപ്രശ്നങ്ങളാലോ യൂട്യൂബ് തന്നെ ഡെലീറ്റ് ചെയ്തിട്ടുണ്ടാകും, ഇപ്രകാരമുള്ള വീഡിയോകള്‍ കിട്ടാതാവുമ്പോള്‍ കമാന്റിനു കീഴില്‍ പ്രവര്‍ത്തിക്കുന്ന സ്ക്രിപ്റ്റ് സ്വയം ടെര്‍മിനേറ്റ് ആകും. ഇതു മറികടക്കാന്‍ ചുമ്മാ ഒരു -i പാസ് ചെയ്താല്‍ മതി. അപ്പോള്‍ കമാന്റ് ഇങ്ങനെ
youtube-dl -i --extract-audio --audio-format mp3 -o "%(title)s.%(ext)s" https://www.youtube.com/playlist?list=PL_rXc1ssylNdm6ywGuUoFDceN7RokajID
ഏതു ഫോള്‍ഡറില്‍ നിന്നുകൊണ്ടാണോ ഇതു ചെയ്യുന്നത് ആ ഫോള്‍ഡറിന്റെ റൂട്ടില്‍ ഫയലുകള്‍ ‍ഡൗണ്‍ലോഡ് ആയിക്കോളും.
യെപ്പടി?

തലമുറകളുടെ കണക്കു സൂക്ഷിക്കാന്‍ “ഗ്രാമ്പൂ വൃക്ഷം”

കുടുംബത്തിന്റെ ചരിത്രങ്ങള്‍ പലരും പലപ്പോഴായി പറഞ്ഞതും കേട്ടതും അറിഞ്ഞതുമായ കാര്യങ്ങളൊക്കെ ക്രോഡീകരിച്ചു് സമാഹരിക്കണമെന്നൊരു ചിന്ത ഏറെ നാളുകള്‍ക്കു മുമ്പേയുള്ളതാണു്. കുറേയൊക്കെ എവിടെയോ ഒക്കെ കോറിയിട്ടിരുന്നതുമാണു്. അതുമായി ബന്ധപ്പെട്ടു് വിശദമായ ഒരു വംശാവലീവൃക്ഷം – ഫാമിലി ട്രീ – രൂപകല്‍പ്പന ചെയ്യാനും ഒരു ശ്രമം നടന്നിരുന്നു. പക്ഷെ അതൊന്നും എങ്ങുമെത്തിയില്ല. കല്ല്യാണം, മനസ്സമ്മതം, മരണം തുടങ്ങിയ അവസരങ്ങളില്‍ ഇതുവരെ കാണാത്ത ചില ബന്ധുക്കളെ കണ്ടുമുട്ടുമ്പോഴായിരിക്കും പഴയ ഫാമിലി ട്രീ സ്പിരിറ്റ് വീണ്ടും മനസ്സിലേയ്ക്കെത്തുക. ഒന്നുരണ്ടു ദിവസം കഴിയുമ്പോള്‍ അതങ്ങടങ്ങും.

