ബ്ലാക്ക് കോഡ്

പ്രൈവസിയെപ്പറ്റിയുള്ള മറ്റൊരു സിനിമ പരിചയപ്പെടുത്തുന്നു – ബ്ലാക്ക് കോഡ്. ടൊറന്റോയിലെ പ്രസിദ്ധ ഡോക്യുഫിലിംമേക്കര്‍ നിക്കോളാസ് ഡ‍ി പെന്‍സിയര്‍ സംവിധാനം ചെയ്ത ഈ സിനിമ സ്വതന്ത്രഭാഷണം, പ്രൈവസി, ആക്ടിവിസം തുടങ്ങിയ വിഷയങ്ങളില്‍ ഭരണകൂടം നടത്തുന്ന ഇടപെടലുകളെപ്പറ്റി കുറെയേറെ വെളിച്ചം പകരുന്നു. വിശദവിവരങ്ങള്‍ http://www.mongrelmedia.com/film/black-code.aspx എന്ന സൈറ്റില്‍ ലഭ്യമാണു്. ഇതേ സൈറ്റില്‍ നിന്നുതന്നെ ഡൗണ്‍ലോഡ് ലിങ്കും കിട്ടും.

Black Code by Mongrel Media

Black Code

Advertisements

ആഗ്രഹമുണ്ടോ കരയാന്‍?

കരയാന്‍ ആഗ്രഹമുള്ളതാര്‍ക്കാണു്? എന്നിട്ടും ഈ ചോദ്യം ലോകത്തില്‍ ഇക്കഴിഞ്ഞകുറേ ദിവസങ്ങളായി മുഴങ്ങിക്കേള്‍ക്കുന്നു. കരഞ്ഞുപോകാന്‍ തോന്നുന്ന സങ്കടകരമായ സാഹചര്യമൊരുക്കിക്കൊണ്ട് ചില സൈബര്‍ കുറ്റവാളികളാണു് ഈ ചോദ്യം മുഴക്കുന്നതു്. കോര്‍പ്പറേറ്റ് / സര്‍ക്കാര്‍ ലോകം മാത്രമല്ല, പാവം വ്യക്തിഗത കമ്പ്യൂട്ടര്‍ ഉപയോക്താക്കള്‍ വരെ ആരുമറിയാതെ കരഞ്ഞുപോയി, നഷ്ടപ്പെട്ട തങ്ങളുടെ വിലപ്പെട്ട ചിത്രങ്ങളോര്‍ത്തു്, പ്രമാണങ്ങളോര്‍ത്തു് അവര്‍ കരഞ്ഞു. വാനക്രൈ പലതും തകര്‍ത്തു. ഡാറ്റയെ ബന്ദികളാക്കി തകര്‍ത്തതു മാത്രമല്ല, ഒരൊറ്റ ആന്റിവൈറസ് ഇന്‍സ്റ്റാള്‍ ചെയ്താല്‍ നമ്മുടെ കമ്പ്യൂട്ടര്‍ സുരക്ഷിതമാണെന്നുള്ള സാധാരണക്കാരന്റെ വിശ്വാസവും ജഗന്നാഥരഥം പോലെ അവന്‍ ചതച്ചരച്ചുകളഞ്ഞു. ഒരുതരത്തിലും വീണ്ടടുക്കുവാനാവാത്ത വിധം വാനക്രൈ ‍ഡാറ്റയെ തരിപ്പണമാക്കി

