റാസ്ബെറി പൈ ഉപയോഗിച്ചു് ഓണ്‍ലൈന്‍ ക്ലാസ്സുകളില്‍ പങ്കെടുക്കാം

റാസ്ബെറി പൈ ഒടുവില്‍ സ്വന്തമാക്കിയതിനു കാരണമായതും ലോക്ക് ഡൗണ്‍ തന്നെയാണു്. കുട്ടികളുടെ പഠനം തല്‍ക്കാലം ഓണ്‍ലൈന്‍ പ്ലാറ്റ്ഫോമിലൂടെ മാത്രമേ സാധ്യമാകൂ എന്ന അവസ്ഥ വന്നു ഭവിച്ചതോടെയാണു് പൈ വാങ്ങാന്‍ തീരുമാനമെടുത്തതു്. ഓണ്‍ലൈന്‍ പ്ലാറ്റ്ഫോമുകള്‍ ഇല്ലാത്ത കുട്ടികള്‍ എന്തു ചെയ്യുമെന്നും കാര്യമായ സാങ്കേതിക പരിജ്ഞാനമില്ലാത്ത മാതാപിതാക്കള്‍ തങ്ങളുടെ കുട്ടികള്‍ക്കായി എങ്ങനെയൊക്കെ ഈ സൗകര്യങ്ങള്‍ ഒരുക്കുമെന്നുമൊക്കെയുള്ള ചോദ്യങ്ങള്‍ക്കുള്ള ഉത്തരങ്ങള്‍ ഇതുവരെ നമുക്കു ലഭിച്ചിട്ടില്ല. എങ്കിലും ഇനി കുറച്ചു നാള്‍ ഇങ്ങനൊക്കെയേ വിദ്യാഭ്യാസം സാധ്യമാകൂ എന്ന അവസ്ഥ പല മാതാപിതാക്കളേയും ആകെ കുഴക്കിയിരിക്കുകയാണു്. പലരും പഴയ ലാപ്‍ടോപ്പിനും ഡെസ്ക്ടോപ്പിനും പുറകേ ഓടി നടക്കുന്നു. ഈയവസരത്തിലാണു് എങ്ങനെ ഒരു റാസ്ബറി പൈ ഉപയോഗിച്ചു നമുക്കു് വീട്ടിലെ സാധാരണ ടെലിവിഷന്‍ സെറ്റ് ഒരു കമ്പ്യൂട്ടര്‍ അല്ലെങ്കില്‍ ഒരു സ്മാര്‍ട്ട് ടിവി ആക്കി എങ്ങനെ മാറ്റാം എന്നു ഞാന്‍ ചിന്തിച്ചു തുടങ്ങിയതു്.

റാസ്ബെറി പൈയെപ്പറ്റി കേട്ടിട്ടുണ്ടാവുമല്ലോ – ഒരു ക്രെഡിറ്റ് കാർഡിന്റെ വലിപ്പമുള്ള ഒരു ബോർഡിൽ ഒതുങ്ങുന്ന കമ്പ്യൂട്ടറാണ് റാസ്ബെറി പൈ. യു.കെയിലെ റാസ്ബെറി പൈ ഫൗണ്ടേഷനാണു് ഇത് വികസിപ്പിച്ചത്. വിദ്യാലയങ്ങളിൽ അടിസ്ഥാന കമ്പ്യൂട്ടർ ശാസ്ത്രം പരിശീലിപ്പിക്കുക എന്ന ലക്ഷ്യത്തോടെയാണ് റാസ്ബെറി പൈ നിർമ്മിച്ചിരിക്കുന്നത്. എങ്കിലും പലവിധ ഉപയോഗങ്ങളും ഇതു വഴി നമുക്കു ചെയ്യാം. അതിലൊരു ഉപയോഗമാണു് എന്നെ ഇതുപയോഗിക്കാന്‍ പ്രേരിപ്പിച്ചതും – ഇന്നത്തെ ഓണ്‍ലൈന്‍ വിദ്യാഭ്യാസത്തിനു് വേണ്ടുന്ന പ്ലാറ്റ്ഫോം ഒരുക്കുക എന്ന ഉപയോഗം. http://www.raspberrypi.org എന്ന അവരുടെ ഔദ്യോഗിക വെബ്സൈറ്റില്‍ കൂടുതല്‍ വിശദവിവരങ്ങള്‍ ലഭ്യമാണു്.

ഉദ്ദേശം രണ്ടു വര്‍ഷങ്ങള്‍ക്കുമുമ്പ് ടെലിവിഷന്‍ ഉപേക്ഷിക്കാന്‍ തീരുമാനമെടുത്തതു് ഞങ്ങള്‍ എല്ലാവരും ഒന്നിച്ചാണു്. പക്ഷേ ഇപ്പോള്‍ ഈ ടെലിവിഷന്‍ വഴിയാണല്ലോ പഠനം – അപ്പോള്‍ എന്തു ചെയ്യും? സെറ്റ് ടോപ്പ് ബോക്സ് ഒക്കെ എവിടെയൊ മാറ്റി വച്ചിരിക്കുകയാണു്, എവിടെയാണോ എന്തോ. കുട്ടികള്‍ക്കു പഠിക്കാന്‍ ഞാന്‍ വര്‍ക്കു ചെയ്യുന്ന എന്റെ സ്വന്തം കമ്പ്യൂട്ടര്‍ കൊടുത്താല്‍ പിന്നെ ഞാനെന്തു ചെയ്യും? എന്റെ കൈയ്യിലാണെങ്കില്‍ ലാപ്‍ടോപ്പുമില്ല. പഴയ ഒരു ലാപ്‍ടോപ്പ് വാങ്ങാന്‍ ആദ്യം ഒന്നു ചിന്തിച്ചു. പിന്നെ ആ വഴി അത്ര ശരിയാവില്ലെന്നു മനസ്സിലാക്കി വേണ്ടെന്നു വയ്ക്കുന്നതിനിടയിലാണു് റാസ്ബെറി പൈ എന്ന ആശയം മനസ്സില്‍ വിരിഞ്ഞതു്. അങ്ങനെ ചെറിയൊരു റിസര്‍ച്ച് നടത്തിയപ്പോള്‍ തന്നെ KDE PLASMA BIGSCREEN എന്ന സ്മാര്‍ട്ട് ടിവി സോഫ്റ്റ്‍വെയറിനെപ്പറ്റി സൂചന കിട്ടിയതു്. അതിന്റെ അടിസ്ഥാന ഡോക്യുമെന്റേഷന്‍ വായിച്ചപ്പോള്‍ത്തന്നെ പ്രത്യേകിച്ചു ടെക്‍സെന്‍സ് ഒന്നുമില്ലാത്ത ആര്‍ക്കു വേണമെങ്കിലും നിര്‍മ്മിച്ചെടുക്കാവുന്ന സംഭവമാണിതെന്നു മനസ്സിലായി. അങ്ങനെ അന്നു വൈകീട്ടു തന്നെ റാസ്ബെറി പൈയുടെ ഔദ്യോഗിക വെബ്‍സൈറ്റില്‍ നിന്നു ലഭിച്ച ഓഥറൈസ്ഡ് സ്റ്റോറില്‍ നിന്നും പൈ ഓര്‍ഡര്‍ ചെയ്തു.

ലോക്ക് ഡൗണ്‍ തടസ്സങ്ങളും കടമ്പകളും മറ്റും കഴിഞ്ഞു് ഒമ്പതാം ദിവസം പൈ വീട്ടിലെത്തി. ഞാന്‍ വാങ്ങിയ സാധനങ്ങളുടെ ലിസ്റ്റ് ഇതാണു്.

റാസ്ബെറി പൈ

വാങ്ങിയ സാധനങ്ങളുടെ ലിസ്റ്റ്

  1. റാസ്ബെറി പൈ മോഡല്‍ ബി 4 ജിബി റാം (ഞാന്‍ ഇതു വാങ്ങിയതിന്റെ രണ്ടു നാളുകള്‍ക്കു ശേഷം 8 ജിബി റാമിന്റെ വെര്‍ഷന്‍ കൂടി ഇറങ്ങി. വില അല്‍പ്പം കൂടുതലാണു കേട്ടോ)
  2. ഒഫീഷ്യല്‍ റാസ്ബെറി പൈ കെയ്സ്
  3. സാന്‍ഡിസ്ക് 16 ജിബി മൈക്രോ എസ്.ഡി. കാര്‍ഡ്
  4. ഒഫീഷ്യല്‍ റാസ്ബെറി പൈ പവര്‍ സപ്ലൈ
  5. ഒഫീഷ്യല്‍ റാസ്ബെറി പൈ എച്ച്.ഡി.എം.ഐ കേബിള്‍
  6. ഒരു സാധാരണ കീബോര്‍ഡ്
  7. ഒരു സാധാരണ മൗസ്.

ഇതു് റാസ്ബെറി പൈ മോഡല്‍ ബി 4 ജിബി റാം സ്റ്റാര്‍ട്ടര്‍ കിറ്റ് ആണു്. ഷിപ്പിംഗ് ചാര്‍ജ്ജ് അടക്കം ആകെ 7,568.18 ഉറുപ്പിക ആണു് ചെലവായതു്. വാസ്തവത്തില്‍ ഇതു കിട്ടിക്കഴിഞ്ഞാല്‍ പിന്നെ കാര്യമായ പണി ഒന്നും തന്നെയില്ല. നേരേ കമ്പ്യൂട്ടറില്‍ ചെന്നു് ഒന്നു രണ്ട് ആപ്ലിക്കേഷനുകള്‍ ഇന്‍സ്റ്റാള്‍ ചെയ്യുക ടിവിയുമായി ബന്ധിപ്പിക്കുക നേരേ പവര്‍ കൊടുത്തു് ഓണ്‍ ചെയ്യുക. സ്റ്റെപ്പുകള്‍ താഴെ പറയുന്നു.

  1. ഈ ലിങ്കില്‍ നിന്നു് https://excellmedia.dl.sourceforge.net/project/bigscreen/rpi4/beta/mycroft-bigscreen-rpi4-20200326_BETA.img.gz കെഡിഇ പ്ലാസ്മ ബിഗ് സ്ക്രീന്‍ ഡൗണ്‍ലോഡ് ചെയ്യുക.
  2. ഈ ലിങ്കില്‍ നിന്നു് https://www.balena.io/etcher ബലെന എച്ചര്‍ എന്ന ആപ്ലിക്കേഷന്‍ ഡൗണ്‍ലോഡ് ചെയ്യുക. ഏതു് ഓപ്പറേറ്റിംഗ് സിസ്റ്റത്തിനും അനുയോജ്യമായ ഫയല്‍ ഇവിടെ ലഭ്യമാണു്.
  3. ഇനി ഒരു കാര്‍ഡ് റീഡര്‍ ഉപയോഗിച്ചു് മൈക്രോ എസ്.ഡി. കാര്‍ഡ് കമ്പ്യൂട്ടറുമായി കണക്ട് ചെയ്യുക
  4. ഇനി ചെയ്യേണ്ടതു് എച്ചര്‍ ലോഞ്ച് ചെയ്യുകയാണു്. ആദ്യം ഡൗണ്‍ലോഡ് ചെയ്ത കെഡിഇ പ്ലാസ്മ ബിഗ് സ്ക്രീന്‍ ഫയല്‍ എച്ചറില്‍ കാണിച്ചു കൊടുക്കുക.
  5. ഫ്ലാഷ് ചെയ്യുക.
  6. കമ്പ്യൂട്ടറിലെ പരിപാടി തീര്‍ന്നു. ഇനി നമുക്കു് റാസ്ബെറി പൈയിലേയ്ക്കു കടക്കാം.
  7. ഇനി കാര്‍ഡ് റീഡറില്‍ നിന്നു് മൈക്രോ എസ്.ഡി. കാര്‍ഡ് ഊരി മാറ്റി അതു് റാസ്ബെറി പൈയുടെ സ്ലോട്ടില്‍ വയ്ക്കക.
  8. കീബോര്‍ഡും മൗസും എച്ച്.ഡി.എം.ഐ കേബിളുമൊക്കെ കണക്ട് ചെയ്തതിനു ശേഷം പവര്‍സപ്ലൈ കൊടുത്തു് സ്വിച്ച് ഓണ്‍ ചെയ്യുക.

ബേസിക് പരിപാടി ഇവിടെ തീര്‍ന്നു. ഇനി ടി.വി. ഒരു കമ്പ്യൂട്ടര്‍ പോലെ ഉപയോഗിച്ചു തുടങ്ങാം. ഇനിയും കുറേ അനന്തമായ സാധ്യതകള്‍ ഈ കുഞ്ഞന്‍ പെട്ടിയിലുണ്ടു്. അവ കണ്ടെത്താന്‍ ഇന്റര്‍നെറ്റിന്റെ സഹായം തേടിയാല്‍ കുറേയേറെ അത്ഭുതങ്ങള്‍ക്കും കൗതുകങ്ങള്‍ക്കും വകയുണ്ടു്.

കൂടുതല്‍ വിവരങ്ങള്‍ക്കു് 8848487510 എന്ന നമ്പറില്‍ വിളിച്ചാല്‍ കഴിയുന്നതു പോലെ ഓണ്‍ലൈന്‍ സപ്പോര്‍ട്ട് നല്‍കാം.

മലയാള പ്രസാധനരംഗം സ്വാതന്ത്ര്യസാക്ഷാത്കാരത്തിലേയ്ക്ക് ചുവടുവയ്ക്കുമ്പോള്‍

ജനയുഗം പത്രം പൂര്‍ണ്ണമായും സ്വതന്ത്രസോഫ്റ്റ്‍വെയറിലേയ്ക്കു ചേക്കേറിയ പ്രചോദനാത്മകമായ വാര്‍ത്ത ഈയടുത്താണു് നാമറിഞ്ഞതു്. കുത്തക സോഫ്റ്റ്‍വെയറുകള്‍ പത്രസ്ഥാപനങ്ങളിലും മറ്റും പിഴയിടല്‍ തുടങ്ങുകയും അതു തുടരുകയും ചെയ്തതോടെ കേരള മീഡിയ അക്കാദമിയുടെ നേതൃത്വത്തില്‍ തിരുവനന്തപുരത്തു് ഇക്കഴിഞ്ഞ ഒക്ടോബര്‍ അവസാനവാരം ഒരു ഉച്ചകോടി നടത്തപ്പെടുകയും വിവിധ പത്രങ്ങളുടെ പ്രതിനിധികള്‍ അതില്‍ പങ്കെടുക്കുകയും ചെയ്തു. പരസ്യ ഏജന്‍സികളുടെ പ്രതിനിധികള്‍ പങ്കെടുത്തോ എന്നതു് വ്യക്തമല്ല. കുത്തക ഓപ്പറേറ്റിങ് സിസ്റ്റങ്ങളും സോഫ്റ്റ്‌വെയറുകളും പ്രസാധനരംഗത്തു ചുവടുറപ്പിച്ചതോടെ പത്ര /പരസ്യ മേഖലകളിൽ ഉണ്ടായ പ്രതിസന്ധി ചെറുതല്ല. ഇത്തരം ഓപ്പറേറ്റിംഗ് സിസ്റ്റങ്ങളുടേയും സോഫ്റ്റ്‍വെയറുകളുടേയും വിലയാകട്ടെ കമ്പനികള്‍ അടിക്കടി ഉയർ‍ത്തിക്കൊണ്ടിരിക്കുകയുമാണ്. ആകാശം മുട്ടുന്ന വിലയാണു് ഇപ്പോള്‍ ഈ സോഫ്റ്റ്‍വെയറുകള്‍ക്കു്. ഈ സാഹചര്യം പെട്ടെന്നു തുടങ്ങിയതൊന്നുമല്ല. വളരെ വിദഗ്ദ്ധമായി നമ്മെ ഈ കുത്തകസോഫ്റ്റ്‍വെയര്‍ കമ്പനികള്‍ തങ്ങളുടെ ഉത്പന്നങ്ങളുടെ അടിമകളാക്കുകയായിരുന്നു. കേരള മീഡിയ അക്കാദമി നടത്തിയ ഉച്ചകോടിയെപ്പറ്റി വായിച്ചപ്പോള്‍ പണ്ടു് പരസ്യ ഏജന്‍സിയില്‍ ജോലി ചെയ്തിരുന്ന കാലത്തെ ചില സംഭവങ്ങള്‍ ഓര്‍ത്തുപോയി – അതേപ്പറ്റിയാണു് ഈ പോസ്റ്റ്.