അങ്ങനെയിരിക്കേ പഴയൊരു സുഹൃത്താണു് ഗ്രാമ്പ്സ് എന്ന ഒരു ഓപ്പണ്‍ സോഴ്സ് സോഫ്റ്റ്വെയറിനെപ്പറ്റി ഒരിക്കല്‍ സാന്ദര്‍ഭികമായി എന്നോടു് സംസാരിക്കുന്നതു്. 2007 കാലഘട്ടത്തില്‍ ആദ്യമായി ഗ്രാമ്പ്സ് ഉപയോഗിക്കുമ്പോള്‍ എന്തോ പ്രത്യേകിച്ചു് ഒന്നും തോന്നിയില്ല, അതൊട്ടും ആകര്‍ഷകമായി അനുഭവപ്പെട്ടതേയില്ല. പിന്നീടു് അഞ്ചാറു വര്‍ഷങ്ങള്‍ക്കുശേഷം കുടുംബചരിത്രരചനയുടെ അസ്കിത വീണ്ടും അലട്ടിയപ്പോള്‍ 2013 കാലഘട്ടത്തിലാണു് വീണ്ടും ഗ്രാമ്പ്സ് തുറന്നതു്. ഇക്കുറി പക്ഷേ അതെന്നെ കീഴ്പ്പെടുത്തിക്കളഞ്ഞു. ഗ്രാമ്പ്സ് പ്രൊജക്ടിനെപ്പറ്റി കൂടുതല്‍ വായിച്ചു. വെറുമൊരു ഫാമിലി ട്രീ ഉണ്ടാക്കുന്ന പ്രോഗ്രാം എന്നതിലുപരി വംശാവലീപഠനസംബന്ധമായി വിപുലമായി ചിട്ടപ്പെടുത്തിയിരിക്കുന്ന ഒരു ഓപ്പണ്‍ സോഴ്സ് സോഫ്റ്റ്വെയര്‍ ആണു് ഗ്രാമ്പ്സ്. 2016 എപ്രില്‍ 11-നു് പുറത്തിറക്കിയ 4.2.3 പതിപ്പാണു് ഏറ്റവും പുതിയതു്. എന്നെ സംബന്ധിച്ചിടത്തോളം കുടുംബചരിത്രരചന എന്നതു് വെറുമൊരു ഹോബി മാത്രമാണു്. പക്ഷേ പ്രൊഫഷണല്‍ ജീനിയോളജിസ്റ്റുകള്‍ വരെ ആശ്രയിക്കുന്ന മികച്ചൊരു സോഫ്റ്റ്വെയര്‍ ആണു് ഗ്രാമ്പ്സ്. ഗ്നൂ/ലിനക്സ്, വിന്‍ഡോസ്, മാക്‍, ബി.എസ്.ഡി. പതിപ്പുകള്‍ ലഭ്യമാണു്. കൂടാതെ ലൈവ് സി.ഡി. ആയും റോള്‍അപ്പ്ആപ്പിലും ഇന്‍സ്റ്റാള്‍ ചെയ്യാതെ തന്നെ ഉപയോഗിച്ചു നോക്കാവുന്നതുമാണു്.

ഗ്രാമ്പ്സ് ആന്‍സെസ്ട്രി വ്യൂ

ദി ചര്‍ച്ച് ഓഫ് ജീസസ് ക്രൈസ്റ്റ് ഓഫ് ലാറ്റര്‍ഡേ സെയിന്റ്സ് രൂപകല്‍പ്പന ചെയ്ത ജെഡ്കോം (GEDCOM – Genealogical Data Communication) ഓപ്പണ്‍ ഡിഫാക്ടോ സ്പെസിഫിക്കേഷനിലുള്ള ഡാറ്റ ടൈപ്പില്‍ ആണു് ഗ്രാമ്പ്സില്‍ വിവരങ്ങള്‍ സൂക്ഷിക്കുന്നതു്. ജി.പി.കെ.ജി. എന്ന ഫയല്‍ എക്സ്റ്റന്‍ഷനിലാണു് ഗ്രാമ്പ്സ് ഫയലുകള്‍ സേവ് ചെയ്യുന്നതു്. സി.എസ്.വി., ജെഡ്കോം, ജീനിവെബ്, എക്സ്.എം.എല്‍ തുടങ്ങി വിവിധ ഫോര്‍മാറ്റുകളിലേയ്ക്കു് എക്സ്പോര്‍ട്ട് ചെയ്യുകയുമാവാം. ഇതു കൂടാതെ അനേകം തരത്തിലുള്ള റിപ്പോര്‍ട്ടുകള്‍ ഗ്രാമ്പ്സില്‍ നിന്നു എടുക്കാം. ബുക്ക്സ്, ആന്‍സസ്റ്റര്‍ ട്രീ (പിതാമഹ പരമ്പര), ഡിസന്‍ഡന്‍ഡ് ട്രീ (പിന്തുടര്‍ച്ചാപരമ്പര), ഫാമിലി ഡിസന്‍ഡന്‍ഡ് ട്രീ, ടൈംലൈന്‍ ചാര്‍ട്ട്, ഫാന്‍ ചാര്‍ട്ട്, ബര്‍ത്ത്ഡേ ആന്റ് ആനിവേഴ്സറി റിപ്പോര്‍ട്ട് അങ്ങനെ തുടങ്ങി ഇനിയുമുണ്ടു് കുറേയധികം റിപ്പോര്‍ട്ടുകള്‍. എസ്.വി.ജി. ഫോര്‍മാറ്റിലുള്ള ഫാമിലി ഡിസന്‍ഡന്‍ഡ് ട്രീ ഇങ്ക്സ്കേപ്പില്‍ കൊണ്ടുവന്നു് എഡിറ്റ് ചെയ്താണു് ഞാന്‍ എന്റെ ഫാമിലി ട്രീ രൂപകല്‍പ്പന ചെയ്തതു്. ഇനി ഇതെല്ലാം ക്രോ‍ഡീകരിച്ചുവേണം ഏറെ ആഗ്രഹിച്ച കുടുംബചരിത്രഗ്രന്ഥം ഉണ്ടാക്കാന്‍.