വാനക്രൈ റാന്‍സംവെയര്‍

മൈക്രോസോഫ്റ്റ് വിന്‍ഡോസ് ഓപ്പറേറ്റിംഗ് സിസ്റ്റത്തിലൂടെയാണു് വാനക്രൈ ഉള്‍പ്പെടെയുള്ള റാന്‍സം വെയറുകള്‍ നമ്മുടെ കമ്പ്യു‍ട്ടറുകള്‍ക്കുള്ളില്‍ പ്രവേശിച്ചു് ഡാറ്റ മുഴുവനും നാശം വിതയ്ക്കുന്നതു്. റാന്‍സംവെയറുകള്‍ വിന്‍ഡാസിനെ മാത്രം ടാര്‍ഗെറ്റ് ചെയ്യാന്‍ ഒന്നിലധികം കാരണങ്ങളുണ്ടു്. സിസ്റ്റം സെക്യുരിറ്റിയെപ്പറ്റി ലവലേശം ബോധമില്ലാതെ പെരുമാറുന്ന ശരാശരി വിന്‍‍ഡോസ് ഉപയോക്താവിന്റെ നിരുത്തരവാദിത്വപരമായ സമീപനമാണു് ഏറ്റവും പ്രധാനകാരണം. ഇതൊരൊഴുക്കന്‍മട്ടിലൂള്ള കുറ്റപ്പെടുത്തലല്ല, സൂക്ഷ്മനിരീക്ഷണത്തില്‍ മിക്കവാറും എല്ലാ വിന്‍ഡോസ് യൂസര്‍മാരും ഈയൊരു പെരുമാറ്റവൈകല്യം പ്രകടിപ്പിക്കുന്നതായി കാണാം. ഒരു ‍ഡയലോഗ് ബോക്സ് തെളിഞ്ഞുവന്നാല്‍, അല്ലെങ്കിലൊരു വാണിംഗ് സന്ദേശം പ്രത്യക്ഷപ്പെട്ടാല്‍ അതിലെന്താണെഴുതിയിരിക്കുന്നതെന്നു മനസ്സിലാക്കാന്‍ ശ്രമിക്കാതെ “OK” എന്നോ “Next” എന്നോ “Yes” എന്നോ “No” ഉള്ള ബട്ടണുകളില്‍ കണ്ണും പൂട്ടി ക്ലിക്ക് ചെയ്യുന്നവരാണു് മിക്കവാറും എല്ലാ വിന്‍ഡോസ് യുസര്‍മാരും. “ആയിരം കണ്ണുമായ്.mp3” എന്ന ഫയലായിരിക്കും ടൊറന്റില്‍ സേര്‍ച്ച് ചെയ്യുക, കിട്ടിയതാകട്ടെ “ആയിരം കണ്ണുമായ്.exe” എന്ന ഫയലും. ഡൗണ്‍ലോഡ് ചെയ്യലും കഴിഞ്ഞു തുറക്കലും കഴിഞ്ഞു, കിട്ടേണ്ട പണി കിട്ടിക്കഴി‍ഞ്ഞെന്ന യാഥാര്‍ത്ഥ്യം മനസ്സിലാക്കാന്‍ ഇനിയൊരല്‍‍പനേരം കാത്തിരുന്നാല്‍ മതി. ഈ പെരുമാറ്റവൈകല്യം വിന്‍ഡോസിനൊപ്പം വിലകൊടുക്കാതെ ലഭിക്കുന്ന സംസ്കാരവൈകൃതമാണു്. ഇത്തരം ഒരു ആറ്റിറ്റ്യൂഡ് മാറ്റിയാല്‍ത്തന്നെ 90 ശതമാനം പ്രശ്നങ്ങളും ഒഴിവായിക്കി‍ട്ടും.

മറ്റൊരു കാരണം, വിന്‍ഡോസിന്റെ അത്യുദാരമായ യൂസര്‍പോളിസിയാണു്. അഡ്മിനിസ്ട്രേറ്റീവ് യൂസര്‍ക്കു് പാസ്വേഡ് നിര്‍ബന്ധമില്ല, അതുപയോഗിച്ചു ആര്‍ക്കെന്തു തോന്നിയവാസം ചെയ്യാനും ഒരു തടസ്സവുമില്ല. മിക്കവാറും എല്ലാ വിന്‍ഡോസ് ഉപയോക്താക്കളും ഇന്റര്‍നെറ്റില്‍ കയറി മേയുന്നതു് ഈ അഡ്മിന്‍ അക്കൗണ്ടുപയോഗിച്ചായിരിക്കും.

എന്റെ കമ്പ്യൂട്ടറില്‍ ഞാനൊരു കിടിലന്‍ ആന്റിവൈറസ് പ്രോഗ്രാം ഇന്‍സ്റ്റാള്‍ ചെയ്തിട്ടുണ്ട്, അതിനാല്‍ ഇനി എനിക്കൊന്നും പേടിക്കാനില്ല എന്നൊരു ചിന്ത മിക്കവാറും എല്ലാ വിന്‍ഡോസ് ഉപയോക്താക്കള്‍ക്കും ഉള്ളതാണു്. ഒരു ആന്റിവൈറസ് പ്രോഗ്രാമുകളും വിന്‍ഡോസിനു് പരിപൂര്‍ണ്ണസംരക്ഷണം നല്‍കില്ല. വ്യക്തിഗതവിവരങ്ങളും ബാങ്കിംഗ് വിവരങ്ങളുമൊക്കെ ഉപയോക്താവറിയാതെ ചോര്‍ത്തിനല്‍കിയും, ബാന്‍ഡ്‍വിഡ്ത് മോഷ്ടിച്ചു് ആഡ്‍വെയറുകള്‍ കടത്തിവിട്ടും മറ്റും തരികിട കാണിച്ചിരുന്ന മാല്‍വെയറുകള്‍ തങ്ങളുടെ മാരകമായ സംഹാരശക്തി പ്രകടിപ്പിച്ചതു് റാന്‍സംവെയര്‍ രൂപത്തിലാണു്. കമ്പ്യൂട്ടറിനകത്തുള്ള ഡാറ്റ മുഴുവനും ഉപയോഗശൂന്യമാവുക എന്നു വച്ചാല്‍ ചിലരെ സംബന്ധിച്ചിടത്തോളം ജീവിതം തന്നെ ഇല്ലാതാവുക എന്നതാണു്. പരിചയമുള്ള ഒരു ഡാറ്റ റിക്കവറി വിദഗ്ദ്ധന്റെയടുത്തു് ഈയിടെ ഒരു പ്രൊഫഷണല്‍ ഫോട്ടോഗ്രാഫര്‍ എത്തി, ഏതാനും ദിവസം മുമ്പെടുത്ത തന്‍റയൊരു കക്ഷിയുടെ വിവാഹഫോട്ടോകളടക്കമാണു് റാന്‍സം ചെയ്യപ്പെട്ടതു്. അതിലൊന്നു പോലും റിക്കവര്‍ ചെയ്യാനാകില്ല എന്നറിഞ്ഞപ്പോള്‍ അദ്ദേഹം തകര്‍ന്നുപോയി.

