നെറ്റിനു വേണ്ടി ഒരു പോരാട്ടം / Battle For The Net

പല ഓണ്‍ലൈൻ പൊതു താൽപ്പര്യ സംഘടനകളും സംയുക്തമായി സെപ്റ്റംബർ 10 ഇന്റർനെറ്റ്‌ സ്ലോഡൌണ്‍ ദിനമായി ആചരിച്ചു. അതിന്റെ വിശദവിവരങ്ങൾ മെയിലിംഗ് ലിസ്റ്റുകളിലൂടെയും സോഷ്യൽ മീഡിയകളിലൂടെയും പ്രചരിക്കുകയും ചെയ്തു. ആഹ്വാനത്തിന്റെ ഒരു ഏകദേശ പദാനുപദ മലയാള പരിഭാഷ ചുവടെ ചേർക്കുന്നു.

നാളെ നിങ്ങൾ ഉണർന്നെണീക്കുമ്പോൾ നിങ്ങളുടെ ഇന്റർനെറ്റ് ഇതുപോലിരുന്നാൽ നിങ്ങൾ എന്ത് ചെയ്യും?നിങ്ങളുടെ പ്രിയപ്പെട്ട എല്ലാ വെബ്‌സൈറ്റുകളും ലോഡ് ചെയ്യാൻ വളരെയധികം സമയമെടുക്കുകയും നിങ്ങളുടെ ഐ.എസ്.പി.യിൽ നിന്ന് അവർ അംഗീകരിച്ച “ഫാസ്റ്റ് ലൈൻ” സൈറ്റുകളിലൊന്നിലേക്ക് മാറുകയും ചെയ്യൂ എന്ന ശല്യപ്പെടുത്തുന്ന നോട്ടിഫിക്കേഷൻ കിട്ടിക്കൊണ്ടിരിക്കുകയും ചെയ്യുന്ന സ്ഥിതി ഒന്നു സങ്കൽപ്പിച്ചു നോക്കൂ. നമുക്ക് നഷ്ടപ്പെടുന്നത് എന്തൊക്കെയെന്നു മനസ്സിലാക്കൂ: അസാധാരണമായവ, സമാന്തരമായവ, താൽപ്പര്യം ജനിപ്പിക്കുന്നവ, നമുക്ക് ബോധോദയം നൽകുന്നവ അങ്ങനെ ഒരു സാധാരണ മെയിൻ സ്ട്രീം കേബിൾ ടീവിയിൽ നിന്ന് ഇന്റർനെറ്റിനെ അത്രമേൽ കൂൾ ആക്കുന്ന ഘടകങ്ങളെല്ലാം.  കോംകാസ്റ്റും വേരിസോണും ആയി വ്യാപാരബന്ധങ്ങൾ മാത്രമുള്ള ചില ന്യൂസ്‌ സൈറ്റുകൾ മാത്രം നിങ്ങൾക്ക് സുഗമമായി കണക്റ്റ് ചെയ്യാൻ സാധിക്കുന്നുള്ളൂ എന്ന് വന്നാൽ? ഫെഡറൽ കമ്മ്യൂണിക്കേഷൻസ് കമ്മീഷൻ നൽകിയ അന്ത്യശാസനകാലാവധിയ്ക്ക് ഒരൽപം മുമ്പ് സെപ്റ്റംബർ 10-നു വിവിധ പൊതു താല്പര്യ സംഘടനകൾ വെബ്‌ സൈറ്റുകൾക്കും ഇന്റർനെറ്റ്‌ ഉപയോക്താക്കൾക്കുമായി “ഇന്റർനെറ്റ്‌ സ്ലോ ഡൌണി”നായി ഒരു തുറന്ന ആഗോള ആഹ്വാനം നല്കി – നെറ്റ് ന്യൂട്രാലിറ്റി തകിടം മറിച്ചു കൊണ്ട് ടീം കേബിൾ നൽകുന്ന വെബ്‌ എങ്ങനെ ആയിരിക്കും എന്നറിയാൻ. നെറ്റ് ന്യൂട്രാലിറ്റി എന്നത് വിശദീകരിക്കാൻ ഒരൽപം വിഷമമാണ്. അതുകൊണ്ടാണ് തുറന്ന ഇന്റർനെറ്റ്‌ നഷ്ടമായാൽ എങ്കിൽ ലോകം എങ്ങനെ അപകടത്തിലാകും എന്ന് മനസ്സിലാക്കാൻ ഇത്തരം ഒരു പ്രവൃത്തി സഹായകമാകും എന്ന് ഞങ്ങൾ പ്രതീക്ഷിക്കുന്നത്.

നിങ്ങൾക്ക് ഒരു വെബ്സൈറ്റോ ബ്ലോഗോ റ്റംബ്ലറോ ഉണ്ടെങ്കിൽ കോഡ് എടുത്ത് #InternetSlowdown-ൽ ചേരൂ. https://battleforthenet.com/sept10thEveryone അല്ലെങ്കിൽ സ്ലോ ഡൌണിനെ പറ്റി നിങ്ങൾക്ക് ലോകത്തെ അറിയിക്കാൻ കഴിയുന്ന നിരവധി മാർഗ്ഗങ്ങൾ ഇവിടെ നിരത്തിയിരിക്കുന്നു: http://tumblr.fightforthefuture.org/post/96020972118/be-a-part-of-the-great-internet-slowdown ക്രിയേറ്റീവ് ഷെയർ ചെയ്യൂ, എന്താണ് അതുകൊണ്ട് എന്താണ് ചെയ്യേണ്ടതെന്ന് പറയേണ്ടല്ലോ. സെപ്റ്റംബർ 10-നു നെറ്റിൽ കാണാം.

If you woke up tomorrow, and your internet looked like this, what would you do? Imagine all your favorite websites taking forever to load, while you get annoying notifications from your ISP suggesting you switch to one of their approved “Fast Lane” sites.Think about what we would lose: all the weird, alternative, interesting, and enlightening stuff that makes the Internet so much cooler than mainstream Cable TV. What if the only news sites you could reliably connect to were the ones that had deals with companies like Comcast and Verizon?On September 10th, just a few days before the FCC’s comment deadline, public interest organizations are issuing an open, international call for websites and internet users to unite for an “Internet Slowdown” to show the world what the web would be like if Team Cable gets their way and trashes net neutrality. Net neutrality is hard to explain, so our hope is that this action will help SHOW the world what’s really at stake if we lose the open Internet.If you’ve got a website, blog or tumblr, get the code to join the #InternetSlowdown here: https://battleforthenet.com/sept10thEveryone else, here’s a quick list of things you can do to help spread the word about the slowdown: http://tumblr.fightforthefuture.org/post/96020972118/be-a-part-of-the-great-internet-slowdown Get creative! Don’t let us tell you what to do. See you on the net September 10th!

via Battle For The Net.

ഒണിയൻ റിപ്പബ്ളിക്ക്

ടെയിൽസ് ഓപ്പറേറ്റിംഗ് സിസ്റ്റം ഉപയോഗിക്കാൻ തുടങ്ങിയതു മുതൽ വിവിധ തരം എച്ച്.ടി.എം.എൽ.പേജുകളെ അടുത്തറിയാൻ അവസരമായി എന്ന് പറയാം. വേൾഡ് വൈഡ് വെബ്ബ്, സർഫെയ്സ് വെബ്ബ്, ഡീപ് വെബ്ബ്, ഡാർക്ക് വെബ്ബ് – ഇവ തമ്മിലുള്ള വ്യത്യാസം എന്തെന്ന് പല ഇടങ്ങളിലും തെരഞ്ഞു. പലയിടത്തും പല പല ആശയക്കുഴപ്പമുണ്ടാക്കും വിധമുള്ള വിശദീകരണങ്ങളാണ് കൊടുത്തിട്ടുള്ളത്. ഇംഗ്ലീഷ് വിക്കിപീഡിയയിൽ ഏതാണ്ട് ആധികാരികമായ ഒരു വിവരണം ഉണ്ടെങ്കിലും ഇനിയും കുറച്ചുകൂടി അപ്ഡേറ്റ് ചെയ്യാനുണ്ടെന്നു ഒറിജിനൽ ഓതർ തന്നെ ടോക്ക് പേജിൽ പറയുന്നുണ്ട്. ചില മലയാളം പോർട്ടലുകളിലും ഡീപ് വെബ്ബിനെയും ഡാർക്ക് വെബ്ബിനെയും പരസ്പരം കൂട്ടിക്കുഴച്ചാണ് വിവരിക്കുന്നത്. ഡാർക്ക് വെബ്ബ് എന്നത് വേൾഡ് വൈഡ് വെബ്ബിന്റെ ഭാഗമാണോ അല്ലയോ എന്ന് ഇപ്പോഴും അത്ര നിശ്ചയം പോരാ.

വേൾഡ് വൈഡ് വെബ്ബിന്റെ സെർച്ചബിൾ ആയ ചെറിയൊരു ഭാഗം മാത്രമാണ് നാം ഏറ്റവും കൂടുതൽ ഉപയോഗിക്കുന്ന സർഫെയ്സ് വെബ്‌. സെർച്ചബിൾ അല്ലാത്ത വലിയൊരു ഭാഗമാണ് ഡീപ് വെബ്ബ്. വെറും 19 ടെറാ ബൈറ്റ് വലിപ്പം മാത്രം സർഫെയ്സ് വെബ്ബിന് ഉള്ളപ്പോൾ ഡീപ് വെബ്ബിന്റെ വലിപ്പം 7500 ടെറാ ബൈറ്റ് ആണ് അതായത് ഏതാണ്ട് 394.75 മടങ്ങ്‌! പക്ഷെ വെറും സാമാന്യബുദ്ധി കൊണ്ട് മാത്രം ആലോചിച്ചാൽ എങ്ങനെ ഡീപ് വെബ്ബിനു  ഇത്രയും ഭീമാകാരമായ വലിപ്പം കിട്ടി എന്ന് മനസ്സിലാക്കാനാവും. കാരണം വെബ്ബിൽ നമുക്ക് ലഭിക്കുന്ന പേജുകൾ എല്ലാം തന്നെ സൈറ്റ് ഉടമകൾ ഓപ്പണ്‍ ആക്കി ഇട്ടിരിക്കുന്ന ഭാഗമാണ്. ലോഗിൻ ചെയ്താൽ മാത്രം ലഭിക്കുന്ന അനേകം സേവനങ്ങൾ കൂടി വെബ്ബിൽ ലഭ്യമാണ്, ഇവയൊന്നും തന്നെ സെർച്ചബിൾ അല്ലതാനും. ഇവ കൂടാതെ റോബോട്ട്സ് മെറ്റാ ടാഗ് ഉപയോഗിച്ച് സെർച്ചബിൾ അല്ലാതാക്കിയിരിക്കുന്ന സൈറ്റുകളും ഇതിൽ പെടും. എച്ച്.ടി.എം.എൽ. അല്ലാത്ത നോണ്‍ സ്റ്റാൻഡേർഡ് സൈറ്റുകൾ ആണ് മറ്റൊരു ഭാഗം. ഇതെല്ലാം കൂടി കൂട്ടിവയ്ക്കുമ്പോഴാണ്‌ ഡീപ് വെബ്ബ് ആകുന്നത്.