എന്റെ കാര്യത്തില്‍ ഒരു വര്‍ഷത്തിലേറെക്കാലം കൊണ്ടു് കുടുംബത്തിലെ മിക്കവരുടേയും പേരുകള്‍, കുടുംബപ്പേരുകള്‍, ജനനത്തിയതികള്‍, വിവാഹത്തിയതികള്‍, മരണത്തിയതികള്‍, ചരിത്രം തുടങ്ങിയ പല കാര്യങ്ങള്‍ ശേഖരിക്കാന്‍ എനിക്കു കഴിഞ്ഞു. ശേഖരിച്ച വിവരങ്ങള്‍ ഗ്രാമ്പ്സ് പോലുള്ള നല്ലൊരു ടൂള്‍ ഇല്ല എങ്കില്‍ ശരിയായി അടുക്കിവയ്ക്കാന്‍ കഴിയാതെ നശിച്ചു പോവുകയേ ഉള്ളൂ എന്നു തീര്‍ച്ചയാണു്.

ടെസ്സറാക്റ്റ് ചിത്രാക്ഷരച്ചാത്തൻ

ഒരു വെബ്‌സൈറ്റിൽ ചേർക്കാനായി കുറച്ചുനാൾ മുമ്പൊരു ദിവസം ഒരു പത്തു പതിനഞ്ച് പ്രിന്റഡ് പേപ്പറുകളുടെ സ്കാൻ ചെയ്ത കോപ്പി മെയിലിൽ വന്നു. അര പേജ് ടൈപ്പ് ചെയ്തപ്പോഴെയ്ക്കും മടുത്തു. കുറെ സമയവുമെടുത്തു, ഈ നില പോയാൽ രണ്ടാഴ്ച്ചകൊണ്ടും പണി തീരുകയുമില്ല, ടൈപ്പ് ചെയ്തു ചെയ്തു എന്റെ കൈ തേയുകയും ചെയ്യും എന്ന് വന്നപ്പോൾ പണി നിർത്തി. പണ്ട് കൊച്ചിയിലെ മറ്റൊരു പരസ്യ ഏജൻസിയിൽ പണിയെടുക്കുമ്പോൾ ആബി ഫൈൻ റീഡർ എന്ന ഒരു ഒസീആർ പ്രോഗ്രാം ഉപയോഗിച്ചിരുന്നു – അതിന് ഒടുക്കത്തെ വിലയും ക്ലോസ്ഡ് സോഴ്സും. സാദാ ഞാൻ അതൊക്കെ എങ്ങനെ ഉപയോഗിക്കാൻ? മാത്രവുമല്ല സോഴ്സ് പൂഴ്ത്തിയ സോഫ്റ്റ്‌വെയർ നമ്മെ പോലുള്ള സ്വാത്രന്ത്ര്യ വാദികൾ കയ്യോണ്ട് തൊടില്ലാലോ. വീട്ടിൽ വന്ന് വലിയ പ്രതീക്ഷകളൊന്നും ഇല്ലാതെ “ചേട്ടാ, ഓസീആർ ഉപകരണങ്ങൾ വല്ലതുമുണ്ടോ എന്ന്” എന്റെ ഡെബിയൻ മെഷീനിലെ apt സംഭരണിയിൽ ചോദിച്ചു നോക്കി. “ടെസ്സറാക്റ്റ് എന്ന ഓസീആർ ഉണ്ടല്ലോ ചങ്ങാതീ” എന്ന് സംഭരണി ഉവാച.