വിന്‍ഡോസിനൊപ്പം വരുന്ന എസ്.എം.ബി. (Server Message Block) എന്ന പ്രോട്ടോക്കോളിലെ പഴുതാണു് Cerber, Wannacry തുടങ്ങിയ റാന്‍സംവെയറുകള്‍ക്കു് വഴിയൊരുക്കുന്നതു്. ഇമെയില്‍ അറ്റാച്ച്മെന്റ് ആയോ, ടൊറന്റ് ഫയലുകള്‍ക്കൊപ്പം ഡൗണ്‍ലോഡ് ചെയ്യാന്‍ നിര്‍ദ്ദേശിക്കുന്ന ഫയലുകളായോ റാന്‍സംവെയര്‍ കടന്നുവരാം. അതോണ്ടു് ഇമെയില്‍ അറ്റാച്ച്മെന്റുകള്‍ തുറക്കുമ്പോള്‍ കരുതിയിരിക്കുക. ടോറന്റില്‍ നിന്നു ഫയല്‍ ഡൗണ്‍ലോഡ് ചെയ്യുമ്പോള്‍ സൂക്ഷിക്കുക. ജാഗ്രതൈ!

പ്രതിരോധം

ജാഗ്രതയോടെയിരിക്കുക. ഒന്നു റിലാക്സ് ചെയ്യണമെന്നുണ്ടെങ്കില്‍ വിന്‍ഡോസിനു പകരം കുറേക്കൂടി സുരക്ഷിതമായ ഗ്നൂ/ലിനക്സ് ഇന്‍സ്റ്റാള്‍ ചെയ്യുക. കരയാതിരിക്കുക. മനസ്സുതുറന്നു ചിരിക്കുക. ദാറ്റ്സാള്‍. ടണ്‍ടഡൈ.

ലോകം പരിസ്ഥിതിയെപ്പറ്റി വിലപിക്കുന്ന ദിനം – ജൂണ്‍ അഞ്ച്

അതിരാവിലെ മക്കള്‍ പച്ച വസ്ത്രങ്ങളണിഞ്ഞു് സ്കൂളില്‍ പോകാന്‍ തുടങ്ങിയപ്പോളാണു് തോന്നിയതു് ഇന്നു് ലോകപരിസ്ഥിതി ദിനമായിരിക്കുമെന്നു്. എത്ര തെറ്റായ സന്ദേശമാണു് നാം നമ്മുടെ കുഞ്ഞുങ്ങള്‍ക്കു് നല്‍കുന്നതെന്നു് ആലോചിച്ചു് ഒരുമാത്ര കുറ്റബോധം തോന്നിപ്പോയി. ജൂണ്‍ അഞ്ചിനു് മാത്രം അനുഷ്ഠാനപരമായി ഒന്നു പരിസ്ഥിതിയെപ്പറ്റി ചിന്തിച്ചാല്‍ മതിയത്രെ. ബാക്കിയുള്ള ദിവസങ്ങള്‍ മുഴുവന്‍ പരിസ്ഥിതിയെ നശിപ്പിച്ചാലും കുഴപ്പമൊന്നുമില്ല.

മാര്‍ച്ച് 8 അന്തര്‍ദ്ദേശീയ വനിതാദിനം.

അങ്ങനെ വീണ്ടുമൊരു അന്തര്‍ദ്ദേശീയ വനിതാദിനം കൂടി കടന്നു പോകുന്നു. ആണ്‍-പെണ്‍ സമത്വം, സ്ത്രീയുടെ സാമൂഹികഔന്നത്യം എന്നിവയൊക്കെയായിരിക്കും എന്നത്തെയും പോലെ ഈ പെണ്‍ദിനത്തിന്റേയും പ്രധാനവിഷയം. സ്ത്രീയെ ശക്തയാക്കാന്‍ ഇറങ്ങിപ്പുറപ്പെട്ടിരിക്കുന്നവരിലേറെയും സൗന്ദര്യ വര്‍ദ്ധകവസ്തുക്കളുടെ വ്യാപാരികളാണെന്നുള്ളതാണു് കൗതുകകരമായ വസ്തുത. ഇവരൊക്കെത്തന്നെയാണു് സ്ത്രീയെ ഒരൊന്നാന്തരം കച്ചവടച്ചരക്കാക്കി ഇവരുടെ വിപുലമായ ഉല്‍പ്പന്നനിരകളുടെ അടിമകളാക്കി പുരുഷനു് മൊത്തക്കച്ചവടം ചെയ്തുകൊടുക്കുന്നതു്.

