ജേര്‍ണലിസം ജയിലിലടയ്ക്കപ്പെട്ടു

ജേര്‍ണലിസം ജയിലിലടയ്ക്കപ്പെട്ടിരിക്കുന്നു. സത്യം വിളിച്ചുകൂവാനുള്ള പൗരന്റെ സ്വാതന്ത്ര്യം അവസാനിച്ചിരിക്കുന്നു. ലോകത്തു് അവശേഷിച്ച സത്യസന്ധനായ അവസാനപത്രപ്രവര്‍ത്തകന്‍ – ജൂലിയന്‍ അസാന്‍ജിന്റെ അറസ്റ്റോടെ ഇനി കൂടുതലൊന്നും പ്രതീക്ഷിക്കാനില്ലാത്ത സ്ഥിതിയിലേയ്ക്കു് ലോകം സഞ്ചരിച്ചുകൊണ്ടിരിക്കുകയാണു്. വിവരസാങ്കേതികവിദ്യയുടെ ആവിര്‍ഭാവത്തോടെ, സാമൂഹ്യമാധ്യമങ്ങളുടെ അതിപ്രസരത്തോടെ നാം എത്തിപ്പെട്ടു നില്ക്കുന്ന വാസ്തവാനന്തര ലോകവ്യവസ്ഥിതിയില്‍ അസാന്‍ജിനു് നേരിടേണ്ടിവന്ന ശിക്ഷ അദ്ദേഹം അര്‍ഹിക്കുന്നതാണെന്നു വരുത്തിത്തീര്‍ക്കുവാനും ലോകം അതു വിശ്വസിക്കാനുമാണു് കൂടുതല്‍ സാദ്ധ്യത.

എന്താണു് അസാഞ്ജ് ചെയ്ത കുറ്റം? അമേരിക്ക ഉള്‍പ്പെട്ട, അനവധി കോര്‍പ്പറേറ്റുകള്‍ ഉള്‍പ്പെട്ട നിരവധി നിയമലംഘനകങ്ങളുടെ അസ്സല്‍ പ്രമാണങ്ങള്‍ തന്റെ ഓണ്‍ലൈന്‍മാധ്യമത്തിലൂടെ അദ്ദേഹം ലോകത്തിനു പങ്കുവച്ചു. ബ്രാഡ്‍ലി മാനിംഗ് (ഇപ്പോള്‍ ചെല്‍സിയ മാനിംഗ്), എഡ്വേര്‍ഡ് സ്നോഡന്‍ തുടങ്ങിയ വിസില്‍ ബ്ലോവര്‍മാര്‍ക്കു് തങ്ങള്‍ കണ്ടെത്തിയ സത്യങ്ങള്‍ പ്രസിദ്ധീകരിക്കാന്‍ സഹായകമായതു് അസാന്‍ജിന്റെ വിക്കിലീക്സ് എന്ന ഓണ്‍ലൈന്‍ മാദ്ധ്യമമായിരുന്നു. അതായതു് സമൂഹം തെരഞ്ഞടുത്തു് അധികാരത്തിലേറ്റിയ സര്‍ക്കാര്‍ നടത്തിയ നിയമലംഘനങ്ങള്‍ അസ്സല്‍ പ്രമാണങ്ങളുടെ ആധികാരികതയോടെ സമൂഹത്തിനു് മനസ്സിലാകുമാറു് റിപ്പോര്‍ട്ട് ചെയ്യുകയും അപ്രകാരം ചെയ്യാന്‍ കഴിയുന്ന മറ്റുള്ളവര്‍ക്കു് അതിനുള്ള സൗകര്യം ഒരുക്കിനല്‍കി എന്നതൊക്കയാണു് അസാന്‍ജ് ചെയ്ത കുറ്റകൃത്യങ്ങള്‍. ഫയങ്കരം തന്നെ, അല്ലേ?

എഡ്വേര്‍ഡ് സ്നോ‍ഡന്‍ ഒരിക്കല്‍ പ്രസ്താവിച്ച ഈ വാക്കുകള്‍ കേള്‍ക്കൂ

താന്‍ ദൃക്‍സാക്ഷിയായ കുറ്റം വിളിച്ചുപറയുന്നതു് ഒരു കുറ്റമായി പരിഗണിക്കപ്പെടുകയാണെങ്കില്‍ സംശയിക്കേണ്ട, നിങ്ങള്‍ ഭരിക്കപ്പെടുന്നതു് കുറ്റവാളികളാലാണു്

ജനങ്ങളാല്‍ തെരഞ്ഞെടുക്കപ്പെട്ട കൊടുംകുറ്റവാളികളാലാണു് ലോകം ഇന്നു ഭരിക്കപ്പെട്ടു കൊണ്ടിരിക്കുന്നതു്. അതായതു് ജനാധിപത്യം കാലഹരണപ്പെട്ടിരിക്കുന്നു, നമുക്കുവേണ്ടതു് ഇനി പുതിയൊരു ലോകക്രമമാണു്. അതിനായി നമുക്കു കാത്തിരിക്കാം.

 

Advertisements

പരമോന്നതകോടതിയുടെ വിധിയെ എങ്ങനെ രാഷ്ട്രീയമായി ഉപയോഗിക്കാം?

ഒരു രാഷ്ട്രത്തിന്റെ പരമോന്നതനീതിപീഠത്തിന്റെ വിധിയെ രാഷ്ട്രീയമായി ഉപയോഗിച്ചുകൊണ്ടു് എങ്ങനെ ഫാസിസം നടപ്പില്‍ വരുത്താന്‍ കഴിയും എന്നു് ഇന്ത്യ പതിയെ തിരിച്ചറിഞ്ഞുകൊണ്ടിരിക്കുകയാണു്. സംഘപരിവാര്‍ ശക്തികള്‍ സംയുക്തമായി എഴുതിയുണ്ടാക്കിയ തിരക്കഥപ്രകാരം അരങ്ങേറുന്ന ഫാസിസ്റ്റ് നാടകത്തിനു് വേദിയാകുന്നതു് പരിപാവനം എന്നു് സാധാരണ തെന്നിന്ത്യന്‍ ഭക്തന്‍ കരുതി പരിപാലിച്ചുപോന്ന ശബരിമലയാണു് എന്നതാണു് ഏറെ ദുഃഖകരം. നാടകത്തിന്റെ നായകകഥാപാത്രങ്ങളായി സവര്‍ണ്ണ സംഘപരിവാര്‍ നേതാക്കള്‍ ആടിത്തിമിര്‍ക്കുമ്പോള്‍ കഥയറിയാതെ അവരുടെ ചരടുവലികള്‍ക്കൊപ്പം നൂലുകളില്‍ തൂങ്ങി പാവന‍ാടകമാടുകയാണു് പാവം ശബരീശഭക്തന്മാര്‍.

കേരളം തങ്ങള്‍ക്കു് ബാലികേറാമലയാണെന്നു് പരിവാരസംഘടനകള്‍ പണ്ടേ തിരിച്ചറിഞ്ഞിരുന്നു. ആ ബാലികേറാമലയെ ഏതൊരു ബാലനും കേറാവുന്ന മലയാക്കിമാറ്റാന്‍ ശബരിമലയിലൂടെ സാധിക്കാമെന്ന തിരിച്ചറിവു് അവര്‍ക്കുണ്ടാകുന്നതു് ഏകദേശം ഒരു ദശകത്തിനെങ്കിലും മുമ്പാണു്. ഏതൊരു സാധാരണ മലയാളിയുടേയും ഹൃദയത്തിന്റെ ഏറ്റവും ലോലമായ ഭാഗങ്ങളില്‍ സ്പര്‍ശിക്കുന്ന അത്രമേല്‍ സെന്‍സിറ്റീവായൊരു വിഷയമാണു് ശബരിമലയെന്നും അതിനെ ബാധിക്കുന്ന ഏതൊരു പ്രശ്നവും തങ്ങള്‍ക്കു് രാഷ്ട്രീയലാഭത്തിനായി മുതലെടുക്കാമെന്നു് പരിവാരശക്തികള്‍ കണക്കുകൂട്ടി. ഈ കണക്കുകൂട്ടലുകള്‍ ശരിയാണോ എന്നുറപ്പിക്കാന്‍ വേണ്ടിയാണു് ബോധപൂര്‍വ്വമായി മുംബൈക്കാരായ ഏതാനും യുവതികളെ അഞ്ചട്ടുകൊല്ലം മുമ്പ്  അവര്‍  സന്നിധാനത്തേയ്ക്കു കടത്തിവിട്ടതു്. സുനില്‍ സ്വാമി എന്ന ഇടനിലക്കാരനെയാണു് അവര്‍ ഇതിനായി ഉപയോഗിച്ചതു്. (അവലംബം 2012 ഏപ്രില്‍ 12-ലെ ദേശാഭിമാനി വാര്‍ത്ത) മാളികപ്പുറം ശാന്തിയുടേയും ശബരിമലയിലെ മറ്റു് പുരോഹിതപ്രമുഖരുടേയും ഒത്താശയോടെയാണു് ഈ ഓപ്പറേഷന്‍ നടത്തിയതു്. തികച്ചും വിജയകരമായ ഈ ഓപ്പറേഷനോടുകൂടെ പരിവാര്‍ ഉന്നതകേന്ദ്രങ്ങളില്‍ നിന്നു് പച്ചക്കൊടി ലഭിച്ചതോടെ തിരക്കഥാരചന തുടങ്ങി.

