ആഗ്രഹമുണ്ടോ കരയാന്‍?

കരയാന്‍ ആഗ്രഹമുള്ളതാര്‍ക്കാണു്? എന്നിട്ടും ഈ ചോദ്യം ലോകത്തില്‍ ഇക്കഴിഞ്ഞകുറേ ദിവസങ്ങളായി മുഴങ്ങിക്കേള്‍ക്കുന്നു. കരഞ്ഞുപോകാന്‍ തോന്നുന്ന സങ്കടകരമായ സാഹചര്യമൊരുക്കിക്കൊണ്ട് ചില സൈബര്‍ കുറ്റവാളികളാണു് ഈ ചോദ്യം മുഴക്കുന്നതു്. കോര്‍പ്പറേറ്റ് / സര്‍ക്കാര്‍ ലോകം മാത്രമല്ല, പാവം വ്യക്തിഗത കമ്പ്യൂട്ടര്‍ ഉപയോക്താക്കള്‍ വരെ ആരുമറിയാതെ കരഞ്ഞുപോയി, നഷ്ടപ്പെട്ട തങ്ങളുടെ വിലപ്പെട്ട ചിത്രങ്ങളോര്‍ത്തു്, പ്രമാണങ്ങളോര്‍ത്തു് അവര്‍ കരഞ്ഞു. വാനക്രൈ പലതും തകര്‍ത്തു. ഡാറ്റയെ ബന്ദികളാക്കി തകര്‍ത്തതു മാത്രമല്ല, ഒരൊറ്റ ആന്റിവൈറസ് ഇന്‍സ്റ്റാള്‍ ചെയ്താല്‍ നമ്മുടെ കമ്പ്യൂട്ടര്‍ സുരക്ഷിതമാണെന്നുള്ള സാധാരണക്കാരന്റെ വിശ്വാസവും ജഗന്നാഥരഥം പോലെ അവന്‍ ചതച്ചരച്ചുകളഞ്ഞു. ഒരുതരത്തിലും വീണ്ടടുക്കുവാനാവാത്ത വിധം വാനക്രൈ ‍ഡാറ്റയെ തരിപ്പണമാക്കി

വാനക്രൈ റാന്‍സംവെയര്‍

മൈക്രോസോഫ്റ്റ് വിന്‍ഡോസ് ഓപ്പറേറ്റിംഗ് സിസ്റ്റത്തിലൂടെയാണു് വാനക്രൈ ഉള്‍പ്പെടെയുള്ള റാന്‍സം വെയറുകള്‍ നമ്മുടെ കമ്പ്യു‍ട്ടറുകള്‍ക്കുള്ളില്‍ പ്രവേശിച്ചു് ഡാറ്റ മുഴുവനും നാശം വിതയ്ക്കുന്നതു്. റാന്‍സംവെയറുകള്‍ വിന്‍ഡാസിനെ മാത്രം ടാര്‍ഗെറ്റ് ചെയ്യാന്‍ ഒന്നിലധികം കാരണങ്ങളുണ്ടു്. സിസ്റ്റം സെക്യുരിറ്റിയെപ്പറ്റി ലവലേശം ബോധമില്ലാതെ പെരുമാറുന്ന ശരാശരി വിന്‍‍ഡോസ് ഉപയോക്താവിന്റെ നിരുത്തരവാദിത്വപരമായ സമീപനമാണു് ഏറ്റവും പ്രധാനകാരണം. ഇതൊരൊഴുക്കന്‍മട്ടിലൂള്ള കുറ്റപ്പെടുത്തലല്ല, സൂക്ഷ്മനിരീക്ഷണത്തില്‍ മിക്കവാറും എല്ലാ വിന്‍ഡോസ് യൂസര്‍മാരും ഈയൊരു പെരുമാറ്റവൈകല്യം പ്രകടിപ്പിക്കുന്നതായി കാണാം. ഒരു ‍ഡയലോഗ് ബോക്സ് തെളിഞ്ഞുവന്നാല്‍, അല്ലെങ്കിലൊരു വാണിംഗ് സന്ദേശം പ്രത്യക്ഷപ്പെട്ടാല്‍ അതിലെന്താണെഴുതിയിരിക്കുന്നതെന്നു മനസ്സിലാക്കാന്‍ ശ്രമിക്കാതെ “OK” എന്നോ “Next” എന്നോ “Yes” എന്നോ “No” ഉള്ള ബട്ടണുകളില്‍ കണ്ണും പൂട്ടി ക്ലിക്ക് ചെയ്യുന്നവരാണു് മിക്കവാറും എല്ലാ വിന്‍ഡോസ് യുസര്‍മാരും. “ആയിരം കണ്ണുമായ്.mp3” എന്ന ഫയലായിരിക്കും ടൊറന്റില്‍ സേര്‍ച്ച് ചെയ്യുക, കിട്ടിയതാകട്ടെ “ആയിരം കണ്ണുമായ്.exe” എന്ന ഫയലും. ഡൗണ്‍ലോഡ് ചെയ്യലും കഴിഞ്ഞു തുറക്കലും കഴിഞ്ഞു, കിട്ടേണ്ട പണി കിട്ടിക്കഴി‍ഞ്ഞെന്ന യാഥാര്‍ത്ഥ്യം മനസ്സിലാക്കാന്‍ ഇനിയൊരല്‍‍പനേരം കാത്തിരുന്നാല്‍ മതി. ഈ പെരുമാറ്റവൈകല്യം വിന്‍ഡോസിനൊപ്പം വിലകൊടുക്കാതെ ലഭിക്കുന്ന സംസ്കാരവൈകൃതമാണു്. ഇത്തരം ഒരു ആറ്റിറ്റ്യൂഡ് മാറ്റിയാല്‍ത്തന്നെ 90 ശതമാനം പ്രശ്നങ്ങളും ഒഴിവായിക്കി‍ട്ടും.

മറ്റൊരു കാരണം, വിന്‍ഡോസിന്റെ അത്യുദാരമായ യൂസര്‍പോളിസിയാണു്. അഡ്മിനിസ്ട്രേറ്റീവ് യൂസര്‍ക്കു് പാസ്വേഡ് നിര്‍ബന്ധമില്ല, അതുപയോഗിച്ചു ആര്‍ക്കെന്തു തോന്നിയവാസം ചെയ്യാനും ഒരു തടസ്സവുമില്ല. മിക്കവാറും എല്ലാ വിന്‍ഡോസ് ഉപയോക്താക്കളും ഇന്റര്‍നെറ്റില്‍ കയറി മേയുന്നതു് ഈ അഡ്മിന്‍ അക്കൗണ്ടുപയോഗിച്ചായിരിക്കും.

എന്റെ കമ്പ്യൂട്ടറില്‍ ഞാനൊരു കിടിലന്‍ ആന്റിവൈറസ് പ്രോഗ്രാം ഇന്‍സ്റ്റാള്‍ ചെയ്തിട്ടുണ്ട്, അതിനാല്‍ ഇനി എനിക്കൊന്നും പേടിക്കാനില്ല എന്നൊരു ചിന്ത മിക്കവാറും എല്ലാ വിന്‍ഡോസ് ഉപയോക്താക്കള്‍ക്കും ഉള്ളതാണു്. ഒരു ആന്റിവൈറസ് പ്രോഗ്രാമുകളും വിന്‍ഡോസിനു് പരിപൂര്‍ണ്ണസംരക്ഷണം നല്‍കില്ല. വ്യക്തിഗതവിവരങ്ങളും ബാങ്കിംഗ് വിവരങ്ങളുമൊക്കെ ഉപയോക്താവറിയാതെ ചോര്‍ത്തിനല്‍കിയും, ബാന്‍ഡ്‍വിഡ്ത് മോഷ്ടിച്ചു് ആഡ്‍വെയറുകള്‍ കടത്തിവിട്ടും മറ്റും തരികിട കാണിച്ചിരുന്ന മാല്‍വെയറുകള്‍ തങ്ങളുടെ മാരകമായ സംഹാരശക്തി പ്രകടിപ്പിച്ചതു് റാന്‍സംവെയര്‍ രൂപത്തിലാണു്. കമ്പ്യൂട്ടറിനകത്തുള്ള ഡാറ്റ മുഴുവനും ഉപയോഗശൂന്യമാവുക എന്നു വച്ചാല്‍ ചിലരെ സംബന്ധിച്ചിടത്തോളം ജീവിതം തന്നെ ഇല്ലാതാവുക എന്നതാണു്. പരിചയമുള്ള ഒരു ഡാറ്റ റിക്കവറി വിദഗ്ദ്ധന്റെയടുത്തു് ഈയിടെ ഒരു പ്രൊഫഷണല്‍ ഫോട്ടോഗ്രാഫര്‍ എത്തി, ഏതാനും ദിവസം മുമ്പെടുത്ത തന്‍റയൊരു കക്ഷിയുടെ വിവാഹഫോട്ടോകളടക്കമാണു് റാന്‍സം ചെയ്യപ്പെട്ടതു്. അതിലൊന്നു പോലും റിക്കവര്‍ ചെയ്യാനാകില്ല എന്നറിഞ്ഞപ്പോള്‍ അദ്ദേഹം തകര്‍ന്നുപോയി.

വിന്‍ഡോസിനൊപ്പം വരുന്ന എസ്.എം.ബി. (Server Message Block) എന്ന പ്രോട്ടോക്കോളിലെ പഴുതാണു് Cerber, Wannacry തുടങ്ങിയ റാന്‍സംവെയറുകള്‍ക്കു് വഴിയൊരുക്കുന്നതു്. ഇമെയില്‍ അറ്റാച്ച്മെന്റ് ആയോ, ടൊറന്റ് ഫയലുകള്‍ക്കൊപ്പം ഡൗണ്‍ലോഡ് ചെയ്യാന്‍ നിര്‍ദ്ദേശിക്കുന്ന ഫയലുകളായോ റാന്‍സംവെയര്‍ കടന്നുവരാം. അതോണ്ടു് ഇമെയില്‍ അറ്റാച്ച്മെന്റുകള്‍ തുറക്കുമ്പോള്‍ കരുതിയിരിക്കുക. ടോറന്റില്‍ നിന്നു ഫയല്‍ ഡൗണ്‍ലോഡ് ചെയ്യുമ്പോള്‍ സൂക്ഷിക്കുക. ജാഗ്രതൈ!