ഞാന്‍ പ്രവര്‍ത്തിച്ചിരുന്ന പരസ്യ ഏജന്‍സിയില്‍ ഇരുപതിലധികം കമ്പ്യൂട്ടറുകളുണ്ടായിരുന്നു. ഏതാണ്ടു് നാലോ അഞ്ചോ ആര്‍ട്ട് ഡയറക്ടര്‍മാരും രണ്ടുമൂന്നു ജൂനിയര്‍ ആര്‍ട്ടിസ്റ്റുകളും ഞാനുള്‍പ്പെടെ മൂന്നു കോപ്പിയെഴുത്തുകാരും പിന്നെ ക്ലയന്റ് സര്‍വീസ് എക്സിക്യൂട്ടീവുമാരും അക്കൗണ്ടന്റുമാരും റിസപ്ഷനിസ്റ്റും ഒക്കെ അടങ്ങിയതായിരുന്നു ഏജന്‍സിയുടെ രൂപഘടന. (മിക്കവാറും എല്ലാ ഇടത്തരം ഏജന്‍സികളുടേയും രൂപഘടന ഇതൊക്കെത്തന്നെയായിരുന്നു.) മേല്‍പ്പറഞ്ഞ ആള്‍ക്കാരോരുത്തര്‍ക്കും ഓരോ കമ്പ്യൂട്ടറുകളും ഉണ്ടായിരുന്നു. രസാവഹമായ സംഗതി എന്തെന്നാല്‍, എല്ലാ കമ്പ്യൂട്ടറുകളിലും മൈക്രോസോഫ്റ്റ് വിന്‍ഡോസും, എം.എസ്. ഓഫീസും അഡോബിയുടെ മിക്കവാറും എല്ലാ സോഫ്റ്റ്‍വെയറുകളും (പേജ്മേക്കര്‍, ഫോട്ടോഷോപ്പ്, ഇന്‍ഡിസൈന്‍, ഫ്ലാഷ്, ഡ്രീംവീവര്‍ തുടങ്ങി എല്ലാം) അനുമതിയില്ലാതെ ഇന്‍സ്റ്റാള്‍ ചെയ്തിരുന്നു എന്നതാണു്! വിവരസാങ്കേതികവിഷയത്തില്‍ ഒരല്‍പ്പം വിവരമുണ്ടായിരുന്നതിനാല്‍ ഞാന്‍ ചെന്നു് അധികം വൈകാതെ ആവശ്യമില്ലാത്ത സോഫ്റ്റ്‍വെയറുകള്‍ പല കമ്പ്യൂട്ടറുകളില്‍ നിന്നും നീക്കം ചെയ്തു. അനുമതിയില്ലാതെ സോഫ്റ്റ്‍വെയര്‍ പ്രവര്‍ത്തിപ്പിക്കുന്നതിന്റെ നിയമവശങ്ങളും ആവശ്യമില്ലാതെ അതു് ഇന്‍സ്റ്റാള്‍ ചെയ്താല്‍ വരുന്ന മെമ്മറി /സ്റ്റോറേജ് നഷ്ടവും ബന്ധപ്പെട്ടവരെ പറഞ്ഞു മനസ്സിലാക്കുകയും ചെയ്തു.

അങ്ങനെയിരിക്കുന്ന കാലത്തു് ഒരു ദിവസം അ‍ഡോബി കോര്‍പ്പറേഷന്റെ ബംഗളൂരു ഓഫീസില്‍ നിന്നു് ഞങ്ങളുടെ ഓഫീസിലേയ്ക്കു് ഒരു കോള്‍ വന്നു. 2007-2009 കാലഘട്ടത്തിലായിരുന്നു അതെന്നാണു് ഓര്‍മ്മ. ഞങ്ങളുടെ കൈവശം അഡോബിയുടെ ലൈസന്‍സ് ഇല്ലെന്നും പല കമ്പ്യൂട്ടറുകളിലും ഫോട്ടോഷോപ്പും ഇന്‍ഡിസൈനും ഒക്കെ അനുമതിയില്ലാതെ വ്യാജമായി ഉപയോഗിക്കുന്നുണ്ടെന്നും ആയതിനാല്‍ അവയുടെ യഥാര്‍ത്ഥ പതിപ്പുകള്‍ ഉടന്‍ പണം കൊടുത്തു വാങ്ങണമെന്നുമായിരുന്നു വിളിയുടെ സാരാംശം. കൗശലത്തോടെ തിരികെ ഞങ്ങളും സംസാരിച്ചു, ആകെ ഒന്നു രണ്ടു കമ്പ്യൂട്ടറുകളില്‍ മാത്രമേ ഈ സോഫ്റ്റ്‍വെയറുകള്‍ ഉപയോഗിക്കുന്നുള്ളു, അതിന്റെ ലൈസന്‍സ് വൈകാതെ വാങ്ങിയേക്കാം എന്നൊക്കെ അനുനയത്തില്‍ മറുപടി പറഞ്ഞും മറ്റും അതങ്ങു നീണ്ടു പോയി. ആ ചര്‍ച്ചയുടെ ചൂടാറും മുമ്പുതന്നെ അടുത്തയാള്‍ അവതരിച്ചു. അഡോബിക്കാര്‍ ഫോണിലാണു് സംസാരിച്ചതെങ്കില്‍ കോറല്‍ കോര്‍പറേഷന്റെ പ്രതിനിധി നേരിട്ടാണു് ഓഫീസിലെത്തിയതു്. അയാള്‍ പക്ഷേ സംസാരിച്ചതു് ഭീഷണിയുടെ സ്വരത്തിലുമായിരുന്നു. ഒടുവില്‍ അഞ്ചു കോറല്‍ഡ്രോ ലൈസന്‍സുകള്‍ അന്നുതന്നെ പണം കൊടുത്തു് വാങ്ങാന്‍ ഏജന്‍സി നിര്‍ബന്ധിതരായി. അതിനു ചെലവായതു് ഉദ്ദേശം ഒന്നര ലക്ഷത്തിലേറെ രൂപയായിരുന്നു.  ഇതു് ഞാന്‍ പ്രവര്‍ത്തിച്ചിരുന്ന ഏജന്‍സിയില്‍ മാത്രമായിരുന്നില്ല, കൊച്ചിയിലെ മിക്ക ഏജന്‍സികളിലും ഇതേ കാലയളവില്‍ ഇത്തരം ഭീഷണിസ്വരത്തില്‍ കോര്‍പ്പറേറ്റ് ദല്ലാളന്മാര്‍ നേരിട്ടും അവരുടെ കങ്കാണിമാരുടെ വിളികള്‍ ഫോണിലൂടെയും എത്തിക്കൊണ്ടിരുന്നു.

കൊച്ചിയില്‍ പരസ്യ ഏജന്‍സികളുടെ രണ്ടു പ്രമുഖ സംഘടനകളുണ്ടായിരുന്നു – കൊച്ചിന്‍ ആഡ് ക്ലബ്ബും (Cochin Ad Club) കെത്രീഏ (Kerala Advertising Agencies Association)യും. ഈ രണ്ടു സംഘടനകളും ഇതേ പ്രശ്നത്തെപ്പറ്റി ഇപ്പോള്‍ മീഡിയ അക്കാദമി തിരുവനന്തപുരത്തുവച്ചു ഉച്ചകോടി നടത്തിയതുപോലെ അന്നു ചില ചെറിയ വട്ടമേശസമ്മേളനങ്ങള്‍ നടത്തിക്കൊണ്ടു് പ്രശ്നത്തിലിടപെട്ടു. അതിലൊന്നില്‍ ഞാനും പങ്കെടുത്തിരുന്നു. ലിനക്സ് ഉപയോഗിക്കുന്ന കാര്യമൊക്കെ പറഞ്ഞപ്പോള്‍ ആരൊക്കെയോ ചേര്‍ന്നു അതിനെ പിന്തുണയ്ക്കുകയും മറ്റും ചെയ്തതായി ചെറിയൊരോര്‍മ്മയുണ്ടു്. അന്നു സ്ക്രൈബസില്‍ മലയാളം തുടങ്ങിയ ഇന്ത്യന്‍ ഭാഷകള്‍ക്കൊന്നും കാര്യമായ പിന്തുണയില്ല. ഓപ്പണ്‍ ഓഫിസിനു പുറമേ ഇങ്ക്സ്കേപ്പും ഗിമ്പും മാത്രമായിരുന്നു ഏജന്‍സികളില്‍ ഉപയോഗിക്കാവുന്ന ആപ്ലിക്കേഷനുകള്‍. അതൊക്കെ പരീക്ഷിച്ചു നോക്കണമെന്നും വ്യാപകമായി ഉപയോഗിക്കപ്പെടണമെന്നും ചില ഏജന്‍സി ഉടമകള്‍ വളരെ ഉത്സാഹത്തോടെ സംസാരിച്ചതും ഓര്‍മ്മയുണ്ടു്. പക്ഷേ ഏതാനും ദിവസങ്ങള്‍ക്കു ശേഷം പിന്നെ കേട്ടതു് അഡോബി കമ്പനി ഈ സംഘടനാ പ്രതിനിധികളുമായി സംസാരിച്ചു് ഒരു ധാരണയിലെത്തിയെന്നും അതു പ്രകാരം നേരത്തേ ഭീഷണിപ്പെടുത്തിയതില്‍ നിന്നും വളരെ കുറഞ്ഞ തുക നല്‍കിയാല്‍ സോഫ്റ്റ്‍വെയര്‍ ലൈസന്‍സ് നല്‍കാമെന്നുമൊക്കയുള്ള കാര്യങ്ങളായിരുന്നു. അതോടെ പല ഏജന്‍സികളും പേരിനു് രണ്ടോ മൂന്നോ അഡോബി ക്രിയേറ്റീവ് സ്യൂട്ട് കാശു കൊടുത്തു വാങ്ങുകയും അതിലേറെ കമ്പ്യൂട്ടറുകളില്‍ അനുമതിയില്ലാതെ വീണ്ടും ഉപയോഗിക്കാന്‍ തുടങ്ങുകയും ചെയ്തു. ഏജന്‍സികളുടേയും അസോസിയേഷന്റേയുമൊക്കെ വീക്ഷണത്തില്‍ പ്രശ്നം പരിഹരിക്കപ്പെട്ടതു പോലെയായിരുന്നു. അങ്ങനെയൊക്കെ അതങ്ങു തേഞ്ഞുമാഞ്ഞു പോയി. (സോഫ്റ്റ്‍വെയര്‍ പൈറസി സംബന്ധമായ നടപടികള്‍ അതിനു മുമ്പും ഉണ്ടായിട്ടുണ്ടു് – ബാങ്കുകള്‍ ഉള്‍പ്പെടെയുള്ള ചില ധനകാര്യസ്ഥാപനങ്ങള്‍, ഓഹരിവിപണിയുമായി ബന്ധപ്പെട്ടു പ്രവര്‍ത്തിക്കുന്ന സ്ഥാപനങ്ങള്‍ തുടങ്ങിയവര്‍ അതിനു മുമ്പേ തന്നെ പണി കിട്ടിയവരാണു് – അവര്‍ പക്ഷേ സമാന്തരമാര്‍ഗ്ഗങ്ങളൊന്നുമന്വേഷിക്കാതെ നല്ല കുട്ടികളായി കുത്തകക്കമ്പനികള്‍ പറഞ്ഞ വിലയ്ക്കു് സോഫ്റ്റ്‍വെയറുകള്‍ വാങ്ങി ഉപയോഗിക്കാന്‍ തുടങ്ങി എന്നാണറിവു്. )

സ്വതന്ത്ര സോഫ്റ്റ്‍വെയര്‍ ഐക്കണുകള്‍

സ്ക്രൈബസ്, ഇങ്ക്സ്കേപ്പ്, ഗിമ്പ്, ലീബ്രേ ഓഫീസ് ഐക്കണുകള്‍

ഒരു പരസ്യ ഏജന്‍‍സി സ്വതന്ത്ര സോഫ്റ്റ്‍വെയര്‍ ഉപയോഗിക്കാന്‍ തീരുമാനിച്ചാല്‍ നിലവില്‍ അവിടെ ജോലി ചെയ്യുന്ന ജീവനക്കാര്‍ക്കു് ട്രെയിനിംഗ് നല്‍കുന്നതു് ഒരു വലിയ തലവേദനയായിരിക്കും എന്നതു് സത്യമാണു്. ആര്‍ട്ട് ആണല്ലോ അവരുടെ പണി. ക്രിയേറ്റീവ് ജോലികള്‍ ചെയ്യുന്ന പലര്‍ക്കും അവര്‍ പഠിച്ച ചില സൗകര്യങ്ങള്‍ ഉപേക്ഷിച്ചു വരാന്‍ വളരെയധികം ബുദ്ധിമുട്ടുമായിരിക്കും. ടെക്കികള്‍ക്കു് പുതിയ സോഫ്റ്റ‍്വെയര്‍ അഭ്യസിക്കാന്‍ വേണ്ട സമയത്തേക്കാള്‍ വളരെയേറെ സമയം ക്രിയേറ്റീവ് ജോലിക്കാര്‍ക്കു് ഇതിനു വേണ്ടിവരും. അതിനാല്‍ ഏജന്‍സികള്‍ക്കു് വളരെ സാവധാനം തന്ത്രപരമായ ചില സൂക്ഷ്മനയങ്ങളുടെ അടിസ്ഥാനത്തില്‍ കാര്യമായ ചെലവൊന്നുമില്ലാതെ സ്വതന്ത്ര സോഫ്റ്റ്‍വെറിനെ പരോക്ഷമായി പ്രോത്സാഹിപ്പിക്കുക എന്നതാണു് കരണീയം. അതിനായി ആദ്യമായി വേണ്ടതു് ജോബ് മാര്‍ക്കറ്റില്‍ സ്വതന്ത്ര സോഫ്റ്റ്‍വെയറിനു് അനുകൂലമായ ഡിമാന്‍ഡ് ഉണ്ടാക്കുക എന്നതാണു്. ഇതിന്റെ ഭാഗമായി റിക്രൂട്ട്മെന്റ് പരസ്യങ്ങളില്‍ മേല്‍പ്പറഞ്ഞ സ്വതന്ത്ര സോഫ്റ്റ്‍വെയറുകളിലെ പരിജ്ഞാനവും ആവശ്യപ്പെടുകയാണെങ്കില്‍ പുതിയ ഉദ്യോഗാര്‍ത്ഥികള്‍ തങ്ങളുടെ സ്വന്തം ചെലവില്‍ തന്നെ ഈ സോഫ്റ്റ്‍വെയറുകള്‍ ഉപയോഗിക്കാനുള്ള പരിജ്ഞാനം സ്വന്തമാക്കും.