ആദ്യഘട്ടമായി 2006 ജൂലൈ 28-നു് ശബരിമലയില്‍ സ്ത്രീകളുടെ പ്രവേശനത്തിന് ഉള്ള നിയന്ത്രണം നീക്കണം എന്ന് ആവശ്യപ്പെട്ട് സംഘ് പരിവാര്‍ അനുകൂല സംഘടനയായ ഇന്ത്യന്‍ യങ് ലോയേഴ്‌സ് അസോസിയേഷന്‍ സെക്രട്ടറി ഭക്തി പശ്രീജ സേത്തി സുപ്രീം കോടതിയില്‍ റിട്ട് ഹര്‍ജി നല്‍കിക്കൊണ്ടു് പ്രോദ്ഘാടനം ചെയ്തു. 2008 മാര്‍ച്ച് വരെ ദ്രൂതഗതിയില്‍ നീങ്ങിയ കേസ് പിന്നീടു് 2016 വരെ ഏതാണ്ടു് എട്ടു വര്‍ഷക്കാലം കോടതിഫയലുകളില്‍ ശിശിരകാലനിദ്രയില്‍ ലയിച്ചു കിടന്നു. 2014-ല്‍ നരേന്ദ്ര മോദിയുടെ നേതൃത്വത്തില്‍ വന്ന ബി.ജെ.പി. സര്‍ക്കാര്‍ അധികാരത്തില്‍ വന്ന ശേഷം 2016-ല്‍ പെട്ടെന്നൊരു പുത്തനുണര്‍വ്വോടെ ഉണര്‍ന്നെണീറ്റ കേസ് കൃത്യമായ ഇടവേളകളില്‍ ആവശ്യമായ നേട്ടങ്ങള്‍ കൈവരിച്ചുകൊണ്ടിരുന്നു. ഇടയ്ക്കു്  കേസില്‍ കോടതി അമിക്കസ് ക്യുറിയെ നിയോഗിക്കുകയും ചെയ്തു (സുപ്രീം കോടതി സീനിയര്‍ അഭിഭാഷകന്‍ രാമമൂര്‍ത്തി, മറ്റൊരു സീനിയര്‍ അഭിഭാഷകര്‍ ആയ രാജു രാമചന്ദ്രന്‍ എന്നിവരായിരുന്നു ആയിരുന്നു അമിക്കസ് ക്യുറിമാര്‍ ). ഇന്ത്യയുടെ 45-ാമതു് സുപ്രീം കോടതി ചീഫ് ജസ്റ്റിസിനെ രാഷ്ട്രപതി രാം നാഥ് കോവിന്ദ് നിയമിച്ചതിനു് അധികം വൈകാതെയാണു് ശബരിമല വിഷയത്തില്‍ വളരെ ചടുലമായ നടപടികള്‍ക്കു് കളമൊരുങ്ങിയതു്. ഇന്ത്യന്‍ യങ് ലോയേഴ്‌സ് അസോസിയേഷനു വേണ്ടി സീനിയര്‍ അഡ്വക്കേറ്റ്  ആര്‍. പി. ഗുപ്തയാണു് കോടതിയില്‍ ഹാജരായതു്.

ശബരിമലയിലെ വിശ്വാസങ്ങളും ആചാരങ്ങളും മാനിക്കണം എന്നും, സ്ത്രീ പ്രവേശനത്തിനുള്ള നിയന്ത്രണം തുടരണം എന്നും ആയിരുന്നു ഉമ്മന്‍ ചാണ്ടിയുടെ നേതൃത്വത്തിലുള്ള അന്നത്തെ സംസ്ഥാന സര്‍ക്കാര്‍ സുപ്രീം കോടതിയില്‍ സമര്‍പ്പിച്ച പുതിയ സത്യവാങ്മൂലത്തിന്റെ കാതല്‍. പിന്നീടു് വിവിധകാലയളവുകളിലായി സുപ്രീം കോടതിയില്‍ വാദങ്ങള്‍ നടന്നപ്പോള്‍ ജസ്റ്റിസ് ദീപക് മിശ്രയും ജസ്റ്റിസ് ഗോപാല്‍ ഗൗഡയും സ്ത്രീ പ്രവേശനത്തിന് അനുകൂലമായ പല പരാമര്‍ശങ്ങളും നടത്തി, അതേസമയം വിശ്വാസങ്ങളിലും ആചാരങ്ങളിലും കോടതി ഇടപെടേണ്ടതില്ല എന്ന നിലപാട് ആണ് ജസ്റ്റിസ് കുര്യന്‍ ജോസഫ് സ്വീകരിച്ചത്.

കേസിന്റെ പുരോഗതികള്‍ക്കിടയില്‍ പലകുറി സുപ്രീം കോടതി ബഞ്ചില്‍ വിവിധ ജഡ്ജിമാര്‍ മാറി മാറി വന്നുകൊണ്ടിരുന്നു. 2016 നവംബറില്‍ ജസ്റ്റിസ് മാരായ ദീപക് മിശ്ര, സി നാഗപ്പന്‍, ആര്‍ ഭാനുമതി എന്നിവര്‍ അടങ്ങിയ ബെഞ്ച് ശബരിമല സ്ത്രീ പ്രവേശന കേസ് പരിഗണിച്ചപ്പോള്‍ പിണറായി വിജയന്റെ നേതൃത്വത്തിലുള്ള സംസ്ഥാന സര്‍ക്കാര്‍ തങ്ങളുടെ നിലപാടു് ശബരിമലയില്‍ സ്ത്രീപ്രവേശനം അനുവദിക്കണം എന്നു തന്നെയാണെന്നു് കോടതിയെ അറിയിച്ചു. സംസ്ഥാന സര്‍ക്കാര്‍ 2016 ഫെബ്രുവരി 5 ന് അധിക സത്യവാങ് മൂലം കോടതിയില്‍ സമര്‍പ്പിച്ചിട്ടുള്ളതു് പിന്‍വലിക്കാന്‍ അനുമതി നല്‍കണമെന്നും  2007 നവംബര്‍ 13-നു് സംസ്ഥാന സര്‍ക്കാര്‍ ഫയല്‍ ചെയ്ത സത്യവാങ് മൂലത്തില്‍ പറഞ്ഞിരിക്കുന്നതാണ് സര്‍ക്കാരിന്റെ നിലപാടു് എന്നും അതിന് അനുസൃതം ആയിരിക്കും സര്‍ക്കാരിന്റെ വാദമെന്നും കൃത്യമായിത്തന്നെയായിരുന്നു സര്‍ക്കാര്‍ അഭിഭാഷകന്റെ വാദം. പുരോഗമനാശയങ്ങളുള്ള (ആശയപരമായി മാത്രം, തത്വത്തില്‍ അല്ല!) പാര്‍ട്ടിയാണെങ്കിലും  പരിവാര്‍ സംഘങ്ങള്‍ ഒരുക്കിയ കെണിയില്‍ തങ്ങള്‍ ഫ്ലാങ്ക് ചെയ്യപ്പെടുകയാണെന്നു് അപ്പോള്‍ അവര്‍ മനസ്സിലാക്കാതെ പോയി. അതിനുള്ള നയചാതുരിയും ചിന്താശക്തിയും വിവേകവും ഉള്ള നേതാക്കന്മാര്‍ ഇന്നു് ഈ പാര്‍ട്ടിയില്‍ ഇല്ലല്ലോ.

2017 ഒക്ടോബര്‍ 13-നായിരുന്നു ശബരിമലയില്‍ സ്ത്രീകളുടെ പ്രവേശനത്തിന് ഉള്ള നിയന്ത്രണം നീക്കണം എന്ന് ആവശ്യപ്പെട്ട് ഇന്ത്യന്‍ യങ് ലോയേഴ്‌സ് അസോസിയേഷന്‍ നല്‍കിയ ഹര്‍ജി ഭരണഘടന ബെഞ്ചിന് വിട്ട് കൊണ്ട് ജസ്റ്റിസ് ദീപക് മിശ്രയുടെ അധ്യക്ഷതയില്‍ ഉള്ള ബെഞ്ച് ഉത്തരവ് പുറപ്പടുവിച്ചതു്. ഭരണഘടന ബെഞ്ച് പരിഗണിക്കേണ്ട വിഷയങ്ങള്‍ക്കും ചീഫ് ജസ്റ്റിസ് അധ്യക്ഷനായ ബെഞ്ച് രൂപം നല്‍കി. തുടര്‍ന്നു്  2018 ജൂലൈ 17നു് തുടങ്ങിയ വാദങ്ങള്‍ക്കൊടുവില്‍ 2018 സെപ്റ്റംബര്‍ 28-നായിരുന്നു ശബരിമല കേസിലെ സുപ്രീം കോടതിയുടെ ഭരണഘടന ബെഞ്ചിലെ ചരിത്രപ്രധാനമായ വിധി. വിരമിക്കുന്നതിനു വെറും മൂന്നു ദിവസം മാത്രം ബാക്കി അവശേഷിക്കേ ചീഫ് ജസ്റ്റിസ് ദീപക്‍ മിശ്ര പുറപ്പെടുവിച്ച ഈ വിധിയുടെ പശ്ചാത്തലത്തിലായിരിക്കും ഇനി കേരളത്തിലെ ബി.ജെ.പി.യുടെ ഭാവി എന്നു നിസ്സംശയം പറയാം.