പത്രങ്ങളും ചാനലുകളും നയിക്കുന്ന ചര്‍ച്ചകള്‍ സ്പോണ്‍സര്‍ ചെയ്യുന്നതും ഇവരൊക്കെത്തന്നെ. കാണുമ്പോള്‍ തമാശ തോന്നും, സ്ത്രീശാക്തീകരണത്തെപ്പറ്റി ഘോരഘോരം വായിട്ടലയ്ക്കുന്ന സ്ത്രീവാദിസാമൂഹ്യപ്രവര്‍ത്തകയുടെ സംസാരം ബലമായി തടസ്സപ്പെടുത്തിക്കൊണ്ടു് അവതാരകന്‍ ബ്രേക്ക് പ്രഖ്യാപിക്കുന്നു. ഉടന്‍ തന്നെ വരുന്നതു് ഭര്‍ത്താവിന്റെ വസ്ത്രമലക്കിക്കൊണ്ടു് മുറിയിലേയ്ക്കു കടന്നുവരുന്ന ഭാര്യയോടു് അലസമായി “മീനൂ ചായ” എന്നാജ്ഞാപിക്കുന്ന മെയില്‍ ഷോവനിസ്റ്റ് പരസ്യം. തുടര്‍ന്നു വരുന്നൂ, “നിന്റെ കൈയ്യുടെ ജോലി ഇരട്ടിയാക്കിയല്ലോ ഇവന്‍” എന്നു് മരുമകളോടു് പരിതപിക്കുന്ന അമ്മായിയമ്മയുടെ പരസ്യം. “ചര്‍മ്മം കണ്ടാല്‍ പ്രായം തോന്നുകയേയില്ല” എന്നു ചിലച്ചുതുടങ്ങി തൊട്ടടുത്ത പരസ്യം. “ഇനി പിന്നിലീരിക്കാന്‍ എന്നെക്കിട്ടില്ല” എന്ന നവയുഗവനിതയുടെ സ്വാതന്ത്ര്യ പ്രഖ്യാപനമാണു് അടുത്ത പരസ്യത്തിലെ ഇതിവൃത്തം. ഈ സ്വാതന്ത്ര്യപ്രഖ്യാപനം പക്ഷേ അവളെ വിപണിയുടെ ഇരയാക്കാനുള്ള ഗൂഢാലോചനയാണെന്നൊന്നും അവള്‍ തിരിച്ചറിയുന്നില്ല എന്നു മാത്രം.

അപ്പോള്‍ വാസ്തവത്തിലെന്താണീ വനിതാദിനം? വിപണിയുടെ സ്പോണ്‍സര്‍ഷിപ്പില്‍ മാദ്ധ്യമവ്യഭിചാരക്കാര്‍ വിറ്റഴിക്കുന്ന തരംതാണ ഒരുല്പന്നം മാത്രമോ?

ആരു പറഞ്ഞു വൈദികര്‍ മുഴുവന്‍ കുറ്റവാളികളും ബലാല്‍സംഗവീരന്മാരുമാണെന്നു്?

ഈ പോസ്റ്റിനു് ആധാരമായ സണ്‍‍ഡേശാലോമില്‍ വന്ന ലേഖനം [https://sundayshalom.com/?p=12671] പേസ്റ്റ്ബിന്നില്‍ കോപ്പി ചെയ്തിരിക്കുന്നു [http://pastebin.com/5D2Yynqp].

ബഹുമാനപ്പെട്ട കത്തോലിക്കാ തിരുസഭയ്ക്കു്, ആരു പറഞ്ഞു വൈദികര്‍ മുഴുവന്‍ കുറ്റവാളികളും ബലാല്‍സംഗവീരന്മാരുമാണെന്നു്? കൊട്ടിയൂരില്‍ നടന്ന സംഭവത്തിലെ യഥാര്‍ത്ഥപ്രതി ആ വൈദികനല്ല, ആകമാന കത്തോലിക്കാസഭയ്ക്കു കീഴിലൂള്ള ബ്രഹ്മചര്യവ്രതമേറ്റിട്ടുള്ള ഒരു വൈദികരും കൊട്ടിയൂരിലെ വൈദികന്‍ നടത്തിയ പാതകത്തില്‍ പ്രതിസ്ഥാനത്തില്ല. കുറ്റം ചെയ്ത വൈദികനെ മൗനമായി പിന്തുണച്ച, അദ്ദേഹത്തെ വിദേശത്തേയ്ക്കയച്ചു രക്ഷിക്കാന്‍ ശ്രമിച്ച സഭയാണു് ഇവിടെ പ്രതിസ്ഥാനത്തു നില്‍ക്കുന്നതു്. തെറ്റു് ആര്‍ക്കും സംഭവിക്കാം. വൈദികര്‍ക്കും സന്യാസിനികള്‍ക്കും ഒക്കെ തെറ്റു സംഭവിക്കാം, അവരെല്ലാം മനുഷ്യരാണു്. പക്ഷെ സഭ ക്രിസ്തുവിന്റെ മൗതികശരീരമാണു്, സഭയ്ക്കു് തെറ്റു സംഭവിച്ചു കൂടാ. സഭയ്ക്കു് തെറ്റു സംഭവിച്ചാല്‍ എന്താണു് നാം മനസ്സിലാക്കുക, അപ്പോള്‍ ക്രിസ്തുവിന്റെ മൗതികശരീരം എവിടെ പോയി? തെറ്റു സംഭവിച്ചാല്‍ അതിനെ ന്യായീകരിക്കുന്നതിനേക്കാള്‍ എത്രയോ മഹത്തരമാണു് അതു് അംഗീകരിച്ചു് മാപ്പു് ചോദിക്കുക എന്നതു്!