ഇന്നിപ്പോള്‍ മിക്ക സോഫ്റ്റ്‍വെയറുകളും ക്ലൗഡിലേയ്ക്കു മാറിക്കഴിഞ്ഞു. അവയുടെ ഏറ്റവും പുതിയ വെര്‍ഷനുകള്‍ പണം കൊടുക്കാതെ അനധികൃതമായി ഉപയോഗിക്കാന്‍ (അതായതു് പണ്ടത്തെപ്പോലെ പേരിനു് ഒന്നുരണ്ടു ലൈസന്‍സുകള്‍ വാങ്ങി ബാക്കിയുള്ള കമ്പ്യൂട്ടറുകളില്‍ വ്യാജ പതിപ്പു പ്രവര്‍ത്തിക്കുന്ന രീതി) വളരെ ബുദ്ധിമുട്ടുമാണു്.  ഒരൊറ്റ കമ്പ്യൂട്ടറില്‍ മാത്രം അ‍ഡോബി ക്രിയേറ്റീവ് ക്ലൗഡ് ഉപയോഗിക്കാന്‍ ഇപ്പോള്‍ പ്രതിമാസം കൊടുക്കേണ്ടതു് 4230 ഉറുപ്പികയാണു്. പ്രതിവര്‍ഷം അമ്പതിനായിരത്തില്‍ കുറയാത്ത തുക ഇതിനായി നല്‍കണം. ഒരു നാലോ അഞ്ചോ കമ്പ്യൂട്ടറുകളില്‍ ഇതു് ഇന്‍സ്റ്റാള്‍ ചെയ്യണമെങ്കില്‍ എത്ര പണം നല്‍കണമെന്നു് കണക്കു കൂട്ടി നോക്കിക്കോളൂ. ഇതാണു് പലരേയും ഇപ്പോള്‍ സ്വതന്ത്ര സോഫ്റ്റ്‍വെയറിലേയ്ക്കു് തിരിയാന്‍ പ്രേരിപ്പിക്കുന്ന സാമ്പത്തിക ഘടകം. നൂറുകണക്കിനു കമ്പ്യൂട്ടറുകളുള്ള പത്രസ്ഥാപനങ്ങളിലെ അവസ്ഥ ഊഹിക്കാവുന്നതേയുള്ളൂ. ഈ എല്ലാ കമ്പ്യൂട്ടറുകളിലും ഡിടിപി സോഫ്റ്റ്‍വെയര്‍ ഇന്‍സ്റ്റാള്‍ ചെയ്യുകയും വേണം. ഉച്ചകോടിയില്‍ ജനയുഗത്തിന്റെ പ്രതിനിധി പറഞ്ഞതു് തങ്ങള്‍ക്കു് പ്രതിവര്‍ഷം ഒരു കോടി രൂപയാണു് ലൈസന്‍സ് ഇനത്തില്‍ ചെലവാക്കേണ്ടി വന്നതു് എന്നാണു്. ജനയുഗത്തിനിതു് ഒരു കോടിയാണെങ്കില്‍ മനോരമയും മാതൃഭൂമിയും എത്ര കോടികളായിരിക്കും ലൈസന്‍സ് ഇനത്തില്‍ പ്രതിവര്‍ഷം ചെലവാക്കുക എന്നു് ഊഹിച്ചാല്‍ മതി.

ലൈസന്‍സ് ഇനത്തില്‍ വലിയൊരു കോര്‍പ്പറേറ്റ് കമ്പനിയ്ക്കു് നല്‍കാനായി മാത്രം വെറുതേ ഒഴുക്കി കളയുന്ന പണം ക്രിയാത്മകമായി ചെലവഴിച്ചു കൂടേ എന്ന ചിന്തയായിരിക്കണം ജനയുഗത്തിന്റെ സ്വതന്ത്ര സോഫ്റ്റ്‍വെയര്‍ പ്രവേശനം സാദ്ധ്യമാക്കിയതു്. ആ പണത്തിന്റെ പത്തിലൊരു ഭാഗം പ്രതിവര്‍ഷം സ്വതന്ത്ര സോഫ്റ്റ്‍വെയര്‍ ഡവലപ്പ് ചെയ്യുന്ന വൊളണ്ടിയര്‍ കമ്പനികള്‍ക്കു് നല്‍കുകയാണെങ്കില്‍ ഇതിനകം നാമാഗ്രഹിക്കുന്ന എത്രയധികം ഫീച്ചറുകള്‍ അതില്‍ ഉള്‍പ്പെടുത്താന്‍ കഴിഞ്ഞേനേ.  ആത്യന്തികമായി അതു സമൂഹത്തിനും ഗുണമുണ്ടാക്കുകയും ചെയ്യും. പത്രങ്ങളുടെ ഒരു കണ്‍സോര്‍ഷ്യം രൂപീകരിച്ചു് സ്വതന്ത്ര സോഫ്റ്റ്‍വെയര്‍ ഡവലപ്പര്‍ സമൂഹത്തിനു് ഉദാരമായി ഫണ്ട് ചെയ്താല്‍ നിലവിലുള്ള പ്രൊപ്രൈറ്ററി സോഫ്റ്റ്‍വെയറുകളേക്കാള്‍ മികച്ച ഫീച്ചറുകളും സുരക്ഷിതത്വവും നല്‍കുന്ന സ്വതന്ത്ര സോഫ്റ്റ്‍വെയറുകള്‍ നമുക്കൊരുക്കാന്‍ കഴിയും.

മാധ്യമസ്ഥാപനങ്ങള്‍ സ്വതന്ത്ര സോഫ്റ്റ്‍വെയറിലേയ്ക്കു് മാറുമ്പോള്‍ താഴെ പറയുന്ന കാര്യങ്ങള്‍ കൂടി കണക്കിലെടുക്കണം.

  1. ഒരു പ്രിന്റിംഗ് / പബ്ലിഷിംഗ് ഹൗസ് ഗ്നു/ലിനക്സിലേയ്ക്കു മാറുമ്പോള്‍ വരുന്ന പ്രധാന വെല്ലുവിളികളിലൊന്നു് സിഎംവൈകെ കളര്‍ പ്രൊഫൈലാണു്. എല്ലാ ഫങ്ഷണാലിറ്റിയുമുള്ള പ്രിന്റര്‍ ഡ്രൈവറും മറ്റൊരു പ്രധാന പ്രശ്നമാണു്. ഇവയ്ക്കെല്ലാം ശാശ്വതമായ ലിനക്സ് സൊല്യൂഷന്‍ അത്ര എളുപ്പമാണെന്നു കരുതുന്നില്ല. അതിനാല്‍ അത്യാവശ്യം വിന്‍ഡോസ് / മാക്‍ കമ്പ്യൂട്ടറുകളും അതില്‍ അഡോബി സോഫ്റ്റ്‍വെയറുകളും കോറല്‍ പോലുള്ള സോഫ്റ്റ്‍വെയറുകളും ആകാം. മറ്റുള്ള കമ്പ്യൂട്ടറുകളിലെല്ലാം തന്നെ ഏതെങ്കിലും ഒരു ഗ്നു/ലിനക്സ് ഡിസ്ട്രിബ്യൂഷന്‍ ഇന്‍സറ്റാള്‍ ചെയ്യുക. ലീബ്രേ ഓഫീസ്, ഇങ്ക്സ്കേപ്പ്, ഗിമ്പ്, സ്ക്രൈബസ് തുടങ്ങിയ ആപ്ലിക്കേഷനുകളും അതില്‍ ഉള്‍പ്പെടുത്തുക
  2. ചെറിയ ഒരു തുക തങ്ങള്‍ ഉപയോഗിക്കുന്ന സ്വതന്ത്ര സോഫ്റ്റ്‍വയെറുകളുടെ വികസനത്തിനായി സംഭാവന ചെയ്യുക. ഇതു് തങ്ങളുടെ സാമൂഹ്യപ്രതിബദ്ധത നിറവേറ്റുന്നതിനൊപ്പം തങ്ങള്‍ തന്നെ ഉപയോഗിക്കുന്ന സോഫ്റ്റ്‍വെയറുകളുടെ വികസനത്തിനും കാരണമാകും.
  3. പുതിയ ഡിസൈനര്‍മാരെയും ജൂനിയര്‍ ആര്‍ട്ട് ഡയറക്ടര്‍മാരെയും ഇതരജീവനക്കാരെയും തേടുന്ന റിക്രൂട്ട്മെന്റ് പരസ്യങ്ങളില്‍ മേല്‍പ്പറഞ്ഞ സ്വതന്ത്ര സോഫ്റ്റ്‍വെയറുകളിലെ പരിജ്ഞാനവും ആവശ്യപ്പെടുക. ഇതു് ഈ സോഫ്റ്റ്‍വെയറുകള്‍ക്കുള്ള ഡിമാന്‍ഡ് ജോബ് മാര്‍ക്കറ്റിലുണ്ടാക്കും. അതു് വളരെ വലിയൊരു കാര്യമാണു്.

മികച്ച യൂണികോഡ് ഫോണ്ടുകളുടെ അഭാവം

മലയാളം അടക്കമുള്ള ഇന്ത്യന്‍ ഭാഷകള്‍ക്കു് വൃത്തിയായി ഉപയോഗിക്കാവുന്ന യൂണികോഡ് ഫോണ്ടുകള്‍ വളരെ കുറവാണു്. എന്നാല്‍ സാങ്കേതികമായി പ്രസക്തമേയല്ലാത്ത ആസ്കി ഫോണ്ടുകളാകട്ടെ, എണ്ണത്തിന്റെ കാര്യത്തില്‍ വളരെയേറെ മുന്നില്‍ നില്‍ക്കുകയും ചെയ്യുന്നു. പല ഡിസൈനര്‍മാരും ആസ്കി മലയാളം ഫോണ്ടുകളെ കൈവെടിയാത്തതു് ഈ കാരണം കൊണ്ടുമാത്രമാണു്.

പരസ്യ ഏജന്‍സികളില്‍ പ്രവര്‍ത്തിക്കുന്ന ആര്‍ട്ട് ഡയറക്ടര്‍മാര്‍ മിക്കവരും ഫൈന്‍ ആര്‍ട്ട് പശ്ചാത്തലമുള്ളവരും നല്ല കലാകാരന്മാരുമാണു്. അവരുടെ കൂട്ടായ്മ ഒന്നൊത്തുപിടിച്ചാല്‍ തീരാവുന്നതേയുള്ളൂ നമ്മുടെ യൂണികോഡ് ഫോണ്ടുകളുടെ ദാരിദ്ര്യം. അവര്‍ക്കു് സ്വതന്ത്ര സോഫ്റ്റ്‍വെയര്‍ സമൂഹം സാങ്കേതിക സഹായം നല്‍കുകയും വേണം. അനുയോജ്യ സാങ്കേതിക വിദ്യാ പ്രോത്സാഹക സംഘം (ATPS), സ്വതന്ത്ര മലയാളം കമ്പ്യൂട്ടിംഗ്, കൊച്ചിന്‍ ഐലഗ്ഗ്, സ്വതന്ത്ര വിജ്ഞാന ജനാധിപത്യ സഖ്യം (DAKF) ഒക്കെ അടങ്ങിയ എത്രയോ സ്വതന്ത്ര സോഫ്റ്റ്‍വെയര്‍ സമൂഹങ്ങള്‍ നമ്മുടെ കേരളത്തിലങ്ങോളമിങ്ങോളമുണ്ടു്. ഈ സമൂഹങ്ങള്‍ വേണ്ടവിധം സമൂഹത്തിലെ കലാകാരന്മാര്‍ക്കു് പിന്തുണ നല്‍കുമെങ്കില്‍ മലയാളത്തിന്റെ ഫോണ്ട് ക്ഷാമം തീര്‍ന്നുകഴിഞ്ഞു എന്നു് ഉറപ്പിക്കാം.

എന്തായാലും ജനയുഗത്തിന്റെ ഈ നീക്കം സ്വതന്ത്ര സോഫ്റ്റ്‍വെയര്‍ സമൂഹത്തിനു് നല്‍കുന്ന പ്രതീക്ഷ വളരെ വലുതാണു്. ഒടുവില്‍ അവര്‍ സ്വപ്നം കണ്ട ആ യുഗം – സ്വതന്ത്രയുഗം – അതു വന്നെത്തുന്നു എന്ന സന്തോഷം – അതു പകരുന്ന ഊര്‍ജ്ജം – അതിന്റെയൊരു ആനന്ദം – അതു് അനിര്‍വ്വചനീയമാണു്.

ഒരു മോട്ടിവേഷണല്‍ ഹോക്സ്

ഇന്റര്‍നെറ്റില്‍ പ്രചരിക്കുന്ന ചില നിരുപദ്രവമായ നുണകളുണ്ടു്. ഹോക്സ്  (Hoax)എന്നാണു് അവയെ വിളിക്കുക. ഇവയിലെ ഒരു അസാധാരണവകഭേദമാണു് മോട്ടിവേഷനല്‍ ഹോക്സ്. ഇതിനൊരു ഒരുദാഹരണമാണു് താഴെ ചേര്‍ക്കുന്നതു്. സൗത്ത് ആഫ്രിക്കയിലെ ഒരു യൂണിവേഴ്സിറ്റിയുടെ കവാടത്തില്‍ എഴുതിവച്ചിരിക്കുന്ന സന്ദേശം എന്ന നിലയിലാണു് ഇതു് എഴുതപ്പെട്ടിരിക്കുന്നതു്. സത്യമെന്തെന്നാല്‍ ഇതു് ഏതു സര്‍വ്വകലാശാലയാണെന്നോ സൗത്ത് ആഫ്രിക്കയിലെവിടെയാണെന്നോ ഒന്നും ഒരിടത്തും ഒരു പരാമര്‍ശവുമില്ല. പക്ഷേ സന്ദേശം വളരെ അര്‍ത്ഥവത്തായതിനാല്‍ ഇതു് വളരെപ്പെട്ടെന്നു് പ്രചരിപ്പിക്കപ്പെടുകയായിരുന്നു. ഇതിന്റെ പരിഭാഷപ്പടുത്തിയ പതിപ്പുകള്‍ പല ഭാഷകളിലും കാണാം. ആശ്വസിക്കാവുന്ന കാര്യമെന്തെന്നാല്‍ വളരെ അര്‍ത്ഥവത്തായ സന്ദേശമാണു് ഇത്തരത്തില്‍ പ്രചരിക്കപ്പെടുന്നതു് എന്നതാണു്.

മലയാളം പതിപ്പ്

ഒരു രാഷ്ട്രത്തെ തകര്‍ത്തെറിയുവാന്‍ ആറ്റം ബോംബുകളുടേയോ മിസൈലുകളുടേയോ ആവശ്യമില്ല.
അതിനു് ആ രാജ്യത്തിന്റെ വിദ്യാഭ്യാസ നിലവാരം തകര്‍ക്കുകയും പരീക്ഷകളില്‍ കള്ളം ചെയ്യുവാന്‍ അനുവദിക്കുകയും ചെയ്താല്‍ മതി.
അതിനു് ആ രാജ്യത്തിന്റെ വിദ്യാഭ്യാസനിലവാരം തകര്‍ക്കുകയും പരീക്ഷകളില്‍ കള്ളം ചെയ്യുവാന്‍ അനുവദിക്കുകയും ചെയ്താല്‍ മതിയാകും.
അത്തരം ഡോക്ടര്‍മാരാല്‍ രോഗികള്‍ കൊല്ലപ്പെടുന്നു.
അത്തരം എഞ്ചിനീയര്‍മാരാല്‍ കെട്ടിടങ്ങള്‍ തകര്‍ന്നു വീഴുന്നു.
അത്തരം സാമ്പത്തിക വിദഗ്ദ്ധന്മാരാല്‍ സാമ്പത്തിക തകര്‍ച്ചയുണ്ടാകുന്നു.
അത്തരം മതപണ്ഡിതന്മാരാല്‍ മനുഷ്യത്വം മരിച്ചു വീഴുന്നു.
അത്തരം ന്യായാധിപന്മാരാല്‍ നീതി നഷ്ടമാകുന്നു.
വിദ്യാഭ്യാസത്തിന്റെ തകര്‍ച്ചയെന്നാല്‍ രാഷ്ട്രത്തിന്റെ തകര്‍ച്ചയാണു്

ഇംഗ്ലീഷ് പതിപ്പു്

Collapsing any Nation does not require use of Atomic bombs or the use of Long range missiles.
But it requires lowering the quality of Education and allowing cheating in the exams by the students.
The patient dies in the hands of the doctor who passed his exams through cheating.
And the buildings collapse in the hands of an engineer who passed his exams through cheating.
And the money is lost in the hands of an accountant who passed his exams through cheating.
And humanity dies in the hands of a religious scholar who passed his exams through cheating.
And justice is lost in the hands of a judge who passed his exams through cheating.
And ignorance is rampant in the minds of children who are under the care of a teacher who passed exams through cheating.
The collapse of education is the collapse of the Nation

View at Medium.com

മിക്കവാറും ഇതു് ഏതോ ഒരു വിദ്യാഭ്യാസപണ്ഡിതന്റെ വാക്കുകള്‍ തന്നെയാകണം. പക്ഷേ എത്ര തെരഞ്ഞിട്ടും ഇതിന്റെ സൗത്ത് ആഫ്രിക്കന്‍ ബന്ധം തെളിയിക്കാനുള്ള ലിങ്കുകളൊന്നും കണ്ടെത്താന്‍ കഴിഞ്ഞില്ല.