വിധിയെത്തുടര്‍ന്നു് പരിവാര്‍ സംഘടനകള്‍ക്കിടയില്‍ ആദ്യം ചില ആശയക്കുഴപ്പങ്ങള്‍ വന്നെങ്കിലും അതിവേഗത്തില്‍ ഈ ഭിന്നത നീക്കാനായി എന്നതു് അവരെ സംബന്ധിച്ചിടത്തോളം ചെറിയൊരു നേട്ടമൊന്നുമല്ല. ശബരിമലവിധി കേരളത്തിന്റെ തലവിധിയാകുമെന്ന ആശങ്ക ഇപ്പോള്‍ത്തന്നെ രാഷ്ട്രീയനിരീക്ഷകര്‍ക്കിടയില്‍ ശക്തമായിക്കഴിഞ്ഞു. കൃത്യമായി ആസുത്രണം ചെയ്തെടുത്ത ഈയൊരു വിധിയുടെ മറവില്‍ കേരളത്തിന്റെ രാഷ്ട്രീയസ്വത്വത്തെത്തന്നെ ഹൈജാക്ക് ചെയ്യുകയാണു് ഫാസിസത്തിന്റെ ഇന്ത്യന്‍ പതിപ്പായ പരിവാര്‍ സംഘടനകള്‍ ശ്രമിക്കുന്നതു്. തത്വത്തില്‍ ഇടതുപക്ഷമൂല്യങ്ങളില്‍ കെട്ടിപ്പടുത്തതാണെങ്കിലും പ്രത്യയശാസ്ത്രം കമ്മ്യൂണിസമാണെങ്കിലും പ്രയുക്തരീതികള്‍ അവയ്ക്കെതിരായ നവമുതലാളിത്തമായതും ചിന്തിക്കുന്ന നേതാക്കള്‍ മന്ത്രിസഭയിലും പാര്‍ട്ടിയിലും ഇല്ലാത്തതും കേരളത്തില്‍ സി.പി.എമ്മിനു് തിരിച്ചടിയാണു്. അവര്‍ വിഷയത്തെ നയപരമായി സമീപിക്കുന്നതില്‍ മത്സരിച്ചു വീഴ്ച വരുത്തിക്കൊണ്ടേയിരിക്കുകയാണു്.  അതേ സമയം ചാണക്യതന്ത്രങ്ങള്‍ മെനയാന്‍ പരിവാര്‍ സംഘടനകളില്‍ അനവധി ബുദ്ധികേന്ദ്രങ്ങളുണ്ടു്. തങ്ങളുടെ അജണ്ട നടപ്പിലാക്കാന്‍ അവര്‍ക്കു കൃത്യമായ പദ്ധതികളുമുണ്ടു്. കേരളത്തിലെ കോണ്‍ഗ്രസ് അനുകൂല പാര്‍ട്ടികള്‍ പണ്ടേ തങ്ങള്‍ ഫാസിസത്തിന്റേ കുഴലൂത്തുകാരാണെന്നു് പലവട്ടം പുരപ്പുറത്തുനിന്നു വിളിച്ചു കൂവിയിട്ടുള്ളവരായതിനാല്‍ അവര്‍ ഈ നീക്കങ്ങളില്‍ ബി.ജെ.പിയുടെ ബാറ്റിംഗ് പാര്‍ട്ട്ണറായി സപ്പോര്‍ട്ട് ചെയ്തു സമര്‍ത്ഥമായി കളിക്കുകയേ ചെയ്യൂ.

ലിംഗസമത്വമൊക്കെ നല്ലതുതന്നെ, പക്ഷേ, മതം മനുഷ്യനെ മയക്കുന്ന കറപ്പാണെന്നു് കണ്ടെത്തിയ അതേ പാര്‍ട്ടിയ്ക്കു് ഈ വിഷയത്തില്‍ എന്തെങ്കിലും ഒരു നിലപാടെടുക്കേണ്ട കാര്യമുണ്ടോ? സത്യത്തില്‍ അതവരുടെ കാര്യമേയല്ല. സ്ത്രീകള്‍ മാത്രമല്ല പുരുഷന്മാര്‍ കൂടി ശബരിമലയില്‍ കയറാതിരിക്കുമെങ്കില്‍ അതാണുനല്ലതു് എന്ന ഒരു നിലപാടായിരുന്നെങ്കില്‍ അതവരുടെ പ്രത്യയശാസ്ത്രത്തിനനുകൂലമെങ്കിലുമായേനെ 😁 കുറഞ്ഞപക്ഷം ഈ സ്ത്രീകളെങ്കിലും മതാചാരാനുഷ്ഠാനമെന്ന കറപ്പില്‍ നിന്നു് അകലം പാലിക്കാന്‍ ഇങ്ങനൊരു വിവേചനം കൊണ്ടു് സാധ്യമായിരുന്നു എന്നൊരു നേട്ടവും അതില്‍ കണ്ടെത്താം. പിന്നെ മറ്റൊരു കാര്യമുള്ളതു് സ്ത്രീകള്‍ക്കു കൂടി ദര്‍ശനം സാധ്യമാകുന്ന അവസ്ഥവന്നാല്‍ ഭക്തി വ്യവസായമെന്ന നിലയില്‍ അതു് ശബരിമലയ്ക്കു് നേട്ടം തന്നെയാണു് – ദേവസ്വം ബോര്‍ഡിന്റെ വരുമാനം ഇരട്ടിയിലേറെയാക്കാം. ഒരു പക്ഷേ അതാകുമോ സീപീയെമ്മിന്റെ ചിന്ത? 😁 പരിവാരസംഘങ്ങള്‍ ഈ വിഷയമെടുത്തു് രാഷ്ട്രീയമായി ഉപയോഗിക്കുമ്പോള്‍ കൈയ്യും കെട്ടി നോക്കിനില്‍ക്കാന്‍ സീപീയെമ്മിനാവില്ല, എങ്ങാനും അവരിതു് മുതലെടുത്താലോ എന്നൊരു ഭയാശങ്ക, ആ നിരര്‍ത്ഥകഭയാശങ്ക കൊണ്ടുതന്നെയാവണം അധികാര അത്യാര്‍ത്തി ഒടുങ്ങാത്ത ഈ നവമുതലാളിത്തപാര്‍ട്ടി ഈ വിഷയത്തില്‍ ഇങ്ങനെ ഒരു രാഷ്ട്രീയ അവിവേകം കാണിക്കാന്‍ കാരണം എന്നു് ന്യായമായും നമുക്കു് സംശയിക്കാം. തല കൊയ്യുന്ന കൊള്ളസംഘത്തിനേക്കാള്‍ നല്ലതു് പിടിച്ചുപറിക്കാരനായ മോഷ്ടാവു തന്നെയായിരിക്കും, അതിനാല്‍ എന്തുകൊണ്ടും ഈ ബുദ്ധിശൂന്യസമരത്തില്‍ സീപീയെം തന്നെ ജയിക്കട്ടെ എന്നാണു് ഇപ്പോള്‍ കേരളം പ്രാര്‍ത്ഥിക്കുന്നതും. ഒപ്പം ചിന്ത പേരിലല്ലാതെ തലയ്ക്കകത്തു് ചിന്തയുള്ള ഏതെങ്കിലും ഒരു നേതാവു് ഈ പാര്‍ട്ടിയില്‍ പിറവിയെടുക്കട്ടെ എന്നും കേരളം ശബരീശനോടു പ്രാര്‍ത്ഥിക്കുന്നു.

ഒന്നുറപ്പാണു് – ശബരിമല വിധി കൊണ്ടു് എത്രയേറെ രാഷ്ട്രീയലാഭം ആര്‍ക്കുണ്ടാക്കാന്‍ കഴിയുമോ അതിന്റെ നാലിരട്ടി ഇതിനകം പരിവാര്‍ രാഷ്ട്രീയം കൊയ്തെടുത്തു കഴിഞ്ഞു. ഇനി ഇതിലൊന്നും വീഴാതെ കേരളത്തിലെ വോട്ടര്‍മാര്‍ ഫാസിസത്തിനെതിരേ വിധിയെഴുതിയാല്‍ അപ്പോള്‍ നമുക്കു് വീണ്ടും കേരളത്തെ പ്രബുദ്ധകേരളം എന്നു വീണ്ടും വിശേഷിപ്പിക്കാം. അതുവരെ ഭാരതം കണ്ടതില്‍ ഏറ്റവും മഹാനായ ഗുരുവായ വിവേകാനന്ദ സ്വാമികള്‍ വിശേഷിപ്പിച്ചതുപോലെ കേരളത്തെ നമുക്കു് ഒരു ഭ്രാന്താലയമായി കാണാം. ജാതിഭേദവും മതദ്വേഷവും ലിംഗവിവേചനവും കലര്‍പ്പില്ലാതെ കാണുന്ന മോസ്റ്റ് മോഡേണ്‍ ശിലായുഗപരമ്പര വസിക്കുമിടമായി ലോകത്തിനു മുമ്പില്‍ ചില്ലിട്ടു സൂക്ഷിക്കാം.

ആധാര്‍ മുഖാന്തിരം ജനങ്ങളുടെ കള്ളയൊപ്പിടാന്‍ കോര്‍പ്പറേറ്റുകളുടെ മത്സരം

1984* യാഥാര്‍ത്ഥ്യമാകുന്നതു് ഇന്ത്യയിലാണു്. ഇവിടെ പൊതുജനം പൊതുവഴിയിലൂടെ ഇപ്പോള്‍ നടക്കുന്നതു് നഗ്നരായാണു് – ആ സത്യം അവര്‍ പക്ഷേ തിരിച്ചറിയുന്നില്ലെന്നു മാത്രം. അവരുടെ നഗ്നത വിറ്റു പണമാക്കുന്നതൊന്നും ആരും ഈയടുത്ത കാലത്തൊന്നും അറിയാന്‍ പോകുന്നുമില്ല. ഇനി അറിഞ്ഞാല്‍ത്തന്നെ ഇതൊക്കെ യെന്തു് എന്ന മനോഭാവമാണു് പലര്‍ക്കും. ബാങ്കില്‍ അക്കൗണ്ടു് തുടങ്ങണമെങ്കിലും അതു് നിലനിര്‍ത്തണമെങ്കിലും വേണം ആധാര്‍. പാന്‍ കാര്‍ഡിനൊപ്പവും ആധാര്‍ ലിങ്ക് ചെയ്യണം. മൊബൈല്‍ ഫോണ്‍ ഉപയോഗിക്കാനും ആധാറുമായി ലിങ്ക് ചെയ്യണം.