പ്രതിരോധം

ജാഗ്രതയോടെയിരിക്കുക. ഒന്നു റിലാക്സ് ചെയ്യണമെന്നുണ്ടെങ്കില്‍ വിന്‍ഡോസിനു പകരം കുറേക്കൂടി സുരക്ഷിതമായ ഗ്നൂ/ലിനക്സ് ഇന്‍സ്റ്റാള്‍ ചെയ്യുക. കരയാതിരിക്കുക. മനസ്സുതുറന്നു ചിരിക്കുക. ദാറ്റ്സാള്‍. ടണ്‍ടഡൈ.

ഓണ്‍ലൈൻ പ്രൈവസി മോണോമാനിയ

ഇക്കഴിഞ്ഞ ഏതാനും ദിവസങ്ങൾ ടെയിൽസ് ഓപ്പറേറ്റിംഗ് സിസ്റ്റത്തിലൂടെയായിരുന്നു കടന്നു പോയത്. ഓണ്‍ലൈൻ പ്രൈവസി എന്ന ആശയത്തിൽ മോണോമാനിയ ബാധിച്ചതു പോലുള്ള ദിവസങ്ങൾ. കുറെയേറെ പുതിയ അറിവുകൾ, പുതിയ വിഹ്വലതകൾ… ആഗോള ഭരണകൂടങ്ങളുടെ ഭീകരമുഖം ഒരു വശത്ത്, ഈ ഭരണകൂടഭീകരതയെ പറ്റി തികച്ചും അജ്ഞരായ നിസ്സഹായരായ പൌരന്മാർ മറുപക്ഷത്ത്. ആശയവിനിമയത്തിനുള്ള നവസാങ്കേതിക വിദ്യകൾ ഭരണകൂടങ്ങൾ കുറഞ്ഞ വിലയ്ക്കു വിൽക്കുന്നു, അതുപയോഗിച്ചു പൌരന്മാർ നടത്തുന്ന ആശയവിനിമയം ഈ ഭരണകൂടങ്ങൾ തന്നെ മൊത്തമായി ചോർത്തുന്നു, ഇതിനെ ചെറ്റപൊക്കിത്തരം എന്നല്ലാതെ എന്തു വിളിക്കണം? A bloody peeping government. (ഒരു സംഭവം ഓർക്കുന്നു, പണ്ട് നമ്മുടെ നാട്ടിലൊരു ഹോട്ടലുണ്ടായിരുന്നു, പേരൊന്നും അറിയില്ല – പറഞ്ഞു കേട്ട കഥയാണ് : വിവാഹം കഴിഞ്ഞ് ഹണിമൂണ്‍ ആഘോഷിക്കുന്ന നവദമ്പതികൾക്ക് ഈ ആഡംബര ഹോട്ടലിൽ ഏതാണ്ട് സൌജന്യമെന്നോണം മുറി കൊടുക്കും, നിസ്സാര വാടക. നിസ്സാരവിലയ്ക്ക് ഭക്ഷണം. കുറെ പേർ ഈ സൌജന്യം ഉപയോഗപ്പെടുത്തി. കുറച്ചു നാൾ കഴിഞ്ഞപ്പോൾ അവരിൽ പലരുടെയും സെക്സ് ടേപ്പുകൾ വെളിയിൽ വന്നപ്പോൾ മാത്രമാണ് തങ്ങൾ ആ ഹോട്ടൽതാമസത്തിനു നൽകിയ വില എത്രയാണെന്ന് അവർ തിരിച്ചറിഞ്ഞതുതന്നെ.)

ഭരണകൂട ചെറ്റപൊക്കിത്തരങ്ങൾക്കെതിരെയുള്ള മുന്‍കരുതലായാണ് ടെയിൽസ് ഓപ്പറേറ്റിംഗ് സിസ്റ്റത്തെ ഞാൻ കാണുന്നത്. അതുപയോഗിക്കുന്നതിലൂടെ ഇന്റർനെറ്റിന് ഒരു ഇരുമ്പുമറ തീർക്കാം, ഭരണകൂട കങ്കാണികൾ ഒരുക്കുന്ന സർവെയ്ലൻസ് ക്യാമറകളിൽ നിന്ന് സംരക്ഷണം നേടാം. തികച്ചും ആത്മവിശ്വാസത്തോടെ ഇന്റർനെറ്റിൽ എന്തും തിരയാം. വേൾഡ് വൈഡ് വെബ്ബും ഡീപ് വെബ്ബിനകത്ത് ഒളിപ്പിച്ചു വച്ചിരിക്കുന്ന ഡാർക്ക്‌ നെറ്റും അടക്കം എന്തും ബ്രൌസ് ചെയ്യാം. എൻക്രിപ്റ്റ് ചെയ്തു മെയിലുകൾ അയയ്ക്കാം. ആശ്വസിക്കാനുള്ള വക നൽകുന്ന കാര്യങ്ങൾ പലതും ചുറ്റും നടക്കുന്നു. ഈയിടെയായി എൻക്രിപ്ഷൻ എന്ന ആശയത്തിന് വ്യാപകമായ സ്വീകരണം ലഭിക്കുന്നു. പലരും തങ്ങളുടെ പബ്ളിക് കീ പ്രസിദ്ധപ്പെടുത്തുന്നു.

സ്നോഡന്‍ അഴിച്ചു വിട്ട ഭൂതം ഭീതി പരത്താന്‍ തുടങ്ങിയത് ഒരു വര്‍ഷം കഴിഞ്ഞതിനു ശേഷമാണെന്നു തോന്നുന്നു. പല പ്രമുഖപോര്‍ട്ടലുകളിലും ബ്ളോഗുകളിലും ഒക്കെ 2014 ജൂണ്‍ 5 മുതല്‍ പോസ്റ്റുകളുടെ കുത്തൊഴുക്കാണ്. അതിനു കാരണവുമുണ്ട് – ഇന്റര്‍നെറ്റിനോടുള്ള നമ്മുടെ അടിമത്തം ഓരോ വര്‍ഷം ചെല്ലുന്തോറും പതിന്മടങ്ങ് കണ്ട് വര്‍ദ്ധിച്ചു വരികയാണ്. ഒന്നു രണ്ടു കൊല്ലം മുമ്പുവരെ ഡെസ്ക്ടോപ്പ് / ലാപ്ടോപ്പ് കമ്പ്യൂട്ടറുകളില്‍ മാത്രമേ ഇന്റര്‍നെറ്റ് ലഭിച്ചിരുന്നുള്ളൂ. അന്നുണ്ടായിരുന്നതിന്റെ നാലിരട്ടി ഉപയോക്താക്കളാണ് ഇന്ന് സ്മാര്‍ട്ട്ഫോണുകളില്‍ ഇന്റര്‍നെറ്റ് ലോകത്തില്‍ അഭിരമിക്കുന്നത്.

കൂടുതല്‍ കൂടുതല്‍ പേര്‍ ഇന്റര്‍നെറ്റ് ഉപയോഗിക്കാൻ തുടങ്ങിയതോടെ ആഗോള ചാരസംഘടനകള്‍ക്ക് പണി എളുപ്പമായിത്തുടങ്ങി. ഓണ്‍ലൈൻ സാമൂഹ്യ കൂട്ടായ്മകള്‍ സജീവമായതോടെ, അതില്‍ അഭിരമിക്കുന്നവരുടെ എണ്ണം കുതിച്ചുയരാൻ തുടങ്ങിയതോടെ ചാരസംഘടനകള്‍ ആനന്ദലഹരിയില്‍ മുഴുകിയെന്നു വേണം പറയാൻ. ലോകം മുഴുവൻ ശൃംഖലകളുള്ള നിരീക്ഷണ സംവിധാനത്തിന്റെ തുടക്കം അവിടെ നിന്നാണ്.

200 ബില്ല്യണ്‍ ഇ-മെയിലുകളാണ് പ്രതിദിനം ലോകമൊട്ടാകെ അയയ്ക്കപ്പെടുന്നത്. സന്ദേശങ്ങള്‍ അയയ്ക്കാന്‍ ഏറ്റവുമധികം പ്രായോഗികമായ ടൂള്‍ ആണെങ്കിലും ഇമെയില്‍ സന്ദേശങ്ങള്‍ ശ്രദ്ധയോടെ കൈകാര്യം ചെയ്തില്ലെങ്കില്‍ സ്വകാര്യതയുടെ കാര്യത്തില്‍ സന്ധി ചെയ്യപ്പെട്ടേക്കാം. ഇന്റര്‍സെപ്ഷൻ, ഐഡന്റിറ്റി തെഫ്റ്റ്, മോണിറ്ററിംഗ് തുടങ്ങിയ നടപടികള്‍ക്ക് നാമയയ്ക്കുന്ന മെയലുകള്‍ വിധേയമായേക്കാം. അയയ്ക്കപ്പെടുന്ന മെയിലുകളില്‍ ഏതാണ്ട് മിക്കവാറും തന്നെ ആവര്‍ത്തിച്ചുള്ള യന്ത്രവായനകള്‍ക്കും ഒരുപക്ഷേ മനുഷ്യവായനകള്‍ക്കും ശേഷമാകും ഉദ്ദിഷ്ടവ്യക്തിയ്ക്ക് ലഭിക്കുക.

ഇമെയില്‍ അയയ്ക്കാൻ വെബ്ബ് മെയിലിന് പകരം ഇമെയില്‍ ക്ളയന്റ് ഉപയോഗിക്കുക (കഴിയുമെങ്കില്‍ സ്വതന്ത്ര ആപ്ളിക്കേഷൻ ആയ തണ്ടര്‍ബേഡ് / അല്ലെങ്കില്‍ ക്ലോവ്സ് ഉപയോഗിക്കുക), അതില്‍ നിന്നയയ്ക്കുന്ന എല്ലാ മെയിലുകളും എൻക്രിപ്റ്റ് ചെയ്തു് അയയ്ക്കുക, ടോര്‍ ബ്രൗസറിലൂടെ മാത്രം ഇന്റര്‍നെറ്റ് ഉപയോഗിക്കുക – ഇത്രയും കാര്യങ്ങള്‍ മാത്രം ചെയ്താല്‍ പകുതി പ്രശ്നങ്ങള്‍ക്ക് പരിഹാരമാകും. ടെയില്‍സ് പോലെയുള്ള അതീവ സുരക്ഷിതമായ ഓപ്പറേറ്റിംഗ് സിസ്റ്റം ഉപയോഗിക്കുകയാണെങ്കില്‍ ബാക്കി പകുതി കൂടി പരിഹരിക്കാം.