ഇനി കൂടുതലൊന്നും പറയാനില്ല. ടെസ്സറാക്റ്റ് എന്നൊരു സോഫ്റ്റ്‌വെയർ ഉണ്ട്. ചിത്രങ്ങളിൽ നിന്ന് അക്ഷരത്തെ തിരിച്ചറിഞ്ഞു അത് ഫോണ്ട് ആക്കി മാറ്റുകയാണ് ഇഷ്ടന്റെ ജോലി. ഒറ്റവാക്കിൽ പറഞ്ഞാൽ ഒരു ചിത്രാക്ഷരച്ചാത്തൻ. പിന്നെ വെബ്ബിൽ പരതിയപ്പോൾ, ഇത് പണ്ടേ ഉള്ള സാധനമാണെന്ന് മനസ്സിലായി (ചക്രം ഇപ്പോൾ മാത്രമേ ഞാൻ കണ്ടു പിടിച്ചോള്ളോ എന്നൊരു ജാള്യതയും തോന്നി). കലശലായി ജാള്യത തോന്നിയതിനാൽ ബ്ലോഗിൽ പോസ്റ്റി ചളമാക്കണ്ട എന്നു തീരുമാനിക്കുകയും ചെയ്തതാണ്. മലയാളക്കരയിലുള്ള സ്വതന്ത്ര മലയാളം കമ്പ്യൂട്ടിംഗ് എന്ന ഡവലപ്പർ കൂട്ടായ്മ മലയാളം ചിത്രങ്ങൾ അക്ഷരങ്ങളിലെയ്ക്ക് മാറ്റാൻ ചിത്രാക്ഷരച്ചാത്തനെ പഠിപ്പിച്ചു കൊണ്ടിരിക്കുകയാണെന്നും അറിഞ്ഞപ്പോൾ ബ്ലോഗണ്ട പോസ്റ്റണ്ട എന്നൊക്കെ ഒന്നൂടി ഉറപ്പിച്ചതാ. ന്നാലും, ചുമ്മാ ഒന്നു പോസ്റ്റഡാ എന്ന് അന്തരംഗം മുറവിളി കൂട്ടിയതിനാൽ ചുമ്മാ ഒന്ന് തലോടി പോസ്റ്റി വിട്ടേക്കാം എന്ന് കരുതി.

ഓപ്പണ്‍ സോഴ്സ് ആയി ഇന്ന് ലഭ്യമായ ഏറ്റവും മികച്ച ഒസീആർ യന്ത്രമാണ് ടെസ്സറാക്റ്റ്. 1985 – 94 കാലഘട്ടത്തിൽ ഹ്യൂലറ്റ് പക്കാർഡ് ആണ് ഇത് സൃഷ്ടിച്ചത്. പിന്നീട് 2005-ൽ ഹ്യൂലറ്റ് പക്കാർഡ് ഇത് ഓപ്പണ്‍ സോഴ്സ് ആക്കി റിലീസ് ചെയ്തു. 2006 മുതൽ ഗൂഗിൾ ആണ് ഇതിന്റെ വികസനത്തിൽ ഏറ്റവും കാര്യമായ പങ്കു വഹിക്കുന്നത്.

ഉപയോഗമുറ

നല്ല ഫലത്തിനായി കിട്ടിയിരിക്കുന്ന ഇമേജ് ഫയൽ ഗിമ്പിൽ തുറന്നു കൂടുതൽ വ്യക്തത വരുത്തുന്നത് നന്നായിരിക്കും. ഉദാഹരണത്തിന് ഇങ്ങനൊരു പീഡിയെഫ് ഫയലാണ് അക്ഷരമാക്കേണ്ടതെങ്കിൽ ഇത് ഗിമ്പ് ഉപയോഗിച്ച് ആദ്യം ഗ്രേസ്കെയിൽ ആക്കുക. പിന്നെ അതിന്റെ ലെവൽസ് ക്രമീകരിച്ചു വെളുപ്പും കറുപ്പും മാത്രം നിറങ്ങളുള്ള ഒരു ടിഫ് ഫയൽ ആക്കി മാറ്റിയതിനു ശേഷം താഴെയുള്ള കോഡ് ഉപയോഗിച്ച് ചിത്രത്തെ ടെക്സ്റ്റ്‌ ആയി പരിവർത്തനം ചെയ്യാം.

tesseract /home/crunchbang/downloads/proclamation-publick-occorances.tif /home/crunchbang/documents/proclamation.txt

സൊ സിമ്പിൾ.