സ്വകാര്യത പൂര്‍ണ്ണമായി നഷ്ടപ്പെട്ടു് തുണിയില്ലാത്തവിധം ജനമങ്ങനെ തെരുവിലൂടെ നടക്കുകയാണു്. സ്വന്തം ശരീരം വരെ ആധാറുമായി ലിങ്ക് ചെയ്യുന്ന കാലം അങ്ങ് അതിവിദൂരമൊന്നുമല്ല. സ്വന്തം ശരീരത്തില്‍ വരെ പൗരനു് പരമമായ അധികാരമില്ല എന്നു് ആധാര്‍ സംബന്ധമായ വ്യവഹാരത്തിനിടെ കോടതിയില്‍ വാദിച്ച സര്‍ക്കാരാണു് അധികാരത്തിലിരിക്കുന്നതെന്നതു് പ്രത്യക്ഷത്തില്‍ അസംബന്ധമെന്നു തോന്നാവുന്ന ഈ വാദത്തിനു് ബലം പകരുന്നുമുണ്ടു്.


newspaper
│കൂടുതല്‍ അറിയാന്‍ ഈ വാര്‍ത്താശകലം നോക്കുക│

ഇങ്ങനെ ആധാറുമായി സര്‍വ്വത്ര കാര്യങ്ങളും ലിങ്ക് ചെയ്യുന്ന പാവപ്പെട്ടവര്‍ക്കു് ഇപ്പോള്‍ കിട്ടുന്നതു് അസ്ഥാനത്തുള്ള അടിയാണു്. തള്ളവിരല്‍ കൊണ്ടു് ഒപ്പു ചാര്‍ത്തുകയാണു് ജനമായ ജനം മുഴുവന്‍ — ഏതോ രേഖയില്‍. എന്തൊക്കെയാണു് അവിടെ നമ്മള്‍ ഒപ്പിടുന്നതെന്നു് ആരും അറിയുന്നുമില്ല. ആ രേഖ കമ്പ്യൂട്ടറിന്റെ മോണിറ്ററിലോ അല്ലെങ്കില്‍ പ്രിന്റ് എടുത്തോ നാം വായിച്ചിരിക്കേണ്ടതാണു്. ആരും അതൊന്നും പറഞ്ഞുതരുന്നുമില്ല, അതൊന്നും നാമൊട്ടറിയുന്നതു പോലുമില്ല. പലരും അവരറിയുകപോലും ചെയ്യാത്ത സര്‍വ്വീസുകള്‍ സബ്സ്ക്രൈബ് ചെയ്യേണ്ടിവരുന്നു. മൊബൈല്‍ കമ്പനികളുടെ പേമെന്റ് ബാങ്കുകളില്‍ അക്കൗണ്ടുകള്‍‍ മുതല്‍ ഉപഭോക്താവിന്റെ കാശുപിടുങ്ങുന്ന ഒട്ടനവധി തട്ടിപ്പുസര്‍വ്വീസുകള്‍ വരെ ആധാര്‍ ലിങ്കിംഗിന്റെ മറവില്‍ അവര്‍ ആളുകളുടെ തലയില്‍ കെട്ടിവച്ചു. എല്ലാം കഴിഞ്ഞു് വീട്ടിലെത്തിക്കഴിയുമ്പോഴാകും ക്ണീം ക്ണീം എന്നൊരു മണിയൊച്ചയോടെ ഒരേസ്സെമ്മെസ് വന്നു കയറുന്നതു് — അവന്റമ്മെടെ ഡാഷ് ഡാഷ് സര്‍വ്വീസ് ഈസ് ആക്ടിവേറ്റഡ് വിത്ത് യുവര്‍ മൊബൈല്‍ കണക്ഷന്‍ — പ്ലിംഗ് എന്നു അണ്ണാക്കില്‍ വിരലും തള്ളിക്കേറ്റി നോക്കിനില്‍ക്കാനേ നമുക്കൊക്കെ കഴിയു. അത്രന്നെ. പാവപ്പെട്ടവന്റെ കാശടിച്ചുമാറ്റുന്ന നാണമില്ലാത്ത ഈ കോര്‍പ്പറേറ്റുകളോടൊക്കെ ആര്‍ക്കു് എതിര്‍ത്തുനില്‍ക്കാന്‍ പറ്റും? പോരാത്തതിനു് നമ്മുടെ സ്വന്തം സര്‍ക്കാര്‍ പോലും അവര്‍ക്കൊപ്പമാണു്  — അല്ല, അവര്‍ക്കൊക്കെ വേണ്ടിയാണല്ലോ ഈ ആധാര്‍ യജ്ഞം സര്‍ക്കാര്‍ നടപ്പാക്കുന്നതു തന്നെ.

ഇനി ഈ ഓഡിയോ ഒന്നു കേട്ടുനോക്കൂ

│ഓഡിയോ കേള്‍ക്കാന്‍ ചുമ്മാ ഒന്നു ക്ലിക്കിയാല്‍ മാത്രം മതി│

ഓഡിയോയില്‍ ഫോണ്‍ വിളിക്കുന്ന ഈ ചങ്ങാതി ചെയ്തതു പോലെ പാവം കസ്റ്റമര്‍ കെയറിലിരിക്കുന്ന തൊഴിലാളിയെ വിളിച്ചു വിരട്ടിയിട്ടു പ്രത്യേകിച്ചു കാര്യമൊന്നുമില്ല. ഒരുപക്ഷേ അയാള്‍ക്കും അതറിയാമായിരിക്കും. അയാള്‍ക്കു് ഒടുവില്‍ എന്തു മറുപടി കിട്ടിയെന്നുമറിയില്ല. ഇതിവിടെ പേസ്റ്റിയതു് പക്ഷേ ജനം ഈ കള്ളക്കളികള്‍ പതിയെ തിരിച്ചറിയാന്‍ തുടങ്ങിയെന്നു കാണിക്കാന്‍ വേണ്ടിയാണു്. എങ്ങനെയാണു് ഈ ബിഗ്ബ്രദര്‍ സ്റ്റേറ്റ് † പൗരന്മാരെ സദാസമയവും  നിരീക്ഷണവലയത്തിനുള്ളിലാക്കുന്നതെന്നു് ഇനി നമുക്കു് നേരിട്ടുകാണാം.

ജിയോ എടുക്കുന്നവര്‍ ആരുമറിയാതെ അവരുടെ ജിയോമണിയുടെ കസ്റ്റമര്‍ ആകുന്നു. എയര്‍ടെല്‍ എടുക്കുന്നവര്‍ തങ്ങളറിയാതെ എയര്‍ടെല്‍ പേമെന്റ് ബാങ്കിലെ ഇടപാടുകാരാവുന്നു. ഏറ്റവും വലിയ കഷ്ടമെന്താണെന്നു വച്ചാല്‍ ആധാറുമായി ലിങ്ക് ചെയ്ത അവസാനത്തെ ബാങ്കിലേയ്കാണു് നമ്മുടെ എല്‍പിജിയുടെയും മറ്റും സബ്സിഡി ചെന്നു ചേരുന്നതു്. ഉത്തമബോധ്യത്തോടെ ആധാറുമായി ബന്ധിപ്പിച്ച സ്വന്തം ബാങ്കില്‍ പണമെത്താതെവരുമ്പോള്‍ മാത്രമേ ഈ തട്ടിപ്പിന്റെ കഥ പാവം ഉപഭോക്താവു് അറിയുകയുള്ളൂ. ചിലരാകട്ടെ ഒരുകാലത്തും അതറിയണമെന്നുമില്ല.

എന്തിനും ഏതിനും ഇന്ത്യയില്‍ ആധാര്‍ ലിങ്കിംഗ്. ഒടുവില്‍ പൊതുജനം വഴിയാധാരമാകുമോ?

എന്തു കാര്യത്തിനും ഇന്ത്യയില്‍ ആധാര്‍ ലിങ്കിംഗ്. അതു് ഉയര്‍ത്തുന്ന സംശയങ്ങള്‍

ലോകമേ ഇനി പറയൂ, എങ്ങനുണ്ടു് ഞങ്ങള്‍ ഇന്ത്യാക്കാര്‍ കണ്ടുപിടിച്ച ഈ ആധാര്‍? എങ്ങനുണ്ടു് സദാനേരവും ഞങ്ങളെ പൊന്നുപോലെ നോക്കുന്ന / നിരീക്ഷിക്കുന്ന സര്‍ക്കാര്‍?

ആധാര്‍ ഇന്ത്യയിലെ പാവപ്പെട്ട ജനതയുടെ ആഹാരം നിഷേധിക്കുന്നു.