വേൾഡ് വൈഡ് വെബ് / ഡീപ് വെബ് / ഡാർക്ക്‌ വെബ്

വേൾഡ് വൈഡ് വെബ്ബ് / ഡീപ് വെബ്ബ് / ഡാർക്ക്‌ നെറ്റ്

ഈ ഡീപ് വെബ്ബിനകത്തു ഒളിപ്പിച്ചു വച്ചിരിക്കുന്ന മറ്റൊരു ലോകം കൂടിയുണ്ട് – അതാണ്‌ ഡാർക്ക് വെബ്ബ് അഥവാ ഡാർക്ക്നെറ്റ്. സാധാരണ വെബ്‌ ബ്രൌസറുകൾ വഴി ഇത് കണ്ടെത്താനാവില്ല എങ്കിലും  ഇത് സെർച്ചബിൾ ആണ് എന്നതാണ് സത്യം (എന്നാൽ ഇവിടെയും തികച്ചും പ്രൈവറ്റ് ആയ സൈറ്റുകൾ ഉണ്ടത്രേ). ഡീപ് വെബ്ബിന്റെ വളരെ വളരെ ചെറിയൊരു ഭാഗം മാത്രമാണ് ഡാർക്ക്‌ നെറ്റ്. ടെയിൽസിനുള്ളിലെയ്ക്ക് കുറച്ചുകൂടി ഊളിയിട്ടിറങ്ങിയപ്പോഴാണ്‌ ഡാർക്ക്‌നെറ്റിനെ അടുത്തറിയുന്നത്.

ഉള്ളിത്തൊണ്ടിനുള്ളിലെ രഹസ്യലോകം

പുറമേ നിന്നു നോക്കുമ്പോൾ ഒരു സാധാരണ ഉള്ളി. പുറന്തൊലി ഊർത്തി നീക്കുമ്പോൾ വീണ്ടും ഒരു പാളി കൂടി ഊർത്തി നോക്കാൻ തോന്നും, അങ്ങനെ ഏറ്റവും അകത്തെ പാളിയിലെത്തുമ്പോൾ കാണാം ഒരു സമാന്തര ലോകം തെളിഞ്ഞുവരുന്ന കാഴ്ച. ടാർസൻ കണ്ട പെല്യൂസിഡാർ പോലെ, ആലീസ് കണ്ട അത്ഭുതലോകം പോലെ ഒരു അന്തർലോകം. ഇവിടെ പറഞ്ഞുവരുന്നത് ഡാർക്ക്‌ നെറ്റിനെ പറ്റിയാണ്. ഇന്റർനെറ്റിനുള്ളിൽ ഒളിപ്പിച്ചുവയ്ക്കപ്പെട്ട ഇരുണ്ട ഒരു ലോകം. സർഫെയ്സ് വെബ്ബിനെക്കാൾ 7000 മടങ്ങ്‌ വലിപ്പമുള്ള ഡീപ് വെബ്ബിനുള്ളിൽ ഒളിപ്പിച്ചു വച്ച ഈ ലോകത്തിന്റെ ഉള്ളറകളിൽ നിന്ന് നിങ്ങൾക്ക് ലഭിക്കുക പുറം ലോകത്തു നിന്ന് ഒരിക്കലും ലഭിക്കാത്ത അറിവുകളാ യിരിക്കും. ഇവിടെ നിരത്തപ്പെട്ട അറിവുകൾക്കൊന്നിനും പക്ഷേ അറിയപ്പെട്ട ഉടമസ്ഥരില്ല, ആരെഴുതിയതെന്നോ സമാഹരിച്ചതെന്നൊ അജ്ഞാതം. ആരൊക്കെ ഈ വിവരങ്ങൾ ശേഖരിക്കുന്നു എന്നും ആർക്കും അറിയാൻ കഴിയില്ല. അതുകൊണ്ട് തന്നെ ഭരണകൂടത്തിന്റെ ചാരപ്രവർത്തനങ്ങൾ ഇവിടെ നടക്കില്ല. വിവരം കൊടുക്കുന്നവനും വിവരം ശേഖരിക്കുന്നവനും ഒരിക്കലും വെള്ളിവെളിച്ചത്തിലില്ല. ഇന്റർനെറ്റിന് സെൻസർഷിപ് ഏർപ്പെടുത്തിയിട്ടുള്ള രാജ്യങ്ങളിലും ഭരണകൂട ചാരപ്രവർത്തനങ്ങൾ പൌരസ്വാതന്ത്ര്യത്തിനു വിലങ്ങുതടിയായ രാജ്യങ്ങളിലെയും പൌരൻമാർക്ക് വലിയൊരു ആശ്രയമാണ് ഡാർക്ക്‌നെറ്റ്.

എന്തുകൊണ്ട് ഡാർക്ക്‌ നെറ്റ് എന്ന പേര്?

ആഴങ്ങളിലേയ്ക്ക് ഇറങ്ങിച്ചെന്നാൽ ഒരുപക്ഷെ സ്നോഡന്‍ പുറത്തുവിട്ട സകൾ രേഖകളും ഇവിടെ നിന്ന് മുങ്ങിയെടുക്കാൻ കഴിഞ്ഞേക്കും. ഗഹനമായ ശാസ്ത്ര പ്രബന്ധങ്ങൾ വായിക്കാനായെക്കും, ബാഹ്യലോകം നമ്മിൽനിന്നും മറച്ചു വച്ച വിവരങ്ങൾ ആരുമറിയാതെ പുറംലോകത്തേയ്ക്ക് തിരിച്ചു കൊണ്ടുവരാനുള്ള ഒരു സംവിധാനമായും ഇതിനെ കാണാം. എങ്കിലും ആർക്കും പരസ്പരം അറിയാൻ കഴിയാത്ത സാഹചര്യങ്ങളിൽ പലരും പലതും മുതലെടുക്കും. അവിടെ സാമൂഹ്യ നേതാക്കളുണ്ടാകും, സാമൂഹ്യ വിരുദ്ധരുണ്ടാകും. അതുകൊണ്ട് തന്നെ ഈ രഹസ്യലോകത്തിനു നിഷിദ്ധമായതൊന്നുമില്ല. ഇവിടത്തെ വിപണിയിൽ ഇല്ലാത്ത ചരക്കുകളില്ല. കാരണം ആളറിയാതെ വില്ക്കാം, ആരുമറിയാതെ വാങ്ങാം. ഷാർപ് ഷൂട്ടർമാരെ ഇവിടെ നിന്ന് ഹയർ ചെയ്യാം, മയക്കുമരുന്നുകൾ ഓർഡർ ചെയ്യാം. എന്തിന് മനുഷ്യമാംസം വരെ വിൽക്കുന്ന ഉള്ളി വിപണികൾ ഉണ്ടെന്നാണ് പറയപ്പെടുന്നത്‌. ഇടപാടുകളെല്ലാം നടക്കുന്നത് ഡാർക്ക്‌ നെറ്റിന്റെ ഔദ്യോഗിക കറൻസി ആയ ബിറ്റ് കോയിനിൽ  മാത്രം. ബാലരതിയും ബോംബ്‌ ഉണ്ടാക്കാൻ ഉള്ള ട്രെയിനിംഗ് മാനുവലുകളും ഇവിടെ സുലഭമത്രെ. പല കരിന്തൊപ്പി ഹാക്കർമാരുടെയും പ്ളെയിൻ ടെക്സ്റ്റ്‌ വെബ്‌ സൈറ്റുകൾ ഇവിടെ കണ്ടുമുട്ടാം. അതുകൊണ്ട് പലരും ഈ ലോകത്തെ കാണുന്നത് ഒരു കറുത്ത ലോകമായാണ്. ഡാർക്ക്‌നെറ്റ് എന്ന പേരു വന്ന വഴിയതാണ്.

ഉള്ളി റിപ്പബ്ളിക്കിലേയ്ക്ക് ഒരു യാത്ര

പാസ്പോർട്ടില്ലാതെ എന്ത് യാത്ര? ഉള്ളി റിപ്പബ്ളിക്കിലേയ്ക്ക് സന്ദർശനം നടത്താനും വേണം ഒരു പാസ്പോർട്ട്. അതിന്റെ പേരാണ് ടോർ ബ്രൌസർ. സാധാരണ ബ്രൌസറിലൂടെ ഡാർക്ക്‌ നെറ്റ് ഉപയോഗിക്കാനാവില്ല. ടോർ ബ്രൌസർ ബണ്ടിൽ ഉപയോഗിച്ചു മാത്രമേ ഡാർക്ക് വെബ്ബ് സെർച്ച്‌ ചെയ്യാൻ കഴിയൂ.

ഈ വീഡിയോ കണ്ടു നോക്കൂ

ടോർ ബണ്ടിൽ വഴി ടോർ നെറ്റ്‌വർക്കിലേയ്ക്ക് ഒരു ഉപയോക്താവ് പ്രവേശിച്ചു കഴിഞ്ഞാൽ അയാളെ പിന്തുടരാൻ വളരെയേറെ ബുദ്ധിമുട്ടാണ്. ആയിരക്കണക്കിന് പ്രോക്സി സർവ്വറുകളുടെ ബൃഹത്തായ ഒരു ശൃംഖലയാണ് ടോർ നെറ്റ്‌വർക്ക്. ക്രമരഹിതമായ ഇടവേളകളിൽ ഈ പ്രോക്സികൾ മാറിക്കൊണ്ടിരിക്കും. ടോറിൽ പ്രവേശിച്ച ഉടനെ ഉപയോക്താവിന്റെ ഐ.പി. പരിശോധിച്ചാൽ ഒരു പക്ഷെ ആദ്യം കാണിക്കുന്ന ലൊക്കേഷൻ ഇറ്റലിയിലെ ലെച്ചെ എന്ന സ്ഥലത്തെ ഐ.പി. ആയിരിക്കും. ഒരഞ്ചു മിനിട്ട് കഴിഞ്ഞു നോക്കുമ്പോൾ അത് ബ്രസീലിലെ സാവോ പോളോ ആയിട്ടുണ്ടാകും. സ്പൈയിംഗ് ഏജൻസികളെ ഈ ഐപി വ്യതിയാനങ്ങൾ ശരിക്കും കുഴയ്ക്കും. എവിടെ നിന്ന് ട്രാഫിക് ഒറിജിനേറ്റ് ചെയ്തു എന്ന് ഒരു സൂചനയും അവർക്ക് ലഭിക്കില്ല.