സ്നോഡന്റെ വെളിപ്പെടുത്തലുകളുടെ ഒന്നാം വാര്‍ഷികത്തോടനുബന്ധിച്ച് ഇന്റര്‍നെറ്റ് ഡിഫൻസ് ലീഗ് നടത്തിയ ആഗോള കാംപെയിനിന്റെ ചുവടുപിടിച്ച് ഗൂഗിള്‍ വരെ തങ്ങളുടെ ഇ-മെയില്‍ സര്‍വ്വീസില്‍ എൻക്രിപ്ഷൻ സംവിധാനങ്ങള്‍ അവതരിപ്പിക്കാന്‍ നിര്‍ബന്ധിതരായി. ഇന്റര്‍നെറ്റ് സുരക്ഷയെപ്പറ്റി വളരെമുമ്പേതന്നെ പ്രതിബദ്ധത തെളിയിച്ചിട്ടുള്ള വേഡ്പ്രസ്സ് ആകട്ടെ ഈ വര്‍ഷം മദ്ധ്യത്തോടെ തങ്ങളുടെ എല്ലാ സബ്ബ്ഡൊമൈനുകളിലൂം എസ്.എസ്.എല്‍. ഉറപ്പാക്കുമെന്ന് പ്രഖ്യാപിച്ചു കഴിഞ്ഞു.

ഇതൊക്കെയാണെങ്കിലും 100% സുരക്ഷിതത്വം ഒരു സേവനങ്ങളും ഉറപ്പു നല്‍കുന്നില്ല. ഗൂഗിള്‍ പോലുള്ള കോര്‍പ്പറേറ്റ് ഭീമന്മാര്‍ സൗജന്യമായി നല്‍കുന്ന സേവനങ്ങളെ വിശ്വസിക്കുന്നതിലും അപകടമുണ്ട്. ഇ-മെയില്‍ എൻക്രിപ്റ്റ് ചെയ്യാന്‍ ഉപയോഗിക്കുന്ന പീ.ജീ.പി., ഗ്നൂപീജി കീറിംഗുകളെ പോലും ക്വാണ്ടം സൂപ്പര്‍ കമ്പ്യുട്ടറുകള്‍ ഉപയോഗിച്ച് തകര്‍ക്കാൻ സാദ്ധ്യമാണെന്ന് കരുതപ്പെടുന്നു.

സ്വകാര്യത പണയം വച്ച് ഇന്റർനെറ്റ്‌ ഉപയോഗിക്കേണ്ടതുണ്ടോ?

ചെറിയൊരു മിനിക്കഥ.

പകലും രാവും മുഴുവൻ നീണ്ട കഠിനമായ പണിയായിരുന്നു. അതിസാഹസികമായി സംഘടിപ്പിച്ച രഹസ്യരേഖകൾ അവലോകനം ചെയ്ത് നാൽപ്പതു പേജുള്ള നെടുങ്കൻ റിപ്പോർട്ട് ടൈപ്പ് ചെയ്തു കഴിഞ്ഞപ്പോഴേയ്ക്കും നേരം പുലരാറായി. ന്യൂ ഓർലിയൻസിലെ സുഹൃത്തിന് അത് അതീവ രഹസ്യവിഭാഗത്തിൽപെടുന്ന ഇമെയിൽ സന്ദേശമായി, പഴുതുകൾ അടച്ച ക്രിപ്റ്റോഗ്രാഫിക് പൂട്ടിട്ട് പൂട്ടിക്കൊണ്ട് അയച്ചുകൊടുത്തു. ജോലി ഏൽപ്പിച്ച മാനസിക സമ്മർദ്ദം അകറ്റാൻ രണ്ടുമൂന്ന് കവിൾ തണുത്ത വോഡ്ക ഒറ്റ വീർപ്പിനു തന്നെ അകത്താക്കി. ഇനി തണുത്ത വെള്ളത്തിൽ ഒന്ന് കുളിക്കണം. തികഞ്ഞ ശ്രദ്ധയോടെ കമ്പ്യൂട്ടർ ഷട്ട് ഡൌണ്‍ ചെയ്തു എന്ന് വീണ്ടും ഉറപ്പുവരുത്തിക്കൊണ്ട് അവൾ സ്നാനമുറിയിൽ കയറി. സ്വന്തം വീടിന്റെ സ്വകാര്യതയിൽ, കിടപ്പുമുറിയോട് ചേർന്ന ആഡംബര സ്നാനമുറിയിൽ തണുത്ത ജലം പ്രവഹിക്കുന്ന ഷവറിനു കീഴിൽ പരിപൂർണ്ണ നഗ്നയായി ശാന്തയായി അവൾ കുളിക്കാൻ തുടങ്ങി.

പെട്ടെന്ന് ഒരു തോന്നൽ, ഒരു വെളിപാട് – താൻ നിൽക്കുന്നത് വലിയൊരു ആംഫിതിയ്യേറ്ററിന്റെ നടുത്തളത്തിലെ പോഡിയത്തിലാണോ എന്ന്. പോഡിയത്തിൽ സെറ്റ് ചെയ്ത സ്നാനമുറിയുടെ ചുവരുകൾ വെറും ലോലമായ സ്ഫടികപാളികൾ മാത്രം. ആണും പെണ്ണുമായി ചുറ്റിലും അനേകമനേകം വ്യക്തികൾ നാടകം കാണുന്നതു പോലെ തന്നെ നോക്കി, തന്റെ നഗ്നതയിൽ കണ്ണുനട്ട് അവിടിരിക്കുന്നു. ഒരു നിമിഷം. അവരെല്ലാം കണ്ടു കഴിഞ്ഞു. ആരും കാണുന്നില്ല എന്ന പൂർണ്ണവിശ്വാസത്തോടെ സ്നാനമുറിയിൽ ചെയ്ത ഓരോ അംഗചലനവും അവരുടെ ക്യാമറകളിൽ പതിഞ്ഞു കഴിഞ്ഞു.

ചെറിയൊരു ടവൽ കൊണ്ട് ദേഹം മറച്ച് അവൾ അവിടെ തളർന്നിരുന്നു.


ഓണ്‍ലൈന്‍ പ്രൈവസിയെപ്പറ്റി അല്‍പ്പമെങ്കിലും അവബോധമുള്ള ഒരു ഇന്റര്‍നെറ്റ് ഉപയോക്താവിന്റെ ടിപ്പിക്കൽ വിഹ്വലസ്വപ്നമാണിത്. അവർക്കറിയാം സ്വകാര്യത എന്നത് ഒരു മരീചിക പോലാണെന്ന്. ഉണ്ടെന്ന് ഒറ്റ നോട്ടത്തിൽ തോന്നുന്നതൊക്കെ ഉള്ളതല്ല എന്ന് അവർക്ക് നന്നായറിയാം.

ഓണ്‍ലൈൻ പ്രൈവസി എന്നത് വളരെ ഗഹനമായ ഒരു വിഷയമാണ്. ഇന്നത്തെ ലോകത്തിൽ ഒരൽപം ശ്രദ്ധ മാറിയാൽ നിങ്ങളുടെ പ്രൈവസി അപകടത്തിലാവും. നിങ്ങൾ ടാർഗറ്റ് ചെയ്യപ്പെട്ടേക്കും. ടെക്ക്നോളജിയിൽ താൽപ്പര്യമുള്ള ഗീക്കുകൾക്ക് ഇത് അറിയാവുന്ന കാര്യമാണ്, എങ്കിലും സാധാരണ ഇന്റർനെറ്റ്‌, മൊബൈൽ ഫോണ്‍ ഉപയോക്താക്കൾ കരുതുന്നത് തങ്ങൾ സുരക്ഷിതരാണ്‌ എന്നാണ്.

നമ്മുടെ കമ്പ്യൂട്ടർ നമുക്കെതിരേ ചാരപ്പണി ചെയ്യുന്നു. മറ്റാരും കാണില്ല എന്ന് കരുതി നാമയയ്ക്കുന്ന സന്ദേശങ്ങൾ നാമറിയാത്ത എത്രയോ മനുഷ്യരും യന്ത്രങ്ങളും വായിക്കുന്നു. അതൊക്കെ ആർക്കൊക്കെ പങ്കുവയ്ക്കപ്പെടുന്നു? നമുക്ക് സൗജന്യ ഇമെയിൽ സേവനങ്ങൾ തരുന്നവർ തന്നെ നമ്മുടെ സന്ദേശങ്ങൾ ചോർത്തി വായിക്കുന്നു. നാമയച്ച സന്ദേശങ്ങൾ നമുക്കൊരിക്കലും ഡിലീറ്റ് ചെയ്യാൻ കഴിയാത്ത വിധം അവരുടെ സർവ്വറുകളിൽ സൂക്ഷിക്കപ്പെടുന്നു.

കറൻസി സൂക്ഷിക്കുന്ന സേഫുകൾ ഇരട്ടപ്പൂട്ടിട്ടു പൂട്ടിയാലും നമുക്ക് സമാധാനമില്ല. വീടു പൂട്ടി ദൂരയാത്ര പോകുമ്പോൾ നാലു തവണയെങ്കിലും നോക്കും ശരിക്കും ലോക്ക് വീണിട്ടുണ്ടോ എന്ന്. പക്ഷേ ഒരു ഇലക്ട്രോണിക് ഡാറ്റ കൈകാര്യം ചെയ്യുമ്പോൾ നമുക്കാർക്കും തന്നെ യാതൊരു സുരക്ഷിതത്വചിന്തയുമില്ല. സുഹൃത്തിന് ഒരു ഇമെയിൽ അയയ്ക്കുമ്പോൾ, സോഷ്യൽ മീഡിയയിൽ ഒരു സ്വകാര്യ ഫോട്ടോ അപ്‌ലോഡ്‌ ചെയ്യുമ്പോൾ ഒന്നും നാം മറ്റൊന്നും ആലോചിക്കാറില്ല. ക്രെഡിറ്റ്‌ കാർഡ്‌ / നെറ്റ് ബാങ്കിംഗ് പാസ്‌വേഡുകൾ  ഒക്കെ പലരും സൂക്ഷിക്കുന്നത് തങ്ങളുടെ ഇമെയിൽ ഇൻബോക്സിന്റെ അല്ലെങ്കിൽ ക്ളൌഡ് സ്പേസിന്റെ ഒക്കെ അകത്താണ്. ഇന്റർനെറ്റിൽ ഒരിടം എന്നത് തികച്ചും സുരക്ഷിതമായാണ് മിക്ക സാധാരണക്കാരും കരുതുന്നത്. മറ്റാരും ഒന്നും കാണുന്നില്ല എന്ന് അവർ ധരിച്ചു വശായിരിക്കുന്നു.