അറബി, ബൾഗെറിയൻ, കറ്റാലൻ, ചെക്ക്‌, ഡാനിഷ്,ഡച്ച്, ഇംഗ്ലീഷ്, ഫിന്നിഷ്, ഫ്രഞ്ച്, ജർമൻ, ഗ്രീക്ക്, ഹിന്ദി, ഹങ്കേറിയൻ, ഇന്തോനേഷ്യൻ, ഇറ്റാലിയൻ, ലാത്വിയൻ, ലിത്വേനിയൻ, നോർവീജിയൻ, പോളിഷ്, പോർച്ചുഗീസ്, റൊമാനിയൻ, റഷ്യൻ, സെർബിയൻ, സ്ലോവാക്, സ്ലോവേനിയൻ, സ്പാനിഷ്, സ്വീഡിഷ്, ടാഗലോഗ്, തായ്‌, തമിഴ്, ടർക്കിഷ്, ഉക്രേനിയൻ, വിയറ്റ്നാമീസ് എന്നു തുടങ്ങി വളരെയധികം ഭാഷകളിൽ ഇന്ന് ടെസ്സറാക്റ്റ് എഞ്ചിൻ ലഭ്യമാണ്. മലയാളത്തിലും ഇത് ഏറെ വൈകാതെ ലഭ്യമാകും (ഇപ്പോൾത്തന്നെ മലയാളത്തിലും ടെസ്സറാക്റ്റ് ലഭ്യമാണെങ്കിലും ട്രെയിനിംഗ് ഡാറ്റയുടെ കൃത്യത കുറവാണ്).

മലയാളം ട്രെയിനിംഗ് ഡാറ്റയുമായി ബന്ധപ്പെട്ട സ്വമകയുടെ പ്രവർത്തനങ്ങൾ കാണാൻ ഇവിടെ ക്ലിക്കുക.

ഇങ്ക്സ്കേപ്. സ്വതന്ത്രമായി വരയ്ക്കൂ

ഇങ്ക്സ്കേപ്പ് പഠിക്കുവാൻ താല്പ്പര്യമുള്ള തുടക്കക്കാർക്ക് മുന്നിൽ പ്രാഥമികമായി അവതരിപ്പിക്കാൻ വേണ്ടി കുറച്ചു നാൾ മുമ്പ് ഞാൻ തയ്യാറാക്കിയ സ്ലൈഡ്ഷോ ഫയൽ ആണ് ഇത്. കുറച്ചു കാലം എന്റെ ഡാഷ്ബോർഡിൽ ഡ്രാഫ്റ്റ് ആയി ഈ ഫയലുകൾ കിടന്നു. ദാ ഇന്ന് ഈ ലിങ്കിൽ കാണുന്ന പോസ്റ്റ്‌ ആണ് പെട്ടെന്ന് തന്നെ ഡ്രാഫ്റ്റിനെ പോസ്റ്റ്‌ ആക്കാൻ പ്രചോദനം തന്നത്. ഇനിയും കുറെ കാര്യങ്ങൾ ഇതിൽ ചേർക്കാനുണ്ട്. ആർക്കെങ്കിലും ഇതിന്റെ എസ് വീ ജി ഫയൽ വേണമെങ്കിൽ ദയവായി ആവശ്യപ്പെടുക. ആവശ്യാനുസൃതം അയച്ചു തരുന്നതായിരിക്കും.

This slideshow requires JavaScript.

ഫ്ലിക്കർ കളക്ഷൻ ഇവിടെ കാണുക

എഫ്എഫ്എംപിഇജി (FFmpeg): ഈ കുഞ്ഞു പ്രോഗ്രാം ഉപയോഗിച്ച് വീഡിയോ/ഓഡിയോ ഫയലുകളില്‍ അത്ഭുതങ്ങള്‍ കാണിക്കാം