ഡക്ക്ഡക്ക്ഗോ, സ്റ്റാർട്ട്‌പേജസ്, ആഹ്മിയ.എഫ്.ഐ., ഗ്രാംസ് തുടങ്ങിയ സെർച്ച്‌ എൻജിനുകൾ ഉപയോഗിച്ച് ഒണിയൻ റിപ്പബ്ളിക്കിലെ പേജുകൾ തിരയാം.

ഭരണകൂടം സെൻസർ ചെയ്തിരിക്കുന്ന അനേകം രേഖകൾ ഇവിടെ ലഭ്യമാണ്, കിരാതമായ ഭരണകൂടങ്ങൾക്കെതിരെയുള്ള ചർച്ചകളും ഇവിടെ ചൂടുപിടിച്ചു നടക്കുന്നു. സർക്കാരിന്റെ ഒളിഞ്ഞുനോട്ടം കൂടാതെ സ്വതന്ത്രമായി വെബ്‌ ഉപയോഗിക്കാം എന്നതാണ് ഡാർക്ക്‌ നെറ്റിനെ ഉപയോക്താക്കൾക്കിടയിൽ പ്രിയങ്കരമാക്കുന്നത്. എങ്കിലും ചൈൽഡ് പോർണോഗ്രാഫി മുതൽ മയക്കുമരുന്ന് കച്ചവടം വരെ നടത്തുന്ന പോർട്ടലുകൾ ഡാർക്ക്‌ വെബ്ബിൽ സജീവമാണ്. ആരാണ് ഇത്തരം സൈറ്റുകൾ ഹോസ്റ്റ് ചെയ്തിരിക്കുന്നതെന്നോ ആരൊക്കെ ഈ സേവനങ്ങൾ ഉപയോഗിക്കുന്നുവെന്നോ ആർക്കും അറിയാൻ കഴിയാത്തവിധമാണ് ഡാർക്ക്‌ വെബ്ബിന്റെ സജ്ജീകരണം. പ്രൈവസി എന്ന ഒരേയൊരു ലക്ഷ്യം മാത്രമാണ് ഡാർക്ക്‌ നെറ്റിനുള്ളത് – അത് നല്ലതിനോ തീയതിനോ എന്ന് ഉടമകളും ഉപയോഗിക്കുന്നവരും തീരുമാനിച്ചോളൂ, നിങ്ങൾക്ക് നല്ലത് വേണമെങ്കിൽ അതിവിടുണ്ട്, ചീത്ത വേണമങ്കിൽ അതുമിവിടുണ്ട്, ആവശ്യമുള്ളത് സ്വയം തെരഞ്ഞെടുക്കുക. ഇതാണ് ഡാർക്ക്‌ നെറ്റിന്റെ നിലപാട്.
എങ്കിലും അനോണിമസ് പോലുള്ള ഇന്റർനെറ്റ്‌ ആക്ടിവിസ്റ്റ് ഗ്രൂപ്പുകൾ ചില ഘട്ടങ്ങളിൽ ഇടപെട്ട് ഇത്തരം സാമൂഹ്യവിരുദ്ധ സൈറ്റുകളെ ആക്രമിച്ചു നശിപ്പിക്കാറുണ്ട്. 2011-ൽ സജീവമായിരുന്ന നാൽപ്പതോളം ചൈൽഡ് പോർണോഗ്രാഫി സൈറ്റുകൾ ആണ് അനോണിമസ് തകർത്തത്. ഫ്രീഡം ഹോസ്റ്റിംഗ് എന്ന ഹോസ്റ്റിംഗ് കമ്പനിയെയാണ് ഇപ്രകാരം അനോണിമസ് തകർത്തത്.  2013-ൽ ഒരു യു.എസ്.ഫെഡറൽ ഏജൻസിയും ഇത്തരത്തിൽ അനേകം സൈറ്റുകൾ നശിപ്പിക്കുകയുണ്ടായി എന്നും പറയപ്പെടുന്നു.

കൂടുതൽ വായനയ്ക്ക്

  1. http://www.madhyamam.com/technology/node/504
  2. http://boolokam.com/archives/142105
  3. http://www.deshabhimani.com/periodicalContent5.php?id=610
  4. http://www.deepdotweb.com/2014/04/08/grams-darknetmarkets-search-engine/
  5. http://gawker.com/the-attack-on-the-dark-net-took-down-a-lot-more-than-ch-1081274609

ഓണ്‍ലൈൻ പ്രൈവസി മോണോമാനിയ

ഇക്കഴിഞ്ഞ ഏതാനും ദിവസങ്ങൾ ടെയിൽസ് ഓപ്പറേറ്റിംഗ് സിസ്റ്റത്തിലൂടെയായിരുന്നു കടന്നു പോയത്. ഓണ്‍ലൈൻ പ്രൈവസി എന്ന ആശയത്തിൽ മോണോമാനിയ ബാധിച്ചതു പോലുള്ള ദിവസങ്ങൾ. കുറെയേറെ പുതിയ അറിവുകൾ, പുതിയ വിഹ്വലതകൾ… ആഗോള ഭരണകൂടങ്ങളുടെ ഭീകരമുഖം ഒരു വശത്ത്, ഈ ഭരണകൂടഭീകരതയെ പറ്റി തികച്ചും അജ്ഞരായ നിസ്സഹായരായ പൌരന്മാർ മറുപക്ഷത്ത്. ആശയവിനിമയത്തിനുള്ള നവസാങ്കേതിക വിദ്യകൾ ഭരണകൂടങ്ങൾ കുറഞ്ഞ വിലയ്ക്കു വിൽക്കുന്നു, അതുപയോഗിച്ചു പൌരന്മാർ നടത്തുന്ന ആശയവിനിമയം ഈ ഭരണകൂടങ്ങൾ തന്നെ മൊത്തമായി ചോർത്തുന്നു, ഇതിനെ ചെറ്റപൊക്കിത്തരം എന്നല്ലാതെ എന്തു വിളിക്കണം? A bloody peeping government. (ഒരു സംഭവം ഓർക്കുന്നു, പണ്ട് നമ്മുടെ നാട്ടിലൊരു ഹോട്ടലുണ്ടായിരുന്നു, പേരൊന്നും അറിയില്ല – പറഞ്ഞു കേട്ട കഥയാണ് : വിവാഹം കഴിഞ്ഞ് ഹണിമൂണ്‍ ആഘോഷിക്കുന്ന നവദമ്പതികൾക്ക് ഈ ആഡംബര ഹോട്ടലിൽ ഏതാണ്ട് സൌജന്യമെന്നോണം മുറി കൊടുക്കും, നിസ്സാര വാടക. നിസ്സാരവിലയ്ക്ക് ഭക്ഷണം. കുറെ പേർ ഈ സൌജന്യം ഉപയോഗപ്പെടുത്തി. കുറച്ചു നാൾ കഴിഞ്ഞപ്പോൾ അവരിൽ പലരുടെയും സെക്സ് ടേപ്പുകൾ വെളിയിൽ വന്നപ്പോൾ മാത്രമാണ് തങ്ങൾ ആ ഹോട്ടൽതാമസത്തിനു നൽകിയ വില എത്രയാണെന്ന് അവർ തിരിച്ചറിഞ്ഞതുതന്നെ.)

ഭരണകൂട ചെറ്റപൊക്കിത്തരങ്ങൾക്കെതിരെയുള്ള മുന്‍കരുതലായാണ് ടെയിൽസ് ഓപ്പറേറ്റിംഗ് സിസ്റ്റത്തെ ഞാൻ കാണുന്നത്. അതുപയോഗിക്കുന്നതിലൂടെ ഇന്റർനെറ്റിന് ഒരു ഇരുമ്പുമറ തീർക്കാം, ഭരണകൂട കങ്കാണികൾ ഒരുക്കുന്ന സർവെയ്ലൻസ് ക്യാമറകളിൽ നിന്ന് സംരക്ഷണം നേടാം. തികച്ചും ആത്മവിശ്വാസത്തോടെ ഇന്റർനെറ്റിൽ എന്തും തിരയാം. വേൾഡ് വൈഡ് വെബ്ബും ഡീപ് വെബ്ബിനകത്ത് ഒളിപ്പിച്ചു വച്ചിരിക്കുന്ന ഡാർക്ക്‌ നെറ്റും അടക്കം എന്തും ബ്രൌസ് ചെയ്യാം. എൻക്രിപ്റ്റ് ചെയ്തു മെയിലുകൾ അയയ്ക്കാം. ആശ്വസിക്കാനുള്ള വക നൽകുന്ന കാര്യങ്ങൾ പലതും ചുറ്റും നടക്കുന്നു. ഈയിടെയായി എൻക്രിപ്ഷൻ എന്ന ആശയത്തിന് വ്യാപകമായ സ്വീകരണം ലഭിക്കുന്നു. പലരും തങ്ങളുടെ പബ്ളിക് കീ പ്രസിദ്ധപ്പെടുത്തുന്നു.

സ്നോഡന്‍ അഴിച്ചു വിട്ട ഭൂതം ഭീതി പരത്താന്‍ തുടങ്ങിയത് ഒരു വര്‍ഷം കഴിഞ്ഞതിനു ശേഷമാണെന്നു തോന്നുന്നു. പല പ്രമുഖപോര്‍ട്ടലുകളിലും ബ്ളോഗുകളിലും ഒക്കെ 2014 ജൂണ്‍ 5 മുതല്‍ പോസ്റ്റുകളുടെ കുത്തൊഴുക്കാണ്. അതിനു കാരണവുമുണ്ട് – ഇന്റര്‍നെറ്റിനോടുള്ള നമ്മുടെ അടിമത്തം ഓരോ വര്‍ഷം ചെല്ലുന്തോറും പതിന്മടങ്ങ് കണ്ട് വര്‍ദ്ധിച്ചു വരികയാണ്. ഒന്നു രണ്ടു കൊല്ലം മുമ്പുവരെ ഡെസ്ക്ടോപ്പ് / ലാപ്ടോപ്പ് കമ്പ്യൂട്ടറുകളില്‍ മാത്രമേ ഇന്റര്‍നെറ്റ് ലഭിച്ചിരുന്നുള്ളൂ. അന്നുണ്ടായിരുന്നതിന്റെ നാലിരട്ടി ഉപയോക്താക്കളാണ് ഇന്ന് സ്മാര്‍ട്ട്ഫോണുകളില്‍ ഇന്റര്‍നെറ്റ് ലോകത്തില്‍ അഭിരമിക്കുന്നത്.