പിന്നീടു് ലേഖനത്തില്‍ നിന്നു് വെട്ടിമാറ്റപ്പെട്ട ഖണ്ഡിക വായിച്ചപ്പോള്‍ അറപ്പാണു് തോന്നിയതു്.

ഇവിടെ തെറ്റില്‍ പങ്കുകാരിയായ കുട്ടിയുടെ പ്രായം 15ന് മുകളിലാണ്. എന്റെ മകളുടെ സ്ഥാനത്ത് ആ കുട്ടിയെ കണ്ട് പറയുകയാണ്. മോളെ നിനക്കും തെറ്റുപറ്റി. നാളെ ദൈവത്തിന്റെ മുമ്പില്‍ നീ ആയിരിക്കും ആദ്യം കുറ്റം ഏറ്റുപറയേണ്ടി വരിക. കുഞ്ഞേ ഒരു വൈദികന്‍ ആരാണെന്ന് എന്തുകൊണ്ട് നീ മറന്നു?. ഒരു വൈദികന്റെ വിശുദ്ധിയുടെ വില നമ്മുടെ ഈശോമിശിഹായുടെ തിരുഹൃദയത്തോളം അമൂല്യമാണെന്നും എന്തുകൊണ്ട് നീ അറിഞ്ഞില്ലേ? വൈദികനും ജഡികശരീരം ഉള്ള വ്യക്തിയാണ്, പ്രലോഭനങ്ങള്‍ സംഭവിക്കാവുന്നതാണ്. താന്‍ ആരാണെന്നും, ജീവിതം എന്തിനാണെന്നും അദ്ദേഹം കുറച്ചുനേരത്തേക്ക് ബോധപൂര്‍വ്വമോ, അല്ലാതെയോ മറന്നാല്‍ വിശുദ്ധ കുര്‍ബാനയില്‍ ഈശോയെ സ്വീകരിച്ച എന്റെ കുഞ്ഞേ സ്‌നേഹത്തോടെയോ കര്‍ക്കശമായോ ആ വൈദികനെ നിനക്ക് തിരുത്തികൂടായിരുന്നോ?

വെറും 15 വയസ്സു മാത്രമുള്ള കുഞ്ഞിനോടു് 45 വയസ്സുള്ള ക്രിമിനല്‍ മനസ്സുമായി കാമവെറിയോടെ തന്നെ സമീപിക്കുന്ന വൈദികനെ ഉപദേശിക്കണം പോലും.. എലീയാമിന്റെ മകളും ഹിത്യനായ ഊരിയാവിന്റെ ഭാര്യയുമായ ബത്ത്-ശേബയേയും വേണമെങ്കില്‍ ഇപ്രകാരം “ദാവീദ് ആരാണെന്ന് എന്തുകൊണ്ട് നീ മറന്നു? മോളെ നിനക്കും തെറ്റുപറ്റി” എന്നൊക്ക പറഞ്ഞു് തിരുത്താമായിരുന്നു. പക്ഷേ നാഥാന്‍ പ്രവാചകന്‍ അതീവഹൃദ്യമായ ഉപമയുമായി വന്നു് ആ മനുഷ്യന്‍ നീ തന്നെ എന്നാക്രോശിക്കുകയാണുണ്ടായതെന്നു് വേദപുസ്തകത്തില്‍ നാം വായിച്ചിട്ടുണ്ടു്.