സജീവന്റെ കൂട്ടുകാരന്റെ സഹോദരിയുടെ കല്ല്യാണം കഴിഞ്ഞു രണ്ടു ദിവസങ്ങള്‍ക്കു ശേഷമാണ് വീഡിയോ ഡീവിഡീ കിട്ടിയത്. കിട്ടിയ ഉടന്‍ തന്നെ നിര്‍മ്മല്‍ സ്ഥലത്തെ പ്രധാന കമ്പ്യൂട്ടര്‍ വിദഗ്ദ്ധനും അടുത്ത സുഹൃത്തുമായ സജീവന്റെ അടുത്തെത്തി. സിമ്പിള്‍ ആയി ഈ വീഡിയോ യൂട്യൂബില്‍ ഇടണം. കാനഡയില്‍ ഉള്ള മൂത്ത ചേച്ചിയ്ക്ക് കാണാനാ. അവധി കിട്ടാത്തതിനാല്‍ അവര്‍ക്ക് നാട്ടില്‍ വരാനോ കല്ല്യാണം കൂടാനോ കഴിഞ്ഞില്ല. ന്യായമായ കാര്യമാണ്. സിമ്പിള്‍ പ്രശ്നവും. സജീവന്‍ സമ്മതിച്ചു. ആദ്യം സിസ്ടത്തില്‍ ഉള്ള ഒരു വീഡിയോ എക്സ്ട്രാക്ടര്‍ യൂട്ടിലിറ്റി  ഉപയോഗിച്ച് ഡീവിഡീയില്‍ നിന്ന് വീഓബി ഫയല്‍ മുറിച്ചു. നേരെ യൂട്യൂബ് തുറന്നു. ലോഗിന്‍ ചെയ്തു. അപ്‌ലോഡ്‌ കൊടുത്തു. “ശൂ” എന്ന് അപ്‌ലോഡ്‌ തുടങ്ങി. റോക്കറ്റ് വിട്ടത് പോലെ നേരെ 95 ശതമാനത്തില്‍ 97, 98, 99… ഇപ്പൊ തീരും ഇപ്പൊ തീരും എന്ന് കരുതി സജീവനും നിര്‍മ്മലും കാത്തിരുന്നു, കുറച്ചു നേരമൊന്നുമല്ല ഒരു ഒന്നൊന്നര മണിക്കൂര്‍ !”ശൂ” എന്ന് പറഞ്ഞു അപ്‌ലോഡ്‌ ആകുന്നത് കണ്ടപ്പോള്‍ തോന്നിയ സന്തോഷം പയ്യെ സങ്കടവും ദേഷ്യവും നട്ടപ്രാന്തും ഒക്കെയായി മാറി. ഒടുവില്‍ സജീവനും നിര്‍മ്മലിനും വട്ടായി. ഒന്നും ശരിയാവാതെ ഒടുവില്‍ ശ്രമം ഉപേക്ഷിച്ചു. “നീ എവിടത്തെ കമ്പ്യൂട്ടര്‍ വിദഗ്ധനാ, ഇത്രയൊക്കെ ഒള്ളോ” എന്നൊക്കെ ചോദിച്ചു ചൊറിഞ്ഞു  നിര്‍മ്മല്‍ സജീവനെ കളിയാക്കി. സജീവന്‍ ചൂടായി. ഉന്തും തള്ളുമായി. കല്യാണ സീഡി, ട്രെയില്‍ നിന്നെടുത്തു സജീവന്‍ ഒടിച്ചു കളഞ്ഞു.  നിര്‍മ്മല്‍ സജീവന്റെ മോണിട്ടര്‍ അടിച്ചു പൊട്ടിച്ചു. എന്നിട്ടരിശം തീരാഞ്ഞ് നിര്‍മ്മല്‍ സജീവന്റെ പുരയുടെ ചുറ്റും മണ്ടി നടന്നു!

ഒരു ചോദ്യം. ഒരൊറ്റ ചോദ്യം – ഇത്രയൊക്കെ വേണമായിരുന്നോ?

വേണ്ട! വേണ്ടേ വേണ്ട.

കാരണമെന്താ? എഫ്എഫ്എംപിഇജി (FFmpeg) ഇല്ലേ നമുക്ക് മുമ്പില്‍? നിങ്ങള്‍ക്ക് മുന്നില്‍ കീറാമുട്ടിയായ ഏതു വീഡിയോ പ്രശ്നങ്ങള്‍ക്കും സമഗ്രമായ പരിഹാരവുമായി ഇഷ്ടന്‍ വരും. നേരത്തെ സജീവന്‍ അഭിമുഖീകരിച്ച മൊത്തം പ്രശ്നം പരിഹരിക്കാന്‍ ഇഷ്ടന് ഒരു പത്തു മിനിട്ട് സമയം മാത്രം മതി, വെറും നാലേ നാല് കമാന്‍ഡുകള്‍ കൊണ്ട് ഈ പറഞ്ഞ പ്രശ്നം വെറും സിമ്പിള്‍ ആയി പരിഹരിക്കാം. എഫ്എഫ്എംപിഇജി (FFmpeg) എന്ന ഒരൊറ്റ കുഞ്ഞന്‍ പ്രോഗ്രാം ഉപയോഗിച്ച് മേല്‍പ്പറഞ്ഞ പ്രശ്നം പൂര്‍ണ്ണമായും പരിഹരിക്കാം. ഒരു 15 മെഗാബൈറ്റുകള്‍ മാത്രമുള്ള ഈ കുഞ്ഞു പ്രോഗ്രാം ഉപയോഗിച്ച് വീഡിയോ/ഓഡിയോ ഫയലുകളില്‍ അത്ഭുതങ്ങള്‍ കാണിക്കാം. വീഡിയോ/ഓഡിയോ ഫയലുകള്‍ മുറിക്കാം, കൂട്ടിച്ചേര്‍ക്കാം, ഫോര്‍മാറ്റുകള്‍ മാറ്റാം. പലര്‍ക്കും യൂട്യൂബില്‍ വീഡിയോ അപ്‌ലോഡ്‌ ചെയ്യുമ്പോള്‍ പലവിധ പ്രശ്നങ്ങളും നേരിട്ടിട്ടുണ്ടാകും.