ഒരു സാധാരണ ഇന്റർനെറ്റ്‌ കമ്മ്യൂണിക്കേഷന്റെ പിന്നിൽ നടക്കുന്ന ഇടപാടുകൾ വളരെ സങ്കീർണ്ണമാണ്. നിരവധി ഗേറ്റ് വേകൾ, നൂറുകണക്കിന് സർവ്വറുകൾ, ഒന്നിലേറെ ഐ.എസ്.പികൾ ഇവയൊക്കെ ഉൾപ്പെട്ടതാണ് ഒരൊറ്റ ഇന്റർനെറ്റ്‌ കമ്മ്യൂണിക്കേഷൻ. ഒരാൾ ഒരു വെബ്സൈറ്റ് നോക്കുമ്പോൾ അതിന്റെ പിന്നിൽ സർവറുകൾ തമ്മിൽ അങ്ങോട്ടുമിങ്ങോട്ടും അയാൾ ഉപയോഗിക്കുന്ന കമ്പ്യൂട്ടറുമായും ഒക്കെ നിരവധി തവണ ബന്ധപ്പെടുന്നുണ്ട്. ഈ കമ്മ്യൂണിക്കേഷനുകൾക്ക് നടുവിൽ നിങ്ങളുടെ സന്ദേശം ഹൈജാക്ക് ചെയ്യാൻ ഒരു രഹസ്യാന്വേഷണ ഏജൻസിക്കോ അല്ലെങ്കിൽ ഒരു അറ്റാക്കർക്കോ നിഷ്‌പ്രയാസം സാധിക്കും.

നിങ്ങൾ എവിടെ നിന്ന് ഇന്റർനെറ്റിൽ പ്രവേശിച്ചു എന്നറിയാൻ ഒരു ബുദ്ധിമുട്ടുമില്ല – നിങ്ങളുടെ ഐ.എസ്.പി. നിങ്ങൾക്ക് ലീസ് നൽകിയ ഐ.പി. അഡ്രസ്‌ കണ്ടെത്തിയാൽ മാത്രം മതി, ഭൂമിശാസ്ത്രപരമായ നിങ്ങളുടെ സ്ഥലം കിറുകൃത്യമായി ഗണിച്ചെടുക്കാൻ സാധിക്കും. അത് കണ്ടെത്താൻ അധികം വൈദഗ്ധ്യം പോലും ആവശ്യമില്ല. ഒരു മുൻകരുതലുമെടുക്കാതെ അയയ്ക്കപ്പെട്ട സംശയാസ്പദമായ ഒരു സന്ദേശം ഒരു രഹസ്യാന്വേഷണ ഏജൻസിയ്ക്ക് ചോർന്നു കിട്ടിയാൽ നിമിഷങ്ങൾ അധികമൊന്നും വേണ്ട അതിന്റെ ഉറവിടം കണ്ടെത്താൻ. ഇക്കാര്യങ്ങളെപ്പറ്റിയൊന്നും കാര്യമായ അവബോധമില്ലാതെ അതീവ രഹസ്യ സ്വഭാവമുള്ള ഒരു സന്ദേശം ഒരാൾ ഇന്റർനെറ്റ്‌ മുഖേന കൈമാറാൻ ശ്രമിച്ചാൽ നിമിഷങ്ങൾക്കകം അയാൾ ടാർഗറ്റ് ചെയ്യപ്പെടും എന്നതാണ് ഇന്നത്തെ സ്ഥിതി.

ഏതാണ്ട് ഒരു വർഷം മുമ്പ്, 2013 ജൂണ്‍ രണ്ടാം വാരത്തോടെ ലോകം ഞെട്ടലോടെ ശ്രവിച്ച സ്നോഡൻ വെളിപ്പെടുത്തലുകൾ ഒന്ന് മനസ്സിരുത്തി വായിച്ചാൽ മാത്രം മതി എത്രമാത്രം അപകടകരമാണ് നമ്മുടെ സൈബർ ജീവിതം എന്ന് വ്യക്തമായി തിരിച്ചറിയാൻ. അമേരിക്കയുടെ നേതൃത്വത്തിൽ പടുത്തുയർത്തിയ ഗ്ളോബൽ സർവെയ്ലൻസ് പ്രോഗ്രാം എന്ന സ്പൈ പ്രോഗ്രാം വഴി ഒരു ഡസനിലേറെ രാജ്യങ്ങളിലെ ശതകോടിക്കണക്കിന് പൌരന്മാരുടെ സ്വകാര്യ വിവരങ്ങളാണ് അവർ സ്വന്തമാക്കിയത്. ഇന്റർനെറ്റിലൂടെയും ഫോണിലൂടെയും ഈ പൌരന്മാർ നടത്തിയ ആശയവിനിമയങ്ങളിൽ നിന്നാണ് അവർ ഈ വിവരങ്ങൾ ചോർത്തിയെടുത്തത്.

ലോകമെമ്പാടും അനേകം സ്പൈ പ്രോഗ്രാമുകള്‍ വ്യാപകമായി ഉപയോഗിക്കപ്പെടുന്നുണ്ടെങ്കിലും സ്നോഡന്റെ വെളിപ്പെടുത്തലുകളിൽ നിന്ന് തെളിയുന്നത് പ്രധാനമായും മൂന്ന് സ്പൈ പ്രോഗ്രാമുകളുടെ സാന്നിധ്യമാണ്.

  1. എക്സ്കീസ്കോർ – ഇന്റർനാഷണൽ സർവെയ്ലൻസ് ടൂൾ. പ്രധാനമായും ഇമെയിൽ, ഫോണ്‍ സന്ദേശങ്ങൾ, വെബ്‌ ചാറ്റുകൾ തുടങ്ങിയവയിൽ നിന്നുള്ള മെറ്റാഡാറ്റ വിവരണങ്ങൾ ചോർത്തുന്നു.
  2. ടെമ്പോറ – ബ്രിട്ടന്റെ സർവെയ്ലൻസ് ടൂൾ. ഇന്റെർനെറ്റിന്റെ ബാക്ക്ബോണ്‍ ആയ ഫൈബർ ഒപ്റ്റിക് കേബിളിൽ നിന്ന് വിവരങ്ങൾ നേരിട്ട് ചോർത്തുന്നു.
  3. പ്രിസം – എൻ.എസ്.എയുടെ സർവെയ്ലൻസ് ടൂൾ. മൈക്രോസോഫ്റ്റ്, ഗൂഗിൾ, യാഹൂ, എഓഎൽ, ഫേസ്ബുക്ക്‌, ആപ്പിൾ, ട്വിറ്റെർ തുടങ്ങിയ യു.എസ്. സേവനദാതാക്കളുടെ സെർവറിൽ നിന്ന് നേരിട്ട് ഡാറ്റ ചോർത്തുന്നു.

ലോകത്തിലെ തന്നെ എണ്ണം പറഞ്ഞ രഹസ്യാന്വേഷണ ഏജൻസിയായ സി.ഐ.എയുടെയും നാഷണൽ സെക്യൂരിറ്റി ഏജൻസിയുടെയും മുൻഉദ്യോഗസ്ഥനായിരുന്ന സ്നോഡൻ എങ്ങനെ ഈ വിവരങ്ങൾ ഇത്രയും സുരക്ഷിതമായി ബ്രിട്ടനിലെയും യു.എസ്സിലെയും പത്രപ്രവർത്തകർക്ക് കൈമാറി? സ്നോഡൻ പത്രപ്രവർത്തകരുമായി ഇമെയിൽ സന്ദേശങ്ങൾ കൈമാറിയിരുന്നോ? എങ്കിൽ എങ്ങനെ ആ സന്ദേശങ്ങൾ മേൽപ്പറഞ്ഞ ചാര സോഫ്റ്റ്‌വെയറുകൾ മണത്തറിഞ്ഞില്ല?

ടെയിൽസ് ഓപ്പറേറ്റിംഗ് സിസ്റ്റം

പത്രപ്രവർത്തകരായ ലോറ പൊയട്രാസ്, ഗ്ളെൻ ഗ്രീൻവാൾദ് എന്നിവരുമായി ജീപീജി പൂട്ടിട്ട ഇമെയിൽ വഴിയാണ് എഡ്വേർഡ് സ്നോഡൻ ആദ്യമായി ബന്ധപ്പെട്ടത്. ഒരു നൂറ്റാണ്ടിലെ ഏറ്റവും വലിയ വെളിപ്പെടുത്തൽ അങ്ങനെ ലോകം കണ്ട ഏറ്റവും വലിയ പത്രവാർത്തകളിൽ ഒന്നായി മാറി. ഇതോടൊപ്പം മറ്റൊരു ടൂൾ കൂടി ലോകശ്രദ്ധ ആകർഷിച്ചു – അതിന്റെ പേരാണ് ടെയിൽസ് ഓപ്പറേറ്റിംഗ് സിസ്റ്റം. നേരത്തെ പറഞ്ഞ ചാരസോഫ്റ്റ്‌വെയറുകളുടെയൊന്നും കണ്ണിൽ പെടാതെ എഡ്വേർഡ് സ്നോഡനുമായി ആശയവിനിമയം നടത്താൻ ഈ പത്രപ്രവർത്തകരെ സഹായിച്ചത് ടെയിൽസ് എന്ന ഈ ഓപ്പറേറ്റിംഗ് സിസ്റ്റമാണ്. സ്നോഡൻ തന്നെയാണ് അവരോട് ടെയിൽസ് ഉപയോഗിക്കാൻ ആവശ്യപ്പെട്ടതും. ഓണ്‍ലൈൻ പ്രൈവസിയുടെ കാര്യത്തിൽ ഏതെങ്കിലും സോഫ്റ്റ്‌വെയറോ  അല്ലെങ്കിൽ ഓപ്പറേറ്റിംഗ് സിസ്റ്റമോ വിശ്വസനീയമായിട്ടുണ്ടെങ്കിൽ അത് ടെയിൽസ് ഓപ്പറേറ്റിംഗ് സിസ്റ്റം മാത്രമായിരിക്കും. എങ്കിലും ഇത് അവസാനവാക്കല്ല എന്ന് ഒരു ഡിസ്ക്ളൈമർ കൂടി ഉൾപ്പെടുത്താൻ അവർ മറന്നിട്ടില്ല.