മറിയക്കുട്ടി കൊലക്കേസ് മുതല്‍ തുടങ്ങുന്നു കേരളത്തില്‍ വൈദികരുടെ കുറ്റവാസനകള്‍. 24 വര്‍ഷമായി തുടരുന്ന അഭയ കേസിലും എന്താണു് സത്യമെന്നറിയാന്‍ വിശ്വാസസമൂഹത്തിനും അവകാശമുണ്ടു്. ഒമ്പതാം ക്ലാസ് വിദ്യാര്‍ത്ഥിനിയെ പള്ളിമേടയില്‍ പീഡിപ്പിച്ച കേസില്‍ ഈയിടെ അറസ്റ്റ് ചെയ്യപ്പെട്ട വൈദികന്‍ ഫാ. എഡ്വിന്‍ ഫിഗറസ് അങ്ങനെ പോകുന്നു ലിസ്റ്റ്. പക്ഷേ, കുറ്റവാളികളായ ഈ വൈദികരെ സഭാകോടതി മുമ്പാകെയും നിയമത്തിനും മുന്നില്‍ കൊണ്ടു വരാതെ മറ്റു വൈദികര്‍ക്കു പോലും മാനഹാനി വരുത്തുന്ന വിധം എന്തുകൊണ്ടു് സഭ പെരുമാറുന്നു. നിയമങ്ങളുടെ തലനാരിഴ കീറി സഭാനേതൃത്വത്തിനു് ഇതിനൊക്കെ തക്കമറുപടി പറയാന്‍ കഴിയുമെന്നറിയാം. ആ മനുഷ്യന്‍ നീ തന്നെ എന്നു് കര്‍ത്താവിന്റെ അരുളപ്പാടുമായി ഒരു പ്രവാചകനും വരാത്തിടത്തോളം തിരുസഭയ്ക്കു് എന്തുമാകാം!

അവിശ്വസനീയമായ ചില തെറ്റിദ്ധാരണകള്‍ :-)

ചില തെറ്റിദ്ധാരണകളുണ്ടു്. ചിലരോടു് എത്ര തര്‍ക്കിച്ചാലൂം ചിലപ്പോള്‍ അവ സമ്മതിച്ചുതന്നെന്നിരിക്കില്ല. അവയില്‍ ചിലതു് താഴെ അക്കമിട്ടു കുറിക്കുന്നു. ഇനിയും വല്ലതും വിട്ടുപോയിട്ടുണ്ടെങ്കില്‍ കമന്റൂ.

  1. ഹാർഡ് ഡിസ്ക് ഇല്ലാതെ കമ്പ്യൂട്ടർ പ്രവർത്തിക്കില്ല
  2. എത്ര സൂക്ഷിച്ചു് ഉപയോഗിച്ചാലും എല്ലാ കമ്പ്യൂട്ടറുകളിലും വൈറസ്‌ കയറും
  3. ഹാക്കർ എന്നത് ഒരു നെഗറ്റീവ് വാക്കാണ്‌
  4. ലിനക്സ്‌ സാധാരണക്കാർക്ക് വേണ്ടിയുള്ളതല്ല
  5. ഫേസ്ബുക്ക്‌ നമ്മുടെ സുഹൃത്താണ്
  6. ഞാൻ ലിനക്സ്‌ ഉപയോഗിച്ചിട്ടില്ല
  7. ഫ്രീ വെയറും ഫ്രീ സോഫ്റ്റ്‌വെയറും ഒന്നാണ്

ഹാർഡ് ഡിസ്ക് ഇല്ലാതെ കമ്പ്യൂട്ടർ പ്രവർത്തിക്കില്ല

വെറും ഒരു ലൈവ് സീഡി മാത്രം ഉപയോഗിച്ച്  വേണമെങ്കിൽ കമ്പ്യൂട്ടർ പ്രവർത്തിപ്പിക്കാം. ഒരു നൂറുകണക്കിന് ലൈവ് ലിനക്സ്‌ ഡിസ്ട്രിബ്യൂഷനുകൾ ഓണ്‍ലൈനിൽ ലഭ്യമാണ്. ഇവയിൽ ഏതെങ്കിലും ഉപയോഗിച്ച് ഹാർഡ് ഡിസ്ക് ഊരി മാറ്റി ഒന്ന് നിങ്ങളുടെ കമ്പ്യൂട്ടർ പ്രവർത്തിപ്പിച്ചു നോക്കൂ.

എല്ലാ കമ്പ്യൂട്ടറുകളിലും വൈറസ്‌ കയറും

കമ്പ്യൂട്ടർ വൈറസ്‌ പ്രധാനമായും ടാർഗെറ്റ് ചെയ്യുന്നത് വിൻഡോസ്‌ കമ്പ്യൂട്ടറുകളെ ആണ്. എത്ര സുരക്ഷിതമായ ആന്റി വൈറസ് ഇന്‍സ്റ്റാള്‍ ചെയ്തിട്ടുണ്ടെങ്കിലൂം വിന്‍ഡോസില്‍ വൈറസ് കയറിയാല്‍ അത്ഭുതപ്പെടേണ്ട. പക്ഷേ സൂക്ഷിച്ചു് ഉപയോഗിച്ചാല്‍ ലിനക്സ്‌ / മാക് / യൂണിക്സ് സിസ്റ്റങ്ങളെ വൈറസ്‌ ആക്രമണം ബാധിക്കില്ല.

ഹാക്കർ എന്നത് ഒരു നെഗറ്റീവ് വാക്കാണ്‌

കമ്പ്യൂട്ടറിന്റെ പ്രവർത്തനങ്ങളെ കൂടുതൽ നന്നായി അറിയുന്ന ആൾ അഥവാ കമ്പ്യൂട്ടർ വിദഗ്ദ്ധൻ എന്നാണു് ഹാക്കർ എന്ന വാക്കിന്റെ പൊതുവിലുള്ള അർത്ഥം. അല്ലാതെ കമ്പ്യൂട്ടർ ശൃംഖല  തകർക്കുന്ന ആൾ എന്നല്ല.