പ്രളയനിരീക്ഷണങ്ങള്‍

ഒരുവേള പഴക്കമേറിയാല്‍ ഇരുളും മെല്ലെ വെളിച്ചമായ് വരാ

എന്നൊരു കവിവചനമുണ്ടു്. കേരളത്തിന്റെ മാറിയ കാലാവസ്ഥയെക്കുറിച്ചും ഇനി അങ്ങനെതന്നെ പറയേണ്ടിവരുമോയെന്നു് പലരും ആശങ്കപ്പെടുന്നു. ഇടവപ്പാതിയ്ക്കു പകരം കര്‍ക്കടകം പകുതിയില്‍ നമുക്കൊരു പ്രളയപ്പാതി വച്ചാലോ എന്നു വരെ വിഷുഫലക്കാര്‍ ആലോചിച്ചതായി കേള്‍ക്കുന്നു. പ്രളയവും ഉരുള്‍പൊട്ടലും പോലുള്ള പ്രകൃതി ദുരന്തങ്ങളോടു് കഴിഞ്ഞവര്‍ഷം ശരാശരി മലയാളി കാണിച്ച ഒറ്റക്കെട്ടായ ആ സമീപനവുമായി താരതമ്യപ്പെടുത്തുമ്പോള്‍ ഇത്തവണത്തെ പ്രകൃതിദുരന്തവേളയില്‍ മലയാളിയുടെ കാഴ്ചപ്പാടിനു വന്നു ഭവിച്ച മാറ്റങ്ങളാണു് ഇവിടെ നോക്കിക്കാണാന്‍ ശ്രമിക്കുന്നതു്.

പ്രളയം

ഏതു പ്രളയവും ഏതു ദുരന്തവും അതിജീവിക്കാന്‍ നമുക്കു കഴിയും – ഒന്നിച്ചു നിന്നാല്‍. മതരാഷ്ട്രീയ വേര്‍തിരിവുകളില്‍ ചേരിതിരിഞ്ഞു നിന്നാല്‍ പ്രളയവും ദുരന്തവും നമ്മെ വിഴുങ്ങാന്‍ അധികസമയം വേണ്ട

പലരും നിരീക്ഷിച്ച ഒരു വാസ്തവമുണ്ടു് – ഈ വര്‍ഷത്തെ പ്രകൃതിദുരന്തമുണ്ടായപ്പോള്‍ നടന്ന രക്ഷാപ്രവര്‍ത്തനങ്ങളും ദുരിതാശ്വാസപ്രവര്‍ത്തനങ്ങളും മുന്‍വര്‍ഷമുണ്ടായ പ്രളയകാലത്തെ പ്രവര്‍ത്തനങ്ങളും തമ്മില്‍ കാതലായ ചില വ്യത്യാസങ്ങളുണ്ടായിരുന്നു എന്നു്. കേരളം ഒറ്റക്കെട്ടായി നിന്നു് രക്ഷാപ്രവര്‍ത്തനവും ദുരിതാശ്വാസപ്രവര്‍ത്തനങ്ങളും നടത്തുന്ന കാഴ്ചയാണു് അന്നു കണ്ടതെങ്കില്‍ ഇക്കുറി കാര്യങ്ങള്‍ അത്രത്തോളം ഒറ്റക്കെട്ടൊന്നുമല്ലായിരുന്നു. പലരും പല കാരണങ്ങള്‍ അതിനായി നിരത്തി. ദുരിതാശ്വാസപ്രവര്‍ത്തനങ്ങള്‍ക്കായി ജനങ്ങള്‍ സ്വരൂപിച്ച സംഭാവനയിലും ഗണ്യമായ പങ്കാളിത്തക്കുറവുണ്ടായതായും ചിലര്‍ അഭിപ്രായപ്പെടുകയുണ്ടായി. ദുരന്തത്തിന്റെ സ്വഭാവത്തിലും അതിന്റെ തീവ്രതയിലും അന്തരങ്ങള്‍ കാണാം. ഈ വ്യത്യാസങ്ങള്‍ മൂലമാണോ അതിനെ നേരിട്ട രീതിയില്‍ വന്ന പങ്കാളിത്തക്കുറവിന്റെ കാരണം? അതോ, ഇതൊരു സ്ഥിരം പ്രതിഭാസമായി സാധാരണ മലയാളി കാണാന്‍ തുടങ്ങിയോ?

2018-ലെ പ്രളയവും ദുരിതാശ്വാസപ്രവര്‍ത്തനങ്ങളും

2018-ല്‍ നിനച്ചിരിക്കാതെ വന്നു് എല്ലാം കൊണ്ടുപോയ പ്രളയം കേരളത്തിനെ സംബന്ധിച്ചു് ഒരു പുതിയ ദുരന്തമായിരുന്നു. അടുത്തകാലത്തു് ഇതിനു മുമ്പുണ്ടായ പ്രളയങ്ങളിലൊന്നും അന്നത്തെ പ്രളയത്തിന്റെയത്ര പ്രഹരശേഷിയുണ്ടായിരുന്നില്ല. കേരളത്തിലെ എല്ലാ ജില്ലകളിലും അന്നു് പ്രളയം നാശം വിതച്ചു. ഏതാനും ദിവസത്തോളം താഴാന്‍ കൂട്ടാക്കാതെ നിന്ന പ്രളയജലം മഴയുടെ ശക്തി കുറഞ്ഞുതുടങ്ങിയതോടെയാണു് സാവധാനം ഇറങ്ങിത്തുടങ്ങിയതു്. പ്രളയജലമിറങ്ങുന്നതിനു മുമ്പുതന്നെ രക്ഷാപ്രവര്‍ത്തനം തുടങ്ങിയിരുന്നതിനാല്‍ മരണസംഖ്യ ഗണ്യമായിക്കുറയ്ക്കുവാന്‍ നമുക്കു സാധിക്കുകയും ചെയ്തു. നാടിന്റെ നാനാഭാഗങ്ങളില്‍ നിന്നും സന്നദ്ധപ്രവര്‍ത്തകര്‍ സജ്ജരായി മുന്നോട്ടു വന്നു, ഉദാരമായ സംഭാവനകള്‍ നാനാഭാഗങ്ങളില്‍ നിന്നും പ്രവഹിച്ചു. ലോകമെമ്പാടും ചിതറിക്കിടക്കുന്ന മലയാളി സമൂഹവും ദുരിതാശ്വാസപ്രവര്‍ത്തനത്തില്‍ കേരളത്തെ കൈയ്യയച്ചു സഹായിച്ചു. ആയിരങ്ങളും പതിനായിരങ്ങളും ലക്ഷങ്ങളും നഷ്ടം സംഭവിച്ചവര്‍ക്കും സമ്പാദ്യം മുഴുവന്‍ നഷ്ടപ്പെട്ടവര്‍ക്കും അര്‍ഹിക്കുന്ന നഷ്ടപരിഹാരം ലഭിക്കാന്‍ ഈ തുക ധാരാളം മതിയായിരുന്നു. കൃത്യമായ ഏകോപനത്തോടെ നടത്തിയിരുന്നെങ്കില്‍ അവരുടെ നഷ്ടങ്ങള്‍ പണ്ടേ നികന്നു പോകുമായിരുന്നു. എന്നാല്‍ സംഭവിച്ചതു് മറിച്ചാണു്. അര്‍ഹിക്കുന്നവര്‍ക്കു് ലഭിക്കാതെയും പോയി അനര്‍ഹരായവര്‍ ഇതില്‍ കൈയ്യിട്ടു വാരുകയും ചെയ്തു എന്നതാണു് സത്യം. ദുരിതാശ്വാസത്തിനായി തുക കണ്ടെത്തുന്നതിനു സ്വീകരിച്ച രീതികളും അതു വിതരണം ചെയ്തതിനു കൈക്കൊണ്ട രീതികളും ഒരേ പോലെ വിമര്‍ശനങ്ങള്‍ ക്ഷണിച്ചുവരുത്തി. ഇതെല്ലാം സാധാരണജനം നിസ്സഹായരായി നോക്കി നിന്നു.

അന്നത്തെ പ്രളയത്തെ കേരളത്തിന്റെ പൊതുമനഃസാക്ഷി ഒറ്റക്കെട്ടായിട്ടാണു് നേരിട്ടതു്. അവിടെ പാര്‍ട്ടി വ്യത്യാസങ്ങള്‍ പ്രകടമായിരുന്നില്ല. മതജാതിവര്‍ണ്ണഗോത്രലിംഗഭേദങ്ങളില്ലാതെ എല്ലാ മനുഷ്യരും ദുരിതനിവാരണപ്രക്രിയയില്‍, പുതിയ കേരളത്തെ കെട്ടിപ്പടുക്കുന്നതില്‍ വ്യാപൃതരായി. കേരളത്തിലെ മത്സ്യബന്ധനതൊഴിലാളികള്‍ മറ്റേതൊരു സര്‍ക്കാര്‍ ഏജന്‍സിയേക്കാളും സ്തുത്യര്‍ഹമായ ദുരന്തനിവാരണപ്രവര്‍ത്തനങ്ങളാണു് കാഴ്ചവച്ചതു്. ഇവരെല്ലാവരും പ്രതിഫലേച്ഛയില്ലാതെയാണു് പ്രവര്‍ത്തിച്ചതെന്നതാണു് ഏറെ ശ്രദ്ധേയം. ദുരന്തനിവാരണ പ്രവര്‍ത്തനങ്ങള്‍ക്കു ശേഷം ഇന്ത്യന്‍ എയര്‍ഫോഴ്സും മറ്റും തങ്ങളുടെ സേവനങ്ങള്‍ക്കു പ്രതിഫലം ആവശ്യപ്പെട്ടതായി വാര്‍ത്തകളുണ്ടായി. പക്ഷേ നമ്മുടെ സ്വന്തം മത്സ്യബന്ധനസേനയ്ക്കു സര്‍ക്കാര്‍ സ്വമനസ്സാലെ പ്രഖ്യാപിച്ച പ്രതിഫലം പോലും അവര്‍ സ്വീകരിക്കാന്‍ കൂട്ടാക്കിയില്ല എന്നതു് അവരുടെ പ്രവര്‍ത്തനത്തെ കൂടുതല്‍ മികച്ചതാക്കുന്നു.

2019-ലെ പ്രളയവും ഉരുള്‍പൊട്ടലും

2019-ലെ പ്രളയവും പ്രകൃതിദൂരന്തവും കേരളത്തിലെ സാധാരണജനങ്ങള്‍ വീണ്ടും പ്രതീക്ഷിച്ചിരുന്നില്ല. അങ്ങനെ രണ്ടാം വര്‍ഷവും നിനച്ചിരിക്കാതെ വീണ്ടും പ്രളയദിനങ്ങളെത്തി. ഇക്കുറി പക്ഷേ കഴിഞ്ഞ തവണ കൊടുംനാശം സംഭവിച്ച സ്ഥലങ്ങളില്‍ പലയിടത്തും ജലനിരപ്പുയര്‍ന്നില്ല. മറിച്ചു് കഴിഞ്ഞവര്‍ഷം കാര്യമായി പ്രശ്നങ്ങളില്ലാതിരുന്ന സ്ഥലങ്ങളിലാണു് ദുരന്തങ്ങള്‍ സംഹാരതാണ്ഡവമാടിയതു്. അഥവാ ചില സ്ഥലങ്ങളില്‍ മാത്രമായി ദുരന്തങ്ങള്‍ കേന്ദ്രീകരിച്ചു. നിലമ്പൂരിന്റെ കാര്യമെടുക്കാം  — കഴിഞ്ഞവര്‍ഷത്തെ പ്രളയത്തില്‍ മാര്‍ക്ക് ചെയ്തതിലും ഏറെ ഉയരത്തിലാണു് ഇക്കുറി അവിടെ ജലമുയര്‍ന്നതു്. പല വീടുകളും അക്ഷരാര്‍ത്ഥത്തില്‍ വെള്ളത്തിനടിയിലായി. എന്നാല്‍ മുന്‍വര്‍ഷം വെള്ളത്തില്‍ മുങ്ങിപ്പോയ ചെങ്ങന്നൂര്‍, റാന്നി പാണ്ടനാട് തുടങ്ങിയ സ്ഥലങ്ങളിലൊന്നും തന്നെ ഇക്കുറി ജലം കയറിയതേയില്ല.

ഇക്കുറിയും അനേകം സന്നദ്ധപ്രവര്‍ത്തകര്‍ ദുരിതാശ്വാസപ്രവര്‍ത്തനങ്ങളിലും രക്ഷാപ്രവര്‍ത്തനങ്ങളിലും പങ്കുചേരാന്‍ വന്നെത്തി എന്നതു സത്യമാണു്. പക്ഷേ അവിടെ കൊടിയടയാളങ്ങളും മറ്റും ചില കല്ലുകടികള്‍ സൃഷ്ടിച്ചു.

ശ്രദ്ധാകേന്ദ്രങ്ങള്‍

ജൈസൽ കെ. പി. എന്ന താനൂർക്കാരനായ മത്സ്യ തൊഴിലാളിയാണ് 2018ലെ പ്രളയകാലത്തു് സോഷ്യൽ മീഡിയ ഏറ്റെടുത്ത താരം. ദേശിയ മാധ്യമങ്ങളിൽ വരെ ജൈസലിനെ വാഴ്ത്തി വാർത്ത വന്നു. വേങ്ങര മുതലമാട് രക്ഷാ പ്രവർത്തനം നടത്തുന്നതിനിടയിൽ സുരക്ഷാ ബോട്ടിലേക്ക് കയറാന്‍ ബുദ്ധിമുട്ടിയ ഏതാനും ചില സ്ത്രീകള്‍ക്കു് ചവിട്ടിക്കയറാനായി തന്റെ മുതുക് കുനിച്ചുവച്ചുകൊണ്ടാണു് ജൈസല്‍ സഹായിച്ചതു്. ആരോ പകര്‍ത്തി സാമൂഹികമാധ്യമങ്ങളില്‍ പങ്കുവച്ച ഈ ചിത്രങ്ങള്‍ ജൈസലിനെ പ്രളയദുരിതനിവാരണപ്രവര്‍ത്തനങ്ങളിലെ ഹീറോ ആക്കി. 2019-ലെ പ്രളയത്തില്‍ ആദ്യം ഹീറോ ആയതു് ദുരിതാശ്വാസപ്രവര്‍ത്തകര്‍ക്കു് സംഭാവന നല്‍കുന്നതില്‍ പിശുക്കു കാണിക്കാതിരുന്ന നൗഷാദ് എന്ന തെരുവു കച്ചവടക്കാരനാണു്. നൗഷാദ് ഹീറോ ആയാണു് രംഗപ്രവേശം ചെയ്തതെങ്കില്‍ ഈ ദുരന്തകാലത്തു് ആന്റി ഹീറോ ആയാണു് ഓമനക്കുട്ടന്‍ എന്ന കമ്മ്യൂണിസ്റ്റ് പാര്‍ട്ടി പ്രവര്‍ത്തകന്‍ രംഗപ്രവേശം ചെയ്യുന്നതു്. മതജാതിവര്‍ണ്ണഭേദങ്ങളും സംഘടനാപാര്‍ട്ടിവ്യത്യാസങ്ങളും ഈ ദുരിതനിവാരണപ്രവര്‍ത്തനങ്ങളുടെ വീര്യം കെടുത്തിയതിന്റെ പ്രകടമായ ഉദാഹരണം കൂടിയായിരുന്നു ഓമനക്കുട്ടന്‍ എന്ന ദരിദ്രനായ പാര്‍ട്ടിപ്രവര്‍ത്തകന്‍ പൊതുജനമദ്ധ്യത്തില്‍ ആദ്യം അപമാനിക്കപ്പെട്ടതു്.