ടെയിൽസ് ഓപ്പറേറ്റിംഗ് സിസ്റ്റം സ്പ്ളാഷ് സ്ക്രീൻ

ടെയിൽസ് ഓപ്പറേറ്റിംഗ് സിസ്റ്റം സ്പ്ളാഷ് സ്ക്രീൻ

ഒരു പക്ഷെ എഡ്വേർഡ് സ്നോഡന്റെ വെളിപ്പെടുത്തലുകളെ ആധാരമാക്കി പ്രശസ്ത ഡയറക്ടർ ഒലിവർ സ്റ്റോണ്‍ സംവിധാനം ചെയ്യുന്ന The Snowden Files: The Inside Story of the World’s Most Want Man എന്ന ചിത്രത്തിൽ ടെയിൽസ് ഓപ്പറേറ്റിംഗ് സിസ്റ്റത്തിലൂടെ പത്രപ്രവർത്തകർ  സ്നോഡനുമായി ആശയവിനിമയം നടത്തുന്ന രംഗങ്ങൾ ഉൾപ്പെടുത്തുമായിരിക്കും! 2014 സെപ്റ്റംബർ മാസത്തിൽ പുറത്തിറങ്ങുന്ന “Classified: The Edward Snowden Story” എന്ന ഫീച്ചർ ഫിലിമിലും ടെയിൽസിനെ പറ്റിയുള്ള പരാമർശങ്ങൾ കണ്ടേക്കാം.

ടെയിൽസ് ഓപ്പറേറ്റിംഗ് സിസ്റ്റം ഒരു ഓൾ-ഇൻ-വണ്‍ സെക്യോർ ഡിജിറ്റൽ കമ്മ്യൂണിക്കേഷൻ സിസ്റ്റമാണ്. ടോർ വെബ്‌ ബ്രൌസർ, ജീപീജീ ഇമെയിൽ, ഒടീആർ ചാറ്റ്, എൻക്രിപ്റ്റഡ് സ്റ്റോറേജ് അങ്ങനെ ഓണ്‍ലൈൻ പ്രൈവസിയ്ക്ക് അത്യാവശ്യം വേണ്ട എല്ലാ പ്രോഗ്രാമുകളും ഉൾക്കൊള്ളിച്ച ഒരു ഓപ്പറേറ്റിംഗ് സിസ്റ്റം ആണ് ടെയിൽസ്. ഏതൊരു സാധാരണക്കാരനും നിഷ്‌പ്രയാസം ഉപയോഗിക്കാൻ കഴിയുന്ന ഇന്റർഫേസ്. പ്രത്യേകിച്ച് ഒരു തരത്തിലുള്ള കോണ്‍ഫിഗറേഷനും ഉപയോക്താവ് ചെയ്യേണ്ടതില്ല. നിയമപരമായി നിങ്ങൾക്ക് അവകാശപ്പെടാവുന്ന അനോണിമിറ്റി (legal anonymity) ടെയിൽസ് നിങ്ങൾക്ക് ആവും വിധം നൽകുന്നു. ടെയിൽസിന്റെ ഏറ്റവും മികച്ച പ്രത്യേകതകളിൽ ഒന്ന് അത് ഉപയോക്താവിന്റെ ഹാർഡ് ഡിസ്കിനെ സ്പർശിക്കുന്നില്ല എന്നതാണ്. ഒരു യു.എസ്.ബി. സ്റ്റിക്കിലൊ ഒരു ഡീവിഡി യിലോ ടെയിൽസ് സൂക്ഷിക്കാം, അതിൽ നിന്നു തന്നെ ലോഡ് ചെയ്യാം. സിസ്റ്റം ഷട്ട് ഡൌണ്‍ ചെയ്തു കഴിയുമ്പോൾ യാതൊരുവിധ ലോഗുകളും അതിൽ ഉണ്ടാവുകയുമില്ല. ഏറ്റവും മികച്ച ഐടി ഫോറൻസിക് വിദഗ്ദ്ധനു പോലും ഒരുവിധ ട്രെയ്സുകളും അതിൽ നിന്ന് ലഭിക്കില്ല.

“ഗൂഗിൾ, ഫേസ്ബുക്ക്‌, യാഹൂ തുടങ്ങിയ ഇന്നത്തെ ഇന്റർനെറ്റ്‌ ഭീമൻമാരും രഹസ്യാന്വേഷണ ഏജൻസികളും ഒക്കെ നമ്മുടെ ഓണ്‍ലൈൻ ജീവിതം ആര്‍ക്കും കാണാന്‍ കഴിയും വിധം
സുതാര്യമാകണം എന്ന് ആഗ്രഹിക്കുന്നവരാണ്. എന്തിനാണെന്നോ? അവരുടെയൊക്കെ സ്വന്തം കാര്യങ്ങൾ കൂടുതല്‍ എളുപ്പമാകാൻ വേണ്ടി മാത്രം.”
– ടെയിൽസ് ഡെവലപ്പ്മെന്റ് ടീം.

കഴിഞ്ഞ നാലഞ്ചു കൊല്ലം മുമ്പ് തുടങ്ങിയതാണ്‌ ടെയിൽസ് പ്രൊജക്റ്റ്‌. ആരംഭത്തിൽ അമ്നീഷ്യ എന്നായിരുന്നു പ്രൊജക്റ്റിനു നൽകിയ പേര്. നേരത്തേ ഉണ്ടായിരുന്ന ഇൻകോഗ്നിറ്റോ എന്ന മറ്റൊരു പ്രോജക്റ്റിനെ അടിസ്ഥാനപ്പെടുത്തിയാണ് അമ്നീഷ്യ ഡെവലപ്പ് ചെയ്യാൻ തുടങ്ങിയത്. ഒടുവിൽ അമ്നീഷ്യയും ഇൻകോഗ്നിറ്റോയും മെർജ് ചെയ്യപ്പെട്ടു. അങ്ങനെ The Amnesic Incognito Live System എന്ന് സിസ്റ്റം നാമകരണം ചെയ്തു, ഇതിന്റെ ചുരുക്കരൂപമാണ് ടെയിൽസ്. ഇപ്പോൾ ഡെസ്ക്ടോപ്പ് കംപ്യൂട്ടറുകളിലും ലാപ്ടോപ്പുകളിലും മാത്രമേ ടെയിൽസ് ഉപയോഗിക്കാൻ കഴിയൂ, വൈകാതെ മൊബൈലിൽ ഉപയോഗിക്കാൻ കഴിയുന്ന വെർഷൻ കൂടി ഇപ്പോൾ ഡെവലപ്പ് ചെയ്യുന്നുണ്ട്.

ടെയിൽസിലെ ഡീഫോൾട്ട് ഇന്റർനെറ്റ്‌ ബ്രൌസർ “ടോർ ബ്രൌസർ” ആണ്. ടോർ ബ്രൌസറിലൂടെ ഇന്റർനെറ്റ്‌ ഉപയോഗിക്കുമ്പോൾ നിങ്ങളുടെ ഐപി അഡ്രസ്‌ ഒരു സ്പൈയിംഗ് ഏജൻസിയ്ക്ക് നേരിട്ട് ലഭിക്കില്ല. കൃത്യമായ ഇടവേളകളിൽ ഐപി അഡ്രസ്‌ മാറിക്കൊണ്ടിരിക്കുന്നത് നിങ്ങൾക്ക് സ്വയം കാണാൻ കഴിയും. ടെയില്‍സിലെ ടോർബ്രൌസർ വാസ്തവത്തിൽ മോസില്ല ഫയർഫോക്സിന്റെ ഫോർക്ക് ആയ ഐസ് വീസലില്‍ ടോര്‍ നെറ്റ്വര്‍ക്ക് സംയോജിപ്പിച്ച പതിപ്പാണ്. ഗ്നുപീജീ സപ്പോർട്ട് ഉള്ള ക്ളോവ്സ്‌ മെയിൽ ആണ് ഡീഫോൾട്ട് ഇമെയിൽ ക്ളയന്റ്. രേഖകൾ എഡിറ്റ്‌ ചെയ്യാൻ ഓപ്പണ്‍ ഓഫീസ്, സ്ക്രൈബസ് എന്നീ എഡിറ്ററുകൾ ഉണ്ട്. ഇമേജുകൾ എഡിറ്റ്‌ ചെയ്യാൻ ഗിമ്പും, വെക്ടർ ഗ്രാഫിക്സിന് ഇങ്ക്സ്കേപ്പും ഉൾക്കൊള്ളിച്ചിട്ടുണ്ട്. പ്ളെയിൻ ടെക്സ്റ്റ്‌ എൻക്രിപ്റ്റ് ചെയ്യാൻ ഓപ്പണ്‍ പീജീപി ആപ്പ്ലെറ്റ് ടെയിൽസിൽ ലഭ്യമാണ്.

ഏതെങ്കിലും പൊതുസ്ഥലങ്ങളിൽ ഇരുന്നു കൊണ്ട് മറ്റുള്ളവരുടെ ശ്രദ്ധ ആകർഷിക്കാതെ ടെയിൽസ് ഉപയോഗിക്കണമെങ്കിൽ അതിനും മാർഗ്ഗമുണ്ട്. ടെയിൽസിലെ രസകരമായ ഒരു വേലത്തരമാണത് – വിൻഡോസ് കാമോഫ്ളാഷ് എന്ന ഓപ്ഷൻ ഉപയോഗിച്ചാൽ പുറത്തു നിന്നൊരാൾ നോക്കിയാൽ നിങ്ങൾ ഉപയോഗിക്കുന്നത് ഒരു വിൻഡോസ്‌ എക്സ്പി ഓപ്പറേറ്റിംഗ് സിസ്റ്റം ആയേ തോന്നൂ.