കൂടുതല്‍ കൂടുതല്‍ പേര്‍ ഇന്റര്‍നെറ്റ് ഉപയോഗിക്കാൻ തുടങ്ങിയതോടെ ആഗോള ചാരസംഘടനകള്‍ക്ക് പണി എളുപ്പമായിത്തുടങ്ങി. ഓണ്‍ലൈൻ സാമൂഹ്യ കൂട്ടായ്മകള്‍ സജീവമായതോടെ, അതില്‍ അഭിരമിക്കുന്നവരുടെ എണ്ണം കുതിച്ചുയരാൻ തുടങ്ങിയതോടെ ചാരസംഘടനകള്‍ ആനന്ദലഹരിയില്‍ മുഴുകിയെന്നു വേണം പറയാൻ. ലോകം മുഴുവൻ ശൃംഖലകളുള്ള നിരീക്ഷണ സംവിധാനത്തിന്റെ തുടക്കം അവിടെ നിന്നാണ്.

200 ബില്ല്യണ്‍ ഇ-മെയിലുകളാണ് പ്രതിദിനം ലോകമൊട്ടാകെ അയയ്ക്കപ്പെടുന്നത്. സന്ദേശങ്ങള്‍ അയയ്ക്കാന്‍ ഏറ്റവുമധികം പ്രായോഗികമായ ടൂള്‍ ആണെങ്കിലും ഇമെയില്‍ സന്ദേശങ്ങള്‍ ശ്രദ്ധയോടെ കൈകാര്യം ചെയ്തില്ലെങ്കില്‍ സ്വകാര്യതയുടെ കാര്യത്തില്‍ സന്ധി ചെയ്യപ്പെട്ടേക്കാം. ഇന്റര്‍സെപ്ഷൻ, ഐഡന്റിറ്റി തെഫ്റ്റ്, മോണിറ്ററിംഗ് തുടങ്ങിയ നടപടികള്‍ക്ക് നാമയയ്ക്കുന്ന മെയലുകള്‍ വിധേയമായേക്കാം. അയയ്ക്കപ്പെടുന്ന മെയിലുകളില്‍ ഏതാണ്ട് മിക്കവാറും തന്നെ ആവര്‍ത്തിച്ചുള്ള യന്ത്രവായനകള്‍ക്കും ഒരുപക്ഷേ മനുഷ്യവായനകള്‍ക്കും ശേഷമാകും ഉദ്ദിഷ്ടവ്യക്തിയ്ക്ക് ലഭിക്കുക.

ഇമെയില്‍ അയയ്ക്കാൻ വെബ്ബ് മെയിലിന് പകരം ഇമെയില്‍ ക്ളയന്റ് ഉപയോഗിക്കുക (കഴിയുമെങ്കില്‍ സ്വതന്ത്ര ആപ്ളിക്കേഷൻ ആയ തണ്ടര്‍ബേഡ് / അല്ലെങ്കില്‍ ക്ലോവ്സ് ഉപയോഗിക്കുക), അതില്‍ നിന്നയയ്ക്കുന്ന എല്ലാ മെയിലുകളും എൻക്രിപ്റ്റ് ചെയ്തു് അയയ്ക്കുക, ടോര്‍ ബ്രൗസറിലൂടെ മാത്രം ഇന്റര്‍നെറ്റ് ഉപയോഗിക്കുക – ഇത്രയും കാര്യങ്ങള്‍ മാത്രം ചെയ്താല്‍ പകുതി പ്രശ്നങ്ങള്‍ക്ക് പരിഹാരമാകും. ടെയില്‍സ് പോലെയുള്ള അതീവ സുരക്ഷിതമായ ഓപ്പറേറ്റിംഗ് സിസ്റ്റം ഉപയോഗിക്കുകയാണെങ്കില്‍ ബാക്കി പകുതി കൂടി പരിഹരിക്കാം.

സ്നോഡന്റെ വെളിപ്പെടുത്തലുകളുടെ ഒന്നാം വാര്‍ഷികത്തോടനുബന്ധിച്ച് ഇന്റര്‍നെറ്റ് ഡിഫൻസ് ലീഗ് നടത്തിയ ആഗോള കാംപെയിനിന്റെ ചുവടുപിടിച്ച് ഗൂഗിള്‍ വരെ തങ്ങളുടെ ഇ-മെയില്‍ സര്‍വ്വീസില്‍ എൻക്രിപ്ഷൻ സംവിധാനങ്ങള്‍ അവതരിപ്പിക്കാന്‍ നിര്‍ബന്ധിതരായി. ഇന്റര്‍നെറ്റ് സുരക്ഷയെപ്പറ്റി വളരെമുമ്പേതന്നെ പ്രതിബദ്ധത തെളിയിച്ചിട്ടുള്ള വേഡ്പ്രസ്സ് ആകട്ടെ ഈ വര്‍ഷം മദ്ധ്യത്തോടെ തങ്ങളുടെ എല്ലാ സബ്ബ്ഡൊമൈനുകളിലൂം എസ്.എസ്.എല്‍. ഉറപ്പാക്കുമെന്ന് പ്രഖ്യാപിച്ചു കഴിഞ്ഞു.

ഇതൊക്കെയാണെങ്കിലും 100% സുരക്ഷിതത്വം ഒരു സേവനങ്ങളും ഉറപ്പു നല്‍കുന്നില്ല. ഗൂഗിള്‍ പോലുള്ള കോര്‍പ്പറേറ്റ് ഭീമന്മാര്‍ സൗജന്യമായി നല്‍കുന്ന സേവനങ്ങളെ വിശ്വസിക്കുന്നതിലും അപകടമുണ്ട്. ഇ-മെയില്‍ എൻക്രിപ്റ്റ് ചെയ്യാന്‍ ഉപയോഗിക്കുന്ന പീ.ജീ.പി., ഗ്നൂപീജി കീറിംഗുകളെ പോലും ക്വാണ്ടം സൂപ്പര്‍ കമ്പ്യുട്ടറുകള്‍ ഉപയോഗിച്ച് തകര്‍ക്കാൻ സാദ്ധ്യമാണെന്ന് കരുതപ്പെടുന്നു.

സ്വകാര്യത പണയം വച്ച് ഇന്റർനെറ്റ്‌ ഉപയോഗിക്കേണ്ടതുണ്ടോ?

ചെറിയൊരു മിനിക്കഥ.

പകലും രാവും മുഴുവൻ നീണ്ട കഠിനമായ പണിയായിരുന്നു. അതിസാഹസികമായി സംഘടിപ്പിച്ച രഹസ്യരേഖകൾ അവലോകനം ചെയ്ത് നാൽപ്പതു പേജുള്ള നെടുങ്കൻ റിപ്പോർട്ട് ടൈപ്പ് ചെയ്തു കഴിഞ്ഞപ്പോഴേയ്ക്കും നേരം പുലരാറായി. ന്യൂ ഓർലിയൻസിലെ സുഹൃത്തിന് അത് അതീവ രഹസ്യവിഭാഗത്തിൽപെടുന്ന ഇമെയിൽ സന്ദേശമായി, പഴുതുകൾ അടച്ച ക്രിപ്റ്റോഗ്രാഫിക് പൂട്ടിട്ട് പൂട്ടിക്കൊണ്ട് അയച്ചുകൊടുത്തു. ജോലി ഏൽപ്പിച്ച മാനസിക സമ്മർദ്ദം അകറ്റാൻ രണ്ടുമൂന്ന് കവിൾ തണുത്ത വോഡ്ക ഒറ്റ വീർപ്പിനു തന്നെ അകത്താക്കി. ഇനി തണുത്ത വെള്ളത്തിൽ ഒന്ന് കുളിക്കണം. തികഞ്ഞ ശ്രദ്ധയോടെ കമ്പ്യൂട്ടർ ഷട്ട് ഡൌണ്‍ ചെയ്തു എന്ന് വീണ്ടും ഉറപ്പുവരുത്തിക്കൊണ്ട് അവൾ സ്നാനമുറിയിൽ കയറി. സ്വന്തം വീടിന്റെ സ്വകാര്യതയിൽ, കിടപ്പുമുറിയോട് ചേർന്ന ആഡംബര സ്നാനമുറിയിൽ തണുത്ത ജലം പ്രവഹിക്കുന്ന ഷവറിനു കീഴിൽ പരിപൂർണ്ണ നഗ്നയായി ശാന്തയായി അവൾ കുളിക്കാൻ തുടങ്ങി.

പെട്ടെന്ന് ഒരു തോന്നൽ, ഒരു വെളിപാട് – താൻ നിൽക്കുന്നത് വലിയൊരു ആംഫിതിയ്യേറ്ററിന്റെ നടുത്തളത്തിലെ പോഡിയത്തിലാണോ എന്ന്. പോഡിയത്തിൽ സെറ്റ് ചെയ്ത സ്നാനമുറിയുടെ ചുവരുകൾ വെറും ലോലമായ സ്ഫടികപാളികൾ മാത്രം. ആണും പെണ്ണുമായി ചുറ്റിലും അനേകമനേകം വ്യക്തികൾ നാടകം കാണുന്നതു പോലെ തന്നെ നോക്കി, തന്റെ നഗ്നതയിൽ കണ്ണുനട്ട് അവിടിരിക്കുന്നു. ഒരു നിമിഷം. അവരെല്ലാം കണ്ടു കഴിഞ്ഞു. ആരും കാണുന്നില്ല എന്ന പൂർണ്ണവിശ്വാസത്തോടെ സ്നാനമുറിയിൽ ചെയ്ത ഓരോ അംഗചലനവും അവരുടെ ക്യാമറകളിൽ പതിഞ്ഞു കഴിഞ്ഞു.

ചെറിയൊരു ടവൽ കൊണ്ട് ദേഹം മറച്ച് അവൾ അവിടെ തളർന്നിരുന്നു.


ഓണ്‍ലൈന്‍ പ്രൈവസിയെപ്പറ്റി അല്‍പ്പമെങ്കിലും അവബോധമുള്ള ഒരു ഇന്റര്‍നെറ്റ് ഉപയോക്താവിന്റെ ടിപ്പിക്കൽ വിഹ്വലസ്വപ്നമാണിത്. അവർക്കറിയാം സ്വകാര്യത എന്നത് ഒരു മരീചിക പോലാണെന്ന്. ഉണ്ടെന്ന് ഒറ്റ നോട്ടത്തിൽ തോന്നുന്നതൊക്കെ ഉള്ളതല്ല എന്ന് അവർക്ക് നന്നായറിയാം.

ഓണ്‍ലൈൻ പ്രൈവസി എന്നത് വളരെ ഗഹനമായ ഒരു വിഷയമാണ്. ഇന്നത്തെ ലോകത്തിൽ ഒരൽപം ശ്രദ്ധ മാറിയാൽ നിങ്ങളുടെ പ്രൈവസി അപകടത്തിലാവും. നിങ്ങൾ ടാർഗറ്റ് ചെയ്യപ്പെട്ടേക്കും. ടെക്ക്നോളജിയിൽ താൽപ്പര്യമുള്ള ഗീക്കുകൾക്ക് ഇത് അറിയാവുന്ന കാര്യമാണ്, എങ്കിലും സാധാരണ ഇന്റർനെറ്റ്‌, മൊബൈൽ ഫോണ്‍ ഉപയോക്താക്കൾ കരുതുന്നത് തങ്ങൾ സുരക്ഷിതരാണ്‌ എന്നാണ്.