ലിനക്സ്‌ സാധാരണക്കാർക്ക് വേണ്ടിയുള്ളതല്ല

1994 കാലഘട്ടത്തിൽ ലിനക്സ്‌ കേർണെൽ പ്രസിദ്ധീകരിച്ച ആദ്യ നാളുകളിൽ വിദഗ്ദ്ധർക്ക് മാത്രമേ ലിനക്സ്‌ ഉപയോഗിക്കാൻ കഴിഞ്ഞിരുന്നുള്ളൂ, എന്നാൽ ഇന്ന് ഏതൊരു സാധാരണക്കാരനും ഉപയോഗിക്കാൻ വിധം ഏറ്റവും യൂസർ ഫ്രണ്ട്ലി ആണ് ലിനക്സ്‌

ഫേസ്ബുക്ക്‌ നമ്മുടെ സുഹൃത്താണ്

ഫേസ്ബുക്ക്‌ നിങ്ങളുടെ സുഹൃത്തല്ല, അതൊരു നിരീക്ഷണക്യാമറയാണ്. അതു നിങ്ങളെ ചതിക്കവം. അതീവ ശ്രദ്ധയോടെ വളരെ സൂക്ഷിച്ചു മാത്രം ഉപയോഗിക്കുക.

ഞാൻ ലിനക്സ്‌ ഉപയോഗിച്ചിട്ടില്ല

ആയിരക്കണക്കിന് ഇന്റർനെറ്റ്‌ സർവറുകളിൽ ഉപയോഗിക്കുന്നത് ലിനക്സ്‌ അധിഷ്ഠിത പ്രവർത്തക സംവിധാനമാണ്. നിങ്ങൾ ഇന്റർനെറ്റ്‌ ഉപയോഗിക്കുന്നുണ്ടെങ്കിൽ ഈ സർവറുകളും ഉപയോഗിച്ചിട്ടുണ്ട്. അതു കൊണ്ടുതന്നെ അറിയാതെയാണെങ്കിലും നിങ്ങള്‍ അതുപയോഗിച്ചിട്ടുണ്ടു്. നിങ്ങൾ ആൻഡ്രോയ്ഡ് ഉപയോഗിക്കുന്നുണ്ടെങ്കിൽ നിങ്ങൾ ലിനക്സ്‌ ഉപയോഗിക്കുന്നുണ്ട്. കാരണം ആൻഡ്രോയ്ഡിനുള്ളിൽ ലിനക്സ്‌ കേർണെൽ ആണ് ഉള്ളത്.

ഫ്രീ വെയറും ഫ്രീ സോഫ്റ്റ്‌വെയറും ഒന്നാണ്

ഫ്രീ വെയറും ഫ്രീ സോഫ്റ്റ്‌വെയറും രണ്ടാണ്. ഫ്രീ വെയർ സോഴ്സ് കോഡ് നൽകാതെ സോഫ്റ്റ്‌വെയർ (ബൈനറി) മാത്രം നിങ്ങൾക്ക് സൗജന്യമായി നൽകുമ്പോൾ ഫ്രീ സോഫ്റ്റ്‌വെയർ സോഴ്സ് കോഡ് അടക്കം അതു നൽകുന്നു.

ഇന്ത്യയില്‍ ബിറ്റ്കോയിന്‍ ഇടപാടുകളില്‍ വന്‍വര്‍ദ്ധന

ആശ്വസിക്കാവുന്ന കാര്യമാണു് – പ്രധാനമന്ത്രിയുടെ തലതിരിഞ്ഞ സാമ്പത്തികപരിഷ്കാരങ്ങളുടെ അനന്തരഫലമായി ചില ബുദ്ധിമാന്മാരായ വ്യക്തികള്‍ യഥാര്‍ത്ഥ കാഷ്ലെസ്സ് ഇക്കണോമിയിലേയ്ക്കു് തിരിഞ്ഞിരിക്കുന്നു. അവര്‍ ഉപയോഗിക്കുന്നതു് പേടിയെമ്മോ യുപിഐയോ ഒന്നുമല്ല, അതിനേക്കാളൊക്കെ ശക്തമായ ബിറ്റ്കോയിനാണു്. മൂന്നു വ്യത്യസ്ത ബിറ്റ്കോയിന്‍ എക്സ്ചേഞ്ച് സ്റ്റാര്‍ട്ടപ്പുകളാണു് [1] ചുരുങ്ങിയ സമയം കൊണ്ടു് ഇന്ത്യയില്‍ ലോഞ്ച് ചെയ്തതു്. ഈ പോസ്റ്റ് എഴുതുന്ന സമയത്തു് ഒരു ബിറ്റ്കോയിന്റെ വില 67,737 ഉറുപ്പികയാണു്. നവംബര്‍ എട്ടിനു 51,491 ഉറുപ്പികയില്‍ നിന്നു തുടങ്ങിയ റാലിയാണു് ഇപ്പോള്‍ 67,737-ല്‍ എത്തിനില്ക്കുന്നതു്.