ടെയിൽസിൽ ഓപ്പണ്‍ ഓഫീസ് സ്യൂട്ടും ഗിമ്പും ഇങ്ക്സ്കേപ്പും ഒക്കെ അടങ്ങിയിട്ടുണ്ടെങ്കിലും ഇത് നമ്മുടെ സ്ഥിര ഉപയോഗത്തിന് അനുയോജ്യമാണ് എന്ന് പറയാനാവില്ല. ടോർ നെറ്റ്‌വർക്കിലൂടെ ബ്രൌസ് ചെയ്യുന്നത് വളരെ അധികം സമയമെടുക്കുന്ന പരിപാടിയാണ്. ഒരാളുടെ തികച്ചും സാധാരണ ഉപയോഗങ്ങൾക്ക് ഡെബിയൻ, ഉബുണ്ടു പോലുള്ള സാധാരണ ഓപ്പറേറ്റിംഗ് സിസ്റ്റം ഉപയോഗിക്കുന്നതായിരിക്കും അഭികാമ്യം. പക്ഷേ എപ്പോഴും ടെയിൽസ് കൈവശം കരുതുക, എപ്പോഴാണ് അനോണിമസ് ആയി നിങ്ങൾക്ക് ഇന്റർനെറ്റ്‌ ഉപയോഗിക്കേണ്ട ആവശ്യം വരുന്നതെന്ന് പറയാൻ കഴിയില്ലല്ലോ.

ക്രിപ്റ്റോപാർട്ടി

ഓണ്‍ലൈൻ പ്രൈവസിയെ പറ്റി തികച്ചും അജ്ഞരായ സാധാരണ ജനങ്ങൾക്ക്‌ അവബോധം നൽകുവാൻ വേണ്ടി ആഗോള തലത്തിൽ നടക്കുന്ന കാമ്പയിൻ ആണ് ക്രിപ്റ്റോപാർട്ടി. പാസ്വേഡുകൾ സൂക്ഷിക്കേണ്ടത് എങ്ങനെ എന്ന ലളിതമായ വിഷയങ്ങൾ മുതൽ ടോർ നെറ്റ്‌വർക്ക്സ്, പീജീപി, ജീപീജി തുടങ്ങിയ എൻക്രിപ്ഷനുകൾ, ഓ.ടി.ആർ (Off The Record) ചാറ്റ് സർവ്വീസുകൾ തുടങ്ങിയ സെക്യൂരിറ്റി വിഷയങ്ങൾ വരെ ക്രിപ്റ്റോപാർട്ടികളിൽ സെഷനുകൾ എടുക്കുന്നു. ഒരിക്കൽ പോലും എൻക്രിപ്ഷൻ ടൂളുകൾ ഉപയോഗിക്കാത്ത സാധാരണക്കാർക്കാണ് ക്രിപ്റ്റോപാർട്ടികളിൽ പ്രഥമപരിഗണന നൽകപ്പെടുന്നത്.

വാൽക്കഷണം

എഡ്വേർഡ് സ്നോഡൻ ഉപയോഗിച്ചിരുന്ന ഇമെയിൽ സർവീസ് ലാവബിറ്റ്.കോം ആയിരുന്നു. cincinnatus@lavabit.com എന്നായിരുന്നു അദ്ദേഹത്തിന്റെ ഇമെയിൽ വിലാസം. ഇന്ന് ലാവബിറ്റിന്റെ ഹോം പേജിൽ നമുക്ക് കാണാൻ കഴിയുന്നത്‌ ഒന്ന് രണ്ടു പോസ്റ്റുകൾ മാത്രം. സ്നോഡൻ വെളിപ്പെടുത്തലുകൾ പുറത്തു വന്ന ശേഷം ഏതാണ്ട് രണ്ടു മാസങ്ങൾക്കു ശേഷം ലാവബിറ്റ് യു.എസ്. ഫെഡറൽ ഗവണ്മെന്റ് കരിനിയമങ്ങൾ ചുമത്തി തകർത്തു തരിപ്പണമാക്കി. ലാവബിറ്റ്  ഇന്ന് സുരക്ഷിത ഇമെയിൽ സർവീസ് നൽകുന്നില്ല. ഇക്കഴിഞ്ഞ മെയ് മാസമാണ് ലോകത്തിലെ മികച്ച ഓപ്പണ്‍ സോഴ്സ് എൻക്രിപ്ഷൻ ടൂൾ എന്ന് കേൾവി കേട്ട ട്രൂക്രിപ്റ്റ് സ്വയം വൾനറബിലിറ്റി ആരോപിച്ച് സർവീസ് അവസാനിപ്പിച്ചത്. നാളെ ഒരു ദിവസം ടെയിൽസ് ഓപ്പറേറ്റിംഗ് സിസ്റ്റത്തിനും ഈ ഗതി വരുമോ?

അവലംബം

  1. https://tails.boum.org/index.en.html
  2. http://www.wired.com/2014/04/tails/
  3. https://pressfreedomfoundation.org/blog/2014/04/help-support-little-known-privacy-tool-has-been-critical-journalists-reporting-nsa
  4. https://www.newschallenge.org/challenge/2014/submissions/improve-tails-to-limit-the-impact-of-security-flaws-isolate-critical-applications-and-provide-same-day-security-updates
  5. http://en.wikipedia.org/wiki/Laura_Poitras
  6. http://www.forbes.com/sites/runasandvik/2014/05/27/that-one-time-i-threw-a-cryptoparty-with-edward-snowden

ക്രിപ്റ്റോപാര്‍ട്ടി / Cryptoparty

പ്രത്യേകിച്ച് മെയിലിംഗ് ലിസ്റ്റില്‍ വന്ന അജണ്ട ഒന്നും നോക്കാതെയാണ്‌ ഐലഗ്ഗിലെ പ്രതിമാസ മീറ്റിങ്ങിനു പോയത്. അവിടെ ചെന്നപ്പോള്‍ “ക്രിപ്റ്റോപാര്‍ട്ടി” എന്ന ഒരു ടൈറ്റില്‍ നോട്ടീസ് ബോര്‍ഡില്‍ എഴുതി വച്ചിരിക്കുന്നു. എന്താണാവോ ഈ ക്രിപ്റ്റോപാര്‍ട്ടി എന്ന് അനന്തന്‍ എന്നോട് സ്വകാര്യമായി ചോദിച്ചപ്പോള്‍ വന്നിരിക്കുന്ന മറ്റുള്ളവര്‍ക്കും ക്രിപ്റ്റോപാര്‍ട്ടിയെ പറ്റി കാര്യമായ ധാരണ ഇല്ല എന്ന് മനസ്സിലായി. ജേ ജേക്കബ്‌ സാറും പുതിയൊരു കക്ഷിയുമായി എന്തോ കാര്യമായി മാറിയിരുന്നു സംസാരിക്കുന്നുണ്ട്. മീറ്റിംഗ് തുടങ്ങാന്‍ പതിവിലും താമസം. ഒടുവില്‍ സോഫ്റ്റ്‌വെയര്‍ ഫ്രീഡം ലേര്‍ണിംഗ് സെന്റെറി (ന്യൂഡല്‍ഹി) ലെ പ്രശാന്ത്‌ സുഗതന്‍ സാര്‍ മീറ്റിംഗ് ഹാളിലേക്ക് വന്നു. ക്രിപ്റ്റോപാര്‍ട്ടി തുടങ്ങി. എന്താണ് ക്രിപ്റ്റോപാര്‍ട്ടി എന്ന് വിശദീകരിച്ചു.

എന്താണ് ക്രിപ്റ്റോപാര്‍ട്ടി / Cryptoparty?

വിശദമായ ഉത്തരം ദാ ഈ കാണുന്ന ലിങ്കുകള്‍ നിന്നൊക്കെ കിട്ടും.

    1. http://en.wikipedia.org/wiki/CryptoParty
    2. https://cryptoparty.org/wiki/CryptoParty
ക്രിപ്റ്റോപാര്‍ട്ടി

ക്രിപ്റ്റോപാര്‍ട്ടി

അധികം കാലമൊന്നും ആയിട്ടില്ല, ഈ കഴിഞ്ഞ വര്‍ഷം  ഓസ്ട്രേലിയയില്‍ ആണ് ആഷര്‍ വോള്‍ഫ് എന്ന ഓണ്‍ലൈന്‍ സെക്യൂരിറ്റി വിദഗ്ധന്‍ ഇങ്ങനെ ഒരു ആശയം മുന്നോട്ടു വച്ചത്. ടോര്‍ പ്രൊജക്റ്റ്‌ എങ്ങനെ ഉപയോഗിക്കാം, പീജീപീ (പ്രെറ്റി  ഗുഡ് പ്രൈവസി), ജീപീജീ (ഗ്നുപീജീ -ഗ്നു പ്രൈവസി ഗാർഡ്‌) തുടങ്ങിയ ഡാറ്റ എന്‍ക്രിപ്ഷന്‍ മാർഗ്ഗങ്ങൾ ഇമെയിലുകളില്‍ എങ്ങനെ ഉപയോഗിക്കാം എന്നൊക്കെ സാധാരണക്കാര്‍ക്കു മുമ്പില്‍ (ഗ്നു/ലിനക്സ്‌ ഗീക്കുകള്‍ക്ക് മാത്രമല്ല, എല്ലാ സാദാ ജനത്തിനു മുമ്പിലും) അവതരിപ്പിക്കുകയാണ് ക്രിപ്റ്റോപാര്‍ട്ടിയുടെ ലക്‌ഷ്യം. ഫേസ്ബുക്കില്‍ എന്തൊക്കെ അപ്ഡേറ്റ് ചെയ്യാം, എന്തൊക്കെ അപ്ഡേറ്റ് ചെയ്യരുത് തുടങ്ങിയ തികച്ചും ചെറിയ ചെറിയ കാര്യങ്ങള്‍ വരെ ഇത്തരം പാര്‍ട്ടികളില്‍ ചര്‍ച്ചാവിഷയം ആകാം എന്നും പ്രശാന്ത്‌ പറഞ്ഞു. അനോണിമസ് ആകാന്‍ നിയമപരമായി ഓരോരുത്തര്‍ക്കും അവകാശം ഉണ്ട്. പക്ഷെ ഒരാളുടെ അറിവില്ലായ്മ മൂലം അയാള്‍ക്ക് ആ അവകാശം ലഭിക്കുന്നില്ല; പക്ഷെ തങ്ങള്‍ തിരിച്ചറിയപ്പെടാം എന്ന് അയാള്‍ തിരിച്ചറിയുന്നുമില്ല. തന്നെ ആരും തിരിച്ചറിയുന്നില്ല എന്ന തെറ്റായ വിശ്വാസം മൂലം പലരും അവര്‍ അറിയാതെ ട്രാക്ക് ചെയ്യപ്പെടുന്നു. ഇവിടെയാണ്‌ ക്രിപ്റ്റോപാര്‍ട്ടി നിങ്ങളുടെ അവകാശങ്ങളെ പറ്റി നിങ്ങള്‍ക്ക് അവബോധം നല്‍കുന്നത്. ഉദാഹരണത്തിന് രണ്ടു വ്യക്തികള്‍ തമ്മില്‍ നടക്കുന്ന ഒരു ഇമെയില്‍ വിനിമയത്തിനിടയില്‍ നിന്ന് വേണമെങ്കില്‍ ഒരു സര്‍ക്കാര്‍ ഏജന്‍സിക്ക് ഡാറ്റ ചോര്‍ത്താം. പക്ഷെ അത് എന്‍ക്രിപ്റ്റഡ് ആണെങ്കില്‍ അതു ചോർത്തുന്നത്‌ എളുപ്പമാവില്ല. അനോണിമസ് ആയിരിക്കാന്‍ നിങ്ങള്‍ക്ക് നിയമപരമായി അവകാശം ഉണ്ട്. വിധ്വംസക പ്രവര്‍ത്തനങ്ങള്‍ അല്ല; ന്യായമായ അവകാശങ്ങള്‍ മാത്രമാണ് ഇവിടെ പ്രസ്താവിക്കപ്പെടുന്നത്. തങ്ങളുടെ അധികാര പരിപാലനത്തിനായി പല സര്‍ക്കാരുകളും പൌരന്മാരുടെ വാര്‍ത്താവിനിമയ രേഖകള്‍ ചോര്‍ത്തുന്നത്‌ ഇന്ന് ലോകത്തില്‍ സര്‍വ്വ സാധാരണമായിക്കൊണ്ടിരിക്കുന്നു.