ഇക്കഴിഞ്ഞ സെപ്തംബര്‍ 28-നു് ആധാറുമായി ലിങ്ക് ചെയ്യാത്തതിന്റെ പേരില്‍ റേഷന്‍ കാര്‍ഡ് നിഷേധിച്ചതോടെ ജാര്‍ഖണ്ഡിലെ സിംദേഗ ജില്ലയില്‍ സന്തോഷ് കുമാരി എന്ന പെണ്‍കുട്ടി പട്ടിണി കിടന്ന് മരിച്ചു. ദുര്‍ഗാ പൂജയ്ക്ക് സ്‌കൂള്‍ അവധിയായിരുന്നതിനാല്‍ ഭക്ഷണം സ്‌കൂളില്‍ നിന്നും ലഭിച്ചിരുന്നില്ല. സ്വന്തമായി ഭൂമിയോ ജോലിയോ ഇല്ലാത്ത ഈ പെണ്‍കുട്ടിയുടെ മാതാപിതാക്കള്‍ നാഷണല്‍ ഫുഡ് സെക്യൂരിറ്റി ആക്ട് പ്രകാരം റേഷന്‍ കാര്‍ഡിന് യോഗ്യരായിരുന്നു. പക്ഷെ ആധാറുമായി ബന്ധിപ്പിച്ചില്ലെന്ന ഒരൊറ്റ കാരണത്താല്‍ മാത്രമാണു് റേഷന്‍ കാര്‍ഡ് അധികൃതര്‍ നിഷേധിച്ചതു്. സര്‍ക്കാര്‍ ആനുകൂല്യങ്ങള്‍ ആധാര്‍ കാര്‍ഡ് ലഭിക്കാത്തവര്‍ക്ക് നിഷേധിക്കരുതെന്ന് സുപ്രീംകോടതി ഉത്തരവ് നിലനില്‍ക്കേയാണ് ഇത്തരത്തില്‍ ഒരു സംഭവം ഉണ്ടായത്. ഇന്ത്യയിലെ പ്രധാനവാര്‍ത്താ ചാനലുകളിലൊന്നിലും വാര്‍ത്ത വേണ്ട വിധത്തില്‍ റിപ്പോര്‍ട്ട് ചെയ്യപ്പെട്ടില്ല. ഇതൊന്നും പക്ഷേ
റേഷന്‍ കാര്‍ഡുമായി ആധാര്‍ ബന്ധിപ്പിക്കുന്ന നടപടികളില്‍ യാതൊരു പുനര്‍വിചിന്തനത്തിനും കാരണമാകുന്നില്ല എന്നതാണ് ദുഃഖകരം. പകരം സര്‍ക്കാര്‍ ബഹുദൂരം അതിശീഘ്രം എന്ന നിലയില്‍ ആധാര്‍ – റേഷന്‍ കാര്‍ഡ് ബന്ധിപ്പിക്കല്‍ യജ്ഞവുമായി മുന്നോട്ടു പോവുകയാണ്. ആധാര്‍ കാര്‍ഡുമായി ബന്ധിപ്പിക്കാത്തവരെ നവംബറോടെ റേഷന്‍ വിതരണ പട്ടികയില്‍ നിന്നും ഒഴിവാക്കുമെന്ന് ലത്തേഹാര്‍ ജില്ലയിലെ സപ്ലൈ ഓഫീസര്‍ ഉത്തരവിട്ടിട്ടുണ്ട്.

ഇടതുമുന്നണി ഭരിക്കുന്ന സാക്ഷര കേരളത്തിലും കേന്ദ്രസര്‍ക്കാരിന്റെ ഈ ഫാസിസ്റ്റ് തീരുമാനത്തിനു കൊടി പിടിക്കുന്ന കാര്യങ്ങളാണു് കാണാന്‍ കഴിയുന്നതു്. ഇന്നത്തെ (2017 നവംബര്‍ 18) മാതൃഭൂമി പത്രത്തിലെ ഈ പരസ്യം കാണൂ.

എവിടെപ്പോയി ഇടതുപക്ഷത്തിന്റെ ഇടതു ചിന്തകള്‍? ഇടതുപക്ഷം ചീഞ്ഞാല്‍ തീവ്ര വലതുപക്ഷമാകും എന്നതു് സത്യമാണു്

ആധാറിനെതിരേ പ്രതികരിക്കുവാന്‍ ആഗ്രഹിക്കുന്നോ?

ആധാര്‍ എന്ന ഭ്രാന്തു് അവസാനിപ്പിക്കൂ സര്‍ക്കാരേ. ജനങ്ങളെ ജീവിക്കാന്‍ അനുവദിക്കൂ. പ്രിയജനങ്ങളേ, നിങ്ങളില്‍ കഴിവുള്ളവര്‍ rethinkaadhaar.in/take-action എന്ന വെബ്സൈറ്റില്‍ പോയി നിങ്ങളുെ പ്രതിഷേധം അറിയിച്ചു് വോട്ടു ചെയ്യൂ — ആധാര്‍ വേണ്ടെന്നു് ലോകത്തോടു വിളിച്ചു പറയൂ.

വാല്‍ക്കഷണം

ഇതൊക്കെ എഴുതിക്കഴിഞ്ഞപ്പോഴാണു് എയര്‍ടെല്ലിന്റെ കാര്യത്തില്‍ സംഭവം സത്യമാണെന്നും ആധാറിന്റെ പിന്നിലുള്ള ഉഡായിക്കമ്പനി എയര്‍ടെല്ലിനൊരു ഭീഷണിസന്ദേശം ഇതിനകം അയച്ചുംകഴിഞ്ഞു എന്നൊക്ക മനസ്സിലാക്കുന്നതു്.  paste-document32 ഈ പേസ്റ്റ്ബിന്‍ ഡോക്യുമെന്റ് ഒന്നു നോക്കിക്കോളൂ.


* ജോര്‍ജജ് ഓര്‍വെല്ലിന്റെ വിഖ്യാതമായ ഒരു നോവല്‍. സര്‍ക്കാരിന്റെ സര്‍വ്വാധിപത്യമാണു് ഇതിവൃത്തം.
† ജോര്‍ജജ് ഓര്‍വെല്ലിന്റെ 1984 എന്ന നോവലിലെ കഥാപാത്രമാണു് ബിഗ് ബ്രദര്‍ (വല്യേട്ടന്‍)

 

സ്വകാര്യത ഇന്ത്യയിലിനി മൗലികാവകാശം

ബ്രിട്ടീഷ് അടിമത്തത്തില്‍ നിന്നു് ഭാരതം മോചിതയായിട്ടു് 70 വര്‍ഷം കഴിഞ്ഞു് പിന്നെയും ഒമ്പതു ദിവസങ്ങള്‍ക്കു ശേഷമായിരുന്നു ഇന്ത്യയിലെ നൂറുകോടി മുപ്പത്തിരണ്ടു ലക്ഷത്തിലേറെ വരുന്ന പൗരന്മാര്‍ക്കു ആഹ്ലാദമേകി പരമോന്നതനീതിപീഠം സുപ്രധാനമായ ആ വിധി പ്രസ്താവിച്ചതു്. സ്വകാര്യത ഭാരതീയപൗരന്റെ മൗലീകാവകാശമാകുന്നു. അതെ 2017 ആഗസ്റ്റ് 24-ാം തീയതി ഇന്ത്യയുടെ രണ്ടാം സ്വാതന്ത്ര്യദിനമാകുന്നു. സ്വകാര്യത മൗലീകാവകാശമല്ലെന്ന കേന്ദ്രസര്‍ക്കാര്‍ വാദത്തെ എതിര്‍ത്തുകൊണ്ടാണു് സുപ്രീം കോടതിയുടെ ഒമ്പതംഗ ബഞ്ച് ചരിത്രപ്രധാനമായ ഈ വിധി പ്രഖ്യാപിച്ചതു്.  ഈ വിധിയോടെ സ്വകാര്യത ഇനിമുതല്‍ ഓരോ ഭാരതീയപൗരന്റേയും മൗലീകാവകാശമാകുന്നു.

പൗരന്മാര്‍ക്കു് അവരുടെ സ്വന്തം ശരീരങ്ങളില്‍പോലും ആത്യന്തിക അവകാശം ഇല്ലെന്നു് കേന്ദ്രസര്‍ക്കാര്‍.

Citizens don’t have absolute right over their bodies: Govt. അതായതു് പൗരന്മാര്‍ക്കു് അവരുടെ സ്വന്തം ശരീരങ്ങളില്‍പോലും ആത്യന്തിക അവകാശം ഇല്ലെന്നു് കേന്ദ്രസര്‍ക്കാര്‍.

ഇത്രയും നാള്‍ സ്വകാര്യത എന്നതു് നമുക്കു് മൗലീകാവകാശമായിരുന്നില്ല എന്നോര്‍ക്കുമ്പോള്‍ എത്ര പിന്തിരിപ്പന്‍ വ്യവസ്ഥിതിയിലാണു് ഇത്രകാലം നാം ജീവിച്ചതെന്നു് ഭീതി തോന്നുന്നു. എന്നിട്ടും നമ്മുടെ സര്‍ക്കാര്‍ കോടതിയില്‍ കഠിനമായി വാദിച്ചതു് സ്വകാര്യത മൗലീകാവകാശമല്ലെന്ന കടുത്ത നിലപാടില്‍ത്തന്നെയാണു്. ആധാര്‍ പോലുള്ള നിരീക്ഷണസംവിധാനങ്ങളിലൂടെ, അതു് വിവിധ പദ്ധതികളുമായി ബന്ധിപ്പിക്കുന്നതിലൂടെയൊക്കെയുള്ള ജനങ്ങളുടെ സ്വകാര്യതയ്ക്ക് മേല്‍ കുതിരകയറാനുള്ള കേന്ദ്ര സര്‍ക്കാര്‍ നീക്കത്തിനേറ്റ കനത്ത തിരിച്ചടിയാണു് സുപ്രീം കോടതി ഒന്‍പതംഗ ഭരണഘടനാ ബഞ്ചിന്റെ ഏകകണ്ഠമായ ചരിത്രപ്രധാനമായ ഈ വിധി.