Bitcoin

ബിറ്റ്കോയിന്‍ വഴി നടത്തപ്പെടുന്ന ഇടപാടുകള്‍ തികച്ചും സുരക്ഷിതവും വ്യക്തികളുടെ സ്വകാര്യത സംരക്ഷിക്കുന്നതുമാണു്. ബിറ്റ്കോയിനെപ്പറ്റി കൂടുതലറിയാന്‍ വിക്കിപീഡിയ കാണുക.

പ്രധാനമായും ഇന്റർനെറ്റിലൂടെയുള്ള സാമ്പത്തിക ഇടപാടുകൾക്കായി ഉപയോഗിക്കുന്ന ഡിജിറ്റൽ നാണയമാണ് ബിറ്റ്കോയിൻ (Bitcoin). ഇത് ലോഹ നിർമ്മിതമായ നാണയമോ കടലാസ് നോട്ടോ അല്ല. കമ്പ്യൂട്ടർ ഭാഷയിൽ തയ്യാറാക്കിയിരിക്കുന്ന ഒരു പ്രോഗ്രാം അല്ലെങ്കിൽ അല്ലെങ്കിൽ സോഫ്റ്റ്‌വെയർ കോഡാണ്. എൻക്രിപ്ഷൻ സാങ്കേതികവിദ്യ ഉപയോഗിക്കുന്നതിനാൽ ഇവയെ ‘ക്രിപ്റ്റോ കറൻസി’ എന്നും വിളിക്കാറുണ്ട്.

ഇടനിലക്കാരോ വിവിധ രാജ്യങ്ങളിലെ കേന്ദ്രബാങ്കുകളോ സർക്കാരുകളോ നിയന്ത്രിക്കാനില്ലാത്ത സ്വതന്ത്ര നാണയം എന്ന ആശയമാണ് ബിറ്റ്കോയിനിലൂടെ യാഥാർത്ഥ്യമായത്. ആഗോള സാമ്പത്തിക, ബാങ്കിങ് തകർച്ചയുടെ നിരാശയിൽ നിന്നാണ് ഡിജിറ്റൽ കറൻസി എന്ന ആശയം രൂപംകൊള്ളുന്നത്. 2008-ൽ സതോഷി നകമോട്ടോ ആണ് ബിറ്റ്കോയിൻ അവതരിപ്പിച്ചത്. ‘സതോഷി നകമോട്ടോ’ എന്നത് ഒരു വ്യക്തിയോ ഒരു സംഘം ഐ.ടി. വിദഗ്ദർ സ്വയം വിശേഷിപ്പിക്കുന്ന പേരോ ആയിരിക്കാമെന്ന് അഭ്യൂഹങ്ങളുണ്ട്. 2016 മേയിൽ ഓസ്ട്രേലിയയിലെ ഐ.ടി. വിദഗ്ദനും വ്യവസായിയുമായ ക്രെയ്ഗ് റൈറ്റ് ബിറ്റ്കോയിന്റെ ഉടമസ്ഥാവകാശ വാദവുമായി രംഗത്തെത്തിയിരുന്നു

ബിറ്റ്കോയിന്റെ ഉപജ്ഞാതാക്കൾ 2.10 കോടി ബിറ്റ്കോയിനുകളാണ് സൃഷ്ടിച്ചത്. ഇവ ഇരുപത് വർഷം കൊണ്ടു പൂർണ്ണമായും ലഭ്യമാക്കുകയും പിന്നീട് പുതിയവ കിട്ടുകയുമില്ലെന്ന് അവർ പറഞ്ഞിരുന്നു. നിലവിലുള്ള ബിറ്റ്കോയിനുകൾ ഉപയോഗിച്ചുള്ള ഇടപാടുകൾ മാത്രമേ പിന്നീട് നടക്കുകയുള്ളൂ. സാധാരണ കറൻസികളുടെ മൂല്യം എപ്പോൾ വേണമെങ്കിലും ഇടിയാൻ സാധ്യതയുള്ളപ്പോൾ ബിറ്റ്കോയിന് ആ ഭീഷണിയില്ല. കാരണം അവയുടെ എണ്ണം കൂടുന്നില്ല. സാധാരണ കറൻസി എത്ര വേണമെങ്കിലും അച്ചടിച്ചിറക്കി മൂല്യം കുറയ്ക്കുവാൻ കേന്ദ്രബാങ്കുകൾക്കു സാധിക്കും

[1] (a) സെബ്പേ  (b) യൂനോകോയിന്‍  (c) കോയിന്‍സെക്യൂര്‍

അവലംബം

  1. http://www.forbes.com/sites/krnkashyap/2016/12/22/indias-demonetization-is-causing-bitcoin-to-surge-inside-the-country/#52d57ddd738a
  2. http://www.manoramaonline.com/technology/technology-news/indian-bitcoin-buying.html