നമ്മുടെ കമ്പ്യൂട്ടർ നമുക്കെതിരേ ചാരപ്പണി ചെയ്യുന്നു. മറ്റാരും കാണില്ല എന്ന് കരുതി നാമയയ്ക്കുന്ന സന്ദേശങ്ങൾ നാമറിയാത്ത എത്രയോ മനുഷ്യരും യന്ത്രങ്ങളും വായിക്കുന്നു. അതൊക്കെ ആർക്കൊക്കെ പങ്കുവയ്ക്കപ്പെടുന്നു? നമുക്ക് സൗജന്യ ഇമെയിൽ സേവനങ്ങൾ തരുന്നവർ തന്നെ നമ്മുടെ സന്ദേശങ്ങൾ ചോർത്തി വായിക്കുന്നു. നാമയച്ച സന്ദേശങ്ങൾ നമുക്കൊരിക്കലും ഡിലീറ്റ് ചെയ്യാൻ കഴിയാത്ത വിധം അവരുടെ സർവ്വറുകളിൽ സൂക്ഷിക്കപ്പെടുന്നു.

കറൻസി സൂക്ഷിക്കുന്ന സേഫുകൾ ഇരട്ടപ്പൂട്ടിട്ടു പൂട്ടിയാലും നമുക്ക് സമാധാനമില്ല. വീടു പൂട്ടി ദൂരയാത്ര പോകുമ്പോൾ നാലു തവണയെങ്കിലും നോക്കും ശരിക്കും ലോക്ക് വീണിട്ടുണ്ടോ എന്ന്. പക്ഷേ ഒരു ഇലക്ട്രോണിക് ഡാറ്റ കൈകാര്യം ചെയ്യുമ്പോൾ നമുക്കാർക്കും തന്നെ യാതൊരു സുരക്ഷിതത്വചിന്തയുമില്ല. സുഹൃത്തിന് ഒരു ഇമെയിൽ അയയ്ക്കുമ്പോൾ, സോഷ്യൽ മീഡിയയിൽ ഒരു സ്വകാര്യ ഫോട്ടോ അപ്‌ലോഡ്‌ ചെയ്യുമ്പോൾ ഒന്നും നാം മറ്റൊന്നും ആലോചിക്കാറില്ല. ക്രെഡിറ്റ്‌ കാർഡ്‌ / നെറ്റ് ബാങ്കിംഗ് പാസ്‌വേഡുകൾ  ഒക്കെ പലരും സൂക്ഷിക്കുന്നത് തങ്ങളുടെ ഇമെയിൽ ഇൻബോക്സിന്റെ അല്ലെങ്കിൽ ക്ളൌഡ് സ്പേസിന്റെ ഒക്കെ അകത്താണ്. ഇന്റർനെറ്റിൽ ഒരിടം എന്നത് തികച്ചും സുരക്ഷിതമായാണ് മിക്ക സാധാരണക്കാരും കരുതുന്നത്. മറ്റാരും ഒന്നും കാണുന്നില്ല എന്ന് അവർ ധരിച്ചു വശായിരിക്കുന്നു.

ഒരു സാധാരണ ഇന്റർനെറ്റ്‌ കമ്മ്യൂണിക്കേഷന്റെ പിന്നിൽ നടക്കുന്ന ഇടപാടുകൾ വളരെ സങ്കീർണ്ണമാണ്. നിരവധി ഗേറ്റ് വേകൾ, നൂറുകണക്കിന് സർവ്വറുകൾ, ഒന്നിലേറെ ഐ.എസ്.പികൾ ഇവയൊക്കെ ഉൾപ്പെട്ടതാണ് ഒരൊറ്റ ഇന്റർനെറ്റ്‌ കമ്മ്യൂണിക്കേഷൻ. ഒരാൾ ഒരു വെബ്സൈറ്റ് നോക്കുമ്പോൾ അതിന്റെ പിന്നിൽ സർവറുകൾ തമ്മിൽ അങ്ങോട്ടുമിങ്ങോട്ടും അയാൾ ഉപയോഗിക്കുന്ന കമ്പ്യൂട്ടറുമായും ഒക്കെ നിരവധി തവണ ബന്ധപ്പെടുന്നുണ്ട്. ഈ കമ്മ്യൂണിക്കേഷനുകൾക്ക് നടുവിൽ നിങ്ങളുടെ സന്ദേശം ഹൈജാക്ക് ചെയ്യാൻ ഒരു രഹസ്യാന്വേഷണ ഏജൻസിക്കോ അല്ലെങ്കിൽ ഒരു അറ്റാക്കർക്കോ നിഷ്‌പ്രയാസം സാധിക്കും.

നിങ്ങൾ എവിടെ നിന്ന് ഇന്റർനെറ്റിൽ പ്രവേശിച്ചു എന്നറിയാൻ ഒരു ബുദ്ധിമുട്ടുമില്ല – നിങ്ങളുടെ ഐ.എസ്.പി. നിങ്ങൾക്ക് ലീസ് നൽകിയ ഐ.പി. അഡ്രസ്‌ കണ്ടെത്തിയാൽ മാത്രം മതി, ഭൂമിശാസ്ത്രപരമായ നിങ്ങളുടെ സ്ഥലം കിറുകൃത്യമായി ഗണിച്ചെടുക്കാൻ സാധിക്കും. അത് കണ്ടെത്താൻ അധികം വൈദഗ്ധ്യം പോലും ആവശ്യമില്ല. ഒരു മുൻകരുതലുമെടുക്കാതെ അയയ്ക്കപ്പെട്ട സംശയാസ്പദമായ ഒരു സന്ദേശം ഒരു രഹസ്യാന്വേഷണ ഏജൻസിയ്ക്ക് ചോർന്നു കിട്ടിയാൽ നിമിഷങ്ങൾ അധികമൊന്നും വേണ്ട അതിന്റെ ഉറവിടം കണ്ടെത്താൻ. ഇക്കാര്യങ്ങളെപ്പറ്റിയൊന്നും കാര്യമായ അവബോധമില്ലാതെ അതീവ രഹസ്യ സ്വഭാവമുള്ള ഒരു സന്ദേശം ഒരാൾ ഇന്റർനെറ്റ്‌ മുഖേന കൈമാറാൻ ശ്രമിച്ചാൽ നിമിഷങ്ങൾക്കകം അയാൾ ടാർഗറ്റ് ചെയ്യപ്പെടും എന്നതാണ് ഇന്നത്തെ സ്ഥിതി.

ഏതാണ്ട് ഒരു വർഷം മുമ്പ്, 2013 ജൂണ്‍ രണ്ടാം വാരത്തോടെ ലോകം ഞെട്ടലോടെ ശ്രവിച്ച സ്നോഡൻ വെളിപ്പെടുത്തലുകൾ ഒന്ന് മനസ്സിരുത്തി വായിച്ചാൽ മാത്രം മതി എത്രമാത്രം അപകടകരമാണ് നമ്മുടെ സൈബർ ജീവിതം എന്ന് വ്യക്തമായി തിരിച്ചറിയാൻ. അമേരിക്കയുടെ നേതൃത്വത്തിൽ പടുത്തുയർത്തിയ ഗ്ളോബൽ സർവെയ്ലൻസ് പ്രോഗ്രാം എന്ന സ്പൈ പ്രോഗ്രാം വഴി ഒരു ഡസനിലേറെ രാജ്യങ്ങളിലെ ശതകോടിക്കണക്കിന് പൌരന്മാരുടെ സ്വകാര്യ വിവരങ്ങളാണ് അവർ സ്വന്തമാക്കിയത്. ഇന്റർനെറ്റിലൂടെയും ഫോണിലൂടെയും ഈ പൌരന്മാർ നടത്തിയ ആശയവിനിമയങ്ങളിൽ നിന്നാണ് അവർ ഈ വിവരങ്ങൾ ചോർത്തിയെടുത്തത്.

ലോകമെമ്പാടും അനേകം സ്പൈ പ്രോഗ്രാമുകള്‍ വ്യാപകമായി ഉപയോഗിക്കപ്പെടുന്നുണ്ടെങ്കിലും സ്നോഡന്റെ വെളിപ്പെടുത്തലുകളിൽ നിന്ന് തെളിയുന്നത് പ്രധാനമായും മൂന്ന് സ്പൈ പ്രോഗ്രാമുകളുടെ സാന്നിധ്യമാണ്.

  1. എക്സ്കീസ്കോർ – ഇന്റർനാഷണൽ സർവെയ്ലൻസ് ടൂൾ. പ്രധാനമായും ഇമെയിൽ, ഫോണ്‍ സന്ദേശങ്ങൾ, വെബ്‌ ചാറ്റുകൾ തുടങ്ങിയവയിൽ നിന്നുള്ള മെറ്റാഡാറ്റ വിവരണങ്ങൾ ചോർത്തുന്നു.
  2. ടെമ്പോറ – ബ്രിട്ടന്റെ സർവെയ്ലൻസ് ടൂൾ. ഇന്റെർനെറ്റിന്റെ ബാക്ക്ബോണ്‍ ആയ ഫൈബർ ഒപ്റ്റിക് കേബിളിൽ നിന്ന് വിവരങ്ങൾ നേരിട്ട് ചോർത്തുന്നു.
  3. പ്രിസം – എൻ.എസ്.എയുടെ സർവെയ്ലൻസ് ടൂൾ. മൈക്രോസോഫ്റ്റ്, ഗൂഗിൾ, യാഹൂ, എഓഎൽ, ഫേസ്ബുക്ക്‌, ആപ്പിൾ, ട്വിറ്റെർ തുടങ്ങിയ യു.എസ്. സേവനദാതാക്കളുടെ സെർവറിൽ നിന്ന് നേരിട്ട് ഡാറ്റ ചോർത്തുന്നു.

ലോകത്തിലെ തന്നെ എണ്ണം പറഞ്ഞ രഹസ്യാന്വേഷണ ഏജൻസിയായ സി.ഐ.എയുടെയും നാഷണൽ സെക്യൂരിറ്റി ഏജൻസിയുടെയും മുൻഉദ്യോഗസ്ഥനായിരുന്ന സ്നോഡൻ എങ്ങനെ ഈ വിവരങ്ങൾ ഇത്രയും സുരക്ഷിതമായി ബ്രിട്ടനിലെയും യു.എസ്സിലെയും പത്രപ്രവർത്തകർക്ക് കൈമാറി? സ്നോഡൻ പത്രപ്രവർത്തകരുമായി ഇമെയിൽ സന്ദേശങ്ങൾ കൈമാറിയിരുന്നോ? എങ്കിൽ എങ്ങനെ ആ സന്ദേശങ്ങൾ മേൽപ്പറഞ്ഞ ചാര സോഫ്റ്റ്‌വെയറുകൾ മണത്തറിഞ്ഞില്ല?