സിപിഎം ലോക്കല്‍ കമ്മിറ്റി അംഗമായ ഓമനക്കുട്ടന്‍ ദുരിതാശ്വാസ ക്യാമ്പിൽ അനധികൃതപണപ്പിരിവ് നടത്തിയെന്ന പരാതിയാണു് വീഡിയോ ദൃശ്യങ്ങളടക്കം സോഷ്യല്‍ മീഡിയയില്‍ വ്യാപകമായി പ്രചരിക്കപ്പെട്ടതു്. ക്യാമ്പില്‍ താമസിക്കുന്നവര്‍ക്കായുള്ള അരിയും സാധനങ്ങളും മാവേലി സ്റ്റോറില്‍ വന്നിരുന്നുവെങ്കിലും യാത്രാ ചെലവിനായി റവന്യു വകുപ്പ് തുക അനുവദിച്ചിരുന്നില്ല. ഇത്രയും കാലമായിട്ടും സാധാരണ ഗതിയില്‍ ക്യാമ്പ് തുടങ്ങുമ്പോഴും അവശ്യ സാധനങ്ങള്‍ എത്തിക്കുന്നതിന് പണം റവന്യു വകുപ്പില്‍ നിന്ന് ലഭിച്ചിരുന്നില്ല. അവശ്യസാധനങ്ങള്‍ ക്യാമ്പിലേക്ക് എത്തിക്കാനായി ചിലവായ 70 രൂപ മാത്രമാണ് ഓമനക്കുട്ടന്‍ ക്യാമ്പിലെ അംഗങ്ങളില്‍ നിന്ന് പിരിച്ചെടുത്തിരുന്നത്. ഓട്ടോക്കൂലി നല്‍കാന്‍ വേണ്ടിവന്ന ആ 70 രൂപ പലരില്‍ നിന്നും പിരിക്കുന്ന ദൃശ്യങ്ങള്‍ എതിര്‍ രാഷ്ട്രീയചേരിയിലുള്ള ശത്രുക്കള്‍ സോഷ്യല്‍ മീഡിയയില്‍ ബോധപൂര്‍വ്വം പ്രചരിപ്പിക്കുകയായിരുന്നു എന്നു പറയപ്പെടുന്നു. അയാളുള്‍പ്പെടെയുള്ള ചെറിയ സമൂഹത്തിന്റെ നിതാന്തജാഗ്രത മൂലമാണു് വലിയൊരു ദുരന്തമാകാമായിരുന്ന ഓമനക്കുട്ടന്റെ ജീവിതത്തെ കാര്യമായ തട്ടുകേടുകളില്ലാതെ രക്ഷപെടുത്തിയെടുത്തതു്.

ഈ പ്രളയകാലത്തിന്റെ ഐക്കണ്‍ അതുകൊണ്ടുതന്നെ ഓമനക്കുട്ടനാണെന്നു നിസ്സംശയം പറയാം, പ്രളയകാലത്തിലും രാഷ്ട്രീയവൈരം തീര്‍ക്കാന്‍ നുണപ്രചരണങ്ങള്‍ കൊണ്ടു സാധിക്കും എന്ന് ഓമനക്കുട്ടന്‍ സംഭവം നമ്മെ പഠിപ്പിക്കുന്നു. അതിനെ ചെറുത്തു തോല്‍പ്പിക്കാന്‍ സമൂഹത്തിന്റെ ജാഗ്രതയ്ക്കു കഴിയും എന്നും അതേ സംഭവം നമ്മോടു പറയുന്നു.

പിടിപ്പുകേടുകള്‍

കഴിഞ്ഞ പ്രളയകാലത്തു് പ്രളയദുരിതാശ്വാസത്തിനായി ലോകം മുഴുവനില്‍ നിന്നും സര്‍ക്കാരിനു ലഭിച്ച ഫണ്ടുകള്‍ പ്രളയാനന്തരം അര്‍ഹതപ്പെട്ടവരിലേയ്ക്കു് എത്തിക്കുന്നതില്‍ കാണിച്ച ജാഗ്രതക്കുറവാണു് ദുരിതാശ്വാസപ്രവര്‍ത്തനങ്ങള്‍ക്കു് ഇക്കുറി ഏറ്റവും വലിയ തിരിച്ചടിയായതു്. 2019-ലെ പ്രളയകാലത്തിനു തൊട്ടുമുമ്പു് ഇതു സംബന്ധമായ അനേകം ചര്‍ച്ചകള്‍ സോഷ്യല്‍ മീഡിയയിലും വര്‍ത്തമാനപ്പത്രങ്ങളിലും സജീവമായിരുന്നു. ഈ ചര്‍ച്ചകളിലൊന്നിലും തന്നെ വിശ്വസനീയമായ വിശദീകരണങ്ങള്‍ നല്‍കാന്‍ ഭരിക്കുന്ന സര്‍ക്കാരിനു കഴിയാതിരുന്നതും ദുരിതാശ്വാസ ഫണ്ടു് നേരെ ചൊവ്വെയല്ല ചിലവഴിക്കപ്പെട്ടതു് എന്ന ചിന്ത ജനമനസ്സില്‍ രൂഢമൂലമായതും അവരുടെ ആത്മവിശ്വാസം തകര്‍ത്തു. എന്നിരിക്കിലും ഇത്തവണത്തെ ദുരിതകാലത്തും സംഭാവനകള്‍ നല്‍കാനും രക്ഷാപ്രവര്‍ത്തനങ്ങള്‍ക്കുമായി പലരും മുന്നോട്ടു വന്നെങ്കിലും അതു് കഴിഞ്ഞ വര്‍ഷം ഉണ്ടായ അതേ ഔത്സുക്യത്തോടെ ആയിരുന്നില്ല എന്നതു് പരക്കെ നിരീക്ഷിക്കപ്പെട്ടിട്ടുള്ള കാര്യമാണു്.

ഇനിയെന്തു്?

കേരളത്തിലെ കാലാവസ്ഥ മണ്‍സൂണിനെ ആശ്രയിച്ചാണു് നിലകൊള്ളുന്നതു്. ആഗോളതാപനത്തിന്റേയും തലതിരിഞ്ഞ വികസനത്തിന്റേയും പരിണിതഫലമായി മണ്‍സൂണിന്റെ സ്വഭാവം തന്നെ മാറിയതുകൊണ്ടാണു് അതിതീവ്രമഴ എന്ന പ്രതിഭാസം സംജാതമായതെന്നാണു് പരിസ്ഥിതി കാലാവസ്ഥാ വിദഗ്ദ്ധര്‍ ചൂണ്ടിക്കാട്ടുന്നതു്. ഇവര്‍ തരുന്ന മുന്നറിയിപ്പു പ്രകാരം ഇനി വരുന്ന മണ്‍സൂണ്‍ കാലഘട്ടങ്ങളും ഇതുപോലെ തന്നെ ദുരന്തസ്വഭാവമുള്ളതായിരിക്കാനാണു് സാദ്ധ്യത. പ്ര‍കൃതി ചൂഷണത്തിനു് കര്‍ശനമായ നിയന്ത്രണങ്ങള്‍ ഏര്‍പ്പെടുത്തുക. കൃത്യമായ ഏകോപനത്തോടെ സുരക്ഷാമുന്‍കരുതലുകളും ദുരിതനിവാരണപ്രവര്‍ത്തനങ്ങളും നഷ്ടപരിഹാരങ്ങളും യഥാസമയം നല്കിക്കൊണ്ടു് സര്‍ക്കാര്‍ ജനങ്ങള്‍ക്കൊപ്പമാണെന്ന ആത്മവിശ്വാസം ജനങ്ങളിലെത്തിക്കട്ടെ, എങ്കില്‍ മാത്രമേ കേരളത്തിലെ പ്രബുദ്ധജനത ഒരൊറ്റ മനസ്സോടെ ഇത്തരം ഏതൊരു ദുര്‍ഘടാവസ്ഥയേയും നേരിടാന്‍ സജ്ജമാകൂ.

ഇതാ ഉള്ളില്‍ നിന്നും സ്വയം തകര്‍ക്കപ്പെട്ടു കൊണ്ടിരിക്കുകയാണു് ഒരു നാഗരികത.

അധികൃതരുടെ അനുമതിയോടെയും അനുമതിയില്ലാതെയും പ്രവര്‍ത്തിക്കുന്ന അസംഖ്യം പാറമടകളും ചെങ്കല്‍ ക്വാറികളും പശ്ചിമഘട്ടത്തില്‍ വിവിധസ്ഥലങ്ങളിലായി ദശാബ്ദങ്ങളായി പ്രവര്‍ത്തിക്കുന്നുണ്ടു്. അവയെപ്പറ്റി ഇപ്പോഴും ഇടവിട്ടിടവിട്ടു് ഒറ്റപ്പെട്ടതും സംഘടിതവുമായ പ്രതിഷേധങ്ങളും ഉയര്‍ന്നുകേള്‍ക്കാറുമുണ്ടു്. ഇവയെ നിയന്ത്രിക്കുന്നതുള്‍പ്പെടെയുള്ള നിര്‍ദ്ദേശങ്ങള്‍ അടങ്ങിയ മാധവ് ഗാഡ്ഗില്‍ കമ്മിറ്റി റിപ്പോര്‍ട്ടിനെ കേരളത്തിലെ രാഷ്ട്രീയ,മത,സാസ്കാരിക നേതൃത്വങ്ങളിലുള്ളവര്‍ ആദ്യമേതന്നെ തള്ളിക്കളഞ്ഞി‍ട്ടുള്ളതുമാണു്. കേരളത്തിലുണ്ടായ പ്രളയം ഉരുള്‍പൊട്ടല്‍ തുടങ്ങിയ പ്രകൃതിക്ഷോഭങ്ങളുടെ പശ്ചാത്തലത്തില്‍ ഇവയെപ്പറ്റി സോഷ്യല്‍ മീഡിയയില്‍ വന്ന ചില പ്രതികരണങ്ങള്‍ വിശകലനം ചെയ്യുമ്പോള്‍ നമുക്കു ചില കാര്യങ്ങള്‍ മനസ്സിലാകും. അവയെ അക്കമിട്ടുനിരത്തുകയാണിവിടെ.

  1. കരിങ്കല്ലും ചെങ്കല്ലും വീടു്/കെട്ടിടനിര്‍മ്മാണത്തിന്റെ അവിഭാജ്യഘടകങ്ങളാണു്. ഇവയില്ലാതെ നിര്‍മ്മാണം സാധ്യമല്ല.
  2. കരിങ്കല്ലും ചെങ്കല്ലും വീടു്/കെട്ടിടനിര്‍മ്മാണത്തിന്റെ അവിഭാജ്യഘടകങ്ങളായതിനാല്‍ത്തന്നെ എത്രവലിയ പ്രളയമോ ഉരുള്‍പൊട്ടലോ പ്രകൃതിദുരന്തമോ സംഭവിച്ചാലും ഇവയുടെ ഖനനം മുടക്കംകൂടാതെ തുടരണം എന്ന കാര്യത്തില്‍ യാതൊരു സംശയവുമില്ല.
  3. ഇപ്പോള്‍ പ്രവര്‍ത്തിച്ചു കൊണ്ടിരിക്കുന്ന ക്വാറികള്‍ നിമിത്തം പരിസ്ഥിതി പ്രശ്നങ്ങള്‍ ഉണ്ടായിട്ടുണ്ടു് എന്നതിനു് ശാസ്ത്രീയമായ തെളിവുകള്‍ ഇല്ലാത്തതിനാല്‍ ഇവയുടെ പ്രവര്‍ത്തനം നിര്‍ബാധം തുടരാം.
  4. സി.ഇ. 1924-ലെ പ്രളയവും സി.ഇ. 1300-ലെ മഹാപ്രളയവും ഉണ്ടായതു് ഇത്തരം പാരിസ്ഥിതികമായ ആഘാതം കൊണ്ടൊന്നുമല്ലല്ലോ?
  5. സ്വന്തം വീടിരിക്കുന്ന സ്ഥലത്തു് ദുരന്തമുണ്ടായിക്കഴിഞ്ഞാല്‍ ഉറ്റവരും ഉടയവരും അതില്‍പ്പെട്ടാല്‍ മാത്രം മേല്‍പ്പറഞ്ഞ നാലു കാര്യങ്ങളും സൗകര്യം പോലെ നിഷേധിക്കാവുന്നതാണു്, ചുരുങ്ങിയ പക്ഷം നിശ്ശബ്ദതയെങ്കിലും പുലര്‍ത്താവുന്നതാണു്.

കൂടുതലൊന്നും എഴുതുന്നില്ല. ഉത്തരവാദിത്വം എന്നൊന്നില്ലാത്ത ഒരു സമൂഹമാണിതു്. ഇവിടെ ആരുവന്നാലും ഒന്നും ശരിയാവില്ല. ഒരു പാറമടയും പ്രവര്‍ത്തനം നിര്‍ത്തുകയോ പരിമിതപ്പെടുത്തുകയോ ചെയ്യില്ല. വിഭവങ്ങള്‍ വിനിയോഗിക്കുന്നതിലെ ധൂര്‍ത്തുകള്‍ അവസാനിപ്പിക്കില്ല. അഴിമതിയും ആര്‍ത്തിയും പൂണ്ട രാഷ്ട്രീയ ഉദ്യോഗസ്ഥ പിശാചുക്കള്‍ മുപ്പതുവെള്ളിക്കാശിനുവേണ്ടി അഴിഞ്ഞാടുന്നതു് തുടരുകതന്നെ ചെയ്യും. ഞാനും നിങ്ങളുമടക്കം ഇതൊന്നും നമ്മുടെ കാര്യമല്ലെന്നു പറഞ്ഞു് മാറിനില്‍ക്കുന്നതും അവസാനിപ്പിക്കില്ല. പശ്ചിമഘട്ടം പൂര്‍ണ്ണമായും പാറക്കഷണങ്ങളായി പൊടിച്ചെടുത്തു് ഇവിടെ അതിമനോഹരങ്ങളായ അനേകം കെട്ടിടങ്ങളും എഞ്ജിനീയറിംഗ് മഹാത്ഭുതങ്ങളായ അനേകം പാലാരിവട്ടം മോഡല്‍ പാലങ്ങളും കൊണ്ടു് നിറയും. അപ്പോള്‍ നമുക്കു് ശാന്തിയും സമാധാനവും കൈവരും. വില്‍ ‍ഡ്യൂറന്റിന്റെ ആ പ്രസിദ്ധമായ വാക്യം കൂടി പറഞ്ഞുകൊണ്ടു് വിടവാങ്ങട്ടെ,

A great civilisation is not conquered from without until it has destroyed itself from within ⇌ ഉള്ളില്‍ നിന്നും സ്വയം തകര്‍ക്കപ്പെടാതെ ഒരു വലിയ നാഗരികത പുറമേനിന്ന് കീഴടക്കപ്പെടില്ല.

ഭാരതം അതിന്റെ ഭൂപ്രകൃതിയും രാഷ്ട്രീയസ്വത്വവും സാംസ്കാരിക,മാനുഷികസത്തയുമെല്ലാം പൂര്‍ണ്ണമായി ഉന്മൂലനം ചെയ്യപ്പെട്ടു് ഉള്ളില്‍ നിന്നും സ്വയം തകര്‍ക്കപ്പെട്ടു കൊണ്ടിരിക്കുകയാണു്. അതിന്റെ പ്രതിഫലനമാണു് നാം ഇപ്പോള്‍ കണ്ടുകൊണ്ടിരിക്കുന്ന ഈ പ്രകൃതിപ്രക്ഷോഭങ്ങളും ദുരന്തങ്ങളും. ചിന്തകള്‍ക്കു് തെളിച്ചവും ഹൃദയത്തിനു് തുറവിയുമില്ലാത്ത ഇവിടം ഇങ്ങനൊക്കെ അങ്ങനെ നശിക്കുകയേ ഉള്ളൂ. അതങ്ങനെ തന്നാകട്ടെ.

പ്രളയത്തെത്തുടര്‍ന്നു് പാറമടകള്‍ക്കെതിരേ എഴുതിയ ഫേസ്ബുക്ക് കുറിപ്പിനു കിട്ടിയ തെറിവിളി

പ്രളയത്തെത്തുടര്‍ന്നു് പാറമടകള്‍ക്കെതിരേ എഴുതിയ ഫേസ്ബുക്ക് കുറിപ്പിനു കിട്ടിയ തെറിവിളി

ജേര്‍ണലിസം ജയിലിലടയ്ക്കപ്പെട്ടു

ജേര്‍ണലിസം ജയിലിലടയ്ക്കപ്പെട്ടിരിക്കുന്നു. സത്യം വിളിച്ചുകൂവാനുള്ള പൗരന്റെ സ്വാതന്ത്ര്യം അവസാനിച്ചിരിക്കുന്നു. ലോകത്തു് അവശേഷിച്ച സത്യസന്ധനായ അവസാനപത്രപ്രവര്‍ത്തകന്‍ – ജൂലിയന്‍ അസാന്‍ജിന്റെ അറസ്റ്റോടെ ഇനി കൂടുതലൊന്നും പ്രതീക്ഷിക്കാനില്ലാത്ത സ്ഥിതിയിലേയ്ക്കു് ലോകം സഞ്ചരിച്ചുകൊണ്ടിരിക്കുകയാണു്. വിവരസാങ്കേതികവിദ്യയുടെ ആവിര്‍ഭാവത്തോടെ, സാമൂഹ്യമാധ്യമങ്ങളുടെ അതിപ്രസരത്തോടെ നാം എത്തിപ്പെട്ടു നില്ക്കുന്ന വാസ്തവാനന്തര ലോകവ്യവസ്ഥിതിയില്‍ അസാന്‍ജിനു് നേരിടേണ്ടിവന്ന ശിക്ഷ അദ്ദേഹം അര്‍ഹിക്കുന്നതാണെന്നു വരുത്തിത്തീര്‍ക്കുവാനും ലോകം അതു വിശ്വസിക്കാനുമാണു് കൂടുതല്‍ സാദ്ധ്യത.