എന്തായാലും ടോര്‍ പ്രൊജെക്ടിനെ പറ്റിയും ഇ മെയില്‍ എന്‍ക്രിപ്ഷനെ പറ്റിയും ഒക്കെ വിവരം തന്ന ക്രിപ്റ്റോപാര്‍ട്ടി എല്ലാവര്‍ക്കും വളരെ ആസ്വാദ്യമായി എന്ന കാര്യത്തില്‍  സംശയമില്ല.

ഒരു സെക്യൂരിറ്റി ചിന്ത: പെര്‍മനെന്റ് ഡിലീറ്റ് ചെയ്ത ഫയല്‍ എങ്ങനെ റിക്കവറബിള്‍ അല്ലാതാക്കി മാറ്റാം?

ഡിജിറ്റല്‍ ഫോട്ടോ/വീഡിയോ ക്യാമറകളുടെ വരവോടെ ആവശ്യത്തിനും അനാവശ്യത്തിനും ഫോട്ടോ/വീഡിയോ എടുത്തു കൂട്ടുന്ന ഒരു സ്വഭാവം നമുക്ക് വന്നു കൂടി. മൊബൈല്‍ ക്യാമറ വിപ്ലവം വന്നതോടെ ഈ സ്വഭാവം സര്‍വ്വ അതിരുകളും ലംഘിക്കാന്‍ തുടങ്ങി. ഡിജിറ്റല്‍ / മൊബൈല്‍ ക്യാമറകള്‍ കൊണ്ട് നഗ്ന ചിത്രങ്ങള്‍ എടുത്തു എമ്മെമ്മെസ്സിലൂടെയും ഈമെയിലിലൂടെയും അയച്ചു കൊടുത്തുള്ള സൈബര്‍ കുറ്റകൃത്യങ്ങള്‍ പെരുകുവാന്‍ തുടങ്ങി. മിക്കവാറും ഇതിന്റെ ഇരകള്‍ പലരും നിരപരാധികളാണ് എന്നതാണ് സത്യം. ഇത്തരം മെറ്റീരിയലുകളുടെ സോഴ്സ് തേടി പോകുമ്പോഴാണ് ചില ദുഃഖ സത്യങ്ങള്‍ മനസ്സിലാവുന്നത്.

ഒരു സംഭവ കഥ ഇതാ.

നല്ല രീതിയില്‍ പ്രണയിച്ചു കൊണ്ടിരുന്ന ചെറുക്കനും പെണ്ണും. (നമുക്കവരെ ടിന്റു മോന്‍ എന്നും ടുട്ടു മോള്‍ എന്നും തല്‍ക്കാലം വിളിക്കാം) ഇവരുടെ വിവാഹം വരെ നിശ്ചയിച്ചതാണ്. വിവാഹത്തിന് മുമ്പ് ഒന്നോ രണ്ടോ ദിവസം ഒരുമിച്ചു താമസിച്ച സമയത്ത്  (ഇപ്പോഴൊക്കെ അത് പതിവാണല്ലോ!) ചുമ്മാ രസത്തിനു ടുട്ടുമോളുടെ ഒരു ടോപ്‌ലെസ്സ് ചിത്രം ടിന്റു മോന്‍ എടുത്തു. അവള്‍ എതിര്‍ത്തതുമില്ല. ലാപ്‌ടോപ്പിന്റെ ഹാര്‍ഡ് ഡിസ്കില്‍ ചുമ്മാ സേവ് ചെയ്ത ശേഷം അന്നേരം തന്നെ അത് ഷിഫ്റ്റ്‌ അടിച്ചു പെര്‍മനെന്റ് ഡിലീറ്റ് ചെയ്തത് ടുട്ടുമോള്‍ തന്നെയാണ്. ഒന്ന് രണ്ടു മാസത്തിനു ശേഷം ലാപ്‌ടോപ്പിന്റെ ഡിസ്പ്ലേ തകരാറിലായപ്പോള്‍ നന്നാക്കാന്‍ സര്‍വീസ് സെന്റെറില്‍ കൊടുത്തതും അവള്‍ തന്നെ. പറഞ്ഞതിലും നേരത്തെ ഡിസ്പ്ലേ ഒക്കെ ശരിയായി ലാപ്‌ടോപ്‌ കയ്യില്‍ കിട്ടുകയും ചെയ്തു. പിന്നെ എങ്ങനെയാണ് ഒന്ന് രണ്ടാഴ്ച്ചകള്‍ക്ക് ശേഷം അന്നെടുത്ത ആ ചിത്രങ്ങള്‍ കോളേജില്‍ പ്രചരിക്കാന്‍ തുടങ്ങിയതെന്ന് ആദ്യമൊന്നും ടുട്ടുമോള്‍ക്കു തീരെ മനസ്സിലായില്ല. പിന്നെയാണ് കാര്യങ്ങളുടെ കിടപ്പ് മനസ്സിലായതും സൈബര്‍ സെല്ലില്‍ കേസ് രജിസ്റ്റര്‍ ചെയ്തതും സര്‍വീസ് സെന്ററിലെ ചെറുപ്പക്കാരനായ എഞ്ചിനീയര്‍ അറസ്റ്റില്‍ ആയതും ഒക്കെ. ആര് അറസ്റ്റില്‍ ആയാലും പോകാനുള്ള മാനം ഏതായാലും പോയി.

ഇനി ഇത് എങ്ങനെ സംഭവിച്ചു എന്ന് നമുക്ക് പരിശോധിക്കാം.

ഒരു ഫയല്‍ നിങ്ങളുടെ കമ്പ്യൂട്ടറില്‍ നിന്ന് ഡിലീറ്റ് ചെയ്യുമ്പോള്‍ ആ ഫയലിനെപ്പറ്റിയുള്ള നേരിട്ടുള്ള ഇന്‍ഫര്‍മേഷന്‍ ( അഥവാ ഫയല്‍ ഐക്കണ്‍ മുതലായ വിവരങ്ങള്‍ ) മാത്രമേ വാസ്തവത്തില്‍ അപ്രത്യക്ഷമാകുന്നുള്ളൂ; ഫയല്‍ പൂര്‍ണ്ണമായും മാഞ്ഞു പോകുവാന്‍ പിന്നെയും കുറെ നടപടി ക്രമങ്ങള്‍ ഉണ്ട്. നിങ്ങളുടെ ഹാര്‍ഡ് ഡിസ്കില്‍ ഇഷ്ടം പോലെ സ്പേസ് ബാക്കിയുണ്ടെങ്കില്‍ ചിലപ്പോള്‍ ആ ഫയല്‍ മാഞ്ഞു പോകാന്‍ ഒരു പക്ഷെ മാസങ്ങള്‍ തന്നെ എടുത്തേക്കാം – വല്ലപ്പോഴും മാത്രം കമ്പ്യൂട്ടര്‍ ഉപയോഗിക്കുന്നവരാണെങ്കിലോ ഫയല്‍ മാഞ്ഞു പോകാന്‍ ചിലപ്പോള്‍ വര്‍ഷങ്ങള്‍ തന്നെ എടുത്തേക്കാം!

കഥയുടെ ബാക്കി കൂടി പറയാം. ഏതായാലും ടിന്റു മോനും ടുട്ടുമോളും ആത്മഹത്യ ചെയ്യാനൊന്നും പോയില്ല. വെറുമൊരു ടോപ്‌ലെസ്സ് ചിത്രത്തിന്റെ കേസ് അല്ലെ. ബോളിവുഡ്ഡിലും ഹോളിവുഡ്ഡിലും ഒക്കെ എത്രയെത്ര നടിമാര്‍ നെഞ്ചുവിരിച്ചു തുണിയുരിയുന്നു!? അതുകൊണ്ട് ഇരുവരുടെയും മാതാപിതാക്കള്‍ അവരെ ഉടന്‍ തന്നെ കെട്ടിച്ചു കൊടുത്തു. ഇപ്പോള്‍ അവര്‍ സുഖമായി നമ്മുടെ നാട്ടിന്‍പുറത്തു തന്നെ ജീവിക്കുന്നു.

ഇനി ഈ പ്രശ്നം എങ്ങനെ ഒഴിവാക്കാമായിരുന്നു എന്ന് നോക്കാം.

ഒരല്‍പം ശ്രദ്ധിച്ചിരുന്നെങ്കില്‍ സിമ്പിള്‍ ആയി ഒഴിവാക്കാമായിരുന്ന ഒരു പ്രശ്നമാണ് ഇവര്‍ ഇവിടെ വലിയൊരു ബ്രഹ്മാണ്ഢന്‍ പ്രശ്നമായി മാറ്റിയത്. ഒരു ചിത്രം നിങ്ങള്‍ സ്വന്തം ഡിജിറ്റല്‍ ക്യാമറയില്‍ എടുത്തു എന്നിരിക്കട്ടെ. അത് മറ്റാര്‍ക്കും റിക്കവര്‍ ചെയ്യാന്‍ കഴിയാത്ത രീതിയില്‍ നിങ്ങള്‍ക്ക് ഡിലീറ്റ് ചെയ്യാനാകും. ഈ പരിപാടിയ്ക്ക് വലിയ സാങ്കേതിക പരിജ്ഞാനം ഒന്നും വേണ്ട. അതിനായി ചെയ്യേണ്ട സംഗതി ഇത്രയേ ഉള്ളൂ.