പശൂവിയന്‍ സിദ്ധാന്തങ്ങളുടെ പിന്‍ബലത്തോടെ ഫാസിസ്റ്റ് ആശയങ്ങളുമായി മുന്നോട്ടു് പോകുന്ന നമ്മുടെ സമകാലീന രാഷ്ട്രീയ സാഹചര്യത്തില്‍ ഈ വിധിയ്ക്ക് നിര്‍ണ്ണായകമായ പ്രാധാന്യമുണ്ട്.  രാജ്യം മുന്നോട്ടുപോയിക്കൊണ്ടിരിക്കുന്നതു് അടിയന്തിരാവസ്ഥയ്ക്ക് സമാനമായ ഒരു സാഹചര്യത്തിലൂടെയാണ്. പശുവിനു വേണ്ടി ആംബുലന്‍സ് ഏര്‍പ്പെടുത്തുകയും ദരിദ്ര / ദളിത് മനുഷ്യര്‍ക്കു് ചികിത്സ നിഷേധിക്കുകയും ചെയ്യുന്ന, ശിശുമരണങ്ങള്‍ ശ്രദ്ധിക്കുകയേ ചെയ്യാത്ത ഈ ഫാസിസ്റ്റ് കാലഘട്ടത്തിൽ  പൗരന്റെ സ്വകാര്യത മൗലിക അവകാശം അനുവദിച്ചുതരുന്ന രീതിയിലുള്ള സുപ്രീം കോടതി വിധിയെ അങ്ങേയറ്റം ബഹുമാനത്തോടെയേ കാണാനാകൂ. രാഷ്ട്രത്തേക്കാള്‍ വ്യക്തിയുടെ അധികാരത്തിന് വര്‍ദ്ധന വരുത്തുന്ന ഈ വിധി നവഫാസിസ്റ്റ് മുന്നേറ്റങ്ങള്‍ക്കു് ഒരു തിരിച്ചടി നല്‍കുമെന്നു് കരുതാം.

കോര്‍പറേറ്റ് നിരീക്ഷണസംവിധാനങ്ങളായ വാട്സാപ്പ്, ഫെയ്സ്ബുക് തുടങ്ങിയ സമൂഹ മാധ്യമങ്ങളിലൂടെ പൗരന്മാര്‍ കൈമാറുന്ന സ്വകാര്യ വിവരങ്ങൾക്കു് യാതൊരു സ്വകാര്യതയുമില്ലെന്ന സത്യം നാം മുന്നേ അറിഞ്ഞിട്ടുള്ളതാണു്. ഉപയോക്താക്കളുടെ വ്യക്തിവിവരങ്ങൾ ഫെയ്‌സ്ബുക്കുമായി പങ്കിടുന്നതിൽനിന്നു വാട്‌സാപ്പിനെ ഡൽഹി ഹൈക്കോടതി വിലക്കിയിരുന്നു. ഇത്തരം ഉത്തരവുകൾക്ക് കൂടുതൽ ബലം നൽകുന്നതാണ് ഇന്നത്തെ സുപ്രിംകോടതി വിധി. സുപ്രിംകോടതിയുടെ പുതിയ വിധിയുടെ പശ്ചാത്തലത്തിൽ വീണ്ടും ഈ വിഷയം സജീവചർച്ചയാകും, ആകണം.

പ്ലേ സ്റ്റോറിൽ നിന്നും ആപ്പ്സ്റ്റോറില്‍ നിന്നുമൊക്കെ ഡൗൺലോഡ് ചെയ്യുന്ന ആപ്പുകളും എന്നുവേണ്ട ഇന്റര്‍നെറ്റിലും മൊബൈല്‍ ഫോണിലുമൊക്ക നാം പങ്കുവയ്ക്കുന്ന സ്വകാര്യവിവരങ്ങളുടെ കാര്യത്തിലും ഈ വിധി ബാധകമാകും. ച്ചാല്‍ കമ്പനികള്‍ അവരുടെ സ്വകാര്യതാ നയം പരിഷ്കരിക്കേണ്ടി വരും എന്നര്‍ത്ഥം. പക്ഷേ അതുകൊണ്ടു് ചാര ഏ‍ജന്‍സികള്‍ പണി നിര്‍ത്തി പുണ്യാളന്മാരാകുമെന്നൊന്നും ആരും കരുതേണ്ട. വിന്‍ഡോസ് അധിഷ്ഠിതമായ കമ്പ്യൂട്ടറുകളില്‍ നിന്നും ‍ഡാറ്റ ചോര്‍ത്തിക്കഴിഞ്ഞു് അമേരിക്കന്‍ ചാര ഏജന്‍സിയായ സിഐഎ മാക്‍ ഓഎസ്എക്സിനെയും ഗ്നു/ലിനക്സിനെയുമൊക്കെ ലക്ഷ്യം വച്ചുള്ള ചോര്‍ത്തല്‍ സംവിധാനങ്ങള്‍ രൂപീകരിച്ചുകഴിഞ്ഞു. ഇന്നത്തെ കോടതിവിധി കൊണ്ടു് നാം നേടിയതു് രാഷ്ട്രത്തിനോ കോര്‍പ്പറേറ്റുകള്‍ക്കോ തോന്നിയപോലെ പൗരന്മാരുടെ മൗലികാവകാശമായ സ്വകാര്യതയില്‍ കാരണമില്ലാതെ നേരിട്ടു് ഇടപെടാനാവില്ല എന്ന നേട്ടം മാത്രമാണു്. പക്ഷേ രാഷ്ട്രവും കോര്‍പ്പറേറ്റുകളും രഹസ്യമായി നമ്മെ സദാ നിരീക്ഷിച്ചു കൊണ്ടിരിക്കുന്നതു് തുടരുകയും ചെയ്യും.

ചത്തതു കീചകനെങ്കില്‍ കൊന്നതു ഭീമന്‍ തന്നെ

സാമാന്യബുദ്ധി മാത്രമുള്ള ഏതൊരാള്‍ക്കും ചുമ്മാ ഒന്നു പരിശോധിച്ചാല്‍ മാത്രം മനസ്സിലാകുന്ന ഒന്നാണു് കീചകവധക്കേസ്. കീചകന്‍ കൊല്ലപ്പെട്ടാല്‍ ഒരല്പം ചരിത്രവും പ്രഥമദൃഷ്ട്യാലൂള്ള ചില സാഹചര്യത്തെളിവുകളും മാത്രം പരിശോധിച്ചാല്‍ത്തന്നെ ചോദ്യം ചെയ്യാനായി  പോലീസ് ഭീമനെ അറസ്റ്റ് ചെയ്യും. പക്ഷേ സമുഹത്തിനറിയാം ഭീമനാണു് ഘാതകനെന്നു്. കൊല്ലപ്പെട്ടവന്‍ അതീവനികൃഷ്ടനും നിഷ്ടൂരനുമായതിനാല്‍ ഘാതകനായ ഭീമനെ ധീരനും വീരനുമായി ജനം ആരാധിക്കാന്‍ തുടങ്ങും. അതിനു് സുപ്രീം കോടതി വിധി വരുന്നതു് വരെ ജനം കാത്തുനില്‍ക്കില്ല. ഇതിനൊക്കെ വേണ്ടതു് ഒരു പൊതുബോധത്തിന്റെ സാന്നിദ്ധ്യമാണു്. ഇത്തരം പൊതുബോധമില്ലാത്ത വ്യക്തികള്‍ ധാരാളമുള്ളതിനാല്‍ കേരളത്തില്‍ അക്രമിയായ ദിലീപെന്ന ഗോപാലകൃഷ്ണനെ വാഴ്ത്താന്‍ അടൂര്‍ ഗോപാലകൃഷ്ണനും സക്കറിയ പോലുള്ള ബുദ്ധിജീവികളും പരസ്യമായി നിലപാടെടുക്കുന്നു. അടിയന്തിരാവസ്ഥയിലും പ്രസ്തുതബുദ്ധിജീവികള്‍ ഇതൊക്കെത്തന്നെയല്ലേ പറഞ്ഞും പാ‍ടിയുമൊക്കെ നടന്നതു്?

ഇന്ത്യ ഒരു കോൺസൻ​ട്രേഷൻ ക്യാമ്പായിക്കൊണ്ടിരിക്കുന്നു, ആധാറിലൂടെ

മാധ്യമം ഓണ്‍ലൈനില്‍ വന്ന ലേഖനം കണ്ടപ്പോള്‍ ചില കാര്യങ്ങള്‍ ഓര്‍ത്തുപോയി. ഷിന്‍ഡ്ലേഴ്സ് ലിസ്റ്റ് എന്ന വിഖ്യാതമായ സിനിമ തുടങ്ങുന്നതു് തടവുകാരായ ജൂതരുടെ കണക്കെടുത്തുകൊണ്ടാണു്. കോണ്‍സന്‍ട്രേഷന്‍ ക്യാമ്പിലേയ്ക്കു് അയയ്ക്കുവാന്‍ വേണ്ടിയുള്ളതായിരുന്നു ആ കണക്കെടുപ്പു്. ഏതാണ്ടതുപോലെതന്നെയാണു് ഇന്ത്യയില്‍ നമ്മുടെ ഫാസിസ്റ്റ് ഭരണകൂടം നിരപരാധികളും അജ്ഞരുമായ ജനങ്ങള്‍ക്കു മേല്‍ ആധാര്‍ എന്ന നിരീക്ഷണക്യാമറ അടിച്ചേല്‍പ്പിക്കുന്നതു്. ആദ്യം അവര്‍ വിരലടയാളങ്ങള്‍ ശേഖരിച്ചു, നിര്‍ബന്ധമില്ലെന്നു പറഞ്ഞു, സൗകര്യവും താല്‍പര്യവും ഉള്ളവര്‍ മാത്രം എടുത്താല്‍ മതിയെന്നു പറഞ്ഞു. പതിയെപ്പതിയെ എന്തിനും ഏതിനും ആധാറില്ലാതെ കാര്യങ്ങള്‍ നടക്കില്ലെന്നായി. ജനത്തിന്റെ സ്വകാര്യത അവര്‍ പൂര്‍ണ്ണമായും വലിച്ചുകീറി. പാന്‍ കാര്‍ഡുമായി ബന്ധിപ്പിക്കുന്നതോടെ ജനത്തിന്റെ സാമ്പത്തികസ്വകാര്യതയും അപകടത്തിലായി. ഇപ്പോഴിതാ മൊബൈല്‍ ഫോണ്‍ ഉപയോഗിക്കുവാന്‍ വരെ ആധാര്‍ അനിവാര്യമായിക്കഴിഞ്ഞിരിക്കുന്നു. പൗരസ്വാതന്ത്ര്യങ്ങളെല്ലാം ഓരോന്നോരോന്നായി നീക്കം ചെയ്തു് ആയിരത്തിത്തൊള്ളായിരത്തി എണ്‍പത്തിനാലെന്ന നോവലില്‍ ജോര്‍ജ്ജ് ഓര്‍വെല്‍ വിവരിച്ചിരിക്കുന്നതു പോലെ ഒരു സര്‍വ്വാധിപത്യരാജ്യമായി ഇന്ത്യ അധഃപതിക്കുന്ന കാഴ്ചയ്ക്കു് വൈകാതെ നമുക്കു സാക്ഷ്യം വഹിക്കാം.