എന്താണു് അസാഞ്ജ് ചെയ്ത കുറ്റം? അമേരിക്ക ഉള്‍പ്പെട്ട, അനവധി കോര്‍പ്പറേറ്റുകള്‍ ഉള്‍പ്പെട്ട നിരവധി നിയമലംഘനകങ്ങളുടെ അസ്സല്‍ പ്രമാണങ്ങള്‍ തന്റെ ഓണ്‍ലൈന്‍മാധ്യമത്തിലൂടെ അദ്ദേഹം ലോകത്തിനു പങ്കുവച്ചു. ബ്രാഡ്‍ലി മാനിംഗ് (ഇപ്പോള്‍ ചെല്‍സിയ മാനിംഗ്), എഡ്വേര്‍ഡ് സ്നോഡന്‍ തുടങ്ങിയ വിസില്‍ ബ്ലോവര്‍മാര്‍ക്കു് തങ്ങള്‍ കണ്ടെത്തിയ സത്യങ്ങള്‍ പ്രസിദ്ധീകരിക്കാന്‍ സഹായകമായതു് അസാന്‍ജിന്റെ വിക്കിലീക്സ് എന്ന ഓണ്‍ലൈന്‍ മാദ്ധ്യമമായിരുന്നു. അതായതു് സമൂഹം തെരഞ്ഞടുത്തു് അധികാരത്തിലേറ്റിയ സര്‍ക്കാര്‍ നടത്തിയ നിയമലംഘനങ്ങള്‍ അസ്സല്‍ പ്രമാണങ്ങളുടെ ആധികാരികതയോടെ സമൂഹത്തിനു് മനസ്സിലാകുമാറു് റിപ്പോര്‍ട്ട് ചെയ്യുകയും അപ്രകാരം ചെയ്യാന്‍ കഴിയുന്ന മറ്റുള്ളവര്‍ക്കു് അതിനുള്ള സൗകര്യം ഒരുക്കിനല്‍കി എന്നതൊക്കയാണു് അസാന്‍ജ് ചെയ്ത കുറ്റകൃത്യങ്ങള്‍. ഫയങ്കരം തന്നെ, അല്ലേ?

എഡ്വേര്‍ഡ് സ്നോ‍ഡന്‍ ഒരിക്കല്‍ പ്രസ്താവിച്ച ഈ വാക്കുകള്‍ കേള്‍ക്കൂ

താന്‍ ദൃക്‍സാക്ഷിയായ കുറ്റം വിളിച്ചുപറയുന്നതു് ഒരു കുറ്റമായി പരിഗണിക്കപ്പെടുകയാണെങ്കില്‍ സംശയിക്കേണ്ട, നിങ്ങള്‍ ഭരിക്കപ്പെടുന്നതു് കുറ്റവാളികളാലാണു്

ജനങ്ങളാല്‍ തെരഞ്ഞെടുക്കപ്പെട്ട കൊടുംകുറ്റവാളികളാലാണു് ലോകം ഇന്നു ഭരിക്കപ്പെട്ടു കൊണ്ടിരിക്കുന്നതു്. അതായതു് ജനാധിപത്യം കാലഹരണപ്പെട്ടിരിക്കുന്നു, നമുക്കുവേണ്ടതു് ഇനി പുതിയൊരു ലോകക്രമമാണു്. അതിനായി നമുക്കു കാത്തിരിക്കാം.

 

ഏറെ പടിഞ്ഞാട്ടു പോയാല്‍

2018 നവംബര്‍ മൂന്നാം തീയതിയിലെ മനോരമയില്‍ കണ്ട വാചകമേള എന്ന പംക്തിയില്‍ പ്രസിദ്ധീകരിച്ച മുരളി ഗോപിയുടെ ഉദ്ധരണി കണ്ടപ്പോള്‍ എഴുന്നേറ്റു നിന്നു കൈയ്യടിക്കാന്‍ തോന്നി – അത്രയ്ക്കും ഉദാത്തമായ ഉദാഹരണമാണു് അദ്ദേഹം നല്‍കിയതു്.

സനാതനധര്‍മ്മവും കമ്മ്യൂണിസവും തമ്മിലെന്തു ബന്ധം

നമ്മള്‍ ഇപ്പോള്‍ കാണുന്ന ഇടതുപക്ഷം എന്നാല്‍ സീപീയെം തന്നെ – പേരെടുത്തു പറഞ്ഞില്ല എന്നേയുള്ളൂ. സനാതനധര്‍മ്മം ഒരു ഇടതുപക്ഷ ചിന്താഗതിയാണെങ്കില്‍ ഹിന്ദുത്വം വെറുമൊരു വലതുപക്ഷഫാസിസം മാത്രമാണു്. അതേസമയം കമ്മ്യൂണിസമോ? അതൊരു ഒരു മനോഹരമായ ഇടതുപക്ഷ ആശയമാണെങ്കില്‍ നമ്മുടെ സീപീയെം അതിതീവ്രവലതുപക്ഷഫാസിസമത്രേ. അതായതു് സനാതനധര്‍മ്മവും ഹിന്ദുത്വവും തമ്മിലുള്ളതിനേക്കാള്‍ അകലമേറെയാണു് കമ്മ്യൂണിസത്തിനും സീപീയെമ്മിനും തമ്മിലെന്നു് സാരം. മുപ്പതുകളില്‍ കേരളത്തില്‍ കമ്മ്യൂണിസ്റ്റ് ആശയങ്ങള്‍ വേരോടിത്തുടങ്ങുമ്പോള്‍ കാര്യങ്ങള്‍ പക്ഷേ അങ്ങനെയായിരുന്നില്ല എന്നാണു് ചരിത്രം രേഖപ്പെടുത്തുന്നതു്. മനുഷ്യസ്നേഹികളായ ഒരുകൂട്ടം നല്ലമനുഷ്യര്‍ പടുത്തുയര്‍ത്തി ചോരയും വിയര്‍പ്പുമൊഴുക്കി വളര്‍ത്തിയെടുത്ത ഈ പാര്‍ട്ടി എങ്ങനെ ഇപ്പോള്‍ കാണുന്നതുപോലുള്ള ഒരു സെപ്റ്റിക്‍ അഴുക്കുചാലില്‍ കഴുത്തറ്റം ആഴ്ന്നിറങ്ങി എന്നതു് ഇന്നും ഹൃദയത്തിനുള്ളില്‍ കനിവു കാത്തുസൂക്ഷിക്കുന്ന യഥാര്‍ത്ഥ ഇടതുപക്ഷആശയക്കാരെ നോവിപ്പിക്കുന്നുണ്ടു്. ഏറെ പടിഞ്ഞാട്ടു പോയി കിഴക്കറ്റമെത്തിയ പാര്‍ട്ടിയാണതു്.

ഇടതുപക്ഷ/തീവ്ര ഇടതുപക്ഷ ആശയം മറയാക്കി പ്രവര്‍ത്തിക്കുന്ന ഇതരഇടതുപക്ഷപാര്‍ട്ടികളും അത്ര മെച്ചമൊന്നുമല്ല, സീപീഐ പണ്ടേ വലതുപക്ഷത്തേയ്ക്കു കൂറുമാറിയ പാര്‍ട്ടിയായതിനാല്‍ പ്രത്യേകിച്ചൊന്നും പറയുന്നില്ല, മാര്‍ക്സിസ്റ്റ് – ലെനിനിസ്റ്റ് എന്നും റെഡ്ഫ്ലാഗ്/റെഡ്സ്റ്റാര്‍ എന്നൊക്കെ ബ്രാന്‍ഡ്നെയിമിട്ടു് നടന്നിട്ടൊന്നും കാര്യമില്ല – ചുവപ്പിനുള്ളില്‍ കാവിയും സ്വസ്തികയുമൊക്കെ തരം പോലെ കൂട്ടിക്കലര്‍ത്തിയാണു് അവരും അശ്വമേധത്തിനിറങ്ങിയിരിക്കുന്നതു്.

ട്രമ്പും മോദിയും തുടങ്ങി ലോകത്തെല്ലായിടത്തും ഫാസിസ്റ്റുകള്‍ വിദ്വേഷരാഷ്ട്രീയം കളിക്കുന്ന കാലത്താണു് സീപീയെമ്മിന്റെ പിണറായി കേരളത്തില്‍ അധികാരത്തിലെത്തിയതെന്നതു് തികച്ചും കൗതുകകരവുമാണു്.

 

പരമോന്നതകോടതിയുടെ വിധിയെ എങ്ങനെ രാഷ്ട്രീയമായി ഉപയോഗിക്കാം?

ഒരു രാഷ്ട്രത്തിന്റെ പരമോന്നതനീതിപീഠത്തിന്റെ വിധിയെ രാഷ്ട്രീയമായി ഉപയോഗിച്ചുകൊണ്ടു് എങ്ങനെ ഫാസിസം നടപ്പില്‍ വരുത്താന്‍ കഴിയും എന്നു് ഇന്ത്യ പതിയെ തിരിച്ചറിഞ്ഞുകൊണ്ടിരിക്കുകയാണു്. സംഘപരിവാര്‍ ശക്തികള്‍ സംയുക്തമായി എഴുതിയുണ്ടാക്കിയ തിരക്കഥപ്രകാരം അരങ്ങേറുന്ന ഫാസിസ്റ്റ് നാടകത്തിനു് വേദിയാകുന്നതു് പരിപാവനം എന്നു് സാധാരണ തെന്നിന്ത്യന്‍ ഭക്തന്‍ കരുതി പരിപാലിച്ചുപോന്ന ശബരിമലയാണു് എന്നതാണു് ഏറെ ദുഃഖകരം. നാടകത്തിന്റെ നായകകഥാപാത്രങ്ങളായി സവര്‍ണ്ണ സംഘപരിവാര്‍ നേതാക്കള്‍ ആടിത്തിമിര്‍ക്കുമ്പോള്‍ കഥയറിയാതെ അവരുടെ ചരടുവലികള്‍ക്കൊപ്പം നൂലുകളില്‍ തൂങ്ങി പാവന‍ാടകമാടുകയാണു് പാവം ശബരീശഭക്തന്മാര്‍.

കേരളം തങ്ങള്‍ക്കു് ബാലികേറാമലയാണെന്നു് പരിവാരസംഘടനകള്‍ പണ്ടേ തിരിച്ചറിഞ്ഞിരുന്നു. ആ ബാലികേറാമലയെ ഏതൊരു ബാലനും കേറാവുന്ന മലയാക്കിമാറ്റാന്‍ ശബരിമലയിലൂടെ സാധിക്കാമെന്ന തിരിച്ചറിവു് അവര്‍ക്കുണ്ടാകുന്നതു് ഏകദേശം ഒരു ദശകത്തിനെങ്കിലും മുമ്പാണു്. ഏതൊരു സാധാരണ മലയാളിയുടേയും ഹൃദയത്തിന്റെ ഏറ്റവും ലോലമായ ഭാഗങ്ങളില്‍ സ്പര്‍ശിക്കുന്ന അത്രമേല്‍ സെന്‍സിറ്റീവായൊരു വിഷയമാണു് ശബരിമലയെന്നും അതിനെ ബാധിക്കുന്ന ഏതൊരു പ്രശ്നവും തങ്ങള്‍ക്കു് രാഷ്ട്രീയലാഭത്തിനായി മുതലെടുക്കാമെന്നു് പരിവാരശക്തികള്‍ കണക്കുകൂട്ടി. ഈ കണക്കുകൂട്ടലുകള്‍ ശരിയാണോ എന്നുറപ്പിക്കാന്‍ വേണ്ടിയാണു് ബോധപൂര്‍വ്വമായി മുംബൈക്കാരായ ഏതാനും യുവതികളെ അഞ്ചട്ടുകൊല്ലം മുമ്പ്  അവര്‍  സന്നിധാനത്തേയ്ക്കു കടത്തിവിട്ടതു്. സുനില്‍ സ്വാമി എന്ന ഇടനിലക്കാരനെയാണു് അവര്‍ ഇതിനായി ഉപയോഗിച്ചതു്. (അവലംബം 2012 ഏപ്രില്‍ 12-ലെ ദേശാഭിമാനി വാര്‍ത്ത) മാളികപ്പുറം ശാന്തിയുടേയും ശബരിമലയിലെ മറ്റു് പുരോഹിതപ്രമുഖരുടേയും ഒത്താശയോടെയാണു് ഈ ഓപ്പറേഷന്‍ നടത്തിയതു്. തികച്ചും വിജയകരമായ ഈ ഓപ്പറേഷനോടുകൂടെ പരിവാര്‍ ഉന്നതകേന്ദ്രങ്ങളില്‍ നിന്നു് പച്ചക്കൊടി ലഭിച്ചതോടെ തിരക്കഥാരചന തുടങ്ങി.

ആദ്യഘട്ടമായി 2006 ജൂലൈ 28-നു് ശബരിമലയില്‍ സ്ത്രീകളുടെ പ്രവേശനത്തിന് ഉള്ള നിയന്ത്രണം നീക്കണം എന്ന് ആവശ്യപ്പെട്ട് സംഘ് പരിവാര്‍ അനുകൂല സംഘടനയായ ഇന്ത്യന്‍ യങ് ലോയേഴ്‌സ് അസോസിയേഷന്‍ സെക്രട്ടറി ഭക്തി പശ്രീജ സേത്തി സുപ്രീം കോടതിയില്‍ റിട്ട് ഹര്‍ജി നല്‍കിക്കൊണ്ടു് പ്രോദ്ഘാടനം ചെയ്തു. 2008 മാര്‍ച്ച് വരെ ദ്രൂതഗതിയില്‍ നീങ്ങിയ കേസ് പിന്നീടു് 2016 വരെ ഏതാണ്ടു് എട്ടു വര്‍ഷക്കാലം കോടതിഫയലുകളില്‍ ശിശിരകാലനിദ്രയില്‍ ലയിച്ചു കിടന്നു. 2014-ല്‍ നരേന്ദ്ര മോദിയുടെ നേതൃത്വത്തില്‍ വന്ന ബി.ജെ.പി. സര്‍ക്കാര്‍ അധികാരത്തില്‍ വന്ന ശേഷം 2016-ല്‍ പെട്ടെന്നൊരു പുത്തനുണര്‍വ്വോടെ ഉണര്‍ന്നെണീറ്റ കേസ് കൃത്യമായ ഇടവേളകളില്‍ ആവശ്യമായ നേട്ടങ്ങള്‍ കൈവരിച്ചുകൊണ്ടിരുന്നു. ഇടയ്ക്കു്  കേസില്‍ കോടതി അമിക്കസ് ക്യുറിയെ നിയോഗിക്കുകയും ചെയ്തു (സുപ്രീം കോടതി സീനിയര്‍ അഭിഭാഷകന്‍ രാമമൂര്‍ത്തി, മറ്റൊരു സീനിയര്‍ അഭിഭാഷകര്‍ ആയ രാജു രാമചന്ദ്രന്‍ എന്നിവരായിരുന്നു ആയിരുന്നു അമിക്കസ് ക്യുറിമാര്‍ ). ഇന്ത്യയുടെ 45-ാമതു് സുപ്രീം കോടതി ചീഫ് ജസ്റ്റിസിനെ രാഷ്ട്രപതി രാം നാഥ് കോവിന്ദ് നിയമിച്ചതിനു് അധികം വൈകാതെയാണു് ശബരിമല വിഷയത്തില്‍ വളരെ ചടുലമായ നടപടികള്‍ക്കു് കളമൊരുങ്ങിയതു്. ഇന്ത്യന്‍ യങ് ലോയേഴ്‌സ് അസോസിയേഷനു വേണ്ടി സീനിയര്‍ അഡ്വക്കേറ്റ്  ആര്‍. പി. ഗുപ്തയാണു് കോടതിയില്‍ ഹാജരായതു്.