  1. നിങ്ങള്‍ എടുത്ത ചിത്രം ( ഫയല്‍ ) ഏതെങ്കിലും ഒരു ഇമേജ് എഡിറ്റിംഗ് സോഫ്റ്റ്‌വെയറില്‍ ഓപ്പണ്‍ ചെയ്യുക.
  2. ഇറേസര്‍ ഉപയോഗിച്ച് അത് മുഴുവന്‍ മായ്ച്ചു കളയുക. (വേണമെങ്കില്‍ വല്ല കാക്കയുടെയോ പൂച്ചയുടെയോ പട്ടിയുടെയോ ചിത്രം അതിനു പകരം വയ്ക്കുകയുമാവാം.)
  3. അതിനു ശേഷം സേവ് ചെയ്യുക.
  4. (ഒരു അധിക സെക്യൂരിറ്റി എന്ന നിലയില്‍ വേണമെങ്കില്‍ ഫയല്‍ റീനെയിം ചെയ്യാം. റീനെയിം  ചെയ്യുമ്പോള്‍ ഫയല്‍ എക്സ്റ്റെന്‍ഷന്‍ കൂടി മാറ്റി കളയണം. ഉദാ:- mypic.jpg  എന്നത് eagle.flv എന്നോ മറ്റോ ആക്കുക)
  5. അതിനു ശേഷം പെര്‍മനെന്റ് ഡിലീറ്റ് ചെയ്യുക.
  6. ആ ഫയല്‍ ആരെങ്കിലും റിക്കവര്‍ ചെയ്‌താല്‍ പോലും ചുമ്മാ ഒരു ബ്ലാങ്ക് ഇമേജ്  അല്ലെങ്കില്‍ വല്ല കാക്കയുടെയോ പൂച്ചയുടെയോ പട്ടിയുടെയോ ചിത്രം മാത്രമാകും ലഭിക്കുക.

ഇനി നിങ്ങള്‍ക്ക് ഡിലീറ്റ് ചെയ്യേണ്ട ഫയല്‍ ഒരു ഡോക്യുമെന്റ് ആണെങ്കിലോ. ഓപ്പണ്‍ ഓഫീസ് റൈറ്റര്‍ പോലുള്ള ഒരു ഡോക്യുമെന്റ് എഡിറ്റര്‍ ഉപയോഗിച്ച് എല്ലാ ഡാറ്റയും ഡിലീറ്റ് ചെയ്തതിനു ശേഷം ഫയല്‍ റീനെയിം ചെയ്യുക, ഫയല്‍ ഡിലീറ്റ് ചെയ്യുക. ദാറ്റ്സ് ഓള്‍ .

ഇനി ഡിലീറ്റ് ചെയ്യേണ്ട ഫയല്‍ വീഡിയോ ഫയല്‍ ആണെങ്കിലോ? നേരത്തെ പറഞ്ഞത് പോലെ വീഡിയോ എഡിറ്റര്‍ ഉപയോഗിച്ച് ഫയലിനുള്ളിലെ ഡാറ്റ മുഴുവനും ഡിലീറ്റ് ചെയ്യുക, ഫയല്‍ റീനെയിം ചെയ്യുക. ഫയല്‍ ഡിലീറ്റ് ചെയ്യുക. പക്ഷെ എത്ര പേരുടെ കയ്യില്‍ വീഡിയോ എഡിറ്റര്‍ കാണും? എഡിറ്റ്‌ ചെയ്യേണ്ട വീഡിയോ ഫയല്‍ വലിയ സൈസ് ഉള്ളതാണെങ്കില്‍ നല്ല മെമ്മറി ഉള്ള സിസ്റ്റം തന്നെ വേണ്ടി വരും. ഇതൊക്കെ എല്ലാവരുടെയും കയ്യില്‍ ഉണ്ടാകണമെന്നില്ല. അപ്പോള്‍ എന്താണ് പരിഹാരം? അതിനുമുണ്ട് പരിഹാരം. ഗ്നു/ലിനക്സില്‍ ഉള്ള ചെറിയൊരു കമാന്‍ഡ് ഉപയോഗിച്ച് ഫയലിനുള്ളിലെ ഡാറ്റ മായ്ച്ചു കളയാം.

കമാന്‍ഡ് ഇതാ

shred -v -n 25 -u -z /tmp/test.mp4

കമാന്‍ഡിന്റെ വിശദീകരണം: /tmp/test.mp4എന്ന ഫയലിനെ 25 തവണ ഓവര്‍റൈറ്റ് ചെയ്ത് ട്രങ്കേറ്റ് ചെയ്ത ശേഷം പൂജ്യങ്ങള്‍ കൊണ്ട് വീണ്ടും അവസാനമായി ഓവര്‍റൈറ്റ് ചെയ്ത് ഡിലീറ്റ് ചെയ്യുക.

  1. -v  വെര്‍ബോസ് അഥവാ ക്രിയകള്‍ സ്ക്രീനില്‍ കാണിക്കുവാന്‍ വേണ്ടിയുള്ള കമാന്‍ഡ്
  2. -n  എത്ര തവണ ഓവര്‍റൈറ്റ് ചെയ്യണമെന്നു
  3. -u  ഓവര്‍റൈറ്റ് ചെയ്ത ശേഷം റിമൂവ് ചെയ്യും മുമ്പ് ട്രങ്കേറ്റ്  ചെയ്യാന്‍ വേണ്ടിയുള്ള കമാന്‍ഡ്
  4. -z  അവസാനമായി പൂജ്യങ്ങള്‍ കൊണ്ട് വീണ്ടും ഓവര്‍റൈറ്റ് ചെയ്യാന്‍ വേണ്ടിയുള്ള കമാന്‍ഡ്

നിങ്ങളുടെ കമ്പ്യൂട്ടറില്‍ ഗ്നു/ലിനക്സ്‌ ഇല്ലെങ്കില്‍ അതിനും പരിഹാരമുണ്ട്. ഇന്റര്‍നെറ്റില്‍ നിന്ന് ഏതെങ്കിലും ഗ്നു/ലിനക്സ്‌ ഡിസ്ട്രിബ്യൂഷന്‍ ഡൌണ്‍ലോഡ് ചെയ്തു ഒരു പെന്‍ഡ്രൈവില്‍ ബൂട്ടബിള്‍ ആയി സേവ് ചെയ്തെടുക്കുക. ഇത് എങ്ങനെ ചെയ്യും എന്നറിയാന്‍ ഇവിടെ നോക്കുക

വീണ്ടും ചില വൈറസ്‌ ചിന്തകള്‍

രോഗാണുക്കള്‍ മൂലമാണ്‌ മനുഷ്യരില്‍ രോഗങ്ങളുണ്ടാകുന്നത്‌. സ്വയം പെറ്റുപെരുകി സമൂഹത്തിലാകെ പടര്‍ന്നുപിടിച്ച്‌ അവ മനുഷ്യരേയും മൃഗങ്ങളേയും കൊന്നൊടുക്കാറുണ്ട്‌. ഇതേ പോലെ തന്നെയാണ്‌ നമ്മുടെ പാവം കമ്പ്യൂട്ടറിന്റെ കാര്യത്തിലും. ശരിയായ ചികിത്സ നല്‍കിയില്ലെങ്കില്‍ ചിലപ്പോള്‍ ചെറിയ അണുബാധ (ഇന്‍ഫെക്ഷന്‍) തന്നെ ഗുരുതരമായ പ്രശ്‌നങ്ങള്‍ക്കു വഴിവച്ചേക്കാം. ഉപയോക്താവിന്റെ അറിവോ അനുമതിയോ ഇല്ലാതെ സ്വയം കോപ്പി ചെയ്യുകയും ഒരു കമ്പ്യൂട്ടറില്‍ നിന്ന്‌ മറ്റൊന്നിലേയ്‌ക്ക്‌ എന്ന കണക്കില്‍ ഒരു കമ്പ്യൂട്ടര്‍ ശൃംഖലയാകമാനം വ്യാപിക്കാന്‍ കഴിവുമുള്ള കമ്പ്യൂട്ടര്‍ പ്രോഗ്രാം ആണ്‌ കമ്പ്യൂട്ടര്‍ വെറസ്‌. ലോക്കല്‍ കമ്പ്യൂട്ടറിനോ നെറ്റ്‌വര്‍ക്കിലെ ഇതര കമ്പ്യൂട്ടറുകള്‍ക്കോ തകരാറുകള്‍ ഉണ്ടാക്കാന്‍ കഴിയുന്ന വൈറസുകള്‍ ഉള്‍പ്പെടെയുള്ള അപകടകരമായ പ്രോഗ്രാമുകളെ പൊതുവില്‍ വിളിക്കുന്ന പേരാണ്‌ മാല്‍വെയര്‍. സ്പൈ‌വെയറുകള്‍, ആഡ്‌വെയറുകള്‍, ട്രോജന്‍ ഹോഴ്‌സുകള്‍, കമ്പ്യൂട്ടര്‍ വേമുകള്‍ തുടങ്ങിയവയാണ്‌ മാല്‍വെയര്‍ ഇനത്തിലെ ഇതര പ്രോഗ്രാമുകള്‍. പക്ഷേ അപകടകരമായ ഇത്തരം ഏതു പ്രോഗ്രാമുകളേയും പലരും വൈറസ്‌ എന്നാണ്‌ പൊതുവില്‍ തെറ്റായി വിളിക്കുന്നത്‌. ഇന്ന്‌ നിലവിലുള്ള മിക്ക മാല്‍വെയര്‍ പ്രോഗ്രാമുകളും ലക്ഷ്യം വയ്‌ക്കുന്നത്‌ വിന്‍ഡോസ്‌ ഓപ്പറേറ്റിംഗ്‌ സിസ്റ്റത്തെയാണ്‌. ഈയുള്ളവന്റെ വീക്ഷണത്തില്‍ ഇതിനു പ്രധാനമായും ഉള്ള കാരണങ്ങള്‍ നാല് എണ്ണമാണ്.

Continue Reading