സജീവന്റെ പ്രശ്നത്തിന് എഫ്എഫ്എംപിഇജി (FFmpeg) നല്‍കുന്ന പരിഹാരം ഇതാ.

ആ വെറും നാലേ നാല് കമാന്‍ഡുകള്‍ ഇതാ.

  1. ffmpeg -i SourceFile1.vob -sameq -ss 00:13:20 -t 180 DestinationFile1.vob
  2. ffmpeg -i SourceFile2.vob -sameq -ss 00:13:20 -t 180 DestinationFile2.vob
  3. ffmpeg -i concat:”DestinationFile1.vob|DestinationFile2.vob” -c copy ConcatenatedFile.vob
  4. ffmpeg -i ConcatenatedFile.vob -qscale 7 -acodec libmp3lame -ar 22050 -ab 96000 -deinterlace -nr 500 -s 640×480 -aspect 4:3 -r 20 -g 500 -me_range 20 -b 270k -deinterlace -f flv -y YoutubeFile.flv

ഓരോ കമാന്‍ഡുകളുടെയും  വിശദീകരണം

  1. ffmpeg -i SourceFile1.vob -sameq -ss 00:13:20 -t 180 DestinationFile1.vob // എഫ്എഫ്എംപിഇജി ഉപയോഗിച്ച് SourceFile1.vob എന്ന ഇന്‍പുട്ട് ഫയലില്‍ നിന്നും  സെയിം ക്വാളിറ്റിയില്‍ 00:13:20 എന്ന ടൈം ഫ്രെയിമില്‍ നിന്നും 180 സെക്കന്റ്‌ മുന്നോട്ടു നീക്കി മുറിച്ചു  DestinationFile1.vob എന്ന പുതിയ ഒരു ഫയല്‍ ആക്കി സേവ് ചെയ്യുക എന്നാണ് ഈ കമാന്‍ഡിന്റെ അര്‍ഥം
  2. ffmpeg -i SourceFile1.vob -sameq -ss  00:20:46 -t 180 DestinationFile2.vob // എഫ്എഫ്എംപിഇജി ഉപയോഗിച്ച് SourceFile1.vob എന്ന മുന്‍പത്തെ അതേ ഇന്‍പുട്ട്  ഫയലില്‍ നിന്നും സെയിം ക്വാളിറ്റിയില്‍  00:20:46 എന്ന ടൈം ഫ്രെയിമില്‍ നിന്നും 180 സെക്കന്റ്‌ മുന്നോട്ടു നീക്കി മുറിച്ചു  DestinationFile2.vob എന്ന പുതിയ ഒരു ഫയല്‍ ആക്കി സേവ് ചെയ്യുക എന്നാണ് ഈ കമാന്‍ഡിന്റെ അര്‍ഥം
    • കുറിപ്പ് :  ഇപ്പോള്‍ രണ്ടു പുതിയ വീഓബി ഫയലുകള്‍ സൃഷ്ടിക്കപ്പെട്ടു. ഇനി ഈ രണ്ടു വീഓബി ഫയലുകളും കൂട്ടി ചേര്‍ക്കണം. അതിനായി താഴെ കാണുന്ന കമാന്‍ഡ് ഉപയോഗിക്കാം.
  3. ffmpeg -i concat:”DestinationFile1.vob|DestinationFile2.vob” -c copy ConcatenatedFile.vob // DestinationFile1.vob  DestinationFile2.vob  എന്ന രണ്ടു വീഓബി ഫയലുകളെ കോണ്‍കാറ്റനേറ്റ്  ചെയ്യുക അഥവാ കൂട്ടിച്ചേര്‍ക്കുക എന്നാണ് ഈ കമാന്‍ഡിന്റെ അര്‍ഥം
    • കുറിപ്പ് :  ഇങ്ങനെ സൃഷ്ടിക്കപ്പെട്ട പുതിയ വീയ്യോബീ ഫയല്‍ യൂട്യൂബിലെക്ക് നേരിട്ട് കയറിപ്പോകാന്‍ സാധ്യതയില്ല. അത് കൊണ്ട് അതി എഫ്ഫെല്‍വി (flv) എന്ന മറ്റൊരു ഫോര്‍മാറ്റിലേക്ക് കണ്‍വേര്‍ട്ട് ചെയ്യണം.
  4. ffmpeg -i ConcatenatedFile.vob -qscale 7 -acodec libmp3lame -ar 22050 -ab 96000 -deinterlace -nr 500 -s 640×480 -aspect 4:3 -r 20 -g 500 -me_range 20 -b 270k -deinterlace -f flv -y YoutubeFile.flv // ConcatenatedFile.vob എന്ന ഫയല്‍ ക്വാളിറ്റി-നിലവാരം 7 ആയി libmp3lame എന്ന ഓഡിയോ കോഡക് ഉപയോഗിച്ച് 640×480 എന്ന ഫ്രെയിം വലുപ്പത്തില്‍ 4:3 എന്ന സ്ക്രീന്‍ അനുപാതത്തില്‍ flv എന്ന ഫോര്‍മാറ്റിലേക്ക് കണ്‍വേര്‍ട്ട് ചെയ്തു YoutubeFile.flv എന്ന പുതിയ ഫയല്‍ ആയി സേവ് ചെയ്യുക എന്നാണ് ഈ കമാന്‍ഡിന്റെ അര്‍ഥം. ( -ar 22050 -ab 96000 -deinterlace -nr 500), ( -r 20 -g 500 -me_range 20 -b 270k -deinterlace) ബ്രാക്കറ്റില്‍ കൊടുത്ത ഇത്രയും ഭാഗങ്ങള്‍ യൂട്യൂബില്‍ എഫ്.എല്‍.വി. അപ്‌ലോഡ്‌ ചെയ്യാന്‍ വേണ്ട സ്പെസിഫിക്കേഷനുകളാണ് .