ശബരിമലയിലെ വിശ്വാസങ്ങളും ആചാരങ്ങളും മാനിക്കണം എന്നും, സ്ത്രീ പ്രവേശനത്തിനുള്ള നിയന്ത്രണം തുടരണം എന്നും ആയിരുന്നു ഉമ്മന്‍ ചാണ്ടിയുടെ നേതൃത്വത്തിലുള്ള അന്നത്തെ സംസ്ഥാന സര്‍ക്കാര്‍ സുപ്രീം കോടതിയില്‍ സമര്‍പ്പിച്ച പുതിയ സത്യവാങ്മൂലത്തിന്റെ കാതല്‍. പിന്നീടു് വിവിധകാലയളവുകളിലായി സുപ്രീം കോടതിയില്‍ വാദങ്ങള്‍ നടന്നപ്പോള്‍ ജസ്റ്റിസ് ദീപക് മിശ്രയും ജസ്റ്റിസ് ഗോപാല്‍ ഗൗഡയും സ്ത്രീ പ്രവേശനത്തിന് അനുകൂലമായ പല പരാമര്‍ശങ്ങളും നടത്തി, അതേസമയം വിശ്വാസങ്ങളിലും ആചാരങ്ങളിലും കോടതി ഇടപെടേണ്ടതില്ല എന്ന നിലപാട് ആണ് ജസ്റ്റിസ് കുര്യന്‍ ജോസഫ് സ്വീകരിച്ചത്.

കേസിന്റെ പുരോഗതികള്‍ക്കിടയില്‍ പലകുറി സുപ്രീം കോടതി ബഞ്ചില്‍ വിവിധ ജഡ്ജിമാര്‍ മാറി മാറി വന്നുകൊണ്ടിരുന്നു. 2016 നവംബറില്‍ ജസ്റ്റിസ് മാരായ ദീപക് മിശ്ര, സി നാഗപ്പന്‍, ആര്‍ ഭാനുമതി എന്നിവര്‍ അടങ്ങിയ ബെഞ്ച് ശബരിമല സ്ത്രീ പ്രവേശന കേസ് പരിഗണിച്ചപ്പോള്‍ പിണറായി വിജയന്റെ നേതൃത്വത്തിലുള്ള സംസ്ഥാന സര്‍ക്കാര്‍ തങ്ങളുടെ നിലപാടു് ശബരിമലയില്‍ സ്ത്രീപ്രവേശനം അനുവദിക്കണം എന്നു തന്നെയാണെന്നു് കോടതിയെ അറിയിച്ചു. സംസ്ഥാന സര്‍ക്കാര്‍ 2016 ഫെബ്രുവരി 5 ന് അധിക സത്യവാങ് മൂലം കോടതിയില്‍ സമര്‍പ്പിച്ചിട്ടുള്ളതു് പിന്‍വലിക്കാന്‍ അനുമതി നല്‍കണമെന്നും  2007 നവംബര്‍ 13-നു് സംസ്ഥാന സര്‍ക്കാര്‍ ഫയല്‍ ചെയ്ത സത്യവാങ് മൂലത്തില്‍ പറഞ്ഞിരിക്കുന്നതാണ് സര്‍ക്കാരിന്റെ നിലപാടു് എന്നും അതിന് അനുസൃതം ആയിരിക്കും സര്‍ക്കാരിന്റെ വാദമെന്നും കൃത്യമായിത്തന്നെയായിരുന്നു സര്‍ക്കാര്‍ അഭിഭാഷകന്റെ വാദം. പുരോഗമനാശയങ്ങളുള്ള (ആശയപരമായി മാത്രം, തത്വത്തില്‍ അല്ല!) പാര്‍ട്ടിയാണെങ്കിലും  പരിവാര്‍ സംഘങ്ങള്‍ ഒരുക്കിയ കെണിയില്‍ തങ്ങള്‍ ഫ്ലാങ്ക് ചെയ്യപ്പെടുകയാണെന്നു് അപ്പോള്‍ അവര്‍ മനസ്സിലാക്കാതെ പോയി. അതിനുള്ള നയചാതുരിയും ചിന്താശക്തിയും വിവേകവും ഉള്ള നേതാക്കന്മാര്‍ ഇന്നു് ഈ പാര്‍ട്ടിയില്‍ ഇല്ലല്ലോ.

2017 ഒക്ടോബര്‍ 13-നായിരുന്നു ശബരിമലയില്‍ സ്ത്രീകളുടെ പ്രവേശനത്തിന് ഉള്ള നിയന്ത്രണം നീക്കണം എന്ന് ആവശ്യപ്പെട്ട് ഇന്ത്യന്‍ യങ് ലോയേഴ്‌സ് അസോസിയേഷന്‍ നല്‍കിയ ഹര്‍ജി ഭരണഘടന ബെഞ്ചിന് വിട്ട് കൊണ്ട് ജസ്റ്റിസ് ദീപക് മിശ്രയുടെ അധ്യക്ഷതയില്‍ ഉള്ള ബെഞ്ച് ഉത്തരവ് പുറപ്പടുവിച്ചതു്. ഭരണഘടന ബെഞ്ച് പരിഗണിക്കേണ്ട വിഷയങ്ങള്‍ക്കും ചീഫ് ജസ്റ്റിസ് അധ്യക്ഷനായ ബെഞ്ച് രൂപം നല്‍കി. തുടര്‍ന്നു്  2018 ജൂലൈ 17നു് തുടങ്ങിയ വാദങ്ങള്‍ക്കൊടുവില്‍ 2018 സെപ്റ്റംബര്‍ 28-നായിരുന്നു ശബരിമല കേസിലെ സുപ്രീം കോടതിയുടെ ഭരണഘടന ബെഞ്ചിലെ ചരിത്രപ്രധാനമായ വിധി. വിരമിക്കുന്നതിനു വെറും മൂന്നു ദിവസം മാത്രം ബാക്കി അവശേഷിക്കേ ചീഫ് ജസ്റ്റിസ് ദീപക്‍ മിശ്ര പുറപ്പെടുവിച്ച ഈ വിധിയുടെ പശ്ചാത്തലത്തിലായിരിക്കും ഇനി കേരളത്തിലെ ബി.ജെ.പി.യുടെ ഭാവി എന്നു നിസ്സംശയം പറയാം.

വിധിയെത്തുടര്‍ന്നു് പരിവാര്‍ സംഘടനകള്‍ക്കിടയില്‍ ആദ്യം ചില ആശയക്കുഴപ്പങ്ങള്‍ വന്നെങ്കിലും അതിവേഗത്തില്‍ ഈ ഭിന്നത നീക്കാനായി എന്നതു് അവരെ സംബന്ധിച്ചിടത്തോളം ചെറിയൊരു നേട്ടമൊന്നുമല്ല. ശബരിമലവിധി കേരളത്തിന്റെ തലവിധിയാകുമെന്ന ആശങ്ക ഇപ്പോള്‍ത്തന്നെ രാഷ്ട്രീയനിരീക്ഷകര്‍ക്കിടയില്‍ ശക്തമായിക്കഴിഞ്ഞു. കൃത്യമായി ആസുത്രണം ചെയ്തെടുത്ത ഈയൊരു വിധിയുടെ മറവില്‍ കേരളത്തിന്റെ രാഷ്ട്രീയസ്വത്വത്തെത്തന്നെ ഹൈജാക്ക് ചെയ്യുകയാണു് ഫാസിസത്തിന്റെ ഇന്ത്യന്‍ പതിപ്പായ പരിവാര്‍ സംഘടനകള്‍ ശ്രമിക്കുന്നതു്. തത്വത്തില്‍ ഇടതുപക്ഷമൂല്യങ്ങളില്‍ കെട്ടിപ്പടുത്തതാണെങ്കിലും പ്രത്യയശാസ്ത്രം കമ്മ്യൂണിസമാണെങ്കിലും പ്രയുക്തരീതികള്‍ അവയ്ക്കെതിരായ നവമുതലാളിത്തമായതും ചിന്തിക്കുന്ന നേതാക്കള്‍ മന്ത്രിസഭയിലും പാര്‍ട്ടിയിലും ഇല്ലാത്തതും കേരളത്തില്‍ സി.പി.എമ്മിനു് തിരിച്ചടിയാണു്. അവര്‍ വിഷയത്തെ നയപരമായി സമീപിക്കുന്നതില്‍ മത്സരിച്ചു വീഴ്ച വരുത്തിക്കൊണ്ടേയിരിക്കുകയാണു്.  അതേ സമയം ചാണക്യതന്ത്രങ്ങള്‍ മെനയാന്‍ പരിവാര്‍ സംഘടനകളില്‍ അനവധി ബുദ്ധികേന്ദ്രങ്ങളുണ്ടു്. തങ്ങളുടെ അജണ്ട നടപ്പിലാക്കാന്‍ അവര്‍ക്കു കൃത്യമായ പദ്ധതികളുമുണ്ടു്. കേരളത്തിലെ കോണ്‍ഗ്രസ് അനുകൂല പാര്‍ട്ടികള്‍ പണ്ടേ തങ്ങള്‍ ഫാസിസത്തിന്റേ കുഴലൂത്തുകാരാണെന്നു് പലവട്ടം പുരപ്പുറത്തുനിന്നു വിളിച്ചു കൂവിയിട്ടുള്ളവരായതിനാല്‍ അവര്‍ ഈ നീക്കങ്ങളില്‍ ബി.ജെ.പിയുടെ ബാറ്റിംഗ് പാര്‍ട്ട്ണറായി സപ്പോര്‍ട്ട് ചെയ്തു സമര്‍ത്ഥമായി കളിക്കുകയേ ചെയ്യൂ.

ലിംഗസമത്വമൊക്കെ നല്ലതുതന്നെ, പക്ഷേ, മതം മനുഷ്യനെ മയക്കുന്ന കറപ്പാണെന്നു് കണ്ടെത്തിയ അതേ പാര്‍ട്ടിയ്ക്കു് ഈ വിഷയത്തില്‍ എന്തെങ്കിലും ഒരു നിലപാടെടുക്കേണ്ട കാര്യമുണ്ടോ? സത്യത്തില്‍ അതവരുടെ കാര്യമേയല്ല. സ്ത്രീകള്‍ മാത്രമല്ല പുരുഷന്മാര്‍ കൂടി ശബരിമലയില്‍ കയറാതിരിക്കുമെങ്കില്‍ അതാണുനല്ലതു് എന്ന ഒരു നിലപാടായിരുന്നെങ്കില്‍ അതവരുടെ പ്രത്യയശാസ്ത്രത്തിനനുകൂലമെങ്കിലുമായേനെ 😁 കുറഞ്ഞപക്ഷം ഈ സ്ത്രീകളെങ്കിലും മതാചാരാനുഷ്ഠാനമെന്ന കറപ്പില്‍ നിന്നു് അകലം പാലിക്കാന്‍ ഇങ്ങനൊരു വിവേചനം കൊണ്ടു് സാധ്യമായിരുന്നു എന്നൊരു നേട്ടവും അതില്‍ കണ്ടെത്താം. പിന്നെ മറ്റൊരു കാര്യമുള്ളതു് സ്ത്രീകള്‍ക്കു കൂടി ദര്‍ശനം സാധ്യമാകുന്ന അവസ്ഥവന്നാല്‍ ഭക്തി വ്യവസായമെന്ന നിലയില്‍ അതു് ശബരിമലയ്ക്കു് നേട്ടം തന്നെയാണു് – ദേവസ്വം ബോര്‍ഡിന്റെ വരുമാനം ഇരട്ടിയിലേറെയാക്കാം. ഒരു പക്ഷേ അതാകുമോ സീപീയെമ്മിന്റെ ചിന്ത? 😁 പരിവാരസംഘങ്ങള്‍ ഈ വിഷയമെടുത്തു് രാഷ്ട്രീയമായി ഉപയോഗിക്കുമ്പോള്‍ കൈയ്യും കെട്ടി നോക്കിനില്‍ക്കാന്‍ സീപീയെമ്മിനാവില്ല, എങ്ങാനും അവരിതു് മുതലെടുത്താലോ എന്നൊരു ഭയാശങ്ക, ആ നിരര്‍ത്ഥകഭയാശങ്ക കൊണ്ടുതന്നെയാവണം അധികാര അത്യാര്‍ത്തി ഒടുങ്ങാത്ത ഈ നവമുതലാളിത്തപാര്‍ട്ടി ഈ വിഷയത്തില്‍ ഇങ്ങനെ ഒരു രാഷ്ട്രീയ അവിവേകം കാണിക്കാന്‍ കാരണം എന്നു് ന്യായമായും നമുക്കു് സംശയിക്കാം. തല കൊയ്യുന്ന കൊള്ളസംഘത്തിനേക്കാള്‍ നല്ലതു് പിടിച്ചുപറിക്കാരനായ മോഷ്ടാവു തന്നെയായിരിക്കും, അതിനാല്‍ എന്തുകൊണ്ടും ഈ ബുദ്ധിശൂന്യസമരത്തില്‍ സീപീയെം തന്നെ ജയിക്കട്ടെ എന്നാണു് ഇപ്പോള്‍ കേരളം പ്രാര്‍ത്ഥിക്കുന്നതും. ഒപ്പം ചിന്ത പേരിലല്ലാതെ തലയ്ക്കകത്തു് ചിന്തയുള്ള ഏതെങ്കിലും ഒരു നേതാവു് ഈ പാര്‍ട്ടിയില്‍ പിറവിയെടുക്കട്ടെ എന്നും കേരളം ശബരീശനോടു പ്രാര്‍ത്ഥിക്കുന്നു.

ഒന്നുറപ്പാണു് – ശബരിമല വിധി കൊണ്ടു് എത്രയേറെ രാഷ്ട്രീയലാഭം ആര്‍ക്കുണ്ടാക്കാന്‍ കഴിയുമോ അതിന്റെ നാലിരട്ടി ഇതിനകം പരിവാര്‍ രാഷ്ട്രീയം കൊയ്തെടുത്തു കഴിഞ്ഞു. ഇനി ഇതിലൊന്നും വീഴാതെ കേരളത്തിലെ വോട്ടര്‍മാര്‍ ഫാസിസത്തിനെതിരേ വിധിയെഴുതിയാല്‍ അപ്പോള്‍ നമുക്കു് വീണ്ടും കേരളത്തെ പ്രബുദ്ധകേരളം എന്നു വീണ്ടും വിശേഷിപ്പിക്കാം. അതുവരെ ഭാരതം കണ്ടതില്‍ ഏറ്റവും മഹാനായ ഗുരുവായ വിവേകാനന്ദ സ്വാമികള്‍ വിശേഷിപ്പിച്ചതുപോലെ കേരളത്തെ നമുക്കു് ഒരു ഭ്രാന്താലയമായി കാണാം. ജാതിഭേദവും മതദ്വേഷവും ലിംഗവിവേചനവും കലര്‍പ്പില്ലാതെ കാണുന്ന മോസ്റ്റ് മോഡേണ്‍ ശിലായുഗപരമ്പര വസിക്കുമിടമായി ലോകത്തിനു മുമ്പില്‍ ചില്ലിട്ടു സൂക്ഷിക്കാം.

മാമോനെ ആരാധിക്കുന്ന ക്രൈസ്തവസഭ

രണ്ടു യജമാനന്മാരെ സേവിപ്പാൻ ആർക്കുംകഴികയില്ല; അങ്ങനെ ചെയ്താൽ ഒരുത്തനെ പകെച്ചു മറ്റവനെ സ്നേഹിക്കും; അല്ലെങ്കിൽ ഒരുത്തനോടു പറ്റിച്ചേർന്നു മറ്റവനെ നിരസിക്കും; നിങ്ങൾക്കു ദൈവത്തെയും മാമോനെയും സേവിപ്പാൻ കഴികയില്ല.