മാധ്യമത്തിലെ ലേഖനം ഇവിടെ കോപ്പി ചെയ്യുന്നു.

‘ആധാർ ഇന്ത്യയെ കോൺസൻ​ട്രേഷൻ ക്യാമ്പാക്കുന്നോ?’…

ന്യൂഡല്‍ഹി: സുപ്രീംകോടതിയിലുണ്ടായ രൂക്ഷമായ വാദപ്രതിവാദത്തില്‍ ആധാര്‍ ഇന്ത്യയെ ഒരു കോണ്‍സന്‍ട്രേഷന്‍ ക്യാമ്പാക്കുകയാണെന്ന വാദത്തെ കേന്ദ്ര സര്‍ക്കാര്‍ ചോദ്യം ചെയ്തു. അതേസമയം ആധാറിെന്‍റ ഭരണഘടനസാധുത ഒമ്പതംഗ ഭരണഘടന ബെഞ്ച് എന്നെന്നേക്കുമായി തീര്‍പ്പ് കല്‍പിക്കട്ടെ എന്ന് സുപ്രീംകോടതി വ്യക്തമാക്കി.

ജസ്റ്റിസ് ജെ. ചെലമേശ്വറിെന്‍റ നേതൃത്വത്തിലുള്ള ബെഞ്ച് മുമ്പാകെയാണ് ആധാറിനെ ചൊല്ലി രൂക്ഷമായ വാഗ്വാദം നടന്നത്. സര്‍വാധിപത്യ ഭരണകൂടത്തെ കുറിച്ച്‌ ജോര്‍ജ് ഒാര്‍വെല്‍ എഴുതിയ പുസ്തകം ഒാര്‍മിപ്പിച്ച ഹരജിക്കാരുടെ അഭിഭാഷകന്‍ ശ്യാം ദിവാന്‍ ഏതൊരാളും എന്തും ‘ബിഗ് ബ്രദര്‍ സ്റ്റേറ്റ്’ നിരീക്ഷിച്ചുകൊണ്ടിരിക്കുകയാണെന്ന് കുറ്റപ്പെടുത്തി. കുട്ടികളോട് വിരലടയാളങ്ങള്‍ നല്‍കി ആധാര്‍കാര്‍ഡ് എടുക്കാന്‍ പറഞ്ഞിരിക്കുന്നു. നമ്മളെല്ലാം ഭരണകൂടത്തിന്റെ കുടിയാന്മാരായിരിക്കുകയാണ്. ഇന്ത്യ ഒരു കോണ്‍സന്‍ട്രേഷന്‍ ക്യാമ്പായി മാറിക്കൊണ്ടിരിക്കുന്നു. ഇത് തെറ്റാണ്. ക്ഷേമപദ്ധതികള്‍ക്കും ആധാര്‍ വേണമെന്ന് പുതിയ വിജ്ഞാപനമിറക്കിയിരിക്കുന്നു. നിരീക്ഷകരായ ഭരണകൂടം നമുക്കുമേല്‍ ഇഴഞ്ഞുവരുകയാണ് എന്നും ദിവാന്‍ കൂട്ടിച്ചേര്‍ത്തു.

എന്നാല്‍ ഇൗ വാദത്തെ എതിര്‍ത്ത അറ്റോണി ജനറല്‍ കെ.കെ. വേണുഗോപാല്‍ ഇന്ത്യ കോണ്‍സന്‍ട്രേഷന്‍ ക്യാമ്പ് ആകുകയാണെന്ന വാദം അതിശയോക്തിപരവും പാര്‍ലമെന്‍ററി വിരുദ്ധവുമാണെന്ന് കുറ്റപ്പെടുത്തി. ആധാര്‍ രാജ്യെത്ത 35 കോടി ജനങ്ങള്‍ക്ക് പ്രയോജനപ്പെട്ടുവെന്ന് അവകാശപ്പെട്ടു. ആധാറിന് ശേഷം ആളുകള്‍ക്ക് പണവും പ്രയോജനവും ലഭിക്കുന്നുണ്ട്. ഇന്ത്യയെ കോണ്‍സന്‍ട്രേഷന്‍ ക്യാമ്പ് എന്ന് വിളിച്ചാല്‍ തനിക്ക് യോജിക്കാനാവില്ലെന്നും വേണുഗോപാല്‍ പറഞ്ഞപ്പോള്‍ താന്‍ പ്രസ്താവന ആവര്‍ത്തിക്കുകയാണെന്ന് ദിവാന്‍ വ്യക്തമാക്കി. ഇത് അതിശയോക്തിപരമല്ല. ഇൗ വാക്കു കുറഞ്ഞുപോയെന്നും സര്‍വാധിപത്യം എന്നാണുപയോഗിക്കേണ്ടതെന്നും ദിവാന്‍ തിരിച്ചടിച്ചു.

ഒരായിരം നിരപരാധികള്‍ രക്ഷപെട്ടില്ലെങ്കിലും ഒരു കുറ്റവാളി പോലും ശിക്ഷിക്കപ്പെ‍ടരുതു്

സമീപകാല ബലാല്‍സംഗങ്ങളുടെ ഇരകള്‍ പൈശാചികമായ ക്രൂരതകള്‍ക്കൊടുവില്‍ ഒരു ദുരനുഷ്ഠാനത്തിന്റെ കലാശം പോലെ അനിവാര്യമായ മരണത്തെ പുല്കുന്നു. മലയാളമനഃസ്സാക്ഷിയെ ഞെട്ടിച്ച സൗമ്യവധക്കേസ്, ഡല്‍ഹിയിലെ നിര്‍ഭയ കേസ്, ഇന്നലെ മാത്രം നടന്ന ജിഷ വധക്കേസ് ഇവയിലെല്ലാം കൊടിയ പൈശാചികതയുടെ സാന്നിദ്ധ്യം ദൃശ്യമാണു്. ഇരയുടെ യോനീനാളത്തിലും മലദ്വാരത്തിലും ഇരുമ്പുദണ്ഡുകള്‍ കുത്തിയിറക്കി അതിലൂടെ കുടല്‍മാല പുറത്തുചാടിക്കുന്ന കൊടുംപൈശാചികതയുടെ പിന്നിലെ മനഃശ്ശാസ്ത്രമാണു് മനസ്സിലാകാത്തതു്. കാമപൂരണത്തില്‍ മാത്രമല്ല, അക്രമി ഇരയെ അതിക്രൂരമായി കൊല്ലുന്നതിലും ആനന്ദം കണ്ടെത്തുന്നു എന്നു് നമുക്കനുമാനിക്കാം. എക്കാലത്തും ഇത്തരം കൊടും ക്രൂരതകള്‍ അപൂര്‍വ്വമായി ഉണ്ടായിരുന്നിരിക്കാം, പക്ഷേ ഇപ്പോള്‍ ഇത്തരം ക്രൂരതകള്‍ മാത്രമാണു് നടമാടുന്നതു്. ബലാല്‍സംഗങ്ങളില്‍ മാത്രമല്ല; കൊലപാതകങ്ങളില്‍ പോലും ഈ പൈശാചികത ദൃശ്യമാണു്. 51 വെട്ടുകള്‍ ഏറ്റു കൊല്ലപ്പെട്ട ടി.പി. ചന്ദ്രശേഖരനും കൊച്ചിയില്‍ കൊല്ലപ്പെട്ട ഇംതിയാസ് ഖാനും ഓര്‍മ്മയില്‍ തെളിയുന്ന ഏതാനും സമീപകാല ഉദാഹരണങ്ങള്‍ മാത്രം.