ടെയിൽസ് ഓപ്പറേറ്റിംഗ് സിസ്റ്റം

പത്രപ്രവർത്തകരായ ലോറ പൊയട്രാസ്, ഗ്ളെൻ ഗ്രീൻവാൾദ് എന്നിവരുമായി ജീപീജി പൂട്ടിട്ട ഇമെയിൽ വഴിയാണ് എഡ്വേർഡ് സ്നോഡൻ ആദ്യമായി ബന്ധപ്പെട്ടത്. ഒരു നൂറ്റാണ്ടിലെ ഏറ്റവും വലിയ വെളിപ്പെടുത്തൽ അങ്ങനെ ലോകം കണ്ട ഏറ്റവും വലിയ പത്രവാർത്തകളിൽ ഒന്നായി മാറി. ഇതോടൊപ്പം മറ്റൊരു ടൂൾ കൂടി ലോകശ്രദ്ധ ആകർഷിച്ചു – അതിന്റെ പേരാണ് ടെയിൽസ് ഓപ്പറേറ്റിംഗ് സിസ്റ്റം. നേരത്തെ പറഞ്ഞ ചാരസോഫ്റ്റ്‌വെയറുകളുടെയൊന്നും കണ്ണിൽ പെടാതെ എഡ്വേർഡ് സ്നോഡനുമായി ആശയവിനിമയം നടത്താൻ ഈ പത്രപ്രവർത്തകരെ സഹായിച്ചത് ടെയിൽസ് എന്ന ഈ ഓപ്പറേറ്റിംഗ് സിസ്റ്റമാണ്. സ്നോഡൻ തന്നെയാണ് അവരോട് ടെയിൽസ് ഉപയോഗിക്കാൻ ആവശ്യപ്പെട്ടതും. ഓണ്‍ലൈൻ പ്രൈവസിയുടെ കാര്യത്തിൽ ഏതെങ്കിലും സോഫ്റ്റ്‌വെയറോ  അല്ലെങ്കിൽ ഓപ്പറേറ്റിംഗ് സിസ്റ്റമോ വിശ്വസനീയമായിട്ടുണ്ടെങ്കിൽ അത് ടെയിൽസ് ഓപ്പറേറ്റിംഗ് സിസ്റ്റം മാത്രമായിരിക്കും. എങ്കിലും ഇത് അവസാനവാക്കല്ല എന്ന് ഒരു ഡിസ്ക്ളൈമർ കൂടി ഉൾപ്പെടുത്താൻ അവർ മറന്നിട്ടില്ല.

ടെയിൽസ് ഓപ്പറേറ്റിംഗ് സിസ്റ്റം സ്പ്ളാഷ് സ്ക്രീൻ

ടെയിൽസ് ഓപ്പറേറ്റിംഗ് സിസ്റ്റം സ്പ്ളാഷ് സ്ക്രീൻ

ഒരു പക്ഷെ എഡ്വേർഡ് സ്നോഡന്റെ വെളിപ്പെടുത്തലുകളെ ആധാരമാക്കി പ്രശസ്ത ഡയറക്ടർ ഒലിവർ സ്റ്റോണ്‍ സംവിധാനം ചെയ്യുന്ന The Snowden Files: The Inside Story of the World’s Most Want Man എന്ന ചിത്രത്തിൽ ടെയിൽസ് ഓപ്പറേറ്റിംഗ് സിസ്റ്റത്തിലൂടെ പത്രപ്രവർത്തകർ  സ്നോഡനുമായി ആശയവിനിമയം നടത്തുന്ന രംഗങ്ങൾ ഉൾപ്പെടുത്തുമായിരിക്കും! 2014 സെപ്റ്റംബർ മാസത്തിൽ പുറത്തിറങ്ങുന്ന “Classified: The Edward Snowden Story” എന്ന ഫീച്ചർ ഫിലിമിലും ടെയിൽസിനെ പറ്റിയുള്ള പരാമർശങ്ങൾ കണ്ടേക്കാം.

ടെയിൽസ് ഓപ്പറേറ്റിംഗ് സിസ്റ്റം ഒരു ഓൾ-ഇൻ-വണ്‍ സെക്യോർ ഡിജിറ്റൽ കമ്മ്യൂണിക്കേഷൻ സിസ്റ്റമാണ്. ടോർ വെബ്‌ ബ്രൌസർ, ജീപീജീ ഇമെയിൽ, ഒടീആർ ചാറ്റ്, എൻക്രിപ്റ്റഡ് സ്റ്റോറേജ് അങ്ങനെ ഓണ്‍ലൈൻ പ്രൈവസിയ്ക്ക് അത്യാവശ്യം വേണ്ട എല്ലാ പ്രോഗ്രാമുകളും ഉൾക്കൊള്ളിച്ച ഒരു ഓപ്പറേറ്റിംഗ് സിസ്റ്റം ആണ് ടെയിൽസ്. ഏതൊരു സാധാരണക്കാരനും നിഷ്‌പ്രയാസം ഉപയോഗിക്കാൻ കഴിയുന്ന ഇന്റർഫേസ്. പ്രത്യേകിച്ച് ഒരു തരത്തിലുള്ള കോണ്‍ഫിഗറേഷനും ഉപയോക്താവ് ചെയ്യേണ്ടതില്ല. നിയമപരമായി നിങ്ങൾക്ക് അവകാശപ്പെടാവുന്ന അനോണിമിറ്റി (legal anonymity) ടെയിൽസ് നിങ്ങൾക്ക് ആവും വിധം നൽകുന്നു. ടെയിൽസിന്റെ ഏറ്റവും മികച്ച പ്രത്യേകതകളിൽ ഒന്ന് അത് ഉപയോക്താവിന്റെ ഹാർഡ് ഡിസ്കിനെ സ്പർശിക്കുന്നില്ല എന്നതാണ്. ഒരു യു.എസ്.ബി. സ്റ്റിക്കിലൊ ഒരു ഡീവിഡി യിലോ ടെയിൽസ് സൂക്ഷിക്കാം, അതിൽ നിന്നു തന്നെ ലോഡ് ചെയ്യാം. സിസ്റ്റം ഷട്ട് ഡൌണ്‍ ചെയ്തു കഴിയുമ്പോൾ യാതൊരുവിധ ലോഗുകളും അതിൽ ഉണ്ടാവുകയുമില്ല. ഏറ്റവും മികച്ച ഐടി ഫോറൻസിക് വിദഗ്ദ്ധനു പോലും ഒരുവിധ ട്രെയ്സുകളും അതിൽ നിന്ന് ലഭിക്കില്ല.

“ഗൂഗിൾ, ഫേസ്ബുക്ക്‌, യാഹൂ തുടങ്ങിയ ഇന്നത്തെ ഇന്റർനെറ്റ്‌ ഭീമൻമാരും രഹസ്യാന്വേഷണ ഏജൻസികളും ഒക്കെ നമ്മുടെ ഓണ്‍ലൈൻ ജീവിതം ആര്‍ക്കും കാണാന്‍ കഴിയും വിധം
സുതാര്യമാകണം എന്ന് ആഗ്രഹിക്കുന്നവരാണ്. എന്തിനാണെന്നോ? അവരുടെയൊക്കെ സ്വന്തം കാര്യങ്ങൾ കൂടുതല്‍ എളുപ്പമാകാൻ വേണ്ടി മാത്രം.”
– ടെയിൽസ് ഡെവലപ്പ്മെന്റ് ടീം.

കഴിഞ്ഞ നാലഞ്ചു കൊല്ലം മുമ്പ് തുടങ്ങിയതാണ്‌ ടെയിൽസ് പ്രൊജക്റ്റ്‌. ആരംഭത്തിൽ അമ്നീഷ്യ എന്നായിരുന്നു പ്രൊജക്റ്റിനു നൽകിയ പേര്. നേരത്തേ ഉണ്ടായിരുന്ന ഇൻകോഗ്നിറ്റോ എന്ന മറ്റൊരു പ്രോജക്റ്റിനെ അടിസ്ഥാനപ്പെടുത്തിയാണ് അമ്നീഷ്യ ഡെവലപ്പ് ചെയ്യാൻ തുടങ്ങിയത്. ഒടുവിൽ അമ്നീഷ്യയും ഇൻകോഗ്നിറ്റോയും മെർജ് ചെയ്യപ്പെട്ടു. അങ്ങനെ The Amnesic Incognito Live System എന്ന് സിസ്റ്റം നാമകരണം ചെയ്തു, ഇതിന്റെ ചുരുക്കരൂപമാണ് ടെയിൽസ്. ഇപ്പോൾ ഡെസ്ക്ടോപ്പ് കംപ്യൂട്ടറുകളിലും ലാപ്ടോപ്പുകളിലും മാത്രമേ ടെയിൽസ് ഉപയോഗിക്കാൻ കഴിയൂ, വൈകാതെ മൊബൈലിൽ ഉപയോഗിക്കാൻ കഴിയുന്ന വെർഷൻ കൂടി ഇപ്പോൾ ഡെവലപ്പ് ചെയ്യുന്നുണ്ട്.

ടെയിൽസിലെ ഡീഫോൾട്ട് ഇന്റർനെറ്റ്‌ ബ്രൌസർ “ടോർ ബ്രൌസർ” ആണ്. ടോർ ബ്രൌസറിലൂടെ ഇന്റർനെറ്റ്‌ ഉപയോഗിക്കുമ്പോൾ നിങ്ങളുടെ ഐപി അഡ്രസ്‌ ഒരു സ്പൈയിംഗ് ഏജൻസിയ്ക്ക് നേരിട്ട് ലഭിക്കില്ല. കൃത്യമായ ഇടവേളകളിൽ ഐപി അഡ്രസ്‌ മാറിക്കൊണ്ടിരിക്കുന്നത് നിങ്ങൾക്ക് സ്വയം കാണാൻ കഴിയും. ടെയില്‍സിലെ ടോർബ്രൌസർ വാസ്തവത്തിൽ മോസില്ല ഫയർഫോക്സിന്റെ ഫോർക്ക് ആയ ഐസ് വീസലില്‍ ടോര്‍ നെറ്റ്വര്‍ക്ക് സംയോജിപ്പിച്ച പതിപ്പാണ്. ഗ്നുപീജീ സപ്പോർട്ട് ഉള്ള ക്ളോവ്സ്‌ മെയിൽ ആണ് ഡീഫോൾട്ട് ഇമെയിൽ ക്ളയന്റ്. രേഖകൾ എഡിറ്റ്‌ ചെയ്യാൻ ഓപ്പണ്‍ ഓഫീസ്, സ്ക്രൈബസ് എന്നീ എഡിറ്ററുകൾ ഉണ്ട്. ഇമേജുകൾ എഡിറ്റ്‌ ചെയ്യാൻ ഗിമ്പും, വെക്ടർ ഗ്രാഫിക്സിന് ഇങ്ക്സ്കേപ്പും ഉൾക്കൊള്ളിച്ചിട്ടുണ്ട്. പ്ളെയിൻ ടെക്സ്റ്റ്‌ എൻക്രിപ്റ്റ് ചെയ്യാൻ ഓപ്പണ്‍ പീജീപി ആപ്പ്ലെറ്റ് ടെയിൽസിൽ ലഭ്യമാണ്.