വി. മത്തായി 6:24

ബൈബിളില്‍ അങ്ങനെ പലതുമൊക്കെ എഴുതിവച്ചിട്ടുണ്ടു്. 70 സി.ഇ. യിലോ മറ്റോ എഴുതപ്പെട്ട ഒരു ഗ്രന്ഥമാണു് വി. മത്തായിയുടെ സുവിശേഷം. അദ്ദേഹം ജീവിച്ചിരുന്ന കാലഘട്ടത്തില്‍ ദൈവത്തെയും മാമോനെയും ഒരുമിച്ചു സേവിക്കാന്‍ ഒരു പക്ഷേ കഴിയുമായിരുന്നില്ല. എന്നാലിന്നു് കേരളത്തിലെ ക്രൈസ്തവസഭകളുടെ കാര്യം എടുത്താല്‍ ദൈവപുത്രനായ ക്രിസ്തുവിന്റെ പേരു പറഞ്ഞു് മാമോനെ ആരാധിക്കുന്ന നികൃഷ്ടസഭയായി ക്രൈസ്തവസഭകളൊന്നാകെ മാറിയിരിക്കുന്നു. എറണാകുളം – അങ്കമാലി മേജര്‍ അതിരൂപതയുടെ ആര്‍ച്ച് ബിഷപ്പും ആഗോള സിറോ മലബാര്‍ സഭയുടെ തലവനുമായ ജോര്‍ജ്ജ് ആലഞ്ചേരി സഭയുടെ സ്വത്തുക്കള്‍ വിറ്റു് പണം മറിച്ചുകൊണ്ടാണു് മാമോന്‍ ആരാധനാ പ്രസ്ഥാനത്തിനു് തുടക്കമിട്ടതു്. ഈ തുടക്കം ഗംഭീരമായിരുന്നുവെന്നു പറയാതെവയ്യ.

ആര്‍ച്ച് ബിഷപ്പ് ജോര്‍ജ്ജ് ആലഞ്ചേരി

ആത്മീയമായ നേട്ടങ്ങളേക്കാള്‍ ഏതു വിധേനയും ഭൗതികമായ നേട്ടങ്ങള്‍ക്കു് പ്രാധാന്യം നല്‍കാന്‍ സഭാനേതൃത്വം വിശ്വാസികള്‍ക്കു് ഇതുവഴി മാതൃകകള്‍ നല്‍കിക്കഴിഞ്ഞു. ഓര്‍ത്തഡോക്സ് സഭയില്‍ (സഭാതര്‍ക്കത്തിലെ മെത്രാന്‍കക്ഷികള്‍) പെട്ട ചില അതിഭൗതികവാദികളായ വൈദികരാണു് ഒരു വിശ്വാസിയുടെ കുമ്പസാരരഹസ്യം പരസ്യമാക്കുമെന്നു് പറഞ്ഞു് ഭീഷണിപ്പെടുത്തി 3 വര്‍ഷക്കാലം അവരുമായി ബലാല്‍സംഗത്തിനു് തുല്യമാകുന്ന രീതിയിലുള്ള അവിഹിതലൈംഗികബന്ധത്തില്‍ ഏര്‍പ്പെട്ടുകൊണ്ടിരുന്നതു്. ഫാ. എബ്രഹാം വര്‍ഗീസ്, ഫാ.ജെയ്‌സ് കെ ജോര്‍ജ്, ഫാ. ജോബ് മാത്യു എന്നിവരാണു് മാമോന്റെ ആ ധീരപടയാളികള്‍. (പ്രസ്തുതവിഷയത്തില്‍ സഭാനേതൃത്വം നടത്തുന്ന അന്വേഷണം തുടങ്ങിയിട്ടു കുറേക്കാലമായി, പക്ഷേ ഇതുവരെ തെളിവൊന്നും കിട്ടിയിട്ടില്ലത്രേ. പക്ഷേ ലോക്കല്‍ പോലീസിനു് തെളിവുകള്‍ ലഭിക്കുകയും ഇവരില്‍ പെട്ട ഒരു വൈദികന്‍ ചോദ്യം ചെയ്യലിനായി അഴിക്കുള്ളിലാകുകയും ചെയ്തു.) തൊട്ടുപിന്നാലെ വന്നു ജലന്ധര്‍ രൂപതയുടെ മെത്രാന്‍ ഫ്രാങ്കോ മുളയ്ക്കല്‍ ഒരു കന്യാസ്ത്രീയെ വര്‍ഷങ്ങളോളം പ്രകൃതിവിരുദ്ധ ലൈംഗികബന്ധമുള്‍പ്പെടെയുള്ള ലൈംഗികകേളികള്‍ നിര്‍ബന്ധിപ്പിച്ചു ചെയ്യിപ്പിച്ചിരുന്നതായി കന്യാസ്ത്രീ തന്നെ മൊഴി നല്‍കിയതു്. (മെത്രാനു് കേന്ദ്രം ഭരിക്കുന്ന പാര്‍ട്ടിയില്‍ നല്ല പിടിയായതിനാല്‍ ഇതുവരെ മുന്‍കൂര്‍ ജാമ്യഹര്‍ജി പോലും നല്കിയിട്ടില്ല)

ജലന്ധര്‍ രൂപതാധിപനായ ബിഷപ്പ് ഫ്രാങ്കോ മുളയ്ക്കല്‍

ഇനി ഓഷോ രജനീഷ് പണ്ടു പറഞ്ഞ ഒരു ഫലിതം ഇവിടെ കുറിക്കട്ടെ.

ദരിദ്രയായിരുന്ന സാറയുമായി സമ്പന്നനും കുലീനനുമായ യോഹന്നാന്റെ മകന്‍ ജോസഫ് പ്രണയത്തിലായി. ഇരുവീട്ടുകാരുടേയും കടുത്ത എതിര്‍പ്പുകളെല്ലാം അതിജീവിച്ചു് ഒടുവില്‍ അവര്‍ക്കു് തമ്മില്‍ വിവാഹം കഴിക്കാന്‍ വീട്ടുകാരുടെ അനുമതി ലഭിച്ചു. പക്ഷേ വിവാഹത്തിന്റെ തലേന്നു സംഭവിച്ച ഒരപകടത്തില്‍ ജോസഫ് മരിച്ചു. ആ ആഘാതം സഹിയാതെ വൈകാതെ സാറയും മരിച്ചു. ഈ യുവമിഥുനങ്ങള്‍ ഒടുവില്‍ സ്വര്‍ഗ്ഗത്തില്‍ വച്ചു വീണ്ടും കണ്ടുമുട്ടി. പ്രണയം വീണ്ടും പൂത്തുതളിര്‍ത്തു. അവിടെയാരും അവരെ എതിര്‍ക്കാനുണ്ടായിരുന്നില്ല. ഒരു ദിവസം സായാഹ്നത്തില്‍ അവര്‍ ഉദ്യാനത്തിലൂടെ ഉലാത്തുന്ന സാക്ഷാല്‍ ദൈവത്തെ കണ്ടു. അദ്ദേഹത്തോടു് അവര്‍ ഭൂമിയില്‍ വച്ചു് തങ്ങള്‍ എത്രത്തോളം പ്രണയബദ്ധരായിരുന്നുവെന്നും വിവാഹത്തലേന്നു് തനിക്കു സംഭവിച്ച അപകടമരണത്തെപ്പറ്റിയുമൊക്കെ ആമുഖമായി പറഞ്ഞതിനുശേഷം തങ്ങളുടെ യഥാര്‍ത്ഥഇംഗിതം അറിയിച്ചു. “ഭൂമിയില്‍ വച്ചു നടക്കാതെ പോയ തങ്ങളുടെ വിവാഹം സ്വര്‍ഗ്ഗത്തില്‍ വച്ചു് നടത്തിത്തരണം.”

നീണ്ട ദീക്ഷ ഉഴിഞ്ഞു ദൈവം പറഞ്ഞു – “ആലോചിക്കാം.”

ദിവസങ്ങള്‍ ഏറെക്കഴിഞ്ഞു നമ്മുടെ യുവമിഥുനങ്ങള്‍ കാത്തിരിപ്പുതുടര്‍ന്നു. ദൈവത്തിനെയാണെങ്കില്‍ ഒരിടത്തും കാണുന്നുമില്ല, തിരക്കായിരിക്കും എന്നവര്‍ സമാധാനിച്ചു. ഭൂമിയില്‍ ജീവിച്ചിരിക്കുന്ന കോടിക്കണക്കിനു പേരുടേയും മരിച്ചു സ്വര്‍ഗ്ഗത്തിലെത്തിയ അനേകം പേരുടേയും ചുമതലയുള്ള ആളല്ലേ, തിരക്കു കാണും എന്നവര്‍ സമാധാനിച്ചു. പക്ഷേ പിന്നീടു് അവരെ കാണുമ്പോഴെല്ലാം ദൈവം ഒഴിഞ്ഞുമാറുന്നതായി അവര്‍ക്കു തോന്നിത്തുടങ്ങി. തോന്നല്‍ ശരിയാണെന്നു അവര്‍ക്കു് ഒടുവില്‍ ബോധ്യമായി. ഒടുവില്‍ ഒരു ദിവസം ഒഴിഞ്ഞുമാറാന്‍ അദ്ദേഹത്തിനു കഴിയുംമുമ്പ് അവര്‍ അടുത്തുചെന്നു ചോദിച്ചു – “അങ്ങു് ഇതുവരെ ഒരുത്തരം തന്നില്ലല്ലോ.” മന്ദസ്മിതത്തോടെ ദൈവം മൊഴിഞ്ഞു, “കുഞ്ഞുങ്ങളേ, ഭൂമിയില്‍ വച്ചു് നിങ്ങള്‍ക്കു് വിവാഹം കൂദാശ ചെയ്യുന്നതിനു് സാധാരണ ഒരു വൈദികന്‍ മാത്രം മതിയായിരുന്നു. പക്ഷേ ഇവിടെ സ്വര്‍ഗ്ഗത്തിലെ നിയമമനുസരിച്ചു് ഇവിടെ ഒരു വിവാഹം കൂദാശ ചെയ്യുവാന്‍ ചുരുങ്ങിയതു് ഒരു മെത്രാനെങ്കിലും വേണം. പക്ഷേ ഇന്നുവരെ അങ്ങനെയൊരാള്‍ ഇവിടെ വന്നെത്തിയിട്ടില്ല. അങ്ങനെയൊരു മെത്രാന്‍ ഇവിടെ വന്നെത്തുമ്പോള്‍ മാത്രമേ നിങ്ങളുടെ വിവാഹം ഇവിടെവച്ചു നടത്താന്‍ കഴിയൂ.”

സമീപകാല സംഭവങ്ങള്‍ വച്ചു നോക്കുമ്പോള്‍ മേല്പറഞ്ഞ സ്വര്‍ഗ്ഗീയ യുവമിഥുനങ്ങളുടെ ആശ ഒരുകാലത്തും സഫലമാവില്ല എന്നു കരുതാം, അല്ലേ.

ക്രൈസ്തവസഭയ്ക്കുള്ളിലെ മാമോന്‍ ആരാധനയുടെ തെളിവുകളാണു് ഇന്നു കാണുന്ന ഈ വാര്‍ത്തകള്‍ക്കു പിന്നില്‍ നിഴലിക്കുന്നതു്. ഒരുപക്ഷേ, ഇതിലും ഭേദമായിരിക്കും ആന്റണ്‍ ലവായേ സ്ഥാപിച്ച ചര്‍ച്ച് ഓഫ് സേറ്റന്‍ അഥവാ ചെകുത്താന്റെ സഭ. അവര്‍ ചുരുങ്ങിയതു് തങ്ങള്‍ ആരാധിക്കുന്നതു് ചെകുത്താനെയാണെന്നു തുറന്നുപറയുകയെങ്കിലും ചെയ്യുന്നുണ്ടു്. ഇവിടെയാകട്ടെ ക്രിസ്തുവിന്റെ പേരു പറഞ്ഞാണു് നരകാധിപനായ ലൂസിഫറെയും സമ്പത്തിന്റെ ദേവതയായ മാമോനെയും ഇവര്‍ ആരാധിക്കുന്നതു്. ക്രൈസ്തവസഭയിലെ പാവം വിശ്വാസസമൂഹവും നേതാക്കള്‍ ചെയ്യുന്നതിനനുസൃതമായി ഇതേ മാമോന്‍ ആരാധന തങ്ങളുടെ ദേവാലയങ്ങളില്‍ അനുഷ്ഠിച്ചു വരുന്നു. വിഭവസമൃദ്ധമായ ഊട്ടുസദ്യകള്‍. ആര്‍ഭാടപൂര്‍ണ്ണമായ പെരുന്നാളുകള്‍, സാധുജനക്ഷേമ പ്രവര്‍ത്തനങ്ങളുടെ അഭാവം, ആശുപത്രിക്കച്ചവടം, വിദ്യാഭ്യാസക്കച്ചവടം, തൊട്ടതിനും പിടിച്ചതിനും പിരിവുകള്‍, കോടിക്കണക്കിനു രൂപ സ്വരൂപിച്ചു് ആഡംബരപ്പള്ളി പണിയല്‍, വര്‍ഗ്ഗീയത വളര്‍ത്തല്‍ അങ്ങനെയങ്ങനെ പോകുന്നു ക്രൈസ്തവസമൂഹം നടത്തുന്ന മാമോന്‍ ആരാധനകളുടെ ചിത്രഗീതം. രണ്ടാം ലോകമഹായുദ്ധകാലത്തു് ഹിറ്റ്ലറിന്റെ കൈയ്യില്‍ നിന്നു കനത്ത കാശുവാങ്ങി അയാള്‍ നടത്തിയ ജൂതഉന്മൂലനങ്ങള്‍ക്കെതിരെ ഒരക്ഷരം പോലും മിണ്ടാതിരുന്ന ചരിത്രമുള്ള കത്തോലിക്കാസഭയുടെ ഉന്നതകേന്ദ്രങ്ങളില്‍ നിന്നും ഇതിനെതിരേ എന്തു നടപടി പ്രതീക്ഷിക്കാം? അറിയില്ല.

അവലംബം

മേല്പറഞ്ഞ പോസ്റ്റിനാധാരമായ വാര്‍ത്തകള്‍ പേസ്റ്റ്ബിന്‍ നോട്ടായി ഇവിടെ കൊടുത്തിരിക്കുന്നു.

സച്ചിദാനന്ദന്റെ മരങ്കൊത്തി

പണ്ടെന്നോ വായിച്ച ആശുപത്രി എന്ന സച്ചിദാനന്ദന്റെ കവിതയെ അടിസ്ഥാനപ്പെടുത്തി പണ്ടുമുതലേ മനസ്സിലൂണ്ടായുരുന്നൊരു സ്പൂഫാണിതു്. ആശുപത്രി വായിക്കുവാന്‍ കിളിയുടെ പടത്തിനു മീതെ ക്ലിക്ക് ചെയ്താല്‍ മതി.

നേരം ഇരുട്ടാറായപ്പോള്‍
സച്ചിദാനന്ദന്റെ കഥയിലെ മരങ്കൊത്തി
ക്ഷീണിതനായി കൂടണഞ്ഞു.
പ്രിയതമ അവനെയും കാത്തു്
കൂട്ടില്‍ത്തന്നെ ഉണ്ടായിരുന്നു.
പിന്നീടു് അത്താഴമുണ്ണുന്ന വേളയില്‍
അവളാണു് മൗനം ഭേദിച്ചതു്.

ആ മരം കണ്ടെത്തിയോ?

ഒരു ദാര്‍ശനികന്റെ ഗാഭീര്യത്തോടെ
സന്ന്യാസിയുടെ നിര്‍മ്മമതയോടെ
കഥയിലെ മരങ്കൊത്തി പറഞ്ഞുതുടങ്ങി

ഈ കോര്‍പ്പറേറ്റ് കാടുകളില്‍ വളരുന്ന
ഉരുക്കുമരങ്ങള്‍ നമ്മുടെ
ബലഹീനമായ കൊക്കുകള്‍ക്കു്
തൂളയ്ക്കുവാനാവില്ല.
മാത്രമല്ല, അവയൊന്നും
ജലോപരിതലത്തില്‍
പൊങ്ങുതടിപോലെ
കിടക്കുന്നവയുമല്ല.
മുങ്ങാത്ത കപ്പലിനു പറ്റിയ
മരങ്ങളൊന്നും തന്നെ
ഇനി ഒരു കാട്ടിലും
ബാക്കിയുണ്ടാവില്ലെന്നു്
ഞാന്‍ കരുതുന്നു,

എന്നു പറഞ്ഞവസാനിപ്പിച്ചു്
കഥയിലെ മരങ്കൊത്തി
ഉറങ്ങാന്‍ കിടന്നു.