ഇരയെ നോവിക്കാതെയും കൊല്ലാം ക്രൂരമായും കൊല്ലാം. പക്ഷേ ഇവിടെ എന്തുകൊണ്ടു് അക്രമികള്‍ ക്രൂരതയോടെ മാത്രം കൊല്ലുന്നു? അതാണു് ചോദ്യം. മാറുന്ന സമൂഹത്തിന്റെ മാറുന്ന ശീലങ്ങളാകാം കാരണം. പണത്താല്‍ നിയന്ത്രിക്കപ്പെടുന്ന ഒരു സമൂഹത്തില്‍, മാനുഷികമൂല്യങ്ങള്‍ക്കു പ്രസക്തി നഷ്ടപ്പെട്ടുകൊണ്ടിരിക്കുന്ന കാലഘട്ടത്തില്‍, ഫ്ലാറ്റുകളില്‍ നിലംതൊടാതെ ജീവിക്കുകയും മാളുകളുടെ ഉപഭോഗതൃഷ്ണകളില്‍ സ്വയം മറന്നു് അഭിരമിക്കുകയും ചെയ്യുന്ന ജഡയുവത്വങ്ങളില്‍ നിന്നു് മറ്റെന്തു പ്രതീക്ഷിക്കാന്‍ എന്ന ഒരൊഴുക്കന്‍ നിരീക്ഷണം ഇവിടെ ഫലം ചെയ്യുകയില്ലെന്നറിയാം. ആഡംബരകാറുകളില്‍ വന്നിറങ്ങിക്കൊണ്ടു് വിലയേറിയ ബൂട്ടുകൊണ്ടു് പാവപ്പെട്ട ഒരു സെക്യൂരിറ്റി ജീവനക്കാരനെ നിഷ്കരുണം മര്‍ദ്ദിച്ചുകൊന്ന സംഭവം നടന്നതു് ഈയിടെയാണു്. പണത്തിന്റെ സ്വാധീനമുണ്ടായിട്ടും ഇവിടെ എങ്ങനെയോ അക്രമി അകത്തായി. പക്ഷേ, സൗമ്യ വധക്കേസിലും ഡല്‍ഹി സംഭവത്തിലും യഥാര്‍ത്ഥഅക്രമികള്‍ രക്ഷപെടുകയാണുണ്ടായതു്. ദാ ഇന്നലെ മാത്രം നടന്ന ജിഷ വധക്കേസിലും ഇതൊക്കെത്തന്നെയായിരിക്കും സംഭവിക്കുക എന്നു് വെറും ജനത്തിലൊരുവനായ ഞാന്‍ കരുതിപ്പോകുന്നു. അക്രമിയെ ഇതുവരെ കണ്ടത്തിയിട്ടുമില്ല, കണ്ടത്താന്‍ കഴിയുമെന്നു് തോന്നുന്നുമില്ല, ഇനി കണ്ടത്തിയാല്‍ത്തന്നെ ഗോവിന്ദച്ചാമിമാരെപ്പോലെ രക്ഷപെടുകയില്ലെന്നു് എന്തുറപ്പു്? ജിഷയുടെ മരണത്തില്‍ ചില കാര്യങ്ങള്‍ നാം ശ്രദ്ധിക്കേണ്ടതുണ്ടു് – ആദ്യദിനങ്ങളിലെ ജനത്തിന്റെ കുറ്റകരമായ മൗനം, നിസ്സംഗത, പ്രതികരണമില്ലായ്മ – അതു് അത്യന്തം അമ്പരപ്പിക്കുന്നു. ഇത്രയും പൈശാചികമായ ഒരു ബലാല്‍സംഗകൊലപാതകം ജനത്തിന്റെ ശ്രദ്ധയിലെത്തിക്കാന്‍ ഏറെ ദൂരെനിന്നുവന്ന ജിഷയുടെ സഹപാഠികള്‍ വേണ്ടിവന്നു എന്നതുതന്നെ വേദനാകരമായ ഒരവസ്ഥയാണു്, തൊട്ടടുത്തുള്ള ജനങ്ങള്‍ക്കൊന്നും അതില്‍ ഒരാശങ്കയുമുണ്ടായില്ല പോലും! പോലീസിന്റെ ആലസ്യം കണക്കിലെടുക്കേണ്ടതില്ല, എല്ലാ കേസുകളിലും അവര്‍ എന്നും ഇങ്ങനൊക്കെത്തന്നെയായിരുന്നു. തങ്ങള്‍ നേരിട്ടുകൊണ്ടിരുന്ന ഭയാനകമായ അരക്ഷിതാവസ്ഥ സംബന്ധിച്ചു് ജിഷയുടെ കുടുംബം സമര്‍പ്പിച്ച പരാതികള്‍ പോലീസ് ആദ്യമേ ഗൗരവത്തിലെടുത്തിരുന്നെങ്കില്‍ ഒരുപക്ഷേ, ഇങ്ങനൊരു കുറ്റകൃത്യം തന്നെ നടക്കുമായിരുന്നില്ല. തെരഞ്ഞടുപ്പിന്റെ വക്കില്‍ വച്ചു നടന്നതായതിനാല്‍ എല്ലാ മുന്നണിയിലും പെട്ട രാഷ്ട്രീയശിഖണ്ഡികള്‍ക്കും ചെന്നായ്ക്കള്‍ക്കും ശിങ്കങ്ങള്‍ക്കും ഒരു ബലാല്‍സംഗ-കൊലപാതകപ്പാല്‍പ്പായസം സൗജന്യമായി വിളമ്പിക്കിട്ടി എന്നേ പറയേണ്ടൂ – അവരുണ്ടു് ആര്‍ത്തിയോടെ കുടിയോടുകുടി. തൊട്ടതിനും പിടിച്ചതിനും തൂറിയതിനും മുള്ളിയതിനും ഹര്‍ത്താല്‍ നടത്തിയിരുന്നവര്‍, ദളിത് സംഘടനകള്‍ സംയുക്തമായി ആഹ്വാനം ചെയ്ത ഹര്‍ത്താലിനു് പിന്തുണ നല്‍കാന്‍ പോലും സന്നദ്ധരാകാതെ, പെട്ടെന്നൊരു ദിവസം കൊണ്ടു് മാന്യന്മാരായി! പോലീസ് തിരക്കിലാണു് – രേഖാചിത്രം തയ്യാറാക്കല്‍ എന്ന നിഴല്‍യുദ്ധം അങ്ങനെ മന്ദമന്ദം പുരോഗതി പ്രാപിച്ചുവരുന്നു.

ജിഷയുടെ ഘാതകനെ എത്രയും വേഗം കണ്ടെത്തുക തന്നെ വേണം. അയാള്‍ക്ക് അര്‍ഹിക്കുന്ന ശിക്ഷ തന്നെ ലഭിക്കണം. അതില്‍ രണ്ടഭിപ്രായമില്ല. ജിഷയുടെ പ്രശ്നങ്ങള്‍ ലോകമറിയാന്‍ അവര്‍ക്കു് രക്തസാക്ഷിത്വം വരിക്കേണ്ടി വന്നു. ജിഷയേയും അവരുടെ അമ്മ രാജേശ്വരിയേയും പോലെ ഇനിയുമേറെ നിസ്സഹായരായ മനുഷ്യര്‍ സമൂഹത്തിന്റെ പുറമ്പോക്കുകളില്‍ നിരാലംബരായി ജീവിക്കുന്നുണ്ടു്. അവരുടെ പ്രശ്നങ്ങളും ലോകശ്രദ്ധ പിടിച്ചുപറ്റാന്‍ ഇനിയും നാം അവരുടെ രക്തസാക്ഷിത്വം ആവശ്യപ്പെട്ടുകൂടാ. വെറുമൊരു ചടങ്ങുപോലെ ഒരു ഇരുചക്രവാഹനറാലിയോ പോലീസ് സ്റ്റേഷന്‍ പിക്കറ്റിങ്ങോ ധര്‍ണ്ണയോ ഒക്കെ മാത്രം നടത്തിയതു കൊണ്ടായില്ല; ജീവിയ്ക്കുന്ന ജിഷമാരെ സംരക്ഷിക്കുകയും അവര്‍ക്കുവേണ്ടി പ്രതികരിക്കുകയും അവരെ സഹായിക്കുകയും ചെയ്യുന്നതാണു് ജിഷയ്ക്കുവേണ്ടി നാം ചെയ്യുന്ന ഏറ്റവും മഹത്തരമായ പ്രതിഷേധം.

ബലാല്‍സംഗക്കേസുകളിലെ പ്രതികള്‍ക്കു് എന്തുകൊണ്ടാണു് പരമോന്നതശിക്ഷ നല്കാത്തതെന്നറിയാമോ? ചെയ്യുന്ന കുറ്റത്തിനു് വധശിക്ഷ കിട്ടുമെന്നറിഞ്ഞാല്‍ തെളിവു നശിപ്പിക്കുക എന്ന ഉദ്ദേശത്തോടെ അക്രമി ഇരയെ ഉറപ്പായും കൊല്ലുമത്രേ. അങ്ങനെ ഇരകളുടെ ജീവന്‍ രക്ഷിക്കാന്‍ വേണ്ടിയാണു് ബലാല്‍സംഗക്കേസുകളിലെ പ്രതികള്‍ക്കു് പരമോന്നതശിക്ഷ നല്കാത്തതു് എന്നു് ചില അഭിഭാഷകര്‍. അപ്പോള്‍ ബലാല്‍സംഗം ചെയ്യുകയും ശേഷം ഇരയെ ക്രൂരമായി കൊല്ലുകയും കുറ്റകൃത്യത്തിനു് വ്യക്തമായ തെളിവുകള്‍ ലഭ്യവുമായ സാഹചര്യത്തില്‍ എന്തുചെയ്യും? എന്തേ ചാമിയ്ക്കു് തക്കശിക്ഷ കിട്ടിയില്ല? ഡല്‍ഹിയിലെ നിര്‍ഭയയെ ഏറ്റം ക്രൂരമായി പീഡിപ്പിച്ച, “കുട്ടിയ്ക്കുള്ളിലൊളിച്ചിരുന്ന മുതുക്ക”ന്റെ പേരു പോലും വെളിപ്പെടുത്താതെ സംരക്ഷിച്ചുകൊണ്ടു് നമ്മുടെ കോടതികള്‍ പ്രതിജ്ഞാബദ്ധത പ്രദര്‍ശിപ്പിച്ചു. രാജ്യാന്തരസമൂഹം പോലും സജീവമായിടപെട്ട ആ കേസിലെ “കുട്ടിയ്ക്കുള്ളിലെ മുതുക്ക”നെ യഥാകാലം കോടതി വെറുതെ വിടുകയും ചെയ്തു. ജിഷയുടെ ഘാതകന്റെ കാര്യത്തിലും അങ്ങനെ തന്നെ സംഭവിക്കാനാണു് കൂടുതല്‍ സാദ്ധ്യത. കാരണം, ആയിരം നിരപരാധികള്‍ രക്ഷപെട്ടില്ലെങ്കിലും ഒരു കുറ്റവാളി പോലും ശിക്ഷിക്കപ്പെ‍ടരുതു് എന്നു് നമ്മുടെ മഹത്തായ നിയമവ്യവസ്ഥയ്ക്കു് കലശലായ നിര്‍ബന്ധമുണ്ടു്. ഭാരത് മാതാ കീ ജയ്!