ഏതെങ്കിലും പൊതുസ്ഥലങ്ങളിൽ ഇരുന്നു കൊണ്ട് മറ്റുള്ളവരുടെ ശ്രദ്ധ ആകർഷിക്കാതെ ടെയിൽസ് ഉപയോഗിക്കണമെങ്കിൽ അതിനും മാർഗ്ഗമുണ്ട്. ടെയിൽസിലെ രസകരമായ ഒരു വേലത്തരമാണത് – വിൻഡോസ് കാമോഫ്ളാഷ് എന്ന ഓപ്ഷൻ ഉപയോഗിച്ചാൽ പുറത്തു നിന്നൊരാൾ നോക്കിയാൽ നിങ്ങൾ ഉപയോഗിക്കുന്നത് ഒരു വിൻഡോസ്‌ എക്സ്പി ഓപ്പറേറ്റിംഗ് സിസ്റ്റം ആയേ തോന്നൂ.

ടെയിൽസിൽ ഓപ്പണ്‍ ഓഫീസ് സ്യൂട്ടും ഗിമ്പും ഇങ്ക്സ്കേപ്പും ഒക്കെ അടങ്ങിയിട്ടുണ്ടെങ്കിലും ഇത് നമ്മുടെ സ്ഥിര ഉപയോഗത്തിന് അനുയോജ്യമാണ് എന്ന് പറയാനാവില്ല. ടോർ നെറ്റ്‌വർക്കിലൂടെ ബ്രൌസ് ചെയ്യുന്നത് വളരെ അധികം സമയമെടുക്കുന്ന പരിപാടിയാണ്. ഒരാളുടെ തികച്ചും സാധാരണ ഉപയോഗങ്ങൾക്ക് ഡെബിയൻ, ഉബുണ്ടു പോലുള്ള സാധാരണ ഓപ്പറേറ്റിംഗ് സിസ്റ്റം ഉപയോഗിക്കുന്നതായിരിക്കും അഭികാമ്യം. പക്ഷേ എപ്പോഴും ടെയിൽസ് കൈവശം കരുതുക, എപ്പോഴാണ് അനോണിമസ് ആയി നിങ്ങൾക്ക് ഇന്റർനെറ്റ്‌ ഉപയോഗിക്കേണ്ട ആവശ്യം വരുന്നതെന്ന് പറയാൻ കഴിയില്ലല്ലോ.

ക്രിപ്റ്റോപാർട്ടി

ഓണ്‍ലൈൻ പ്രൈവസിയെ പറ്റി തികച്ചും അജ്ഞരായ സാധാരണ ജനങ്ങൾക്ക്‌ അവബോധം നൽകുവാൻ വേണ്ടി ആഗോള തലത്തിൽ നടക്കുന്ന കാമ്പയിൻ ആണ് ക്രിപ്റ്റോപാർട്ടി. പാസ്വേഡുകൾ സൂക്ഷിക്കേണ്ടത് എങ്ങനെ എന്ന ലളിതമായ വിഷയങ്ങൾ മുതൽ ടോർ നെറ്റ്‌വർക്ക്സ്, പീജീപി, ജീപീജി തുടങ്ങിയ എൻക്രിപ്ഷനുകൾ, ഓ.ടി.ആർ (Off The Record) ചാറ്റ് സർവ്വീസുകൾ തുടങ്ങിയ സെക്യൂരിറ്റി വിഷയങ്ങൾ വരെ ക്രിപ്റ്റോപാർട്ടികളിൽ സെഷനുകൾ എടുക്കുന്നു. ഒരിക്കൽ പോലും എൻക്രിപ്ഷൻ ടൂളുകൾ ഉപയോഗിക്കാത്ത സാധാരണക്കാർക്കാണ് ക്രിപ്റ്റോപാർട്ടികളിൽ പ്രഥമപരിഗണന നൽകപ്പെടുന്നത്.

വാൽക്കഷണം

എഡ്വേർഡ് സ്നോഡൻ ഉപയോഗിച്ചിരുന്ന ഇമെയിൽ സർവീസ് ലാവബിറ്റ്.കോം ആയിരുന്നു. cincinnatus@lavabit.com എന്നായിരുന്നു അദ്ദേഹത്തിന്റെ ഇമെയിൽ വിലാസം. ഇന്ന് ലാവബിറ്റിന്റെ ഹോം പേജിൽ നമുക്ക് കാണാൻ കഴിയുന്നത്‌ ഒന്ന് രണ്ടു പോസ്റ്റുകൾ മാത്രം. സ്നോഡൻ വെളിപ്പെടുത്തലുകൾ പുറത്തു വന്ന ശേഷം ഏതാണ്ട് രണ്ടു മാസങ്ങൾക്കു ശേഷം ലാവബിറ്റ് യു.എസ്. ഫെഡറൽ ഗവണ്മെന്റ് കരിനിയമങ്ങൾ ചുമത്തി തകർത്തു തരിപ്പണമാക്കി. ലാവബിറ്റ്  ഇന്ന് സുരക്ഷിത ഇമെയിൽ സർവീസ് നൽകുന്നില്ല. ഇക്കഴിഞ്ഞ മെയ് മാസമാണ് ലോകത്തിലെ മികച്ച ഓപ്പണ്‍ സോഴ്സ് എൻക്രിപ്ഷൻ ടൂൾ എന്ന് കേൾവി കേട്ട ട്രൂക്രിപ്റ്റ് സ്വയം വൾനറബിലിറ്റി ആരോപിച്ച് സർവീസ് അവസാനിപ്പിച്ചത്. നാളെ ഒരു ദിവസം ടെയിൽസ് ഓപ്പറേറ്റിംഗ് സിസ്റ്റത്തിനും ഈ ഗതി വരുമോ?

അവലംബം

  1. https://tails.boum.org/index.en.html
  2. http://www.wired.com/2014/04/tails/
  3. https://pressfreedomfoundation.org/blog/2014/04/help-support-little-known-privacy-tool-has-been-critical-journalists-reporting-nsa
  4. https://www.newschallenge.org/challenge/2014/submissions/improve-tails-to-limit-the-impact-of-security-flaws-isolate-critical-applications-and-provide-same-day-security-updates
  5. http://en.wikipedia.org/wiki/Laura_Poitras
  6. http://www.forbes.com/sites/runasandvik/2014/05/27/that-one-time-i-threw-a-cryptoparty-with-edward-snowden

വിപണി വിഹിതം അല്ലെങ്കിൽ സ്വതന്ത്ര വെബ്‌? ഇതാണ് ചോദ്യം. മോസില്ല എന്തു തെരഞ്ഞെടുത്തു?

firefox_icon

സൽസ്വഭാവിയെന്നു പേരെടുത്ത ഉദ്യോഗസ്ഥൻ കൈക്കൂലിക്കേസിൽ പിടിക്കപ്പെട്ടത് പോലെയായി ഇത്. കോഴക്കേസിൽ ക്രിക്കറ്റ് ടീം നായകൻ പ്രതിക്കൂട്ടിലായത് പോലെ. മോസില്ലയ്ക്ക് ഇതെന്തുപറ്റി എന്ന് സ്വതന്ത്ര ലോകത്തിലെ എല്ലാവരും പരസ്പരം അത്ഭുതപ്പെടുന്നു.

മെയ്‌ 14-നു പുറത്തിറങ്ങിയ മോസില്ലയുടെ ഔദ്യോഗിക പത്രക്കുറിപ്പിൽ സ്വന്തം ബ്രൌസറിൽ ഡി.ആർ.എം. ഉപയോഗിക്കാൻ തീരുമാനിച്ച വിവരം അവർ പുറത്തുവിട്ടു. (ഇന്റർനെറ്റ്‌ എക്സ്പ്ളോറര്‍ ഡെവലപ്പ്മെന്റ് ടീം ഇത്തവണയും കേക്ക് സമ്മാനിച്ചോ എന്ന് ഇതുവരെ അറിവായിട്ടില്ല.)

Netflix, Hulu, Amazon Videoതുടങ്ങിയ ഓണ്‍ലൈൻ ടെലിവിഷൻ / മൂവീ സർവ്വീസുകൾ ഉപയോഗിക്കുന്ന ഉപയോക്താക്കളെ നഷ്ടപ്പെടുമോ എന്ന ഭീതിയിലാണ് മോസില്ല ഇ.എം.ഇ. ഉപയോഗിക്കാൻ തുനിഞ്ഞിരിക്കുന്നതെന്ന് ഔദ്യോഗിക ബ്ളോഗിൽ സൂചിപ്പിച്ചിരിക്കുന്നു. ഇത് ഒന്ന് കൂടി വിശദമാക്കുകയാണെങ്കിൽ, മേൽപ്പറഞ്ഞ ടെലിവിഷൻ / മൂവീ സർവ്വീസുകൾ നൽകുന്ന കമ്പനികൾ തങ്ങൾ നൽകുന്ന കണ്ടന്റിനു മീതെ പരിപൂർണ്ണ നിയന്ത്രണം വേണമെന്ന് ബ്രൌസറുകളോട് ആവശ്യപ്പെടുന്നു, ചോദിക്കേണ്ട താമസം ഐ.ഇ., ക്രോം പോലുള്ള പ്രൊപ്രൈറ്ററി ബ്രൌസറുകൾ അതു നൽകുന്നു, നിയന്ത്രണം നൽകുന്നതിൽ ഇനിയും അമാന്തിച്ചാൽ ഈ സർവ്വീസ് ഉപയോക്താക്കൾ തങ്ങളിൽ നിന്നു വിട്ടുപോയി പ്രൊപ്രൈറ്ററി ബ്രൌസറിൽ ചേക്കേറും. അതുകൊണ്ടാണ് (ഉള്ള യൂസർ ബേസ് നഷ്ടപ്പെടുത്താതിരിക്കാൻ) തങ്ങൾ ഇ.എം.ഇ. നടപ്പാക്കാൻ നിർബന്ധിതരായതെന്നാണ് മോസില്ല പറഞ്ഞു വരുന്നത്. അങ്ങനെ ഈ കണ്ടന്റ് വിതരണക്കാരുടെ പിണിയാളായ അഡോബീ കോർപ്പറേഷനെ കൂട്ടുപിടിച്ചുകൊണ്ട് മോസില്ല സ്വന്തം ബ്രൌസറിലും ഇ.എം.ഇ. ഇൻസ്റ്റോൾ ചെയ്യാനുള്ള അവസരം ഉപയോക്താവിന്  നൽകുന്നു.