(qscale) ക്യൂസ്കെയില്‍ ഉപയോഗിക്കുന്നത് വീഡിയോയുടെ ക്വാളിറ്റി കുറയ്ക്കുവാന്‍ വേണ്ടിയാണ്. ആദ്യം കണ്ട (sameq) എന്ന ഓപ്ഷന്‍ ഉപയോഗിച്ചാല്‍ എഫ്എഫ്എംപിഇജി വീഡിയോയുടെ ക്വാളിറ്റി അതേ പടി തന്നെ നിലനിര്‍ത്തും. (qscale) ക്യൂസ്കെയില്‍ എന്താണ് എന്ന് വിശദമായി അറിയുവാന്‍ ഇവിടെ ക്ലിക്ക് ചെയ്യുക. qscale 7 / ക്യൂസ്കെയില്‍ 7  അഥവാ ക്വാളിറ്റി 7 നല്‍കിയിട്ടും ഫയല്‍ യൂട്യൂബില്‍ അപ്‌ലോഡ്‌ ചെയ്യാന്‍ കഴിഞ്ഞില്ലെങ്കില്‍ ഒരല്‍പം കൂടി കുറയ്ക്കുക. qscale 10 നല്‍കി നോക്കുക. മിക്കവാറും ശരിയാവും.

ഉപയോഗപ്രദമായ മറ്റു എഫ്എഫ്എംപിഇജി (FFmpeg) കമാന്‍ഡുകള്‍ ഇവിടെ കാണാം.

എഫ്എഫ്എംപിഇജി (FFmpeg) ഡൌണ്‍ലോഡ് ചെയ്യുവാന്‍

ലിനക്സില്‍ എന്നത് പോലെ വിന്‍ഡോസിലും മാക്കിലും എഫ്എഫ്എംപിഇജി (FFmpeg) ലഭ്യമാണ്. ഒട്ടു മിക്ക വീഡിയോ കണ്‍വേര്‍ഷന്‍ പ്രോഗ്രാമുകളുടെയും ബാക്ക് എന്‍ഡില്‍ കിടന്നു കളിക്കുന്നത് എഫ്എഫ്എംപിഇജി എന്ന ഈ കുഞ്ഞന്‍ പ്രോഗ്രാമാണ്. എഫ്എഫ്എംപിഇജി (FFmpeg) ഡൌണ്‍ലോഡ് ചെയ്യുവാന്‍ ഇവിടെ ക്ലിക്ക് ചെയ്യുക.