ഇ.എം.ഇ. / സി.ഡി.എം.

ഇ.എം.ഇ. എന്നാൽ എൻക്രിപ്റ്റഡ് മീഡിയ എക്സ്റ്റൻഷൻ. ഇതിനെ സി.ഡി.എം. (കണ്ടന്റ് ഡിക്രിപ്ഷൻ മോഡ്യൂൾ) എന്നും പറയും. അതായത് വീഡിയോ കണ്ടന്റുകൾ നല്ല അന്തസ്സായി എൻക്രിപ്റ്റ് ചെയ്തായിരിക്കും പല കണ്ടന്റ് ഭീമൻമാരും തങ്ങളുടെ വെബ്സൈറ്റിലൂടെ ഉപയോക്താക്കൾക്ക് ലഭ്യമാക്കുക. ഉപയോക്താക്കൾക്ക് ഈ വീഡിയോ കണ്ടന്റ് കാണണം എങ്കിൽ ഇത് ഡിക്രിപ്റ്റ്‌ ചെയ്യണം. അതിനായി അവരുടെ ബ്രൌസറിൽ ഒരു ഇൻ-ബിൽറ്റ്‌ കണ്ടന്റ് ഡിക്രിപ്ഷൻ മോഡ്യൂൾ വേണം. കണ്ടന്റ് ഡിക്രിപ്ഷൻ മോഡ്യൂൾ ഇല്ലാത്ത പക്ഷം ഉപയോക്താവിന് വീഡിയോ കണ്ടന്റ് കാണുവാൻ സാധ്യമല്ല.

ഡി.ആർ.എമ്മിനെതിരായ അന്താരാഷ്‌ട്ര ദിനം കഴിഞ്ഞു വെറും ഒരാഴ്ച മാത്രം കഴിഞ്ഞ സന്ദർഭത്തിലാണ് ലോകത്തിലെ ആദ്യത്തെ ഓപ്പണ്‍ സോഴ്സ് ബ്രൌസർ എന്നു വിശേഷിപ്പിക്കപ്പെടുന്ന മോസില്ല കുത്തക സോഫ്റ്റ്‌വെയർ കമ്പനിയായ അഡോബിയുമായി ചേർന്ന് തങ്ങളുടെ ബ്രൌസറിൽ ഡിജിറ്റൽ നിയന്ത്രണ സംവിധാനം (Digital Restrictions Management – DRM) ഏർപ്പെടുത്താൻ ഉദ്ദേശിക്കുന്നതായി പത്രസമ്മേളനത്തിൽ പ്രഖ്യാപിച്ചിരിക്കുന്നത്. മോസില്ലയുടെ വിവാദ പ്രഖ്യാപനം കഴിഞ്ഞയുടൻ തന്നെ എഫ്.എസ്.എഫ്. ഈ നടപടിയെ അപലപിച്ചു കൊണ്ട് പ്രസ്താവന പുറത്തിറക്കി.

മുൻനിര ഓപ്പണ്‍ സോഴ്സ് കമ്പനികൾ തന്നെ സ്വയം തുരങ്കം വയ്ക്കുന്ന ഇത്തരം നടപടികളുമായി മുന്നോട്ടു പോകുമ്പോൾ തകരുന്നത് ഓണ്‍ലൈൻ സ്വാതന്ത്ര്യമാണ്. നേരത്തെ ഉബുണ്ടു ആമസോണുമായി ചേർന്ന് ഉപയോക്താവിന്റെ വിവരങ്ങൾ ചോർത്തിയതിനെക്കാളും വലിയ ചീത്തപ്പേരാണ് ഇതുവഴി മോസില്ലയ്ക്ക് ലഭിച്ചിരിക്കുന്നത്. മറ്റൊരു വഴിയില്ലാത്തതിനാലാണ് ഇങ്ങനൊരു നടപടി എന്ന് മോസില്ല സ്വയം ന്യായീകരിക്കുന്നുണ്ടെങ്കിലും തരം കിട്ടുമ്പോൾ അഡോബിയെ പ്രശംസിക്കാനും അവർ മടിക്കുന്നില്ല.

സ്വീഡനിലെ പൈറേറ്റ് പാര്‍ട്ടി എങ്ങനെയാണ് സ്വതന്ത്ര സോഫ്റ്റ്‌വെയറിനെ ദോഷമായി ബാധിക്കുന്നത്

ഇതിനെയാണ് പറയുന്നത് “കുളിപ്പിച്ച് കുളിപ്പിച്ച്കൊച്ചിനെ ഇല്ലാതാക്കുക” എന്ന് 🙂 🙂 കോപ്പിറൈറ്റിൽ കയറി കളിച്ചാൽ കോപ്പിലെഫ്റ്റിന്റെ ഡിപ്പന്റൻസി ചെയിൻ പൊട്ടും. ജീപീഎല്ലിന്റെ ശക്തി കുറയും. എങ്കിൽ പിന്നെ ഡിപ്പന്റൻസി ഒഴിവാക്കി കോപ്പിലെഫ്റ്റിനെ റീഎഞ്ചിനീയർ ചെയ്തൂടെ? കോപ്പിലെഫ്റ്റിനു നിയമപരമായി നിലനിൽപ്പില്ല എന്നാണല്ലോ പറയുന്നത്, കോപ്പിലെഫ്റ്റിനു നിയമപരമായ സ്വതന്ത്ര നിലനിൽപ്പ്‌ / സാധുത ഉണ്ടാക്കാൻ ആഗോളതലത്തിൽ എന്തെങ്കിലും ശ്രമങ്ങൾ ഉണ്ടായിട്ടുണ്ടോ?

നേരിടം

എഴുതിയത് റിച്ചാര്‍ഡ് സ്റ്റാള്‍മന്‍

അറിയിപ്പ് : ഓരോ പൈറേറ്റ് പാര്‍ട്ടികള്‍ക്കും അവരുടേതായ തട്ടകമുണ്ട്. പകര്‍പ്പവകാശ ശക്തി ഇല്ലാതാക്കാന്‍ ശ്രമിക്കുന്നു എന്നാണ് അവര്‍ എല്ലാവരും പറയുന്നത്. എന്നാല്‍ അതിന് ഏറ്റക്കുറച്ചിലുകളുണ്ട്. ഈ പ്രശ്നം പാര്‍ട്ടികളുടെ മറ്റ് നയങ്ങളെ ബാധിക്കുന്നുമില്ല.

സ്വീഡനില്‍ പകര്‍പ്പവകാശ വ്യവസായത്തിന്റെ മുഠാളത്തരം സഹിക്കാന്‍ വയ്യാതെ ആദ്യമായി പകര്‍പ്പവകാശത്തിന് നിയന്ത്രണം കൊണ്ടുവരായുള്ള ഒരു രാഷ്ട്രീയ പാര്‍ട്ടി രൂപീകരിച്ചു. പൈറേറ്റ് പാര്‍ട്ടി. ഡിജിറ്റല്‍ നിയന്ത്രണ വ്യവസ്ഥയുടെ നിരോധനം, വാണിജ്യാവശ്യത്തിനല്ലാത്ത പങ്കു വെക്കലിന് നിയമ സാധുത, വാണിജ്യാവശ്യത്തിനായുള്ള പകര്‍പ്പവകാശത്തിന്റെ കാലാവധി കുറക്കുക(5 വര്‍ഷം) തുടങ്ങിയവയാണ് അവരുടെ ലക്ഷ്യം. പ്രസിദ്ധകരിക്കപ്പെട്ട എല്ലാം 5 വര്‍ഷം കഴിഞ്ഞാല്‍ പൊതു ഉടമസ്ഥതയിലാവും.

ഞാന്‍ ഈ മാറ്റങ്ങളെ പൊതുവായി അംഗീകരിക്കുന്നു. എന്നാല്‍ സ്വീഡനിലെ പൈറേറ്റ് പാര്‍ട്ടി തിരഞ്ഞെടുത്ത പ്രവര്‍ത്തനങ്ങള്‍ സ്വതന്ത്രസോഫ്റ്റ്‌വെയറിനെ മോശമായി ബാധിക്കുന്നതാണ്. സ്വതന്ത്രസോഫ്റ്റ്‌വെയറിനെ ദ്രോഹിക്കണമെന്ന് കരുതി മനഃപ്പൂര്‍വ്വം അവര്‍ അങ്ങനെ ചെയ്തു എന്നല്ല പറയുന്നത്. പക്ഷേ ദോഷമാണുണ്ടായത്.

ഗ്നു ജനറല്‍ പബ്ലിക്ക് അനുമതിയും മറ്റ് പകര്‍പ്പുപേക്ഷാ ലൈസന്‍സുകളും പകര്‍പ്പവകാശം ഉപയോഗിച്ചാണ് അതിന്റെ ഉപയോക്താക്കള്‍ക്ക് സ്വാതന്ത്ര്യം ഉറപ്പാക്കുന്നത്. എല്ലാവര്‍ക്കും മാറ്റം വരുത്തിയ സൃഷ്ടികള്‍ ജി.പി.എല്‍ അനുസരിച്ച് പ്രസിദ്ധീകരിക്കാനാവും, അതേ ലൈസന്‍സ് പ്രകാരമാകണമെന്ന ഒരു നിബന്ധനമാത്രമേയുള്ളു. മാറ്റം വരുത്താതെയും ഈ അനുമതി പ്രകാരം സൃഷ്ടികളുടെ വിതരണം നടത്താനാവും. എല്ലാ വിതരണത്തിലും സോഫ്റ്റ്‌വെയറിന്റെ സോഴ്സ് കോഡ് ഉപയോക്താക്കള്‍ക്ക് ലഭ്യമാക്കണം എന്നത് നിര്‍ബന്ധമാണ്.

സ്വീഡനിലെ പൈറേറ്റ് പാര്‍ട്ടിയുടെ പ്ലാറ്റ്ഫോം എങ്ങനെയാണ് പകര്‍പ്പുപേക്ഷയില്‍ അടിസ്ഥാനമായ സ്വതന്ത്രസോഫ്റ്റ്‌വെയറിനെ ബാധിക്കുക ? അതിന്റെ സോഴ്സ് കോഡ് പൊതു ഡൊമൈനിലേക്ക് പോകുന്നു…

View original post 435 more words